Yɛdh 25 - RUAC KUƆTH IN RƐL RƆ

Ruac go̱o̱kä mi jiääk kɛ kui̱ Am-on

¹ Kä cu ruac Kuɔth Nhial ben kä ɣä ɛn ɣöö,

² gat ran, ri̱tni nhiamdu peek ji̱ Am-on kä lätnikɛ ruac go̱o̱kä mi jiääk.

³ Läri jɛ ji̱ Am-on ɛn ɣöö bikɛ ruac Kua̱r ni Kuoth Nhial liŋ. Kä mɛmɛ ɛ jɛn ruac Kua̱r ni Kuoth wëë i̱, “Kɛ ɣöö cia wee i̱, ‘Ɣëë’ kɛ kui̱ luaakdä mëë ca jɛ ya̱r, kɛnɛ wec ji̱ I-thɛ-rɛl mëë ca jɛ ba̱ny piny baaŋ, kɛ dhɔr Juda mëë ca ji̱kɛ naŋ pɛɛcä.

⁴ Kɛ kui̱ ɛmɔ, ɣän bä yɛ ka̱m ji̱ kuec känyä ca̱ŋ ala kuaanykiɛn. Bikɛ kɛmɛnikiɛn yiath piny rɛydun kä bikɛ ciëëŋkiɛn la̱t rɛydun. Bikɛ dɛy jiɛnkun cam kä bikɛ caakun rueth.

⁵ Ɣän bä wec Rɛ̈-baa jakä gua̱a̱th la̱k thɔ̱a̱rɔa̱a̱li, kä bä wec Am-on jakä gua̱a̱th lɔ̱ŋä deet. Kä bi yɛn ɛ cu ŋa̱c ɛn ɣöö ɛ ɣän Kuoth Nhial.

⁶ Kɛ kui̱ ɛmɔ, cu Kuäär ni Kuoth Nhial mɛmɛ lar ɛn ɣöö, ‘Kɛ ɣöö cia tetkun pat, kä cia ciökun dua̱c piny, kä tɛth lo̱ckun kɛ kui̱ jiäkni diaal tëë ci tuɔɔk muun I-thɛ-rɛl,

⁷ kɛ kui̱ ɛmɔ ɣän bä yɛ däk, kä bä yɛ la̱th tetni dööri ce̱tkɛ kuak tin la pɛ̈ckɛ ko̱o̱r. Ɣän bä yɛ woc rɛy dööri, kä bä yɛ däk rɛy wi̱i̱ni. Kä bi yɛn ɛ cu ŋa̱c ɛn ɣöö ɛ ɣän Kuoth Nhial.’ ”

Ruac go̱o̱kä mi jiääk kɛ kui̱ Mo-ab

⁸ Cu Kuäär ni Kuoth Nhial mɛmɛ lar, kɛ ɣöö ci Mo-ab wee i̱, “Thok duëël Juda cɛ ce̱tnikɛ döör diaal tin kɔ̱ŋ,

⁹ kɛ kui̱ ɛmɔ, ɣän bä wi̱i̱ tin te këth Mo-ab tin gaŋkɛ jɛ woc, kɛn wi̱i̱ tin gɔw ɛn muun ɛmɔ, ala Beth-yɛ-ci-moth kɛnɛ Baal-me-on kɛ Kir-ya-tha-yim.

¹⁰ Ɣän bä Mo-ab thöp ji̱ kuec känyä ca̱ŋ kɛɛl kɛnɛ Am-on ala duŋdiɛn. Inɔ, /ca ji̱ Am-on bilɛ nyɔk kɛ ti̱em rɛy dööri,

¹¹ kä ɣän bä Mo-ab cu luk. Kä bikɛn ɛ cu ŋa̱c ɛn ɣöö ɛ ɣän Kuoth Nhial.”

Ruac go̱o̱kä mi jiääk kɛ kui̱ Ɛ-dɔm

¹² Mɛmɛ lar ɛ Kuäär ni Kuoth Nhial kɛ kui̱ kä ɣöö ci Ɛ-dɔm cut la̱t kɛ thok duëël Juda, jɛn Ɛ-dɔm cɛ tekɛ duer kɛ ɣöö cɛ cut ɛmɔ la̱t.

¹³ Kɛ kui̱ ɛmɔ ci Kuäär ni Kuoth Nhial mɛmɛ lar wëë i̱, “Ɣän bä Ɛ-dɔm däk kɛ buɔ̱mdä, bä naath kɛnɛ ley tin cieŋ thi̱n näk. Kä bä jɛ jakä gua̱a̱th mi luɔ̱t mi thil raan, a känɛ ni wi̱c Te-man a wä mäni wec Dɛ-dan, bakɛ näk ko̱o̱r.

¹⁴ Ɣän bä rɔ col kä Ɛ-dɔm kɛ tet nɛɛnikä ni ji̱ I-thɛ-rɛl. Kä bikɛ lät kɛ Ɛ-dɔm ce̱tnikɛ pek gaakdä, kɛnɛ waŋ lɔaacdä. Kä bikɛ cutdä cu ŋa̱c, ruac ni ɣän Kuäär ni Kuoth Nhial.”

Ruac go̱o̱kä mi jiääk kɛ kui̱ Pi-li-thɛt

¹⁵ Mɛmɛ lar ɛ Kuäär ni Kuoth Nhial kɛ kui̱ ji̱ Pi-li-thɛt tin /ci gakdiɛn thuk, kä la̱tkɛ cut kɛ tiɛɛl lɔaac mi di̱i̱t. Kɛ jɛn gak ëë wal carkɛ däk Juda.

¹⁶ Kɛ kui̱ ɛmɔ, ci Kuäär ni Kuoth Nhial mɛmɛ lar wëë i̱, “Ɣän bä ji̱ Pi-li-thɛt däk kɛ buɔ̱mdä. Kä bä ji̱ Kɛ-reth tɛ̈m jɔ̱ɔ̱r, kä bä ji̱ jɔak yiëër diaal däk.

¹⁷ Ɣän bä cut mi di̱i̱t nöŋkɛ kɛnɛ tɔ̱ɔ̱ŋ waŋä lɔaac. Kä bi kɛn ɛ cu ŋa̱c ɛn ɣöö ɛ ɣän Kuoth Nhial, mi wa̱a̱ cutdä wä nöŋkɛ.”