Yɛdh 30 - RUAC KUƆTH IN RƐL RƆ

Bi Kuoth Nhial I-jëp duäc

¹ Kä cu ruac Kuɔth Nhial ben kä ɣä i̱,

² gat ran lat ruac go̱o̱kä, larɛ ɛn ɣöö mɛmɛ laarɛ Kuäär ni Kuoth Nhial wëë i̱, “Wieeɛ i̱, ‘Cäŋ däkä a bëëni!’

³ Kɛ ɣöö ci cäŋ thia̱k, ci cäŋ luɔ̱k Kuɔth Nhial thia̱k. Bɛ la cäŋ mi tekɛ pua̱r, ɛ gua̱a̱th mi bi da̱k kɛ döör.

⁴ Bi ko̱r ben kä I-jëp, kä bɛ la cäŋ rikä kä Kuc, mi waa ji̱ I-jëp wä näk, kä ba kuakɛ diaal naŋ, kä ba jɛ ba̱ny piny a cɛ da̱k.

⁵ Kä Kuc kɛnɛ Put kɛ Lud kɛ wi̱i̱ Ä-rab-ya diaal kɛ Lib-ya amäni nɛy tin ca mat ruac la̱t kɛ I-jëp ba kɛn diaal näk ko̱o̱r.”

⁶ Kä cu Kuoth Nhial mɛmɛ lar wëë i̱, “Nɛy tɔ̱ ba I-jëp luäk tɔ̱ bakɛ näk. Kä bi liak bumädɛ kɛɛliw thil. A känɛ nikä Mig-dol a wä nikä Thi-nim, ba kɛn diaal näk rɛydɛ kɛ ko̱r, ruac ni ɣän Kuäär ni Kuoth Nhial.

⁷ Bakɛ päl ni baaŋ ce̱tkɛ wi̱i̱ tin kɔ̱ŋ, tin ca päl ni baaŋ a thil naath, kä bi ciëëŋkɛ te ni baaŋ, ce̱tkɛ ciëëŋ tin kɔ̱ŋ tin te ni baaŋ.

⁸ Kä bikɛn ɛ cu ŋa̱c ɛn ɣöö ɛ ɣän Kuoth Nhial, mi wa̱a̱ I-jëp wä tɔ̱a̱ŋ kɛ mac, mi wa̱a̱ nɛy diaal tin lua̱kɛ jɛ wä dup.

⁹ “Kɛ jɛn cäŋ ɛmɔ, bi ja̱a̱k jiɛɛn kä ɣä kɛ babuuri, kɛ ɣöö bikɛ Kuc in cieŋ malä wä jakä dual. Bikɛ dual kɛ cäŋ in wa I-jëp wä tɔ̱ŋ!”

¹⁰ Kä cu Kuäär ni Kuoth Nhial wee i̱, “Ɣän bä ria̱ŋ I-jëp moc kɛ pek, kɛ tet Kua̱r Bɛ̈-bi-lɔn ni Nɛ-bu-kad-nɛ-dhar.

¹¹ Jɛn kɛnɛ nɛɛkɛ tin te kɛɛl kɛ jɛ, kɛn nɛy tin bɛc ni kɛn rɛy dööri, bikɛ ben ba wec ben däk. Kä bikɛ ko̱r ben tɛr kɛ I-jëp, bikɛ wec thiäŋ kɛ nɛy tin ca näk.

¹² Ɣän bä yiër jakä do̱n, kä bä wec cu kɔak kɛ tet nɛɛni tin la̱tkɛ jiäk. Kä bä mun jakä pa̱lkɛ, kɛnɛ tin diaal tin te thi̱n kɛ tet juri. Ɛ ɣän Kuoth Nhial lat jɛ mɔ.”

¹³ Kä cu Kuäär ni Kuoth Nhial wee i̱, “Ɣän bä kuth guäyni däk, kä bä pua̱ny tin ca la̱t kä Mɛm-pith däk. Kä bɛ cu thil ram mi bi lɛ ruëc kä I-jëp. Kä bä mun I-jëp cu moc kɛ dual.

¹⁴ Ɣän bä Path-roth jakä day, kä bä Dho-an waŋ, kä bä The-bɛth luk.

¹⁵ Ɣän bä ŋɛ̈ɛ̈nydä jakä wä kä Thin, ɛn min la buɔ̱m I-jëp, kä bä ji̱ The-bɛth tin ŋuan ŋuɔk raar.

¹⁶ Ɣän bä I-jëp tɔ̱a̱ŋ kɛ mac, kä bi Thin te rikä mi di̱i̱t. Kä ba päny The-bɛth da̱k piny, kä bi Mɛm-pith te rik ni ciaŋ.

¹⁷ Kä ba ŋuɛ̈tni Ɔn kɛnɛ Pi-bɛ-thɛth näk ko̱o̱r. Kä ba duɔth nɛɛni tin kɔ̱ŋ naŋ ala pɛ̈ɛ̈c.

¹⁸ Kä bi cäŋ a muuth kä Ta-pa-neth, mi wa̱a̱ buɔ̱m I-jëp wä woc, mi wa̱a̱ buɔ̱m liakädɛ moc kɛ pek. Kä ba wec kum ɛ pua̱a̱r, kä ba ji̱ wi̱i̱nikɛ naŋ ala pɛ̈ɛ̈c.

¹⁹ Ɛ jɛn luk in bä luk ni I-jëp ɛnɔ. Ɛ jɛn bikɛn ɛ cu ŋa̱c ɛn ɣöö ɛ ɣän Kuoth Nhial.”

Ruac go̱o̱kä mi jiääk kɛ kui̱ Pɛro

²⁰ Kɛ cäŋ kä bärɔw kä pay in jio̱l, kɛ wälkɛl runi mëë ta̱kɔ pɛɛcä, cu ruac Kuɔth Nhial ben kä ɣä wëë i̱,

²¹ “Gat ran, ɣän cä wuɔ̱ɔ̱k kua̱r I-jëp ni Pɛro to̱l. Kä thilɛ ram mi ci jɛ yiɛn kɛ ɣöö bɛ gɔaa, kiɛ ram mi ci jɛ rith kɛ yieen buɔ̱ɔ̱tni, kɛ ɣöö bɛ buɔ̱m a bɛ thɛp luäŋ kɛ ka̱p ko̱o̱r.

²² Kɛ kui̱ ɛmɔ ci Kuäär ni Kuoth Nhial mɛmɛ lar ɛn ɣöö ɣän gakä kɛ kuäär I-jëp ni Pɛro, bä wuɔ̱ɔ̱kɛ töl. Ɛn wuɔ̱ɔ̱k in gɔaa kɛnɛ wuɔ̱ɔ̱k ëë cä kɔŋ to̱l kɛ nhiam. Kä bä thɛp jakä pɛn tetädɛ.

²³ Ɣän bä ji̱ I-jëp cu riaw rɛy dööri diaal. Kä bäkɛ kiɛth rɛy ɣɔaa kɛɛliw.

²⁴ Ɣän bä wuɔ̱ɔ̱k kua̱r Bɛ̈-bi-lɔn jakä bum, kä bä thɛpdä la̱th tetädɛ, duundɛ ɣöö bä wuɔ̱ɔ̱k Pɛro töl. Kä bɛ cu wiee nhiam kua̱r Bɛ̈-bi-lɔn kɛ wiee raam mi ca moc kɛ buɔ̱t mi bɛc ɛlɔ̱ŋ.

²⁵ Bä kua̱r Bɛ̈-bi-lɔn moc kɛ buɔ̱m, duundɛ ɣöö bi Pɛro thil buɔ̱m. Kä bikɛn ɛ cu ŋa̱c ɛn ɣöö ɛ ɣän Kuoth Nhial, mi wa̱a̱ thɛpdä wä la̱th tetdä kua̱r Bɛ̈-bi-lɔn. Kä bɛ jɛ tɛr ko̱r kɛ mun I-jëp.

²⁶ Ɣän bä ji̱ I-jëp diaal cu riaw kä rɛy dööri, kä bäkɛ kiɛth rɛy wi̱i̱ni diaal. Kä bikɛ jɛ cu ŋa̱c ɛn ɣöö ɛ ɣän Kuoth Nhial.”