Yɛdh 43 - RUAC KUƆTH IN RƐL RƆ

Luny bumä Kuɔth luaak Kuɔth

¹ Kä cu ram indaan ɣä naŋ kɛ thok kal in lot ni kui̱c känyä ca̱ŋ.

² Kä ɛn wani, cu buay Kuɔth I-thɛ-rɛl ben kui̱c känyä ca̱ŋ. Kä ce̱t jɔwdɛ kɛ jɔw pi̱i̱ni ti ŋuan. Kä cuɛ piny riaw kɛ buaydɛ.

³ Kä jɛn nyuuth in cä nɛn ce̱tdɛ kɛ nyuuth ëë nɛ̈ɛ̈nä mëë bä Kuoth wec ben däk, kɛnɛ nyuuth ëë cä kɔŋ nɛn mëë ta̱a̱ jɔk kiɛɛr Kɛ-bar, mëë cua̱ rɔ yuɔr piny ni buupä.

⁴ Kä cu buay Kuɔth Nhial coth rɛy luaak Kuɔth kɛ thok in lot ni käny ca̱ŋ,

⁵ kä cu yiëë ɣä kap nhial kä cuɛ ɣä nööŋ ni rɛy kal in te rɛci. Kä cu buay Kuɔth Nhial luaak Kuɔth thiäŋ.

⁶ Kä min te wut ɛmɔ cuŋä gekädä, cua̱ ram mi ruac kɛ ɣä liŋ, ruac ɛ kɛ ɣä rɛy luaak Kuɔth.

⁷ Cuɛ ɣä jiök i̱, “Gat ran, mɛmɛ ɛ jɛn gua̱a̱th kɔamdä, kä gua̱a̱th ciöknikä min bä cieŋ thi̱n, rɛy ji̱ I-thɛ-rɛl amäni cäŋ kɛl. Kä /ci thok duëël I-thɛ-rɛl ciötdä min rɛl rɔ bi nyɔk kɛ yäri, kä /ci kua̱rkiɛn ɛ bi ya̱r kɛ lät leerädiɛn kɛ pua̱ny kua̱rikiɛn gua̱th palikiɛn.

⁸ Mëë cikɛ tuut lueeknikiɛn thiëëk kɛ tuut luaakdä, kä cikɛ wääthni ciëëŋnikiɛn thiëëk kɛ wääthni luaakdä, a te ni päny kamädä kɛ kɛ, kɛn la yär kɛn ni ciötdä min rɛl gɔɔydɛ rɔ kɛ lätkiɛn ti jiäk tin cikɛn kɛ la̱t. Kɛ kui̱ ɛmɔ, ɣän cua̱ kɛ näk kɛ ŋɛ̈ɛ̈nydä.

⁹ Täämɛ akɛ wuɔckɛ ciaŋ kuthni guääynikiɛn, kä a ri̱ŋ kua̱rikiɛn nɔ̱a̱n kɛ ɣä, ɣän bä cieŋ rɛydiɛn amäni cäŋ kɛl.

¹⁰ “Kä kɛ kui̱du lö gat ran lärni ji̱ I-thɛ-rɛl ta̱a̱ luaak Kuɔth kä akɛ thɛ̈mkɛ ta̱a̱dɛ, kä akɛ po̱c kɛ dueerkiɛn.

¹¹ Mi wä kɛ wä pöc kɛ tin diaal tin cikɛn kɛ la̱t, ku kɛ jakä ŋa̱ckɛ ta̱a̱ in bi tekɛ luaak Kuɔth, rialidɛ ikä, kɛnɛ duɔ̱p tin wä kɛ naath raar kɛnɛ duɔ̱p tin wä kɛ naath rɛc, kɛ jɛn ta̱a̱ in bi tekɛ luaak Kuɔth ni kɛɛliw. Kä lär ni naath ta̱a̱ ŋuɔ̱tnikɛ diaal kɛnɛ luëëkɛ diaal, gɔ̱rnikɛ piny nhiamdiɛn, kɛ ɣöö dee kɛn ta̱a̱dɛ tit kä guurkɛn ŋuɔ̱tkɛ diaal.

¹² Kä mɛmɛ ɛ jɛn ŋut kɛ kui̱ luaak Kuɔth, ɛn gua̱a̱th ɛ thieek kɛ wi̱c pa̱a̱mɛ ni kɛɛliw, bɛ a gua̱a̱th mi rɛl gɔɔydɛ rɔ. Mɛmɛ ɛ jɛn ŋut kɛ kui̱ luaak Kuɔth.”

Yi̱k

¹³ Ti̱ti̱ kɛ kɛn theemni yi̱kä tin ca thɛm kɛ jua̱th tetni (kä jɛn juäth tetdä, ɛ juäth tetdä mi tekɛ pät tetdä) bi pinydɛ tekɛ juäth tetdä bär jiɛcdɛ, kä ɣäp ɣääpdɛ ɛ juäth tetdä, kä bi gëëkɛ win kɛ thɛɛr kɛl. Ɛn nɔmɔ bɛ la jɛn bär yi̱kä.

¹⁴ A känɛ jɛ ni piny ni wi̱i̱ muɔ̱ɔ̱n a wä ni thɛɛrädɛ, ɛ jua̱th tetni da̱ŋ rɛw, kä ɣäp ɣääpdɛ ɛ juäth tetdä kɛl. Kä a känɛ jɛ ni thɛɛrä min tɔt a wä thɛɛrä min di̱i̱t, ɛ jua̱th tetni da̱ŋ ŋuaan, kä ɣäp ɣääpdɛ ɛ juäth tetdä kɛl.

¹⁵ Kä wi̱c yi̱kä min waŋkɛ muc thi̱n, ɛ jua̱th tetni da̱ŋ ŋuaan. Kä wi̱c yi̱kä min waŋkɛ muc thi̱n ca lät kä tuɔ̱ŋ da̱ŋ ŋuaan ti wä nhial.

¹⁶ Kä wi̱c yi̱kä min waŋkɛ muc thi̱n ɛ pur pur, tëë kɛ jua̱th tetni da̱ŋ wäl rɛw bärɛ kɛ jua̱th tetni da̱ŋ wäl rɛw ɣäp ɣääpdɛ.

¹⁷ Kä bi thɛɛr yi̱kä a mi pur pur, bi bärɛ a jua̱th tetni da̱ŋ wäl ŋuaan, kä bi ɣäp ɣääpdɛ a jua̱th tetni da̱ŋ wäl ŋuaan, kɛ thɛɛr mi wil jɛ, mi ɣäp ɣääpdɛ ɛ nuth jua̱a̱th tetdä. Kä bi gua̱a̱th in wil jɛ juäth tetdä kɛl. Kä bi ko̱o̱tnikɛ lot ni pek känyä ca̱ŋ.

Lëy yi̱kä

¹⁸ Kä cuɛ ruac kɛ ɣä laarɛ jɛ, ɛn ɣöö mɛmɛ ɛ ruac Kua̱r ni Kuoth Nhial wëë i̱, “Ti̱ti̱ kɛ kɛn ŋut kɛ kui̱ yi̱kä, kɛ cäŋ in ba jɛ la̱t kä ba loori kɛnɛ muc tin waŋkɛ kɛ riɛm in kiɛthkɛ wi̱i̱dɛ wä tok.

¹⁹ Bia bööth palä tin la ji̱ thuɔk duëël Dha-dok tin la bä nhiamdä, kä la̱tkɛ ɣä ikä ka̱m thäk, kɛ kui̱ mucä dueeri ruac ni ɣän Kuäär ni Kuoth Nhial.

²⁰ Kä ji̱n bi tha̱a̱ŋ riɛmdɛ ka̱n kä bi jɛ la̱th tuɔ̱ŋni yi̱kä da̱ŋ ŋuaan kɛnɛ gɔŋtɔtnikɛ da̱ŋ ŋuaan, kɛ thɛɛrɛ kɛɛliw. Kä bi jɛ cu lɛy inɔ, kä bi jɛ cu luɛl.

²¹ Kä ji̱n bä käni thäk mucä kɛ kui̱ dui̱rä, kä ba jɛ waŋ ni guäth in ca mɛk guäth luaak Kuɔth, raar gua̱th in rɛl rɔ.

²² “Kä kɛ cäŋ in rɛwdɛ bi tut dɛ̈ɛ̈l böwä mi thil mɛ̈ɛ̈ny thöp ala muc dui̱rä, kä a yi̱k lɛ̈ykɛ ce̱tkɛ mëë ca jɛ lɛy kɛ thäk.

²³ Kä mi wi̱i̱ wä thuɔ̱k kɛ lëydɛ, bi thäk mi thil mɛ̈ɛ̈ny kɛnɛ thäk dɛ̈ɛ̈l böwä mi thil mɛ̈ɛ̈ny rɛy deet cu thöp ala muc.

²⁴ Kä bikɛ wä thöp ni nhiam Kuɔth Nhial, kä bi bööth palä milɛ kiɛth puɔ̱ɔ̱nydiɛn kä bikɛn kɛ cu thöp Kuoth Nhial ala muc ti waŋkɛ.

²⁵ Kä kɛ ni̱n da̱ŋ bärɔw ni ciaŋ bi böw kɛl la tho̱pi ala muc dui̱rä, inɔ bä bi thäk kɛnɛ thäk dɛ̈ɛ̈l rɔɔmä la tho̱pi bä rɛy deet, kä bikɛ thil mɛ̈ɛ̈ny kɛn tɔ̱ bi thöp tɔ̱.

²⁶ Kɛ ni̱n da̱ŋ bärɔw bikɛ yi̱k luɛl, kä bikɛn ɛ jakä gɔaa, inɔ bikɛn ɛ cu lɛy.

²⁷ Mi wä ni̱n da̱ŋ bärɔw ti̱ti̱ wä thuɔ̱k, kɛ cäŋ kä bädäk ɛ wä nhiam bi bööth palä muckun tin waŋkɛ cu tho̱p wi̱i̱ yi̱kä amäni muc tɛthä lɔaacdun. Kä ɣän bä yɛ cu nhɔk, ruac ni ɣän Kuäär ni Kuoth Nhial.”