Yɛdh 33 - RUAC KUƆTH IN RƐL RƆ

Yieen I-thɛ-rɛl ni Yɛdh-ki-el

¹ Kä cu ruac Kuɔth Nhial ben kä ɣä wëë i̱,

² “Gat ran, ruacni kɛ nɛɛku, jio̱kni kɛ i̱, ‘Mi wa̱a̱ wec ka̱p ko̱r, kä kɛn ji̱ wec ɛmɔ cikɛ ram kɛl jakä yie̱e̱ndiɛn.

³ Kä mi wä ram min ca jakä yieen ko̱r wä nɛn ɛ ka̱pkɛ jɛ wi̱c, kä bɛ kaaŋ koth a lärɛ naath lär,

⁴ kä mi tëëkɛ ram mi ci jɔw kaaŋä liŋ kä /cɛ läär bi nhɔk, a bi ko̱r cop kä ba jɛ näk, bi riɛmdɛ pɛn ni wi̱i̱dɛ ɛn ram ɛmɔ.

⁵ Mi cɛ jɔw kaaŋä liŋ kä /kenɛ lui̱k liŋ, bi riɛmdɛ pɛn wi̱i̱dɛ. Kɛ ɣöö mi cɛ lui̱k liŋ, derɛ tëkdɛ kän.

⁶ Duundɛ ɣöö, mi nɛn yieen ko̱r ka̱pkɛ jɛ, kä /cɛ kaaŋ bi koth, kɛ ɣöö bɛ naath la̱r lär, kä bi ko̱r ben a bɛ kɛ ben näk, bikɛ li̱w kɛ dueerkiɛn, bi dueerkiɛn pɛn wi̱i̱ raam min yieen.’

⁷ “Inɔ, lö gat ran ɣän cä ji̱ jakä yieen thuɔk duëël I-thɛ-rɛl. Ji̱n liŋ ruacdä kä luek kɛ kɛ ruacdä.

⁸ Mi wa̱a̱ gua̱n dueeri wä jiök i̱, ‘Lö ji̱ dueeri yɛn ɛ puc bia dhil li̱w.’ Kä ji̱n /cu ruac kɛ ji̱ dueeri kɛ ɣöö bikɛ rɔ̱ ri̱t kä dueerkiɛn, a ji̱ dueeri li̱w kɛ dueerkiɛn, duundɛ ɣöö ɣän bä riɛmdiɛn la̱th wi̱i̱du.

⁹ Duundɛ ɣöö, mi ci ji̱ nyuɔɔni luek kä nyuɔɔnkiɛn, kä lökɛ lui̱kdu ɛ kɛn, kɛn bikɛ li̱w kɛ nyuɔɔnkiɛn, duundɛ ɣöö ji̱n bi tëkdu kän.”

Lät raam ɔ kä rɔaadɛ

¹⁰ “Täämɛ ji̱n gat ran, ruacni kɛ thok duëël I-thɛ-rɛl, bikɛ jiök i̱ ruac yɛn i̱, ‘Nyuɔɔnkɔ kɛnɛ dueerkɔ kɛ kɛn ci pɛn wi̱i̱da tɔ̱, kä ca nɛy cuc ɛ kɛn, kä dee nɛy kulɛ tëk i̱di?’

¹¹ Kä läri jɛ kɛ, ɛn ɣöö ce̱tnikɛ tëkdä, ɣän Kuäär ni Kuoth Nhial ɛn ɣöö, ɣän thilɛ mi nhɔakä kä lia̱a̱ ji̱ nyuɔɔni, mi cikɛ rɔ̱ ri̱t kä dueerkiɛn kɛ ɣöö bikɛ tëk, rietdɛ rɔ̱, rietdɛ rɔ̱ kä lät dueerikun, kɛ ɣöö ɛŋu bia li̱w ɔ lö thok duëël I-thɛ-rɛl?

¹² Kä ji̱n gat ran läri jɛ nɛɛku ɛn ɣöö /ci cuŋ ram mi gua̱n cuŋni bi kän mi cikɛ duer. Kä /ci dueer ram mi gua̱n dueeri bi näk, mi cɛ rɔ ri̱t dueerikɛ kä /ci ji̱ cuŋni bi tëk kɛ cuŋkiɛn mi cikɛ duer.

¹³ A cäŋɛ mëë cä ruac kɛ ji̱ cuŋni ɛn ɣöö ɛpuc bikɛ dhil tëk, kä mi wäkɛ ŋäth ni cuŋkiɛn a wäkɛ la̱t ni dueer, /ca cuŋkiɛn tɔ̱tɔ̱ bi tim, duundɛ ɣöö bikɛ li̱w kɛ kui̱ dueeri tɔ̱ cikɛn kɛ la̱t tɔ̱.

¹⁴ Kä cäŋ cä ruac kɛ ji̱ dueeri a jiökä kɛ i̱, ‘Ɛpuc yɛn bia li̱w,’ kä ŋotdɛ kɛn mi wäkɛ rɔ̱ ri̱t kä dueerkiɛn kä bikɛ la̱t ni min la ŋuɔ̱t kä mɔ cuɔ̱ɔ̱ŋ,

¹⁵ mi wä ji̱ dueeri rɔ̱ wä riet gɔɔyä, mi wäkɛ ŋɔak tëë cikɛn kɛ mac luɔ̱c ji̱kiɛn, a bikɛ luëëkä luɔ̱th kä thilɛ duer mi bikɛn ɛ nyɔk kɛ lätni, ɛpuc kɛn bikɛ tëk /cikɛ bi li̱w.

¹⁶ Thilɛ duer kɛl kä dueer tëë cikɛn kɛ la̱t mi ba nyɔk kɛ ti̱em ala mi jiääk kä kɛ. Kɛ ɣöö cikɛ la̱t ni ŋut kä mɔ cuɔ̱ɔ̱ŋ, ɛpuc kɛn bikɛ tëk.

¹⁷ “Kä ŋotdɛ ruac yɛn i̱, ‘Min lät Kuäär ɛ /ciɛ cuɔ̱ɔ̱ŋ,’ kä kɛ duɔ̱pkiɛn kɛn tɔ̱ ci tɔ̱ a cuŋ tɔ̱.

¹⁸ Kä mi ci ji̱ cuŋni rɔ̱ ri̱t cuŋnikiɛn a wa la̱t ni duer, bikɛ li̱w kɛ jɛ.

¹⁹ Kä mi wä ji̱ dueeri rɔ̱ ri̱t dueerikiɛn a wäkɛ la̱t ni cuŋ, ɛ puc bikɛ tëk kɛ jɛ.

²⁰ Kä ŋotdɛ ruac yɛn i̱, ‘Min lät Kuäär ɛ /ciɛ cuɔ̱ɔ̱ŋ.’ Aɣ thok duëël I-thɛ-rɛl ɣän bä yɛn diaal luk ce̱tnikɛ duɔ̱pkun.”

Lär pɛɛnä Jɛ-ru-tha-lɛm

²¹ Kɛ cäŋ kä dhieec, kä wäl päthni kɛ wäl rɛw runi tëë pɛ̈ckɛ nɛy, cu ram kɛl mi bar ɔ kä Jɛ-ru-tha-lɛm ben, kä cuɛ ɣä jiök i̱, “Ci wec pay pɛ̈ɛ̈n.”

²² Täämɛ ci buɔ̱m Kuɔth Nhial ben kä ɣä nikɛ thiaŋ a /ken pɛ̈ɛ̈c ni ben. Duundɛ ɣöö Kuoth Nhial cɛ thokdä lɛp kɛ thaak ëë bi cu cop kɛ ram min ci kään kɛ runwaŋ. Inɔ, cu thokdä rɔ lɛp /ka̱n lɛ ŋot kɛ di̱w di̱i̱w a /cä ruac luäŋ.

Nɛy tin ci kään kä Juda

²³ Kä cu ruac Kuɔth Nhial ben kä ɣä ɛn ɣöö,

²⁴ gat ran, kɛn nɛy ti cieŋ ti ɛn guäth ɛ ca pälɛ muun I-thɛ-rɛl ruac kɛ wäkɛ i̱, “A-bɛ-ram jɛn ɛ ram kɛl, kä cua jɛ ka̱m mun ala duŋdɛ. Kä ŋuan kɔn, ɛpuc ɛn mun ca jɛ ka̱m kɔn ala duŋdan.”

²⁵ Kɛ kui̱ ɛmɔ, ji̱n läri jɛ kɛ ci Kuäär ni Kuoth Nhial wee i̱, “Ci yɛn ri̱ŋ cam kɛɛl kɛ riɛmdɛ, kä pal yɛn kuth guääynikun, kä wuɔ̱thɛ riɛm piny, dërɛ wec ka̱n bä ala duŋdun?

²⁶ Kä yɛn ŋa̱thɛ ni thɛpnikun, kä lät yɛn ti jiäk, kä dhɔm ram ɔ ciek gua̱n thieekädɛ kä yɛ, dërɛ mun ka̱n bä ala duŋdun?”

²⁷ Läri kɛ mɛmɛ ɛn ɣöö ruac Kuäär ni Kuoth Nhial wëë i̱, “Ce̱tnikɛ tëkdä, ɛpuc kɛn nɛy tɔ̱ cieŋ gua̱thni ti ca päl tɔ̱, bakɛ näk ko̱o̱r. Kä nɛy tɔ̱ cieŋ rɛy ka̱a̱kni tɔ̱, bäkɛ ka̱m ley dɔaar kɛ ɣöö bakɛ cam ɛ kɛn. Kä nɛy tɔ̱ cieŋ gua̱thni tin buɔ̱m buɔ̱ɔ̱m tɔ̱ kɛnɛ kɔ̱a̱k, bakɛ näk ɛ juey.

²⁸ Ɣän bä mun jakä ba päl ni baaŋ a thil raan, kä bi buɔ̱m liakädɛ cu thuuk. Kä ba pääm I-thɛ-rɛl ba̱ny piny baaŋ a thilɛ ram mi bi rët kɛ kɛ.

²⁹ Kä bikɛn ɛ cu ŋa̱c ɛn ɣöö ɛ ɣän Kuoth Nhial, mi wa̱a̱ wec wä jakä pa̱lkɛ ni baaŋ a thil raan kɛ ɣöö ŋuan dueer tëë cikɛn kɛ la̱t.”

Luɔt ruac Yɛdh-ki-el

³⁰ Kä kɛ kui̱du, lö gat ran, kɛn nɛɛku ruackɛ kɛ kui̱du gëëkni käli kɛnɛ thuk duëli, ruackɛ kamnikiɛn kärɔ̱, jio̱k ram ɔ gua̱n thieekädɛ i̱, “Bër liŋ ruac in ɛ waa bä kä Kuoth Nhial.”

³¹ “Cukɛ ben kä ji̱ ce̱tkɛ min la naath a bä, kä cukɛ ben nyuur nhiamdu ce̱tkɛ mi kɛ nɛɛkä, cukɛ rieetku liŋ, kä /ken kɛn kɛ luɔ̱th. Pɛlkɛ ni ji̱ ɛ kɛn kɛ lëëpkiɛn, kä cikɛ lo̱ckiɛn la̱th kä ŋɔak tin jëkɛ.

³² Curi ce̱tnikɛ ram mi kɛt tuaari ti nhɔakɛ ɛ kɛn, ala ram mi tekɛ jɔw mi gɔaa mi puɔ̱ɔ̱t thom agɔaa. Cukɛ min latdi liŋ, duundɛ ɣöö /kenkɛ jɛ la̱th lät.

³³ Mi wä mɛmɛ cop, kä bɛ ben ala jɛn, bikɛ jɛ cu ŋa̱c ɛn ɣöö ci gök kɔŋ te rɛydiɛn.”