Yɛdh 41 - RUAC KUƆTH IN RƐL RƆ

¹ Kä cu wut ɣä naŋ guäth in la naath a nyuur thi̱n rɛy luaak Kuɔth, kä cuɛ wääthnikɛ ben thɛm, kä cu pek wääthä kɛl kui̱cni diaal a jua̱th tetni da̱ŋ bäkɛl kä ɣäp ɣääpdɛ.

² Kä ɣäp ɣääp thuɔk in wäkɛ naath rɛc ɛ jua̱th tetni da̱ŋ wäl. Kä pa̱nyni peknikɛ diaal ɛ jua̱th tetni da̱ŋ dhieec, kä cuɛ gua̱a̱th in la nyuur naath thi̱n bär jɔakdɛ thɛm, kä cuɛ la jua̱th tetni ti jiɛn da̱ŋ ŋuaan, kä cu ɣäp ɣääpdɛ a jua̱th tetni ti jiɛn da̱ŋ rɛw.

³ Kä cuɛ coth dueel in te rɛci, kä cuɛ wääthni gua̱th in wäkɛ naath rɛc wä thɛm, cuɛ a jua̱th tetni da̱ŋ rɛw. Kä cu ɣäp ɣääp thuɔkdɛ a jua̱th tetni da̱ŋ bäkɛl. Kä päny gua̱th in wäkɛ naath rɛc tëë kɛ jua̱th tetni da̱ŋ bärɔw.

⁴ Kä cuɛ bär duëël thɛm, cuɛ a jua̱th tetni ti jiɛn da̱ŋ rɛw, kä cu ɣäp ɣääpdɛ a jua̱th tetni ti jiɛn da̱ŋ rɛw, kui̱c gua̱th in la nyuur naath thi̱n. Kä cuɛ ɣä jiök i̱, “Mɛmɛ ɛ jɛn gua̱a̱th in rɛl gɔɔydɛ rɔ.”

Duël pua̱a̱ny luaak Kuɔth

⁵ Kä cuɛ päny luaak Kuɔth thɛm, kä cu dëlɛ a jua̱th tetni da̱ŋ bäkɛl. Kä ɣäp ɣääp kuec in te duël thi̱n cuɛ la jua̱th tetni da̱ŋ ŋuaan, kui̱cni luaak Kuɔth diaal.

⁶ Kä ti̱ec tin te gekä luaak tëë kɛ duël nhial da̱ŋ diɔ̱k ti döörkɛ rɔ̱, te mɔ wi̱i̱kä min dɔ̱ŋ, te ber kɛl kɛ duël ti jiɛn da̱ŋ diɔ̱k. Kä ca päny luaak Kuɔth ni kɛɛliw win kɛ nɔa̱a̱k kui̱cni diaal kɛ ɣöö bɛ duël gëëkni luäk, /cikɛ bi lɛ mat kɛ päny luaak Kuɔth.

⁷ Kä duɔ̱ɔ̱p duëli ca jɛ jakä rep di̱t duëlikɛ rɔ̱, duel ɔ ɛ wä kä duel ɔ. Kä ca jɛn luaak Kuɔth la̱t a ca jɛ moc kɛ ko̱o̱tni peknikɛ diaal. Kɛ kui̱c ɛmɔ duël wäkɛ kɛ di̱t a wä beerɔ kɛnɛ berɔ. Kä ca jɛ moc kɛ ko̱o̱tni jiɛn ti te ni piny a wä ni nhial, wëë kɛ duel in te däär.

⁸ Kä cua̱ jɛ nɛn bä ɛn ɣöö te luaak Kuɔth kɛ gua̱th ti luɔc luɔɔc ti wiɛl kɛ jɛ. Kä keŋ duëli gëëkni ɛ theem taŋ mi bärɛ ɛ jua̱th tetni da̱ŋ bäkɛl.

⁹ Kä dël pa̱a̱ny raar duëli gëëkni, ɛ jua̱th tetni da̱ŋ dhieec. Kä kam in te baaŋ kamä min te duël luaak Kuɔth thi̱n,

¹⁰ kɛnɛ duël tin te rɛy kal ɣäp ɣääpdɛ ɛ jua̱th tetni ti jiɛn da̱ŋ rɛw pekni luaak Kuɔth diaal.

¹¹ Kä duël gekä luaak Kuɔth lɛ̈pkɛ rɔ̱ guäth in ca päl baaŋ, lot thok kɛl ni pek kuec caam, kä lot min dɔ̱ŋ ni pek kuec cuëëc. Kä ɣäp ɣääp gua̱th in ca päl lɔrä ɛ jua̱th tetni da̱ŋ dhieec kui̱cni diaal.

Duel kuec konyä ca̱ŋ

¹² Kä ti̱c in lot ni kal luaak Kuɔth kui̱ konyä ca̱ŋ, ɣäp ɣääpdɛ ɛ jua̱th tetni ti jiɛn da̱ŋ bärɔw. Kä dël pa̱a̱ny ti̱eec ɛ jua̱th tetni da̱ŋ dhieec kɛɛliw, kä bärɛ ɛ jua̱th tetni ti jiɛn bäŋuan.

Theemni luaak Kuɔth

¹³ Kä ɛ jɛn cuɛ luaak Kuɔth ku thɛm, cu bärɛ a jua̱th tetni ti kuɔ̱r kɛl, kä cu kal kɛnɛ ti̱c kɛ pa̱nynikɛ diaal, cu bärɛ a jua̱th tetni ti kuɔ̱r kɛl.

¹⁴ Kä cu ɣäp ɣääp kuec känyä ca̱ŋ nhiam luaak Kuɔth kɛnɛ kal a jua̱th tetni ti kuɔ̱r kɛl.

¹⁵ Inɔ, cuɛ luëŋ ti̱eec in lot ni kui̱c konyä ca̱ŋ thɛm, kɛɛl kɛ kamkɛ kui̱cnikɛ diaal, kä cuɛ a jua̱th tetni ti kuɔ̱r kɛl. Kä gua̱a̱th in nyuur naath thi̱n rɛy luaak Kuɔth kɛnɛ duel in te ni rɛci kɛ bäŋ in te raar,

Rɛy luaak Kuɔth kɛnɛ yi̱k

¹⁶ nikɛ tut luaak wä mäni päny kɛ wernyini kɛ duel ga̱a̱ŋni, ca kɛn diaal pap kɛ jiɛn. Kä ro̱o̱th luaak Kuɔth a wä nikä päny ca jɛ pua̱t kɛ jiɛn, ca jɛ röm ni kɛɛliw ca jɛ kum amäni wernyini,

¹⁷ kä cuɛ wä amäni kam in te nhial wi̱i̱ thiekni, kɛ rɛy duëël in te ni rɛci kɛ rɛy luaak. Kä pa̱nyni duëël in nyuur naath thi̱n kɛnɛ rɛy luaak kɛɛliw ca jɛ pa̱r jiɛn.

¹⁸ Cakɛ lät kä ti ce̱tkɛ ja̱a̱k nhial kɛnɛ jiɛn nööri, ca jiɛn nööri la̱th kamni tɔ̱ ce̱tkɛ ja̱a̱k tɔ̱. Kä te jääkɔ kɛ nhiem da̱ŋ rɛw.

¹⁹ Ci nhiam ran rɔ luɔc peek jiaath nöör kui̱ kɛl, kä ci nhiam luɔny rɔ luɔc peek jiaath nöör kui̱c in dɔ̱ŋ.

²⁰ A känɛ jɛ nikä ro̱o̱th cu wä mäni nhial thiek, ca jiath nöör kɛnɛ min ce̱tkɛ jääk kɛ̈t puɔ̱ɔ̱ny pa̱a̱ny.

²¹ Kä do̱o̱pni thuɔk duëël in nyuur naath thi̱n päär tuɔ̱ŋkiɛn. Kä te nhiam gua̱th in rɛl gɔɔydɛ rɔ kɛ mi ce̱tkɛ

²² yi̱k mi ca la̱t kɛ jiɛn, bärɛ nhial ɛ jua̱th tetni da̱ŋ diɔ̱k, kä bär jɔakdɛ ɛ jua̱th tetni da̱ŋ rɛw, kä ɣäp ɣääpdɛ ɛ jua̱th tetni da̱ŋ rɛw. Kä gɔŋtɔtnikɛ kɛnɛ pinydɛ kɛ ri̱i̱wnikɛ cakɛ la̱t kɛ jiath. Kä cuɛ ɣä jiök i̱, “Mɛmɛ ɛ jɛn tharbët in te nhiam Kuɔth Nhial.”

²³ Kä jɛn gua̱a̱th in nyuur naath thi̱n kɛnɛ gua̱a̱th in leny gɔɔydɛ ti diaal te mɔ kɛ thiekni da̱ŋ rɛw ti ca ban.

²⁴ Kä kɛn thiekni tekɛ kɛ thiekni da̱ŋ rɛw ti la rɔ̱ a lɛ̈pkɛ däär.

²⁵ Kä thiekni gua̱th in nyuur naath thi̱n cakɛ kët ti ce̱tkɛ ja̱a̱k kɛnɛ jiɛn nööri, ti ce̱tnikɛ tëë ca kɛ̈t puɔ̱ɔ̱ny pa̱nyni. Kä tëë kɛ jiath mi ca la̱th nhiam yacɛkä raar.

²⁶ Kä tëë kɛ wernyini, kä ca puɔ̱ny pa̱nyni duëli tin te gëëkni luaak Kuɔth kɛt kɛ jiɛn nööri peknikiɛn diaal.