Yɛdh 31 - RUAC KUƆTH IN RƐL RƆ

Päär I-jëp kɛ jiath thëëp

¹ Kɛ cäŋ kä kɛl kä pay in diɔ̱ɔ̱kdiɛn, kɛ wälkɛl runi mëë ta̱kɔ pɛɛcä, cu ruac Kuɔth Nhial ben kä ɣä wëë i̱,

² gat ran ruacni kɛ kuäär I-jëp ni Pɛro kɛnɛ nɛɛkɛ jio̱kni jɛ i̱, “Kä ɛŋa mi päär di̱tdɛ kɛ ji̱?

³ Kä ji̱n car A-thi-ri-ya, mëë ce̱tkɛ jiath thëëp kä Lɛ-ba-nɔn, mëë te karkɛ kɛ ti̱eep mi gɔaa. Kä jɛn bärɛ ɛlɔ̱ŋ, kä cup biɛɛdɛ ni pua̱a̱ri.

⁴ Kä cu pi̱ ɛ jakä pith, cu pi̱ piɛny muɔ̱ɔ̱n ɛ jakä bär. Kiɛr lo̱ny pi̱kiɛn, kɛ gua̱a̱th in ca jiath pith thi̱n. Kä wä lönydiɛn kä jiɛn diaal tin te rɛy ruɔ̱ɔ̱p.

⁵ Inɔ, cu jiath ɛmɔ bär ni wi̱cdɛ, kä jiɛn diaal tin te rɛy dɔaar, kä cu ji̱thkɛ piith ala pa̱n pa̱a̱n, kä cu karkɛ piith ɛ bär, kɛ ɣöö te tharɛ kɛ pi̱ ti ŋuan.

⁶ Kä cu diit nhial diaal duëlkiɛn la̱t nɔa̱a̱knikɛ, kä cu ley dɔaar diaal di̱eth piny karikɛ, kä cu döör diaal tin di̱t cieŋ ti̱pädɛ.

⁷ Kä cuɛ gɔaa ɛlɔ̱ŋ ɛn jiath, kä bär karkɛ, kɛ ɣöö ci ciökɛ räth ni piny, ni rɛy pi̱i̱ni tin ŋuan.

⁸ Kä jiɛn thëëp diaal tin te rɛy kakä Kuɔth thilɛ jiath mi päär kɛ jɛ, thilɛ jiath mi tɔ̱c mi päär nɔa̱a̱kɛ kɛ jɛ. Kä thilɛ jiath kuëël mi päär karkɛ kɛ jɛ, Thilɛ jiath kä jiɛn kakä Kuɔth mi päär gɔɔydɛ kɛ jɛ.

⁹ Ɛ ɣän lät jɛ agɔaa ɔ kɛɛl kɛ karkɛ tin ŋuan, kä jiɛn diaal kä E-dɛn tin te rɛy kakä Kuɔth, go̱o̱rkɛn ɣöö deekɛ ce̱tkɛ jɛ.”

¹⁰ Kɛ kui̱c ɛmɔ cu Kuäär ni Kuoth Nhial ruac kɛ wee i̱, “Jɛn jiath cɛ piith a bär a ci biɛɛdɛ cop ni pua̱a̱ri, kä cɛ rɔ cu liak kɛ bärɛ.

¹¹ Ɣän cä jɛ la̱th tetni rueecä dööri, kɛ ɣöö bɛ jɛ lätkä mi päär kɛ nyuɔɔnkɛ. Ɣän cä jɛ yuɔr dɔɔr kɛ kui̱ jiäknikɛ.

¹² Kä bi jur tin bɛc nikɛn kä döör jɛ jɔap piny kä ba jɛ ba̱ny piny. Kä bi karkɛ pɛn wi̱i̱ päämni kɛnɛ rɛy löli diaal. Kä bi ji̱thkɛ te rɛy pi̱i̱ni a cikɛ töl, kä bi döör wec muɔ̱ɔ̱n diaal jiɛɛn ti̱pädɛ ba jɛ ba̱ny piny.

¹³ Cieŋ diit nhial diaal wi̱i̱ jiaath in ci tɛɛth, kä cieŋ ley dɔaar diaal kamni karikɛ.

¹⁴ “Kɛ kui̱ kä ti̱ti̱ diaal ɛ ɣöö bɛ thil jiath mi bi rɔ lɛ nyɔk kɛ liak kɛ bärɛ kä jiɛn tin pith gekä pi̱i̱ni, mi bi biɛɛdɛ pua̱a̱r cop. Kä thilɛ jiath mi dɔ̱ŋ mi bi bär ce̱tkɛ jɛ kä jiɛn tin ca wac agɔaa. Kɛ ɣöö ca kɛn diaal ka̱m lia̱a̱, bikɛn diaal wä jɔɔkni, bikɛ li̱w kɛɛl kɛ nɛy diaal tin kɔ̱ŋ, nɛy diaal tin li̱w.”

¹⁵ Kɛ kui̱ ɛmɔ ci Kuäär ni Kuoth Nhial wee i̱, “Kɛ jɛn cäŋ ɔ ba kony ni jɛ mɔ, bä mun kɔ̱a̱kdɛ muɔl thi̱n a bɛ jɛ kum. Kä bäkɛ kum kä bä pi̱w yiëërɛ cu ka̱p cuɔ̱ŋ, a bi pi̱kɛ tin ŋuan cu thuɔ̱k. Ɣän bä Lɛ-ba-nɔn moc kɛ bieyni pärä kɛ ɣöö paarɛ jiath, kä jiɛn diaal tin te piny wec parkɛ jɛ bä.

¹⁶ Kä cua̱ döör jakä lathɛ kɛ jɔw pɛɛnä jiaath, mëë jakä jɛ kä li̱w kɛɛl kɛ jɔɔk. Kä ka̱a̱k Kuɔth diaal kɛ mɛ̈ɛ̈k jiɛn Lɛ-ba-nɔn tin gɔw, kɛ jiɛn diaal tëë ca wac agɔaa, bakɛ wä bum ni muun jɔɔkni pinyi.

¹⁷ Kä nɛy tëë cieŋ ti̱pädɛ, kɛnɛ nɛy tëë ci mat kɛ jɛ rɛy dööri, cikɛ li̱w kɛɛl kɛ jɛ, cikɛ rɔ̱ ma̱t nɛy tëë ca näk ko̱o̱r.

¹⁸ “Kä ɛ jiath in mith kä jiɛn E-dɛn päär wuɔ̱tdɛ kɛnɛ gɔɔydɛ kɛ ji̱ mɔ? Täämɛ ji̱n yɛnɛ jiɛn E-dɛn ba yɛ naŋ ro̱o̱l jɔɔkni pinyi. Bi rɔ ma̱t nɛy tin /ci tɔ̱a̱ nɛɛ Kuɔth, nɛy tëë ca näk ko̱o̱r. Kä jɛn jiath ɛmɛ ɛ Kuäär I-jëp ni Pɛro kɛnɛ nɛɛkɛ diaal, ruac ni ɣän Kuäär ni Kuoth Nhial.”