Yɛdh 38 - RUAC KUƆTH IN RƐL RƆ

Gog ɛ kɛɛt Kuɔth

¹ Kä cu ruac Kuɔth Nhial ben kä ɣä, cuɛ wëë i̱,

² “Gat ran, ri̱tni wi̱cdu peek Gog raan rööl Ma-gog, rueec ji̱ Mɛ-cɛk kɛnɛ ji̱ Tu-bal in di̱i̱t. Kä lat ruac go̱o̱kä mi jiääk kɛ kui̱dɛ,

³ jio̱k ni jɛ ɛn ɣöö ɛ Kuäär ni Kuoth Nhial i̱, ‘Ɣän gakä kɛ ji̱ lö Gog in la rueec Mɛ-cɛk kɛnɛ Tu-bal in di̱i̱t.

⁴ Ɣän bä ji̱ ri̱et kä bä jio̱mku gɔn kɛ yieeth. Kä bä ji̱ buath raar kɛɛl kɛ rɛmdu, kɛnɛ jiöŋkööriku kɛnɛ ji̱kiɛn, tin ca rɔ̱ rony kɛ gi̱ew gi̱eewni ɛ pot, kä ŋuankɛ. Te kɛn diaal kɛ köötni ti di̱t kɛnɛ ti tɔatni kä tekɛ kɛ thɛpni.

⁵ Kä bi ji̱ Pa-rath kɛnɛ ji̱ Kuc kɛ Put te kɛɛl kɛ kɛ, kɛn diaal tekɛ kɛ gi̱ew gi̱eewni kɛnɛ köötni.

⁶ Kä te Go-mɛr kɛnɛ rɛmdɛ kɛɛliw kɛnɛ Beth-to-gar-maa in te ni nɔ̱nä kui̱ caam kɛ rɛmdɛ kɛɛliw kɛɛl kɛ jɛ, te döör ti ŋuan kɛɛl kɛ ji̱.

⁷ “ ‘Riali rɔ ikä, riali rɔ ikä, ji̱n yɛnɛ buɔ̱n diaal tin ca rɔ̱ dol gëëkniku, kɛ ɣöö bikɛ ben bo̱th.

⁸ Kɛ kɔr ni̱ni ti ŋuan bä ji̱ cɔl kɛ ɣöö bia rɔ̱ mat, kɛ run tɔ̱ bi ben tɔ̱ bi mun mi ca luɔ̱c jɔk ko̱o̱r mac, mun in ruɔ̱ɔ̱lkɛ ji̱kɛ rɛy dööri ti ŋuan, ba pääm I-thɛ-rɛl ben mac, tëë ca päl baaŋ mëëdan. Ca ji̱kɛ nööŋ raar rɛy dööri cieŋ kɛn diaal kɛ mal.

⁹ Kä ji̱n yɛnɛ rɛmdu kɛɛliw kɛ döör tin ŋuan tin te kɛɛl kɛ ji̱ bia wä thi̱n, bia wä nhiam ce̱tnikɛ thul. Bia ce̱tnikɛ pua̱r mi ci wi̱c muɔ̱ɔ̱n kum.’ ”

¹⁰ Kä cu Kuäär ni Kuoth Nhial mɛmɛ lar wëë i̱, “Ɛn cäŋ ɛmɔ bi cär ti jiäk ben wi̱i̱du kɛ gör lätdä kä mi jiääk.

¹¹ Kä bi wee i̱, ‘Ɣän bä wä gaak kɛ wi̱i̱ tin /ka̱n moc kɛ pa̱nyni, bä nɛy tin te bitädiɛn tin cieŋ kɛ mal pärikä. Kɛn nɛy diaal tin cieŋ wi̱i̱ni ti thil päny kä thil wääthni kɛnɛ thiekni.’

¹² Ɣän bä kuakiɛn wä mac kä bä wä pɛɛc. Bä buɔ̱mdä luɔ̱c kɛn gua̱th tëë ca däk tin cieŋ naath thi̱n ɛn täämɛ. Kɛn nɛy tëë ruɔ̱ɔ̱lkɛ rɛy dööri, tin ci pay tekɛ ɣɔ̱k kɛnɛ ria̱ŋ mi di̱i̱t. Kɛn nɛy tin cieŋ däär ɣɔaa.

¹³ Kä bi Cɛba kɛnɛ Dɛ-dan kɛ köök rööl Tar-cic nikɛ ŋuɛ̈tni köörɛ diaal ji̱ jiök i̱, ‘Ji̱n bi̱i̱ kɛ ɣöö bi kuak ben mac? Ci nɛɛku tin ŋuan rol kɛ ɣöö ba ŋɔak ben pɛc? Ji̱n bi̱i̱ kɛ ɣöö bi ciɛk in bo̱r kɛnɛ da̱a̱pni kɛ ɣɔ̱k kɛ kuak diaal ti ŋuan ti̱ti̱ ben naŋ?’

¹⁴ “Kɛ kui̱ ɛmɔ ji̱n gat ran lätni Gog ruac go̱o̱kä, jio̱kni jɛ ɛn ɣöö ci Kuäär ni Kuoth Nhial ruac ɛmɛ lar wëë i̱, ‘Ɛn cäŋ ɛmɔ, ɛn guäth in cieŋ nɛɛkä ni ji̱ I-thɛ-rɛl kɛ mal ji̱n /ci jɛ bi ŋa̱c?

¹⁵ Ji̱n bi cu ben raar guäthdu min nɔ̱a̱n nɔ̱a̱n in te ni kui̱c caam, ji̱n yɛnɛ döör diaal tin ŋuan tin te kɛɛl kɛ ji̱. Kä kɛn diaal cikɛ kɔt jio̱kni jiöŋkööri kä kɛ nɛy ti ŋuan ɛlɔ̱ŋ.

¹⁶ Kä bia nɛɛkä ni ji̱ I-thɛ-rɛl ban, ce̱tnikɛ pua̱r mi ci wi̱c muɔ̱ɔ̱n kum. Kä kɛ ni̱n tɔ̱ bi ben tɔ̱, ɣän bä ji̱ jakä gak kɛ mundä lö Gog, kɛ ɣöö bi döör ɣä cu ŋa̱c mi wa̱a̱ gɔɔydä nyoth kɛ ji̱ nhiamdiɛn.’ ”

Duäc Kuɔth kɛ Gog

¹⁷ Kä cu Kuäär ni Kuoth Nhial mɛmɛ lar wëë i̱, “Ɛ ji̱n ɛ nëë ruacä kɛ kui̱dɛ kɛ ni̱n tëëkɔn, kɛ ja̱a̱ŋkä ni göök I-thɛ-rɛl, tëë ca ruac go̱o̱kä lat, ɛn ɣöö runi tia̱ bëëni, ɣän bä ji̱ jakä maki kɛ?

¹⁸ Duundɛ ɣöö, ɛn cäŋ ɛmɔ, mi wä Gog wec I-thɛ-rɛl ben mak, bi waŋ lɔaacdä rɔ jiɛc, ruac ni ɣän Kuäär ni Kuoth Nhial.

¹⁹ Kɛ kui̱ ŋɛnyädä kɛnɛ tiɛɛl lɔaacdä min di̱i̱t, ɣän bä jɛ lar, ɛn ɣöö bi cäŋ ɛmɔ tekɛ lath mi di̱i̱t muun I-thɛ-rɛl.

²⁰ Kä bɛ rɛc yiëër kɛnɛ diit nhial kɛ ley dɔaar diaal, kɛ muɔɔl piɛny diaal tin la jäl kɛ bapdiɛn, kɛ naath diaal tin te wi̱i̱ muɔ̱ɔ̱n lath nhiamdä. Kä bä pääm diaal wuɔ̱l, kä bä luiiri pa̱a̱m wuɔ̱l bä, kä bä kal diaal jakä tëth.

²¹ Ɣän bä Gog ciöl rik wi̱i̱ päämnikä diaal, bi thɛp ran pɛn ni wi̱i̱ däman, ruac ni ɣän Kuäär ni Kuoth Nhial.

²² Kɛ liaw kɛnɛ ko̱r ɣän bä Gog luk kɛ kɛ. Ɣän bä nhiaal thuɔ̱ɔ̱l kɛnɛ nhiaal guiiyni, kɛ mac kɛnɛ tol mi tekɛ ŋuäny mi jiääk, jakä dɛm kä jɛ kɛnɛ rɛmdɛ kɛ nɛy tin ŋuan tin te kɛɛl kɛ jɛ.

²³ Inɔ, ɣän bä di̱tdä kɛnɛ gɔɔydä min rɛl rɔ, jakä ŋa̱ckɛ ɛ döör ti ŋuan. Kä bikɛn ɛ cu ŋa̱c ɛn ɣöö ɛ ɣän Kuoth Nhial.”