Yɛdh 32 - RUAC KUƆTH IN RƐL RƆ

Pa̱r Pɛro kɛnɛ I-jëp

¹ Kɛ cäŋ in jio̱l, kä wälrɛw päthni kɛ wäl rɛw runi mëë ta̱kɔ pɛɛcä, cu ruac Kuɔth Nhial ben kä ɣä i̱,

² gat ran, kɛt dit pärä kɛ kui̱ Pɛro kuäär I-jëp, jio̱k ni jɛ i̱, “Ji̱n ce̱tdi kɛ lony rɛy dööri, kä ce̱tdi kɛ nyaŋ rɛy yiëri, ku la thɔɔri ni rɔ rɛy kiɛriku, kä tuupi pi̱ kɛ ciöku, bi pi̱i̱ku cu nyon.

³ Kä ci Kuäär ni Kuoth Nhial mɛmɛ lar wëë i̱, ‘Rɛy dolä nɛɛni ti ŋuan ɣän bä cambakdä yuɔr wi̱i̱du, kä bä ji̱ thöt raar kɛ cambakdä.

⁴ Inɔ, ɣän bä ji̱ cu yuɔr raar, bä ji̱ cu jakä pɛn piny. Kä bä diit nhial diaal jakä camkɛ ji̱, kä bi ley dɔaar diaal ji̱ cam amäni mi cikɛ ria̱ŋ.

⁵ Ɣän bä ri̱ŋku kiɛth wuɔ̱thni päämni, kä bä löli thiäŋ kɛ ri̱ŋdu min ci duɔth.

⁶ Ɣän bä mun luäny kɛ riɛmdu min bi lo̱ny amäni wuɔ̱th päämni, kä bi yiër diaal thia̱a̱ŋ kɛ riɛmdu.

⁷ Mi wa̱a̱ ji̱ wä yuɔ̱th raar, ɣän bä pua̱a̱r kum, kä bä ciɛrkɛ jakä col. Bä cäŋ kum kɛ pua̱r, kä /ci buay path bi lɛ̈p.

⁸ Ɣän bä nyin nhial diaal tin la buɔy jakä muth wi̱i̱dun. Kä bi wi̱c muɔ̱ɔ̱n cua̱ muuth,’ ruac ni ɣän Kuäär ni Kuoth Nhial.

⁹ ‘Kä bä nɛy ti ŋuan jakä dual, mi wa̱a̱ yɛ naŋ dööri ti kɔ̱ŋ ala pɛ̈ɛ̈c. Wi̱i̱ni ti kui̱c yɛn kɛ.

¹⁰ Bä nɛy ti ŋuan jakä ga̱a̱c kɛ kui̱dun, bɛ kua̱rkiɛn lath kɛ kui̱dun. Mi wa̱a̱ thɛpdä wä caŋ nhiamdiɛn, /ci lathdiɛn bilɛ tekɛ pek, bɛ ramɔ lath kɛ kui̱ teekädɛ, kɛ cäŋ in pɛn kɛ ji̱.’ ”

¹¹ Kɛ ɣöö ci Kuäär ni Kuoth Nhial mɛmɛ lar i̱, “Bi kuäär Bɛ̈-bi-lɔn ji̱ mak.

¹² Ɣän bä nɛɛku jakä ka̱pkɛ ko̱o̱r ɛ rɛm mi bum bum, kɛn diaal nɛy tin bɛc ni kɛn kä döör diaal. Bikɛ liak I-jëp däk, kä bi nɛɛkɛ diaal li̱w.

¹³ Ɣän bä ɣɔ̱ɔ̱kiɛn tin te tuɔcni gekä pi̱i̱ni ti ŋuan näk. Kä thilɛ ram mi bi jɛ nyɔk kɛ do̱ny cio̱o̱k. Kä /ci barkaak ɣɔ̱ɔ̱k ɛ bi nyɔk kɛ do̱ny.

¹⁴ Inɔ, bä pi̱i̱kiɛn jakä wi̱er wi̱eer, kä bä pi̱ kiɛɛriɛn jakä lo̱ny ce̱tkɛ liɛɛth,” ruac ni ɣän Kuäär ni Kuoth Nhial.

¹⁵ “Mi wa̱a̱ mun I-jëp jakä pa̱lkɛ, mi wa̱a̱ tin diaal tin te muun wä woc, mi wa̱a̱ ti diaal tin cieŋ thi̱n näk, bikɛn ɛ cu ŋa̱c ɛn ɣöö ɛ ɣän Kuoth Nhial.

¹⁶ Mɛmɛ ɛ dit pärä, mi ba ga̱a̱mkɛ. Bi män dööri jɛ la gääm. Bi I-jëp kɛnɛ nɛɛkɛ diaal jɛ a gääm, ruac ni ɣän Kuäär ni Kuoth Nhial.”

Wä Pɛro ro̱o̱l jɔɔkni

¹⁷ Kɛ cäŋ kä wäl dhieec, kä pay in jio̱liɛn, kɛ wälrɛw runi mëë ta̱kɔ pɛɛcä, cu ruac Kuɔth Nhial ben kä ɣä wëë i̱,

¹⁸ “Gat ran, wieeni kɛ kui̱ ji̱ I-jëp, kä jäknikɛ kä piny, kɛɛl kɛnɛ män dööri tin buɔ̱m buɔ̱ɔ̱m, ro̱o̱l jɔɔkni pinyi kɛɛl kɛ nɛy tëë ci li̱w ni mëë.

¹⁹ ‘Kä ɛŋa mi lenyi kɛ gɔɔy? Wër piny, bi wä lɔ̱ɔ̱ŋ kɛɛl kɛ nɛy tin thil kuoth!’

²⁰ Bikɛ wä te kɛɛl kɛ nɛy tëë na̱kɛ kɛ ko̱r. Ji̱ I-jëp bakɛ näk ko̱o̱r, kä ba jɛ naŋ kɛɛl kɛnɛ nɛɛkɛ.

²¹ Rɛy kɔ̱kä kunyä, bi bööth tin buɔ̱m buɔ̱ɔ̱m ruac kɛ kui̱ I-jëp kɛnɛ nɛy tin la lua̱kɛ jɛ wäkɛ i̱, ‘Kɛn cikɛ ben piny, a tekɛ kɛɛl kɛ nɛy tin thil kuoth ro̱o̱l jɔɔkni, kɛnɛ nɛy tëë na̱kɛ ko̱o̱r.’

²² “Ɛn wani te A-thi-ri-ya thi̱n, kɛnɛ buɔ̱ndɛ kɛɛliw, ca kɔ̱a̱kiɛn go̱o̱lni jɛ, kɛn diaal na̱kɛ kɛ ko̱o̱r.

²³ Kä ca kɔ̱a̱k kunyädiɛn la̱th ni pinyi ro̱o̱l jɔɔkni. Kä te rɛmdɛ tɔ̱ɔ̱cä gekä kɔ̱kä kunyädɛ. Kä nɛy diaal tëë jak naath kä dual teekä cikɛ li̱w, cakɛ näk ko̱o̱r.

²⁴ “Kä Ee-lam ɛn wani, kä te nɛɛkɛ diaal gekä kɔ̱a̱k kunyädɛ. Kɛn diaal cakɛ näk ko̱o̱r, kɛn nɛy diaal tëë jakɛ naath kä dual teekä, cikɛ wä ro̱o̱l jɔɔkni kɛn nɛy tin thil kuoth. Ruɔ̱t kɛ pöcdiɛn kɛɛl kɛ nɛy tëë ci wä ro̱o̱l jɔɔkni.

²⁵ Ci kɛn Ee-lam lät kä dhaŋ rɛy nɛɛni tëë ca näk, kɛnɛ buɔ̱n nɛɛnikɛ diaal gekä kɔ̱a̱k kunyädɛ. Kɛn diaal kɛ nɛy ti thil kuoth, kä cakɛ näk kɛ ko̱r. Kɛ ɣöö cikɛ naath jakä dual mëë tekɛ teekä, ruɔ̱tkɛ pöcdiɛn kɛɛl kɛ nɛy tëë ci wä ro̱o̱l jɔɔkni, cakɛ la̱th guäth kɛl kɛ nɛy tin ca näk.

²⁶ “Kä te Mɛ-cɛk kɛnɛ Tu-bal ɛn wani, kɛɛl kɛ nɛɛkiɛn tin ŋuan kä cakɛ go̱l kɛ kɔ̱a̱k kunyädiɛn, Kä kɛn diaal kɛ nɛy ti thil kuoth, cakɛ näk ko̱o̱r kɛ ɣöö cikɛ naath jakä dual mëë tëk kɛn.

²⁷ Kä /ka̱nkɛ kony kɛɛl kɛ wäth köör tëë wal tëë ca kony kɛɛl kɛ yio̱w kööriɛn, tëë ca thɛpnikiɛn caak ni wuɔ̱thkiɛn piny. Kä ci duäc dueerikiɛn lɔ̱ɔ̱ŋ ni cɔ̱ɔ̱nikiɛn. Kɛ ɣöö cikɛ naath jakä dual mëë tekɛ teekä.

²⁸ Inɔ, ji̱n ba ji̱ dhil dup, kä bi cu cieŋ kɛɛl kɛ nɛy tin thil kuoth, kɛnɛ nɛy tëë ca näk ko̱o̱r.

²⁹ “Ɛn wani te Ɛ-dɔm thi̱n kɛnɛ kua̱rkɛ kɛ ruëëckɛ diaal, nikɛ buɔ̱mdiɛn kɛɛl cukɛ tɔ̱ɔ̱c kɛɛl kɛ nɛy tëë ca näk ko̱o̱r. Cukɛ cieŋ kɛɛl kɛ nɛy tin thil kuoth, nɛy tëë ci wä ro̱o̱l jɔɔkni.

³⁰ “Ɛn wani te ruëëc kuec caam thi̱n kɛn diaal, kä te ji̱ Dhi-don diaal thi̱n, nɛy tëë ci wä piny a po̱ckɛ kɛɛl kɛ nɛy tëë ca näk, kɛ kui̱ kä ɣöö cikɛ naath jakä dual kɛ kui̱ bumädiɛn. Cieŋkɛ kɛɛl kɛ nɛy tëë thil kuoth nɛy tëë ca näk ko̱o̱r, kä bikɛ pöcdiɛn rut kɛɛl kɛ nɛy tëë ci wä ro̱o̱l jɔɔkni.

³¹ “Kä bi kuäär I-jëp kɛnɛ rɛmdɛ nɛy tëë ca näk ko̱o̱r nɛn, Kä ba jɛ cu bum kɛ kui̱ rɛ̈mdɛ min ca näk ko̱o̱r, ruac ni Kuäär ni Kuoth Nhial.

³² A cäŋɛ ni mëë cɛ naath jakä dual mëë tëë teekä. Kɛ kui̱ ɛmɔ, jɛn Pɛro kɛnɛ nɛɛkɛ tin ŋuan, bikɛ tɔ̱ɔ̱c kɛɛl kɛ nɛy tin thil kuoth, kɛɛl kɛ nɛy tëë ca näk ko̱o̱r, ruacni ɣän Kuäär ni Kuoth Nhial.”