Yɛdh 42 - RUAC KUƆTH IN RƐL RƆ

Duël bööthni palä

¹ Kä cuɛ ɣä böth raar naŋ ɛ ɣä peek kal in te raar, kui̱c caam, kä cuɛ ɣä nööŋ duëli tin luɔtkɛ rɔ̱ kɛ kal luaak Kuɔth, kä lotdɛ rɔ kɛ ciëŋ in te kui̱c caam.

² Kä ciëŋ in ci thi̱i̱kdɛ thokdɛ rɔ luɔc kui̱c caam, bärɛ ɛ jua̱th tetni ti kuɔ̱r kɛl kä ɣäp ɣääpdɛ ɛ jua̱th tetni ti jiɛn da̱ŋ dhieec.

³ Kä kui̱ kɛl in ci nhiamdɛ luɔc dɛɛkä, min thieek kɛ luaak Kuɔth ɛ jua̱th tetni ti jiɛn da̱ŋ rɛw, kä kui̱c in dɔ̱ŋ min lot ni ro̱o̱th kal raar, ca duëlkɛ la̱t ɛ lɔathkɛ rɔ̱, kɛ bëër da̱ŋ diɔ̱k, te mɔ wi̱i̱kä mɔ.

⁴ Kä nhiam duëli tëë kɛ duɔ̱ɔ̱p kui̱ rɛ̈ci, tëë kɛ jua̱th tetni da̱ŋ wäl ɣäp ɣääpdɛ kɛ jua̱th tetni ti kuɔ̱r kɛl kɛ luëŋdɛ. Kä te thokdɛ min wäkɛ naath rɛc kui̱c caam.

⁵ Täämɛ duël tin te nhial kɛ riɛp riɛɛp, kɛ ɣöö ci yacɛni gua̱a̱th mi di̱i̱t naŋ kä kɛ, a di̱t ni duël tin te piny kɛnɛ duël tin te däär ti̱eec.

⁶ Kɛ ɣöö cakɛ la̱t ala ti̱ec da̱ŋ diɔ̱k ti ca rɔ̱ lɔth kɛɛl. Kä thilɛ kɛ thieer ti ce̱tkɛ thieer tin te ti̱ecni tin kɔ̱ŋ tin te rɛy kal raar. Kɛ kui̱ ɛmɔ, ca kɛn duël nhial la̱t ni jɔk a leny duël piɛny kɛnɛ duël da̱a̱r kɛ.

⁷ Kä tëë kɛ päny mi te raar mi car ɔ kɛ duël, peek kal in te raar, lotdä duëli, tëë kɛ jua̱th tetni ti jiɛn da̱ŋ dhieec bärɛ.

⁸ Kä duël tin te peek kal in te raar tekɛ jua̱th tetni ti jiɛn da̱ŋ dhieec bäriɛn. Kä duël tin luɔtkɛ rɔ̱ kɛ luaak Kuɔth tekɛ kɛ jua̱th tetni ti kuɔ̱r kɛl bäriɛn.

⁹ Kä piny duëli ti̱ti̱ tëë kɛ duɔ̱ɔ̱p mi wä coth rɛc kɛ pek känyä ca̱ŋ, kɛ ɣöö bi kulɛ wä rɛy duëli kɛ pek kal in te raar.

¹⁰ Kä kɛ kui̱ känyä ca̱ŋ kɛ tuk kal in te raar, min lot rɔ kɛ päny luaak Kuɔth min lot rɔ kɛ kal in te raar, ɣäp ɣääpdɛ a wä mäni puɔ̱ny kal, kä tëë kɛ duël

¹¹ ti tekɛ duɔ̱ɔ̱p nhiamdiɛn. Kä kɛn cäätkɛ kɛ duël tin te kui̱c caam, kä päär bäriɛn kɛnɛ ɣäp ɣääpdiɛn. Kä ɛ jɛn la̱t in ca lät ni thukiɛn diaal amäni thieknikiɛn.

¹² Kä duɔ̱ɔ̱p in wäkɛ naath duëli tin te kui̱c cuëëc, lotdɛ rɔ̱ kɛ duɔ̱ɔ̱p in te puɔ̱ɔ̱ny pa̱a̱ny in te kui̱c känyä ca̱ŋ, min la wäkɛ naath rɛy duëli.

¹³ Kä cuɛ ruac kɛ ɣä wëë i̱, “Kɛn duël kuec caam kɛnɛ duël tin te kui̱c cuëëc tin luɔtkɛ rɔ̱ kɛ gua̱a̱th in te baaŋ kɛ duël ti rɛl gɔɔydiɛn rɔ, ti bi bööth palä tin lät nhiam Kuɔth Nhial muc tin rɛl gɔɔydiɛn rɔ a cam thi̱n. Kä bikɛ muc tin rɛl gɔɔydiɛn rɔ la̱th thi̱n muc bɛɛl, kɛnɛ muc dueeri kɛ muc cutdä, kɛ ɣöö ɛn gua̱a̱th rɛl gɔɔydɛ rɔ.

¹⁴ Kä mi wä bööth palä wä guäth in rɛl gɔɔydɛ rɔ, /cikɛ bi luny raar thi̱n a wäkɛ rɛy kal in te raar amäni mi cikɛ bieyni tin lätkɛ kɛ jɔl kɛ wuɔ̱c, kɛ ɣöö kɛ ti rɛl gɔɔydiɛn rɔ. Bikɛn bieyni ti kɔ̱ŋ jɔl kɛ läth pua̱nynikiɛn a ŋot /kenkɛ ni wä guäth in te nɛy diaal thi̱n.”

Theemni gua̱th in te luaak Kuɔth thi̱n

¹⁵ Kä min cɛ thuɔ̱k kɛ thëm gua̱th in te luaak Kuɔth thi̱n rɛci, cuɛ ɣä naŋ raar kɛ thok kal kuec känyä ca̱ŋ, kä cuɛ gua̱a̱th in te luaak Kuɔth thi̱n ben thɛm ni kɛɛliw.

¹⁶ Kä cuɛ kui̱c känyä ca̱ŋ thɛm kɛ taŋ thëm, kä cuɛ a jua̱th tetni ti kur dhieec kɛ jɛn taŋ thëm.

¹⁷ Kä cuɛ rɔ ri̱t, cuɛ kui̱c caam ben thɛm, kä cuɛ a jua̱th tetni ti kur dhieec kɛ jɛn taŋ thëm.

¹⁸ Kä jɛn cuɛ rɔ ri̱t bä, cuɛ kui̱c cuëëc ben thɛm, kä cuɛ a jua̱th tetni ti kur dhieec kɛ jɛn taŋ thëm.

¹⁹ Kä cuɛ rɔ riet peek konyä ca̱ŋ bä, kä cuɛ jɛ thɛm, cuɛ a jua̱th tetni ti kur da̱ŋ dhieec kɛ jɛn taŋ thëm.

²⁰ Kä cuɛ jɛ thɛm peknikɛ da̱ŋ ŋuaan diaal. Kä tëë kɛ päny mi go̱l jɛ, bär jɔakdɛ ɛ jua̱th tetni ti kur dhieec, kä ɣäp ɣääpdɛ ɛ jua̱th tetni ti kur dhieec, päny ɛmɔ dääkɛ gua̱a̱th in rɛl gɔɔydɛ rɔ kɛnɛ gua̱th tin kɔ̱ŋ.