Yɛdh 3 - RUAC KUƆTH IN RƐL RƆ

¹ Kä cu Kuoth ruac kɛ ɣä wëë i̱, “Gat ran, cam min ca ka̱m ji̱, cam warɛgak ɛmɛ, kä wër ruacni kɛ ji̱ thuɔk duëël I-thɛ-rɛl.”

² Kä cua̱ thokdä lɛp, kä cuɛ ɣä ka̱m warɛgak kɛ ɣöö bä jɛ cam.

³ Kä cuɛ ɣä jiök i̱, “Gat ran, cam warɛgak ɛmɛ, min cä ka̱m ji̱, thiäŋ jicdu kɛ jɛ.” Kä cua̱ jɛ cam, kä cua̱ jɛ jek thokdä, limɛ ce̱tdɛ nikɛ tuaar.

⁴ Kä cuɛ ruac kɛ ɣä wëë i̱, “Gat ran, wër kä ji̱ thuɔk duëël I-thɛ-rɛl wër lätnikɛ ruacdä.

⁵ Kɛ ɣöö /ca ji̱ jäkä do̱r mi kui̱ci ruacdiɛn mi bum thokdiɛn, kɛ ji̱ thuɔk duëël I-thɛ-rɛl.

⁶ Kä /ca ji̱ jäkä rɛy dööri ti ŋuan ti kui̱ci ruacdiɛn kä bum thokdiɛn tin /ci rieetkiɛn dee ŋa̱c. Kɛ thuɔ̱k mi ja̱kä ji̱ kä kɛ, dee kɛn ji̱ liŋ.

⁷ Duundɛ ɣöö /ci thok duëël I-thɛ-rɛl ruacdu bi liŋ, kɛ ɣöö /cikɛn li̱eŋ ruacdä go̱o̱r. Kɛ ɣöö ji̱ thuɔk duëël I-thɛ-rɛl bum wuɔ̱thkiɛn, kä /cikɛ ruac liŋ.

⁸ Kä nɛnɛ, ɣän bä jak ni wi̱cdu kä bum ce̱tnikɛ buɔ̱m wecdiɛn.

⁹ Bä jɛ jakä bum ce̱tnikɛ guɛɛy in bum ni jɛn, bä wi̱cdu jakä bum ce̱tnikɛ lɛ̈l. /Cu dual kɛ kɛ, kä /cu ga̱a̱c kɛ guecdiɛn kɛ ɣöö kɛ ji̱ thuɔk duëël mi ci kac raar.”

¹⁰ Kä cu Kuoth ruac kɛ ɣä wëë i̱, “Gat ran, rieetkä tin la̱tdä ji̱ liŋkɛ kɛ ji̱thku kä käpkɛ agɔaa kɛ lɔcdu.

¹¹ Kä inɔ, ji̱n wër kä pɛ̈ɛ̈c tin la nɛɛku, wër ruacni kɛ kɛ, kä jio̱kni kɛ i̱, ‘Mɛmɛ, ɛ min ci Kuäär ni Kuoth Nhial ɛ lar’, a cäŋ liŋ kɛn ɛ kiɛ /cikɛn ɛ liŋ.”

Yɛdh-ki-el jɔk Kiɛɛr Kɛ-bar

¹² Kä cu yiëë Kuɔth ɣä kap nhial, kä cua̱ jɔw mi di̱i̱t liŋ jɔkdä ruacɛ wëë i̱, “Liakɛ gɔɔy Kuɔth Nhial rɛy puɔ̱rä.”

¹³ Kä cua̱ jɔw gɔ̱ɔ̱k leyni tin tëk liŋ min cuɔthkɛ rɔ̱ kɛ̈l kɛ̈ɛ̈li, kɛnɛ gi̱r gi̱i̱r wi̱el wi̱eeli gëëknikiɛn, ɛ jɔw mi di̱i̱t ɛlɔ̱ŋ.

¹⁴ Kä cu yiëë Kuɔth ɣä kap nhial, kä cuɛ ɣä naŋ. Cua̱ wä kɛ ŋɛ̈ɛ̈ny kɛnɛ jiääk lɔaac, kä te buɔ̱m Kuɔth Nhial kɛɛl kɛ ɣä.

¹⁵ Kä cua̱ ben kä pɛ̈ɛ̈c tëë cieŋ gekä Kiɛɛr Kɛ-bar kä Tel-a-bib. Kä cua̱ wä ɛn wi̱ni kä kɛ, cua̱ nyuur kɛɛl kɛ kɛ ɛn wi̱ni, kä cuɛ ɣä di̱w kɛ ni̱n da̱ŋ bärɔw.

Kuëny Kuɔth kɛ Yɛdh-ki-el ala Gääŋ

¹⁶ Kɛ thuɔ̱k ni̱ni da̱ŋ bärɔw, cu ruac Kuɔth Nhial ben kä ɣä, wëë i̱,

¹⁷ “Gat ran, ɣän cä ji̱ jakä gääŋ thuɔk duëël I-thɛ-rɛl. Mi wi̱i̱ riet wä liŋ kä ɣä, kä bikɛ cu la̱r lui̱kdä.

¹⁸ Kä mi cä gua̱n nyuɔɔni jiök i̱, ‘Ji̱n bi rɔ dhil nikɛ lia̱a̱ ɛ puc,’ kä thilɛ lui̱k mi bi la̱rkɛ, kiɛ bi gua̱n nyuɔɔni luek kɛ kui̱ nyuɔɔnikɛ, kɛ kui̱ kä ɣöö bɛ kään. Kɛn ji̱ nyuɔɔni tɔ̱tɔ̱ bikɛ li̱w kɛ kui̱ dueerikiɛn, duundɛ ɣöö bä riɛmdiɛn thiec kä ji̱.

¹⁹ Duundɛ ɣöö, mi wi̱i̱ ji̱ nyuɔɔni wä luek kä nyuɔɔnkiɛn, kä bikɛ jɛ lo̱k ɛn ɣöö rietkɛ rɔ̱ dueerikiɛn, bi kɛ li̱w kɛ dueerkiɛn. Duundɛ ɣöö ji̱n bi tëkdu kän.

²⁰ Kä, mi wä ji̱ cuŋni rɔ̱ ri̱t kä cuŋkiɛn a wä kɛn la̱t ni dueer, mi wa̱a̱ mi bɛ kɔ̱thikä wä la̱th nhiamdiɛn bikɛ li̱w, kɛ ɣöö /keni kɛ luek, bikɛ li̱w kɛ dueerkiɛn, kä lätkiɛn tëë gɔw tëë cikɛn kɛ la̱t /cakɛ bi tim. Duundɛ ɣöö bi riɛmdiɛn te tetniku.

²¹ Duundɛ ɣöö, mi wi̱i̱ ji̱ cuŋni wä luek, kɛ ɣöö /cikɛ duer bi la̱t, kä cikɛ luekdu liŋ a /kenkɛ duer la̱t, ɛ puc kɛn bikɛ tëk kɛ ɣöö cikɛ luek liŋ, kä bi tëkdu kän.”

Ta̱a̱ Yɛdh-ki-el kä rɔa kɛ di̱ewdɛ

²² Kä cu buɔ̱m Kuɔth tekɛ ɣä kɛɛl ɛn wani. Kä cuɛ ruac kɛ ɣä wëë i̱, “Jiɛcni rɔ nhial, wër rɛy lo̱o̱lä, ɛn wani ɣän bä wä ruac kɛ ji̱.”

²³ Kä cua̱ rɔ jiɛc cua̱ wä rɛy lo̱o̱lä, cua̱ gɔɔy Kuɔth Nhial nɛn tëë cuŋä ɛn wani, ce̱tnikɛ gɔɔy ëë cä kɔŋ nɛn mëë ta̱a̱ jɔk Kiɛɛr Kɛ-bar, kä cua̱ rɔ yuɔr piny buupä.

²⁴ Kä cu yiëë Kuɔth ben rɛydä, kä cuɛ ɣä jakä cuŋ kɛ ciökä. Kä cuɛ ruac kɛ ɣä wëë i̱, “Wër gäkni rɔɔdu dueelu.

²⁵ Kɛ kui̱du, lö gat ran, ba ji̱ yian kɛ röök kɛ ɣöö /ci bi lɛ jiɛɛn rɛy nath.

²⁶ Kä bä lɛpdu jakä dɔp nyääru nhial, kɛ ɣöö /ci bi lɛ tekɛ lua̱ŋ mi lueki kɛ. Kɛ ɣöö kɛ ji̱ thuɔk duëël mi ci kac raar.

²⁷ Duundɛ ɣöö mi wa̱a̱ ruac kɛ ji̱, ɣän bä thokdu lɛp, kä bikɛ jiök i̱, ‘Mɛmɛ ɛ min ci Kuäär ni Kuoth Nhial ɛ lar.’ A nɛy tin görkɛ li̱eŋdɛ liɛŋkɛ jɛ kä a nɛy tin lökɛ li̱eŋdɛ lo̱kɛ, kɛ ɣöö kɛ ji̱ thuɔk duëël mi ci kac raar.”