Yɛdh 26 - RUAC KUƆTH IN RƐL RƆ

Ruac go̱o̱kä mi jiääk kɛ kui̱ Dhor

¹ Kɛ cäŋ in jio̱liɛn kä paykɛ wäl kɛl runi mëë ta̱kɔ pɛɛcä, cu ruac Kuɔth Nhial ben kä ɣä wëë i̱,

² “Gat ran, ruacni kɛ kui̱ Dhor ëë ruac kɛ kui̱ Jɛ-ru-tha-lɛm wëë i̱, ‘Ɛ jɛn, Jɛ-ru-tha-lɛm in la duɔ̱ɔ̱p nath cɛ da̱k, ci thieknikɛ rɔ lëp ɣä, Täämɛ min cɛ ku da̱k, ɣän bä ku ria̱ŋ.’ ”

³ Kɛ kui̱ ɛmɔ, ci Kuäär ni Kuoth Nhial mɛmɛ lar i̱, “Nɛnɛ, ɣän gakä kɛ ji̱ lö Dhor! Bä döör ti ŋuan jakä gak kɛ ji̱, ce̱tnikɛ min la muaŋ yiëër rɔ a jiɛc.

⁴ Bi döör tɔ̱tɔ̱ päny Dhor däk, kä bikɛ ti̱eckɛ tin ba̱r ba̱a̱r däk. Ɣän bä tupdɛ puɔc dɔɔr, bä ba̱ny ni pääm thi̱n.

⁵ Kä jɛn Dhor bɛ la dhuɔ̱ɔ̱l mi te däär baar, bɛ la gua̱a̱th mi ko̱o̱t dëëp rɛc cambaknikiɛn thi̱n. Ruac ni ɣän Kuäär ni Kuoth Nhial, ɛn ɣöö ba jɛ pɛc ɛ döör,

⁶ kä ba wi̱i̱kɛ tin te rɛy ciëŋ ji̱kiɛn näk kɛ ko̱r. Ɛ jɛn bi kɛn ɛ cu ŋa̱c ɛn ɣöö ɛ ɣän Kuoth Nhial.”

⁷ Kä cu Kuäär ni Kuoth Nhial mɛmɛ lar wëë i̱, “Ɣän bä ram mi gak kɛ Dhor nööŋ kui̱c caam ala Kuäär Bɛ̈-bi-lɔn ni Nɛ-bu-kad-nɛ-dhar, min la kuäär kua̱ri. Bɛ ben kɛɛl kɛ jiöŋköörikɛ kɛnɛ thurbiɛɛlikɛ kɛ nɛy ti ci kɔt kɛ jiöŋkööri, kɛ rɛm mi di̱i̱t.

⁸ Kä bɛ wi̱i̱ku tin te rɛy ciëŋ ji̱kiɛn näk kɛ ko̱r. Kä bɛ rɔ tët kɔ̱a̱k ti gölkɛ ni wecdun, kä bɛ ko̱o̱tni la̱t ti wä wi̱i̱ pa̱a̱ny, kä bɛ köötni kap nhial kɛ kui̱du.

⁹ Kä bɛ jiɛnkɛ nööŋ bɛ kɛ ben thur ni pänydu. Kä bɛ ti̱ecku tin ba̱r ba̱a̱r däk kɛ jiöpnikɛ.

¹⁰ Kä bi jiöŋköörikɛ ŋuan ɛlɔ̱ŋ, a bi turiɛn ji̱ kum. Kä bɛ pa̱nyniku lath, kɛ rɔal jiöŋkööri köör kɛnɛ thurbiɛɛli, mi wëë wä ben kɛ thuk kälikun, ce̱tnikɛ nɛy ti coth rɛy wec mi ci pänydɛ da̱k.

¹¹ Kä bɛ wur kɛ jiöŋköörikɛ, rɛy duɔ̱pniku diaal. Kä bɛ nɛɛku näk kɛ ko̱r, kä bi nɛɛku tin bum tëth, ce̱tnikɛ thieer.

¹² Kä bikɛ ria̱ŋdu pɛc, kä bikɛ kööku mac. Bikɛ pa̱nyniku to̱l kä piny, kä bikɛ ciëëŋku tin gɔw däk. Kä bikɛ päämku kɛnɛ jiɛnku kɛ mundu yuɔr rɛy pi̱i̱ni.

¹³ Kä bä tuaarikun jakä bit, kä /ca jɔw thuɔmniku bi nyɔk kɛ li̱eŋ.

¹⁴ Ɣän bä ji̱ jakä päm mi day, bi la gua̱a̱th ko̱tdä cambakni. Kä /ca ji̱ bi nyɔk kɛ ta̱th, kɛ ɣöö larɛ ɣän Kuoth Nhial, ruac ni ɣän Kuäär ni Kuoth Nhial.”

¹⁵ Mɛmɛ ɛ min lar Kuäär ni Kuoth Nhial ɛ kɛ kui̱ Dhor wëë i̱, “/Cɛ nɛy tin cieŋ jɔk yieer bi lath, mi wä ji̱ buɔ̱ɔ̱tni wä daar, mi wa naath wä näk rɛydu?

¹⁶ Kä bi ruëëc jɔak yiëër diaal ben piny kuäärädiɛn kä bikɛ bieynikiɛn tin tekɛ biɛɛl woc pua̱nynikiɛn. Kä bɛ kɛ kum kɛ dual, kä bikɛ nyuur piny lathɛ kɛ gua̱thni diaal, kä bɛ kɛ gäy kɛ ji̱.

¹⁷ Kä bikɛ ji̱ par kɛ diit jiɛthä lɔaac, bikɛ ji̱ jiök i̱, ‘Ci kulɛ da̱k i̱di lö wec mi tekɛ kɛ̈k, yɛn nɛy tin cieŋ rɛy yiëër! Bum yɛn mëëdan rɛy yiëër, ji̱n yɛnɛ nɛy diaal tin cieŋ rɛydu, ci nɛy diaal tin cieŋ ɛn wi̱ni jakä dual.

¹⁸ Täämɛ nɛy tin cieŋ jɔk yiëër cikɛ dual kɛ cäŋ ëë pɛn kɛ ji̱. Kä nɛy tin cieŋ dhuɔ̱li, cikɛ dual kɛ juc in ca joc ni yɛ.’ ”

¹⁹ Mɛmɛ ɛ min laar Kuäär ni Kuoth Nhial wëë i̱, “Mi wa̱a̱ ji̱ jakä wec mi te lɔrä, ce̱tkɛ wi̱i̱ tin /ca ciɛŋ ɛ naath. Ɣän bä pi̱w bäpdiit jakä bä kä yɛ, pi̱w kɛ tin ŋuan ba yɛ buɔny,

²⁰ ɛn wa̱nɔ ɣän bä ji̱ naŋ piny kɛɛl kɛ nɛy tëë ci li̱w, nɛy tëë ci li̱w ni wal. Ɣän bä ji̱ jakä cieŋ piny muɔ̱ɔ̱n rɛy nɛɛni tëë ci dhiap ni wal. /Ci rɔ bi nyɔk kɛ luny raar, kä bia cu thil gua̱a̱th muun nɛɛni tin tëk.

²¹ Ɣän bä yɛ moc kɛ guut dualä mi bɛc, bia cu thuɔ̱k. Bi naath yɛ go̱r, kä /cikɛ yɛ bi nyɔk kɛ jek, ruac ni ɣän Kuäär ni Kuoth Nhial.”