Yɛdh 34 - RUAC KUƆTH IN RƐL RƆ

Yiëën I-thɛ-rɛl ti ji̱ kacä

¹ Kä cu ruac Kuɔth Nhial ben kä ɣä i̱,

² gat ran, lat ruac go̱o̱kä mi jiääk kɛ kui̱ yiëëni I-thɛ-rɛl. Lat ruac go̱o̱kä, läri jɛ kɛn yiëën ɛn ɣöö ɛ Kuäär ni Kuoth Nhial i̱, “Aɣ, lö yiëën I-thɛ-rɛl tin mi̱eethɛ ni rɔ̱ɔ̱dun! /Ci yieen deet la mi̱i̱th ni dët?

³ Yɛn camɛ ni thio̱o̱l kä ruɔnyɛ rɔ̱ kɛ bieyni ti ca tak kɛ miem deet, kä ŋuɔ̱tdɛ ni dɛy deet tin ci buuth, kä /ci yɛn det lääk.

⁴ Kä /ken yɛn nɛy tin thil lua̱ŋ bum, kä /ken yɛn nɛy tin tekɛ juey jakä gɔaa, kä /ken yɛn buɔ̱ɔ̱t yian, kä /ken yɛn nɛy tin ca duɔ̱ɔ̱p dui̱r luɔ̱ɔ̱c jɔk, kä /ken yɛn tin ci bath go̱r. Duundɛ ɣöö, cia ruac nikɛ kɛ buɔ̱m kɛnɛ kok.

⁵ Kä ɛ jɛn cakɛ riaw dɔɔr ɔ, kɛ ɣöö thilɛ kɛ yiëën, kä mëë cakɛ riaw cikɛ cua̱ mi̱th leyni dɔaar diaal.

⁶ Detkä cakɛ riaw, ku yi̱i̱c nikɛn wuɔ̱thni päämni tin ba̱r ba̱a̱r diaal, detkä cakɛ riaw rɛy ɣɔaa kɛɛliw, kä thilɛ ram mi go̱o̱rkɛ.”

⁷ Kä kɛ kui̱ ɛmɔ, yɛn yiëën deet liɛŋɛ ruac Kuɔth Nhial wëë i̱,

⁸ “Ce̱tnikɛ tëkdä, ɣän Kuäär ni Kuoth Nhial, kɛ ɣöö ci detkä la ti kakɛ nikɛ, cikɛ la ni mi̱eth kä ley dɔaar diaal, kɛ ɣöö thilɛ yiëën, kä /ken yiëën deetkä detkä wä go̱r, cikɛn yiëën deet cu mi̱eeth ni rɔ̱, /kenkɛ detkä mi̱eeth.

⁹ Kɛ kui̱ ɛmɔ, yɛn yiëën deet liɛŋɛ ruac Kuoth Nhial.

¹⁰ Mɛmɛ larɛ Kuäär ni Kuoth wëë i̱, ‘Ɣän gakä kɛ yiëën deet. Kä ɣän bä detkä woc kä yɛ, kä /cia rɔ̱ bi nyɔk kɛ mi bia la yiëënkiɛn. Kä /ci yɛn yiëën deet rɔ̱ bi nyɔk kɛ mi mi̱eethkɛ rɔ̱. Ɣän bä detkä luäk kä kɛ, /cikɛ bilɛ ŋot ala mi̱eth kä kɛ.’ ”

Kuoth ɛ jɛn yieen in thuɔ̱k

¹¹ Kä cu Kuäär ni Kuoth Nhial mɛmɛ lar wëë i̱, “Ɣän puɔ̱nydä pa̱ny bä detkä wä go̱r ɛ ɣän, bäkɛ dhil nikɛ gör.

¹² Ce̱tkɛ min la yiëën deet detkiɛn la go̱o̱r rɛy deet tin ca rɔ̱ liɔam thi̱n, ɣän bä detkä go̱r inɔ bä. Ɣän bäkɛ luäk gua̱thni diaal tin cakɛ riaw thi̱n, kɛ cäŋ pua̱a̱ri muɔ̱th mi col.

¹³ Ɣän bäkɛ ma̱a̱t rɛy dööri kä bä kɛ ruɔ̱ɔ̱l rɛy wi̱i̱ni, kä bäkɛ nööŋ muundiɛn pa̱ny. Kä bäkɛ wä mi̱eeth ni wuɔ̱thni päämni I-thɛ-rɛl, gekä pi̱i̱ni gua̱th ni diaal tin la ciaŋkɛ.

¹⁴ Ɣän bäkɛ la̱a̱k kɛ wal ti gɔw, kä wuɔ̱th päämni I-thɛ-rɛl tin bär bɛ la gua̱a̱th la̱kdiɛn. Ɛn wani bikɛ tɔ̱ɔ̱c rɛy wal la̱kdiɛn tin gɔw, kä lakɛ wal ti gɔw wuɔ̱thni päämni I-thɛ-rɛl.

¹⁵ Ɣän puɔ̱nydä bä cua̱ yieen deetkä, kä bäkɛ cu jakä tɔ̱ɔ̱c, ruac ni ɣän Kuäär ni Kuoth Nhial.

¹⁶ Ɣän bä tin ci bath go̱r, kä bä tin ci duɔ̱ɔ̱p dui̱r luɔ̱ɔ̱c jɔk, kä bä buɔ̱ɔ̱t kä tin tekɛ buɔ̱ɔ̱t yian, kä bä tin thil lua̱ŋ bum, duundɛ ɣöö bä tin cuath cuaath kɛnɛ tin buɔ̱m buɔ̱ɔ̱m däk. Kä ɣän bäkɛ mi̱eeth kɛ la̱t cuŋni.”

¹⁷ Kä cu Kuäär ni Kuoth Nhial, mɛmɛ lar kɛ kui̱ deetkɛ wëë i̱, “Ɣän bä yɛ luk, kam rɔɔmni kɛnɛ böwni.

¹⁸ Kä /kenɛ ro̱ŋ kɛ yɛ yɛ ɛn ɣöö laak yɛ ni wal ti gɔw, la dɔny yɛn wal tin lakɛ kɛ ciökun? Ɛ /cɛ ku ro̱ŋ ɛn ɣöö laak yɛn ni wal ti gɔw ɛ ni mi cia tha̱a̱ŋkiɛn dɔny kä piny kɛ ciökun? Kä mi cia maath pi̱i̱ni ti gɔw, la yɛn duɔthkiɛn cua̱ nyoon kɛ ciökun?

¹⁹ Kä a bi detkä ku laak kɛ wal tin cia dɔany kɛ ciökun, kä bikɛ math ni pi̱ tin cia nyon kɛ ciökun?”

²⁰ Kɛ kui̱ ɛmɔ, cu Kuäär ni Kuoth Nhial kɛ jiök i̱, “Ɣän puɔ̱nydä, bä kam rɔɔmä mi cuay kɛnɛ rɔaam mi nuän luk.

²¹ Kɛ ɣöö la yɛn dët tin nua̱n a pi̱m kɛ tuɔ̱ŋkun amäni mi ciakɛ riawkä dɔɔr a bikɛ nɔ̱a̱n.

²² Ɣän bä detkä luäk, /ca kɛ bi̱lɛ nyɔk kɛ ciëŋ a jiäk. Ɣän bä kam deet kɛnɛ det tin kɔ̱ŋ luk.”

²³ “Ɣän bäkɛ moc kɛ yieen kɛl, min la ja̱ŋdä ni Dee-bid, kä jɛn bɛ kɛ la̱a̱k. Jɛn bɛ kɛ la̱a̱k, kä bɛ cua̱ yieendiɛn.

²⁴ Kä ɣän Kuoth Nhial bä cua̱ Kuothdiɛn, kä bi ja̱ŋdä ni Dee-bid cua̱ rueec rɛydiɛn. Ɛ ɣän Kuoth Nhial lat jɛ mɔ.”

²⁵ “Ɣän bä ruac malä cu la̱t kɛ kɛ, kä bä ley dɔaar cu woc muun, kɛ ɣöö bi detkä kulɛ cieŋ kɛ mal rɛy ruɔ̱pni kɛnɛ där dɔaar.

²⁶ Ɣän bäkɛ poth kɛ gua̱th tin thieek kɛ pämdä. Ɛn wani bäkɛ moc kɛ nhiaal kɛ gua̱a̱thdɛ, ala nhiaal mi ro̱ŋ.

²⁷ Kä bi jiɛn ruɔ̱ɔ̱p dɛykiɛn kuir, kä bi mundiɛn do̱ny kɛ ŋɔak ti ŋuan. Kä bikɛ cieŋ kɛ mal muundiɛn. Kä bi kɛn ɛ cu ŋa̱c ɛn ɣöö ɛ ɣän Kuoth Nhial, mi wa̱a̱ kuatni gäkädiɛn wä töl, mi wa̱a̱kɛ wä kän tetni nɛɛni tëë cakɛ jak kä kuaany.

²⁸ /Cakɛ bi̱lɛ nyɔk kɛ pec ɛ döör, kä /ci ley dɔaar kɛ bi̱lɛ nyɔk kɛ mi̱eth. Bikɛ cieŋ kɛ mal kä thilɛ ram mi bikɛ lɛ nyɔk kɛ jakɛ kä dual.

²⁹ Kä bäkɛ ka̱m kak dɛɛni wal mi gɔaa kɛ ɣöö /ci buɔth kɛ bi̱lɛ nyɔk kɛ näk rɛy wec, kä /cikɛ bilɛ cuuc kɛ kuethni dööri.

³⁰ Kä bikɛn ɛ cu ŋa̱c ɛn ɣöö ɛ ɣän Kuoth Nhial ni Kuothdiɛn, ta̱a̱ kɛɛl kɛ kɛ, kɛ ɣöö kɛn ji̱ thuɔk duëël I-thɛ-rɛl kɛ nɛɛkä, ruac ni ɣän Kuäär ni Kuoth Nhial.

³¹ Kɛ yɛn detkä, detkä tin la la̱a̱kä, kä ɛ ɣän Kuothdun, ruac ni ɣän Kuäär ni Kuoth Nhial.”