Yɛdh 37 - RUAC KUƆTH IN RƐL RƆ

Lo̱o̱l cɔ̱ɔ̱ni ti ko̱o̱t

¹ Kä cua̱ rɔ jek te buɔ̱m Kuɔth Nhial kɛ ɣä kɛɛl. Kä cu yiëë Kuɔth Nhial ɣä nööŋ raar, kä cuɛ ɣä nyuɔ̱ɔ̱r ni däär lo̱o̱lä mi ci thia̱ŋ kɛ cɔ̱w.

² Kä jɛn cuɛ ɣä jälikä rɛydiɛn, ɛn wani te cɔ̱w ti ŋuan rɛy lo̱o̱lä, kä kɛn cikɛ kööt.

³ Kä cuɛ ɣä jiök i̱, “Gat ran, kɛn cɔ̱w ti̱ti̱ dee kɛ tëk?” Kä cua̱ jɛ loc i̱, “Lö, Kuäär ni Kuoth Nhial ŋäcɛ ji̱n.”

⁴ Kä cuɛ ɣä jiök i̱, “Lätni cɔ̱w ti̱ti̱ ruac go̱o̱kä, läri jɛ kɛ i̱, ‘Lö, cɔ̱w ti ko̱o̱t liɛŋɛ ruac Kuɔth Nhial’ ”

⁵ Kä cu Kuäär ni Kuoth Nhial cɔ̱w ti̱ti̱ jiök i̱, “Ɣän bä yiëë jakä wä rɛydun kɛ ɣöö bia cu tëk.

⁶ Ɣän bä räl kɛnɛ ri̱ŋ la̱th puɔ̱ɔ̱nydun, kä bä yɛ cu kum kɛ guɔ̱p. Kä bä yiëë cu la̱th rɛydun, kä bia cu tëk. Kä bi yɛn ɛ cu ŋa̱c ɛn ɣöö ɛ ɣän Kuoth Nhial.”

⁷ Inɔ, cua̱ ruac go̱o̱kä lat ce̱tnikɛ mëë ca la̱r ɣä. Kä min cä ruac go̱o̱kä lat, nikɛ pɛ̈th cu rɔal päl mi te gak gak. Kä cu cɔ̱w rɔ̱ mat kɛɛl, cu cɔa̱a̱ ɔ wä cɔ̱ɔ̱kädɛ.

⁸ Kä cua̱ guic, cua̱ kɛ nɛn tekɛ kɛ räl, kä cu ri̱ŋ wä puɔ̱ɔ̱nydiɛn, kä cu guɔ̱p kɛ kum. Kuɛ la ɣöö thilɛ kɛ yiëë mi tekɛ kɛ.

⁹ Kä cu Kuoth Nhial ruac kɛ ɣä wëë i̱, “Lätni yiëë ruac go̱o̱kä, lat ruac go̱o̱kä gat ran, läri jɛ yiëë ɛn ɣöö mɛmɛ lar ɛ Kuäär ni Kuoth Nhial wëë i̱, ‘Lö, yiëë, ku mal ben pekni ɣɔaa da̱ŋ ŋuaan, ŋo̱kni nɛy ti ca näk ti yiëë, kɛ ɣöö dee kɛ tëk.’ ”

¹⁰ Kä cua̱ ruac go̱o̱kä lat ce̱tnikɛ min ca la̱r ɣä. Kä cu yiëë ben kä kɛ, kä cukɛ tëk, kä cukɛ cuɔ̱ŋ kɛ ciökiɛn ala buɔ̱n mi di̱i̱t.

¹¹ Kä cuɛ ɣä jiök i̱, “Gat ran, cɔ̱w ti̱ti̱ kɛ ji̱ thuɔk duël I-thɛ-rɛl diaal. Kä cukɛ wee i̱, ‘Kɛn cɔ̱w kɔ diaal cikɛ kööt, kä ci ŋa̱thda kɛ ti bi ben thil. Kɔn cakɔ tɛ̈m raar a thil diɛw.’

¹² Kɛ kui̱ ɛmɔ, lat ruac go̱o̱kä läri jɛ kɛ ɛn ɣöö mɛmɛ ɛ min laar Kuäär ni Kuoth Nhialɛ wëë i̱, ‘Ɣän bä kɔ̱a̱k kunyädun lɛp, bä yɛ ka̱m raar rɛy kɔ̱a̱kni kunyädun, lö nɛɛkä. Ɣän bä yɛ luɔc ni muun I-thɛ-rɛl.

¹³ Kä bi yɛn ɛ cu ŋa̱c ɛn ɣöö ɛ ɣän Kuoth Nhial, mi wa̱a̱ kɔ̱a̱k kunyädun wä lɛp, kä bä yɛ ka̱m raar rɛy kɔ̱a̱knikun, lö nɛɛkä.

¹⁴ Ɣän bä yiëëdä la̱th rɛydun, kä bia cu tëk, kä bä yɛ cu la̱th ni muundun pa̱ny. Kä bi yɛn ɛ cu ŋa̱c ɛn ɣöö ɛ ɣän Kuoth Nhial ruac ɔ, kä bä jɛ la̱t,’ ” ruac ni ɣän Kuoth Nhial.

Juda kɛnɛ I-thɛ-rɛl rɛy kuäärä kɛl

¹⁵ Kä cu ruac Kuɔth Nhial ben kä ɣä wëë i̱,

¹⁶ “Gat ran, käni kɛɛt jiaath, kä gɔ̱rɛ i̱, ‘Kuäär Juda kɛnɛ ji̱kɛ diaal.’ Kä käni kɛɛt jiaath mi dɔ̱ŋ kä gɔ̱rɛ i̱, ‘Kuäär I-thɛ-rɛl kɛnɛ ji̱kɛ diaal.’

¹⁷ Kä ku kɛ tuɔ̱ɔ̱m kɛɛl ala kɛɛt kɛl, kɛ ɣöö bikɛ jɔɔc ala kɛl tetädu.

¹⁸ Kä mi wä nɛɛku ji̱ wä thiec i̱, ‘A /ci nɛy biku la̱r min lotdi kɛ kɛn ti̱ti̱?’

¹⁹ läri jɛ kɛ ɛn ɣöö ci Kuäär ni Kuoth Nhial mɛmɛ lar wëë i̱, ‘Ɣän cä thia̱k kɛ nöŋ kɛɛtdä min lot ni ji̱ I-thɛ-rɛl, kä bä jɛ mat kɛɛl kɛ kɛɛt in lot ni ji̱ Juda. Ɣän bäkɛ mat ala kɛɛt kɛl, kɛ ɣöö bikɛ la kɛɛt kɛl tetädä.

²⁰ Kä mi wä kɛtni tin gɔ̱rɛ thi̱n wä te tetädu ɛ guic kɛn ɛ,’

²¹ inɔ, kuɛlɛ la̱r kɛ ɛn ɣöö ɛ Kuäär ni Kuoth Nhial i̱, ‘Bä ji̱ I-thɛ-rɛl diaal wä nööŋ rɛy nɛɛni diaal tëë cikɛ wä thi̱n, kä bäkɛ rol pekni diaal, kä bäkɛ nööŋ ni muundiɛn pa̱ny.

²² Kä bäkɛ cu jakä do̱r kɛl ɛn muun, wuɔ̱thni päämni I-thɛ-rɛl. Kä bi kuäär kɛl te wi̱i̱diɛn ala kuääriɛn kɛn diaal. /Ca rɔ̱ bi̱lɛ nyɔk kɛ mi bikɛ la döör da̱ŋ rɛw, kä /ca rɔ̱ bilɛ nyɔk kɛ dääk kä kuääri da̱ŋ rɛw.

²³ /Ca rɔ̱ bilɛ nyɔk kɛ yäri kɛ kuth guäynikiɛn kɛnɛ nyin jiäknikiɛn, kiɛ dueerkiɛn. Ɣän bä kɛ kän, duɔ̱pni jiäkni diaal tëë cikɛn kɛ guɔ̱ɔ̱r, kä bäkɛ jakä gɔw. Inɔ, bikɛn cua̱ nɛɛkä kä bi ɣän cua̱ Kuothdiɛn.’

²⁴ “Kä bi ja̱ŋdä ni Dee-bid la kuääriɛn kä bi kɛn diaal tekɛ yieen kɛl. Kä bikɛ ŋuɔ̱tkä käp kä bikɛ luëëkä luɔ̱th, agɔaa.

²⁵ Kä bikɛ cieŋ muun ëë cä ka̱m ja̱ŋdä ni Je-kɔb, min cieŋ gua̱ndɔɔŋnikun thi̱n. Kɛn kɛ gaatkiɛn kɛ gaat gankiɛn bikɛ cieŋ ɛn wani amäni cäŋ kɛl. Kä bi ja̱ŋdä ni Dee-bid a rueecdiɛn amäni cäŋ kɛl.

²⁶ Kä bä mat ruac malä lat kɛ kɛ. Kä bɛ la mat ruac mi do̱raar kɛ kɛ. Kä bäkɛ poth kä bäkɛ rep, kä bä luaakdä la̱th rɛydiɛn amäni cäŋ kɛl.

²⁷ Kä bi gua̱a̱th ciɛŋädä te kɛɛl kɛ kɛ. Kä bi ɣän a Kuothdiɛn, kä bikɛ la nɛɛkä.

²⁸ Kä bi döör ɛ cu ŋa̱c ɛn ɣöö, ɛ ɣän Kuoth Nhial ci ji̱ I-thɛ-rɛl lɛy, mi wa̱a̱ luaakdä la̱th rɛydiɛn amäni cäŋ kɛl.”