Yɛdh 40 - RUAC KUƆTH IN RƐL RƆ

Nyuuth luaak Kuɔth mi bi ben

¹ Kɛ jiɛn da̱ŋ rɛw wi̱cdɛ dhieec runi pɛɛcäda, kɛ tuk runä mɔmɔ, kɛ wäl ni̱ni kä pay, kɛ wäl ŋuaan runi kɛ kɔr kä mëë ca wec da̱k piny, kɛ jɛn cäŋ ɛmɔ, cu buɔ̱m Kuɔth Nhial ben kä ɣä, cuɛ ɣä naŋ ɛn wani.

² Kä cuɛ ɣä nööŋ guäth mi cua̱ nyuuth Kuɔth ben nɛn thi̱n, muun I-thɛ-rɛl. Kä cuɛ ɣä nyuɔ̱ɔ̱r wi̱i̱ pa̱a̱m mi bäär, mi te mi ce̱tkɛ wec thi̱n kui̱c cuëëcdɛ.

³ Kä mëë cɛ ɣä naŋ ɛn wani, tëë kɛ wut mi te ɛn wani, mi ce̱t ta̱a̱dɛ kɛ ciɛk in yian, mi tekɛ lath thëm mi gɔaa, kä te tetdɛ kɛ ta̱y thëm mi gɔaa. Kä tëë cuŋä thok kal.

⁴ Kä cuɛ ruac kɛ ɣä wëë i̱, “Gat ran, ji̱n gui̱cni kä li̱ŋni agɔaa, kä läthni lɔcdu kä ŋɔak diaal tin bä nyuɔ̱th ji̱, kɛ ɣöö nööŋkɛ ji̱ ɛn guäth ɛmɛ kɛ ɣöö bä ŋɔak ti̱ti̱ ben nyuɔ̱th ji̱. Kä lätni tin diaal tin ci nɛn ji̱ thuɔk duëël I-thɛ-rɛl.”

Thok kal in te peek känyä ca̱ŋ

⁵ Ɛn wanɛ mɔ tëë kɛ päny mi ca go̱l ni luaak Kuɔth raar. Kä theem gutdä in te tetdä wutdä bärɛ ɛ jua̱th tetni da̱ŋ bäkɛl ti ba̱r ba̱a̱r. Kä bär kä kɛl ɛ juäth tetdä kɛnɛ pät tetdä. Kä cu dël pa̱a̱ny kɛnɛ bärɛ thɛm, kä cuɛ tekɛ taŋ kɛl.

⁶ Kä cuɛ wä kɛ pek thuɔk kal in lot ni käny ca̱ŋ, wëë nhial kɛ ko̱o̱tnikɛ, cuɛ tuut kal thɛm, cu bär jɔakdɛ a taŋ kɛl.

⁷ Kä gëëkdɛ te duël ga̱a̱ŋni thi̱n, kä te duel ɔ kɛ theem taŋ kɛl, kä ɣäp ɣääpdɛ, taŋ kɛl kä bär jɔakdɛ. Kä kam duëli ɛ jua̱th tetni da̱ŋ dhieec. Kä thok pa̱a̱ny in la wä kɛ naath dueel in te rɛci bär jɔakdɛ ɛ taŋ kɛl.

⁸ Kä cuɛ duel in wäkɛ naath rɛc thɛm, cuɛ la juäth tetdä kɛl.

⁹ Kä cuɛ duel in te thok kal thɛm, cuɛ la jua̱th tetni da̱ŋ bädäk. Kä wääthnikɛ da̱ŋ rɛw kɛ jua̱th tetni da̱ŋ rɛw. Kä jɛn duel thuɔk kal in wäkɛ naath rɛc thieekɛ kɛ luaak Kuɔth.

¹⁰ Kä te kui̱c ɔ kɛ duël da̱ŋ diɔ̱k ti te thok kal peek känyä ca̱ŋ. Kä kɛn da̱ŋ diɔ̱k päärkɛ, kä kɛn wääthni kui̱ni da̱ŋ rɛw päärkɛ.

¹¹ Kä cuɛ ɣäp ɣääp in lɛ̈pkɛ thok kal thi̱n thɛm, kä cuɛ la jua̱th tetni da̱ŋ wäl. Kä ɣäp ɣääp duɔ̱p thuɔk kal cuɛ la jua̱th tetni da̱ŋ wäl diɔ̱k.

¹² Kä nhiam duëli ga̱a̱ŋni peknikɛ da̱ŋ rɛw tëë kɛ käl da̱ŋ rɛw ti ciëk ciëëk, te mɔ kɛ juäth tetdä kɛl kä kɛn duël tëë kɛ jua̱th tetni da̱ŋ bäkɛl kui̱nikɛ diaal.

¹³ Kä cuɛ kam duëël ga̱a̱ŋni kɛl ɛ wä duëël ga̱a̱ŋni min lot ni jɛ thɛm jɔkɔ, kä cuɛ jɛ jek a jua̱th tetni ti jiɛn da̱ŋ rɛw wi̱cdɛ dhieec kam kalɔ kɛnɛ kalɔ.

¹⁴ Kä cuɛ duel in te rɛci in la wä kɛ naath rɛy kal thɛm. Kä cuɛ jɛ jek ala jua̱th tetni ti jiɛn da̱ŋ rɛw. Kä cu mäni thok in thieek kɛ wääthni kui̱cni diaal.

¹⁵ A känɛ jɛ ni nhiam thuɔk kal in wä kɛ naath rɛc, a wä mäni thok kal in te rɛci, ɛ jua̱th tetni ti jiɛn da̱ŋ dhieec.

¹⁶ Kä kɛn duël kɛnɛ wäthnikiɛn tekɛ kɛ wernyini, rɛc ɔ kui̱ thuɔk in wä kɛ naath rɛc kui̱ ni diaal, kä te käl tin te rɛci kɛ wernyini bä. Kä ca wääthni biɛl kɛ jiɛn nööri.

Rɛy kal raar

¹⁷ Kä cuɛ ɣä naŋ kɛ duɔ̱ɔ̱p in wäkɛ naath rɛy kal in te raar. Kä ɛn wani te duël thi̱n, kä ca rɛy kal rɔth kɛ päm ni kɛɛliw, kä ca duël ti jiɛn da̱ŋ diɔ̱k car kä ro̱o̱th pa̱a̱m ɛmɔ.

¹⁸ Kä ɛn ro̱o̱th känɛ jɛ ni thok kal, wëë ce̱tnikɛ bär thukni käli. Kä mɛmɛ ɛ jɛn ro̱o̱th in te rɛcɔ.

¹⁹ Kä cuɛ kam thuɔk kal raar rɛcɔ kɛnɛ rar thuɔk kal rɛ̈ci thɛm, kä cuɛ jɛ jek kɛ jua̱th tetni ti kuɔ̱r kɛl.

Thok kal in te kui̱c caam

²⁰ Kä cuɛ thok kal in te raar in te kui̱c cam thɛm, bärɛ kɛnɛ ɣäp ɣääpdɛ.

²¹ Kä te thok kal kɛ duël ga̱a̱ŋni da̱ŋ diɔ̱k peknikɛ diaal. Kä wääthnikɛ kɛnɛ duëlkɛ tin di̱t diaal päär theemnikiɛn kɛ theemni duëli thuɔk kal tëë nhiam tëë te kui̱c känyä ca̱ŋ. Bäriɛn kɛ jua̱th tetni ti jiɛn dhieec kä ɣäp ɣääpdiɛn kɛ jua̱th tetni ti jiɛn da̱ŋ rɛw wi̱cdɛ dhieec.

²² Kä wernyinikɛ kɛnɛ wääthni kɛ jiɛn nöörikɛ päär theemnikiɛn kɛ theemni tëë te peek thuɔk kal in lot ni kui̱c känyä ca̱ŋ. Tëë kɛ ka̱a̱th da̱ŋ bärɔw wädu thok kal nhial, kä te wääthnikɛ rɛci.

²³ Kamä thuɔk kal in lot ni kui̱c caam kɛnɛ thok kal in lot ni kui̱c känyä ca̱ŋ, te thuk ti wä kɛ naath rɛc thi̱n. Cuɛ kam thukni käli thɛm, cuɛ kɛ jek kɛ jua̱th tetni ti kuɔ̱r kɛl.

Thok kal in te kui̱c cuëëc

²⁴ Kä cuɛ ɣä lɛ naŋ kɛ kui̱c cuëëc, kä cu kui̱c cuëëc tekɛ thok kal, kä cuɛ wääthnikɛ kɛnɛ duël ga̱a̱ŋnikɛ thɛm. Kä cuɛ theemnikiɛn jek päärkɛ kɛ theemni thukni kal tin kɔ̱ŋ.

²⁵ Kä duël ga̱a̱ŋnikɛ kɛ bäŋdɛ tekɛ kɛ wernyini ti cakɛ go̱l kui̱cni diaal, ce̱tkɛ wernyini kä tin kɔ̱ŋ. Kä bärɛ ɛ jua̱th tetni ti jiɛn dhieec, kä ɣäp ɣääpdɛ kɛ jua̱th tetni ti jiɛn da̱ŋ rɛw wi̱cdɛ dhieec.

²⁶ Tëë kɛ ko̱o̱tni da̱ŋ bärɔw ti wä kɛ naath nhial, kä te bäŋdɛ rɛci. Kä te wääthnikɛ kɛ jiɛn nööri, te kɛl kui̱c ɛmɛ kä te min dɔ̱ŋ peek in dɔ̱ŋ.

²⁷ Kä te thok kal kuec cuëëc in te rɛci kɛ thi̱i̱k, kä cuɛ jɛ thɛm nikä thi̱i̱k in nhiam a wä kä thi̱i̱k in dɔ̱ŋ peek kuec cuëëc, kä cua jɛ jek kɛ jua̱th tetni ti kuɔ̱r kɛl.

Kal in te rɛci, thok kal kuec cuëëc

²⁸ Kä cuɛ ɣä naŋ rɛy kal in te rɛci kɛ thi̱i̱k kuec cuëëc. Kä cuɛ thi̱i̱k kuec cuëëc thɛm, kä cu theemdɛ pa̱a̱r kɛ theemni kä tin kɔ̱kiɛn.

²⁹ Kä duël ga̱a̱ŋnikɛ kɛnɛ wääthnikɛ kɛ ba̱ŋnikɛ, päär theemnikiɛn kɛ tin kɔ̱kiɛn. Kä tëë kɛ wernyini kui̱cni diaal, kɛnɛ bäŋdɛ kui̱cni diaal. Kä bärɛ ɛ jua̱th tetni ti jiɛn da̱ŋ dhieec, kä ɣäp ɣääpdɛ kɛ jua̱th tetni ti jiɛn da̱ŋ rɛw wi̱cdɛ dhieec.

³⁰ Kä tëë kɛ ba̱ŋni kui̱ni diaal, bärɛ tëë kɛ jua̱th tetni ti jiɛn da̱ŋ rɛw wi̱cdɛ dhieec, kä tëë kɛ jua̱th tetni da̱ŋ dhieec kä ɣäp ɣääpdɛ.

³¹ Kä bäŋdɛ lotdɛ ni kal in te raar, kä te jiɛn nööri puɔ̱ɔ̱ny wääthni, kä duɔ̱p ko̱o̱tnikɛ tëë ka̱a̱th da̱ŋ bädäk.

Kal in te rɛci thok kal kuec känyä ca̱ŋ

³² Kä cuɛ ɣä naŋ rɛy kal in te rɛci kuec känyä ca̱ŋ, kä cuɛ thi̱i̱k thɛm, cu theemdɛ pa̱a̱r kɛ tin kɔ̱kiɛn.

³³ Kä duël ga̱a̱ŋnikɛ, kɛnɛ wääthnikɛ kɛ ba̱ŋnikɛ päär theemnikiɛn kɛ tin kɔ̱kiɛn. Kä ca jɛ go̱l kɛ wernyini kui̱ni diaal amäni bäŋdɛ. Kä bärɛ ɛ jua̱th tetni ti jiɛn dhieec, kä ɣäp ɣääpdɛ ɛ jua̱th tetni ti jiɛn da̱ŋ rɛw wi̱cdɛ dhieec.

³⁴ Kä bäŋdɛ lotdɛ ni kui̱c kal in te raar. Kä te wääthnikɛ kɛ jiɛn nööri peknikɛ diaal, kä te ko̱o̱tnikɛ kɛ ka̱a̱th da̱ŋ bädäk.

Kal in te rɛci thok kal kuec caam

³⁵ Kä cuɛ ɣä naŋ thok kal kui̱c caam, kä cuɛ jɛ thɛm, kä cu theemdɛ pa̱a̱r kɛ theemni kä tin kɔ̱ŋ.

³⁶ Kä duël ga̱a̱ŋnikɛ kɛnɛ wääthnikɛ kɛ ba̱ŋnikɛ cu theemnikiɛn pa̱a̱r kɛ theemni kä tin kɔ̱kiɛn. Kä tëë kɛ wernyini ti ca go̱o̱l ni jɛ kui̱cni diaal. Kä bärɛ ɛ jua̱th tetni ti jiɛn da̱ŋ dhieec, kä ɣäp ɣääpdɛ ɛ jua̱th tetni ti jiɛn da̱ŋ rɛw wi̱cdɛ dhieec.

³⁷ Kä bäŋdɛ lotdɛ ni pek kal in te raar. Kä tëë kɛ jiɛn nööri puɔ̱ɔ̱ny wääthnikɛ, peknikɛ diaal, kä te ko̱o̱tnikɛ kɛ ka̱a̱th da̱ŋ bädäk.

Duël ti ba muc rialikä thi̱n

³⁸ Kä tëë kɛ duel mi ci nhiamdɛ luɔc thok kal in te kui̱c caam, mi ba muc tin waŋkɛ lak thi̱n.

³⁹ Kä bäŋ thuɔk kal, kui̱cnikɛ diaal te mɔ kɛ tharbëtni da̱ŋ rɛw, tin la muc tin waŋ kɛ, kɛnɛ muc dui̱rä kɛ muc cutdä a ŋuɔ̱tkɛ thi̱n.

⁴⁰ Kä rar ba̱a̱ŋ, thuɔk kal kuec caam in la wäkɛ naath rɛc, tëë kɛ tharbëtni da̱ŋ rɛw, kä kui̱c in dɔ̱ŋ te tharbëtni rɛw ti kɔ̱ŋ thi̱n.

⁴¹ Kä te tharbëtni ŋuaan rɛci, kä te tharbëtni da̱ŋ ŋuaan raar thok kal, kɛn diaal kɛ tharbëtni da̱ŋ bädäk ti la ŋuɔ̱tkɛ muc thi̱n.

⁴² Kä tëë kɛ tharbëtni da̱ŋ ŋuaan ti kɔ̱ŋ ti ca la̱t kɛ pääm kɛ kui̱ mucni tin waŋkɛ, kä bäriɛn piny ɛ juäth tetdä kɛl kɛ nuth, kä ɣäp ɣääpdɛ ɛ juäth tetdä kɛl kɛ nuth, bärɛ nhial ɛ juäth tetdä, min la la̱thkɛ kuak tin la ŋuɔ̱tkɛ muc tin waŋkɛ thi̱n.

⁴³ Kä tëë kɛ thöt ti ca win puɔ̱ny duëël kɛɛliw ti bäriɛn ce̱tdɛ kɛ pät tetdä. Kɛ tharbët mi la ri̱ŋ mucni a la̱thkɛ thi̱n.

Duël kɛ kui̱ bööthni palä

⁴⁴ Kä rar thuɔk kal in te rɛci tëë kɛ duël kɛ kui̱ këëtni din rɛy kal in te rɛci, te kɛl peek thuɔk kal kuec caam, cɛ thokdɛ luɔc kui̱c cuëëc, kä te min dɔ̱ŋ peek kuec känyä ca̱ŋ cɛ thokdɛ luɔc peek kuec caam.

⁴⁵ Kä cuɛ ruac kɛ ɣä wëë i̱, “Jɛn duel in ci thokdɛ luɔc kui̱c cuëëc, ɛ duel bööthni palä tin lät rɛy luaak Kuɔth.

⁴⁶ Kä duel in ci thokdɛ luɔc kui̱c caam, ɛ duel bööthni palä tin lät wi̱i̱ yi̱kä. Kä kɛ kɛn kuay Dha-dok, rɛy ji̱ Lii-bay kä rɔ̱ tin bi ben thiäkä kä Kuoth Nhial kɛ ɣöö bikɛ jɛ ben lätikä.”

⁴⁷ Kä cuɛ kal thɛm, kä cuɛ tekɛ jua̱th tetni ti kuɔ̱r kɛl luëŋdɛ, kɛ jua̱th tetni ti kuɔ̱r kɛl kä ɣäp ɣääpdɛ, kä jɛn päär tuɔ̱ŋkɛ. Kä yi̱k tëë nhiam luaak Kuɔth.

Luaak Kuɔth

⁴⁸ Kä cuɛ ɣä nööŋ bääŋ luaak Kuɔth, kä cuɛ wääthni ba̱a̱ŋ luaak Kuɔth thɛm, kä cuɛ jɛ jek kɛ jua̱th tetni da̱ŋ dhieec peknikɛ diaal. Kä ɣäp ɣääp thuɔkdɛ ɛ jua̱th tetni da̱ŋ wäl ŋuaan. Kä pa̱nyni peknikɛ diaal te mɔ kɛ jua̱th tetni da̱ŋ diɔ̱k.

⁴⁹ Kä luëŋ ba̱a̱ŋ ɛ jua̱th tetni ti jiɛn daŋ rɛw, kä ɣäp ɣääpdɛ ɛ jua̱th tetni da̱ŋ wäl rɛw. Tëë kɛ ko̱o̱tni ti te ka̱a̱th da̱ŋ wäl ti wä kɛ naath nhial. Kä tëë kɛ thieer gekä wääthni peknikɛ diaal.