Yɛdh 24 - RUAC KUƆTH IN RƐL RƆ

Cuk tha̱t mi ci pua̱a̱r

¹ Kɛ cäŋ kä wäl, kä wäl päthni, kɛ bäŋuan runi, cu ruac Kuɔth Nhial ben kä ɣä wëë i̱,

² “Gat ran, gɔ̱ri ciöt ca̱ŋ ɛ wa̱lɛ mɛ piny. Ɛn cäŋ ɛmɛ kɛ ɣöö ci kuäär Bɛ̈-bi-lɔn Jɛ-ru-tha-lɛm go̱l kɛ jɛn cäŋ ɛ wa̱lɛ mɛ.

³ Kä lätni thok duëël ɛ ci kac raarɛ ruac cäätdä, ɛn ɣöö mɛmɛ ɛ min lar Kuäär ni Kuoth Nhialɛ wëë i̱, ‘Lɔapɛ cuk, lɔapɛ jɛ, kä muɔcɛ jɛ kɛ pi̱.

⁴ La̱thɛ dhon ri̱eŋ ti gɔw thi̱n, La̱thɛ mɛ̈ɛ̈k dhoon thi̱n, jiɛr kɛnɛ ciök la̱thɛ kɛ thi̱n, thia̱ŋɛ jɛ kɛ cɔ̱w tin gɔw.

⁵ Ka̱nɛ ri̱ŋ dɛ̈ɛ̈l mi gɔaa, la̱thɛ tɔŋ thaar cukä, kä jak ni jɛ kä pua̱a̱r, amäni mi ci cɔ̱wkɛ tuak.’

⁶ “Kɛ kui̱ ɛmɔ, Kuäär ni Kuoth Nhial cɛ wee i̱, ‘Riɛk akɛ wec in näk ji̱kɛ naath, ɛn cuk in te kɔlɛ rɛydɛ, jɛn cuk in /ken kɔlɛ rɔ kɔ̱k rɛydɛ! Thuɔ̱lɛ dhonkɛ raar kɛ̈l kɛ̈ɛ̈li, /cuarɛ kɛ liny.

⁷ Kɛ ɣöö te riɛm in cɛ wuɔ̱th piny rɛydɛ, cɛ jɛ la̱th wi̱i̱ pa̱a̱m mi puɔth. /Kenɛ jɛ wuɔc piny rɛy tupä, a bi tup ɛ kulɛ kum.

⁸ Kɛ ɣöö bi waŋ lɔaacdä rɔ jiɛc, kä bɛ duɔ̱ɔ̱r col, cä riɛm nɛɛni tëë cɛ näk la̱th wi̱i̱ pa̱a̱m mi puɔth, kɛ ɣöö ca jɛ /bilɛ kum.’

⁹ Kɛ kui̱c ɛmɔ, ci Kuäär ni Kuoth Nhial wee i̱, ‘Riɛk akɛ wec in näk ji̱kɛ naath! Ɣän puɔ̱nydä bä tɔŋ cukä dol ɛlɔ̱ŋ.

¹⁰ Duɔlɛ tɔŋ piny a ŋuan, kä dɔapɛ mac, thalɛ ri̱ŋ agɔaa, matdɛ wal tin ŋuäny thi̱n, kä a cɔ̱w waŋkɛ.

¹¹ La̱thɛ puɔ̱ny cukä rɛy maac miim, amäni mi cɛ le̱e̱th a ci tɛɛkdɛ waaŋ, kä bi kɔlɛ lëër, kä bi gɔakdɛ pɛ̈t ala miɛm.

¹² Ɣän cä rɔ cuc lɔrä, /ken gɔakdɛ min del del ben raar, a cäŋɛ ni mac /kenɛ jɛ luäŋ kɛ wa̱ŋ.

¹³ Kä ŋotdɛ, mëë cä ɣɔ̱n i̱ lakä ji̱, kä leeru, ji̱n /keni rɔ luäŋ kɛ la̱k leerädu. Ji̱n /ci rɔɔdu bi nyɔk kɛ gɔɔy, amäni mi cä ŋɛ̈ɛ̈nydä jakä thuk kä ji̱.’

¹⁴ Kä cu Kuoth Nhial mɛmɛ lar ɛn ɣöö gua̱a̱th a bëëni, ɣän bä ŋɔak la̱t thi̱n. Ɣän /cä bi luny jɔk, kä /cä raan bi pälikä, kä /cä wi̱cdä bi car. Ɣän bä yɛ luk ce̱tnikɛ duɔ̱pkun kɛnɛ lätkun, ruac ni ɣän Kuäär ni Kuoth Nhial.”

Lia̱a̱ ciëk Yɛdh-ki-el

¹⁵ Kä cu ruac Kuɔth Nhial ben kä ɣä wëë i̱,

¹⁶ “Gat ran, ciekdu bɛ rɔ pär kɛ lia̱a̱. Duundɛ ɣöö /cu pär kä /cu wiee, a cäŋɛ ni merku akɛ /ci pɛn.

¹⁷ Ɛ lɔcdu jiɛth bitdä, /cu ram in ci li̱w par. A kumdu te wi̱i̱du, kä /cu jäl kɛ pa̱a̱tku baaŋ a thil wa̱a̱ri. /Cu nhiamdu kum, kä /cu cam ni mi̱th nɛɛni tin la pär.”

¹⁸ Inɔ, ɣän cua̱ ruac kɛ naath kɛ runwaŋ, kä kɛ thiaŋ cu ciekdä li̱w. Kä kɛ runwaŋdɛ min dɔ̱diɛn cua̱ la̱t ce̱tnikɛ mëë ca la̱r ɣä.

¹⁹ Kä cu naath ɣä thiec wäkɛ i̱, “Ji̱n /cikɔ bi la̱r mɔ lot ti̱ti̱ jɛ mɔ kɛ kui̱da, mɔ lätdi nɔmɔ ɔ?”

²⁰ Ɛ jɛn, ɣän cua̱ kɛ la̱r ɣöö ci ruac Kuɔth Nhial ben kä ɣä,

²¹ ɛn ɣöö bä ruac kɛ thok duëël I-thɛ-rɛl, ɛn ɣöö mɛmɛ ɛ ruac Kua̱r ni Kuoth Nhial wëë i̱, “Ɣän bä luaakdä ya̱r, min la liak bumädun, kä gɔaa nëndɛ kä yɛ, kä nhɔk yɛnɛ kɛ lo̱ckun. Kä ba dhɔɔlkun kɛnɛ nyieekun tin cia ba̱ny jɔk näk ko̱o̱r.

²² Kä bi yɛn ɛ la̱t ce̱tnikɛ min cä la̱t. /Ci yɛn nhiamdun bi kum kä /ci yɛn mi̱eth nɛɛni tin la pär bi cam.

²³ Bi kuɔ̱mni wuɔ̱thnikun te ni thi̱n, kä bi wa̱a̱rikun te ciöknikun. /Cuarɛ pär kä /cuarɛ wiee, duundɛ ɣöö bia thuuk kɛ kui̱ dueerikun, kä bi ramɔ ramɔ par.

²⁴ Inɔ, bi Yɛdh-ki-el a nyuuth kä yɛ, bia jɛ la̱t ce̱tnikɛ min cɛ pay la̱t. Mi wä mɛmɛ wä cop, ɛ jɛn bi yɛn ɛ cu ŋa̱c ɛn ɣöö ɛ ɣän Kuäär ni Kuoth Nhial.”

²⁵ Kä cu ruac Kuɔth Nhial ben kä ɣä wëë i̱, “Gat ran, ɛn cäŋ ɛmɔ, cäŋ in bä naŋ ni luaakdiɛn in bum bum kä kɛ, ɛn tɛ̈th lɔaacdiɛn kä buɔ̱mdiɛn, ɛn min gɔaa nëndɛ kä kɛ, kä nhɔk kɛn ɛ kɛ lo̱ckiɛn, amäni dhɔɔlkiɛn kɛnɛ nyieekiɛn bä,

²⁶ ɛn cäŋ ɛmɔ, bi ram mi ci kään ben kä ji̱ bɛ ji̱ ben la̱r thuk.

²⁷ Ɛn cäŋ ɛmɔ bi thokdu te ɣo̱o̱ŋä kɛ ram in ci kään, kä bi ruac kɛ jɛ, /ci biɛt bilɛ nyɔk. Kɛ kui̱ ɛmɔ, bi ji̱n a nyuuth kä kɛ, kä bikɛn ɛ cu ŋa̱c ɛn ɣöö ɛ ɣän Kuoth Nhial.”