Yɛdh 35 - RUAC KUƆTH IN RƐL RƆ

Luk Kuɔth kɛ Ɛ-dɔm

¹ Kä cu ruac Kuɔth Nhial ben kä ɣä wëë i̱,

² “Gat ran, ri̱tni wi̱cdu pe̱e̱k päämni Ɛ-dɔm, kä lat ruac go̱o̱kä mi jiääk kɛ kui̱dɛ,

³ jio̱k ni jɛ ɛn ɣöö ɛ Kuäär ni Kuoth Nhial i̱, ‘Ɣän gakä kɛ ji̱ lö ro̱l päämni Ɛ-dɔm. ɣän bä la gua̱n tɛ̈ru, kä bä ji̱ jakä day mi thil raan.

⁴ Ɣän cä wi̱i̱ku da̱k piny, kä bi la mi ca päl, kä bi jɛ cu ŋa̱c ɛn ɣöö ɛ ɣän Kuoth Nhial.

⁵ “ ‘Kɛ ɣöö /cia rɔ̱ jakä ji̱ tɛ̈r mëëdan, cuarɛ ji̱ I-thɛ-rɛl jakä na̱kɛ ko̱o̱r, kɛ gua̱a̱th riknikiɛn, gua̱a̱th duäcädiɛn in jɔak.

⁶ Kɛ kui̱ ɛmɔ, cu Kuäär ni Kuoth Nhial ruac ɛn ɣöö ce̱tnikɛ tëkdä, ɣän bä yɛ jak kä na̱kɛ, kä lia̱a̱ bɛ yɛ guɔ̱ɔ̱r. Kä mëë /ken yɛn wuth riɛm piny lo̱k mëëdan, riɛm bɛ yɛ guɔ̱ɔ̱r.

⁷ Ɣän bä ro̱l päämni Ɛ-dɔm jakä pa̱lkɛ baaŋ a thil raan. Ɣän bä nɛy tin bä thi̱n kɛnɛ nɛy tin jiɛy thi̱n näk.

⁸ Kä bä päämkɛ thiäŋ kɛ nɛy ti ca näk. Kä wuɔ̱th päämniku, kɛnɛ rɛy löliku, kɛ rɛy yiëriku bi nɛy tin ca näk ko̱o̱r tɛth thi̱n.

⁹ Bä ji̱ jakä pa̱lkɛ baaŋ a wee wä, kä /ca wi̱i̱ku bi nyɔk kɛ ciëŋ amäni cäŋ kɛl. Kä bia jɛ cu ŋa̱c ɛn ɣöö ɛ ɣän Kuoth Nhial.’

¹⁰ “Kä kɛ ɣöö ci jɛ lar i̱, ‘Kɛn döör da̱ŋ rɛw ti̱ti̱ kɛnɛ wi̱i̱ da̱ŋ rɛw ti̱ti̱ bikɛ la nyinkɔ, kä bi nɛy kɛ cu ka̱n ala nyinkɔ,’ a cäŋɛ mëë te Kuoth Nhial ɛn wani.

¹¹ Kɛ kui̱ ɛmɔ, ce̱tnikɛ min tëkä, ɣän Kuäär ni Kuoth Nhial, ɣän bä yɛ lät kä mi lot rɔ kɛ lät ŋɛnyädun kɛnɛ nyi̱erun ëë cia nyoth kɛ ɣöö gak yɛn kɛ kɛ, kä bä rɔ jakä ŋa̱ckɛ rɛydun, mi wa̱a̱ yɛ wä luk.

¹² Kä bi yɛn ɛ ŋa̱c ɛn ɣöö ɣän Kuoth Nhial cä ruac kueethädun liŋ mëë lat yɛn ɛ kɛ kui̱ nyi̱rädun kɛ pääm I-thɛ-rɛl, ruac yɛn i̱, ‘Cakɛ päl ni baaŋ a thil raan, cakɛ ba̱ny kɔn kɛ ɣöö banɛ kɛ cam.’

¹³ Kä ci yɛn rɔ̱ kap nhial a gakɛ kɛ ɣä kɛ thukun, a rëpɛ gakdun kɛ ɣä, ɣän cä jɛ liŋ.

¹⁴ Kɛ kui̱ ɛmɔ, ci Kuäär ni Kuoth Nhial mɛmɛ lar ɛn ɣöö kɛ gua̱a̱th in kulɛ tɛɛth kɛ lɔc ji̱ wec muɔ̱ɔ̱n, ɣän bä yɛ cu däk.

¹⁵ Kɛ min tɛth lo̱ckun kɛ mun ji̱ thuɔk duëël I-thɛ-rɛl kɛ ɣöö ca jɛ päl baaŋ, ɣän bä lät kɛ ji̱ ce̱tnikɛ min göörä. Ɣän bä ji̱ jakä pa̱lkɛ a thil raan ji̱n päm Ɛ-dɔm, ji̱n ro̱l ɛmɔ ni kɛɛliw. Kä bia jɛ cu ŋa̱c ɛn ɣöö ɛ ɣän Kuoth Nhial.”