Yɛdh 29 - RUAC KUƆTH IN RƐL RƆ

Ruac go̱o̱kä mi jiääk kɛ kui̱ I-jëp

¹ Kɛ cäŋ kä wälrɛw kä pay in wäliɛn kɛ ruɔ̱n in wäliɛn mëë ta̱kɔ pɛɛcä cu ruac Kuɔth Nhial ben kä ɣä i̱,

² “Gat ran lucni wi̱i̱du Pɛro kuäär I-jëp, kä lätni jɛ ruac go̱o̱kä mi jiääk kɛnɛ ji̱ I-jëp diaal.

³ Ruacni larɛ ɛn ɣöö ɛ Kuäär ni Kuoth Nhial i̱, ‘Ɣän gakä kɛ ji̱ lö kuäär I-jëp ni Pɛro ji̱n nyaŋ in di̱i̱t in ci tɔ̱ɔ̱c däär kiɛɛr ruaci i̱, “Kir ɛ duŋdä cä jɛ lät kä rɔɔdä.”

⁴ Ɣän bä yieethni la̱th jio̱o̱mdu, kä bä rɛc yiëëru jakä dɔp kuacniku. Ɣän bä ji̱ yuɔ̱th raar rɛy yiëëru kɛɛl kɛ rɛckɛ diaal a cikɛ dɔp kuacniku.

⁵ Ɣän bä ji̱ yuɔr ni rɛy dɔaar, ji̱n yɛnɛ rɛc yiëëru diaal. Bia wä pɛn ni rɛy dɔaar mi day, kä /ca yɛ bi rol kä /ca yɛ bi kony. Ɣän cä ji̱ thöp diit kɛnɛ ley wec muɔ̱ɔ̱n ala mi̱ethdiɛn.

⁶ Inɔ, bi ji̱ I-jëp diaal ɛ cu ŋa̱c ɛn ɣöö ɛ ɣän Kuoth Nhial. Kɛ ɣöö ci ce̱tnikɛ guɔ̱t kä ji̱ thuɔk duëël I-thɛ-rɛl.

⁷ Mɔ cikɛ ji̱ käp ɔ kɛ tetkiɛn, bi cu tööl, la temi wuɔ̱ɔ̱kiɛn diaal. Kä mɔ cikɛ rɔ̱ nhiɛt kɛ ji̱ mɔ, /ci ciökiɛn la cuŋ kɛ thilu lua̱ŋ.’ ”

⁸ Kɛ kui̱ ɛmɔ, mɛmɛ larɛ Kuäär ni Kuoth Nhial wëë i̱, “Ɣän bä ko̱r nöŋ ji̱, kä bä naath kɛnɛ ley diaal ŋuɔk raar kä ji̱.

⁹ Kä bi mun I-jëp cua̱ luɔ̱t mi ca päl. Kä bikɛ jɛ cu ŋa̱c ɛn ɣöö ɛ ɣän Kuoth Nhial. “Kä kɛ ɣöö ci jɛ lar i̱, ‘Jɛn Kir ɛ duŋdä lätdɛ ɣän,’

¹⁰ kɛ kui̱ ɛmɔ, ɣän gakä kɛ ji̱, kä gakä kɛ yiërku, ɣän bä mun I-jëp cu jakä gua̱a̱th mi ca päl a thil raan, a känɛ jɛ ni kä Mig-dol a wä mäni Thi-nim, a räth ni këthdu kɛ Kuc.

¹¹ Thil ram mi bi rët kɛ jɛ, kä thil cio̱o̱k lɛ̱̈ɛ̱̈ mi bi jɛ dɔany. /Ca jɛ bi ciɛŋ kɛ pek runi ti jiɛn ŋuaan.

¹² Ɣän bä mun I-jëp jakä pa̱lkɛ a thil raan ce̱tnikɛ wi̱i̱ tin kɔ̱ŋ. Kä ba ciëëŋkɛ päl baaŋ kɛ run ti jiɛn ŋuaan ce̱tnikɛ wi̱i̱ ti ca päl röli tin kɔ̱kiɛn. Ɣän bä ji̱ I-jëp riaw rɛy dööri, kä bäkɛ kiɛth rɛy wi̱i̱ni.”

¹³ Wi̱i̱kä ti̱ti̱ diaal Kuäär ni Kuoth Nhial wëë i̱, “Kɛ thuɔ̱k runi ti jiɛn da̱ŋ ŋuaan, ɣän bä ji̱ I-jëp ruɔ̱ɔ̱l rɛy dööri tëë cakɛ riaw kä thi̱n.

¹⁴ Bä I-jëp nyɔk kɛ luc gɔɔydɛ, kä bä kɛ nyɔk kɛ luuc muun Path-roth, in la mundiɛn, kä bikɛ cu tekɛ kuäär mi tɔt ɛn wani.

¹⁵ Kä bi kuɛ̈ɛ̈ ni kuäärɛ ɛlɔ̱ŋ rɛy kuääri, kä /cikɛ rɔ̱ bilɛ nyɔk kɛ kap nhial rɛy dööri. Kä bäkɛ jakä kuiy kɛ ɣöö /cikɛ döör bilɛ nyɔk kɛ ruëc.

¹⁶ Kä /ci ji̱ I-thɛ-rɛl rɔ̱ bi nyɔk kɛ ŋäth ji̱ I-jëp. Bikɛ dueerkiɛn tim, mi wäkɛ rɔ̱ wä ri̱et I-jëp kɛ luäk. Kä bikɛ jɛ cu ŋa̱c ɛn ɣöö ɛ ɣän Kuäär ni Kuoth Nhial.”

Bi Kuäär ni Nɛ-bu-kad-nɛ-dhar I-jëp käp

¹⁷ Kɛ cäŋ in jio̱liɛn, kä pay in jio̱liɛn, kɛ ruɔ̱n jiɛn da̱ŋ rɛw wi̱cdɛ bärɔw mëë ta̱kɔ pɛɛcä, cu ruac Kuɔth Nhial ben kä ɣä wëë i̱,

¹⁸ “Gat ran, Kuäär Bɛ̈-bi-lɔn ni Nɛ-bu-kad-nɛ-dhar cɛ rɛmdɛ jakä lät kɛ la̱t mi bɛc ɛlɔ̱ŋ, kɛ kui̱ gaakdɛ kɛ Dhor. Cɛ miemkiɛn diaal gur kä cɛ jiɛrkiɛn diaal pöth kɛ ɣa̱c kä ti thiak thiaak. Kä jɛn kɛnɛ rɛmdɛ thilɛ ram mi cu duɔ̱ɔ̱r jek kä kɛ min ci kɛn ɛ la̱t kɛ kui̱ Dhor.

¹⁹ Kɛ kui̱ ɛmɔ, cu Kuäär ni Kuoth Nhial mɛmɛ lar wëë i̱, ‘Ɣän bä mun I-jëp la̱th tetdä Kua̱r Bɛ̈-bi-lɔn ni Nɛ-bu-kad-nɛ-dhar. Kä bɛ ria̱ŋdɛ naŋ ni kɛɛliw, kä bɛ jɛ tiath kä bɛ nyinkɛ pɛc. Bɛ kɛ thöp rɛmdɛ ala gua̱a̱th ëë ci lät kɛ kɛ.

²⁰ Ɣän cä jɛ ka̱m mun I-jëp kɛ gua̱a̱th ëë ci lät kɛ jɛ, kɛ ɣöö cikɛn ɣä lätikä,’ ruac ni ɣän Kuäär ni Kuoth Nhial.

²¹ Kä kɛ jɛn cäŋ ɛmɔ, ɣän bä thok duëël I-thɛ-rɛl moc kɛ buɔ̱m, kä ɣän bä thokdu lɛp ji̱n Yɛdh-ki-el kɛ ɣöö bi ruac kɛ kɛ. Inɔ, bikɛn ɛ cu ŋa̱c ɛn ɣöö ɛ ɣän Kuoth Nhial.”