Yɛdh 23 - RUAC KUƆTH IN RƐL RƆ

Nyi̱er raam kɛl ti ji̱ dueeri

¹ Kä cu ruac Kuɔth Nhial ben kä ɣä wëë i̱,

² “Gat ran, tëë kɛ nyier da̱ŋ rɛw, ti nyiee ciëk kɛl.

³ Kɛn kɛ leer kä I-jëp, kɛ lër ni ŋuɛɛtädiɛn. Ɛn wani la thiëëpkɛ thinkiɛn ɛ wutni.

⁴ Cɔalkɛ min di̱i̱tdiɛn i̱ Ɔ-laa, kä cɔalkɛ min tɔtdiɛn i̱ Ɔ-li-baa. Kä cu kɛn da̱ŋ rɛw a mänkä, cu kɛn ɣä da̱p dhɔɔl kɛnɛ nyier. Kä cu Ɔ-laa a Tha-mɛ-ria, kä cu Ɔ-li-baa a Jɛ-ru-tha-lɛm.

⁵ “Kä cu Ɔ-laa nyin leerä la̱t kä ɛ ciekdä. Cuɛ nyin leerä la̱t kɛ nhöökɛ ni wutni A-thi-ri-ya.

⁶ Rɛm mi tekɛ bi̱i̱ mi yiel, ruëëc kɛnɛ bööth rɛmni kɛn diaal kɛ ŋuɛ̈tni ti tekɛ maan ti jälkɛ jio̱o̱k tuɔ̱ruɔ̱k.

⁷ Cuɛ nhökdɛ min di̱i̱t ka̱m kɛn wutni A-thi-ri-ya diaal tin ca kuany. Kä cuɛ rɔɔdɛ ya̱r kɛ kuth guäyni diaal tin nhɔkɛ ji̱kiɛn.

⁸ Kä /kenɛ leer mëë cɛ tok kä I-jëp päl. La wutni a tɔ̱ɔ̱c kɛ jɛ ni mëë ɛ ŋuɛ̈t, kä cikɛn jɛ cu cɔli kadim.

⁹ Kɛ kui̱ ɛmɔ ɣän cua̱ jɛ pa̱l nhöökɛ ni ji̱ A-thi-ri-ya, tin nhɔkɛ ɛlɔ̱ŋ.

¹⁰ Kä cukɛn ɛ lony, ni juutdä ɛ thil bi̱i̱, cukɛ dhɔɔlkɛ kɛnɛ nyieekɛ naŋ, kä cukɛ jɛ näk kɛ thɛp. Cuɛ la cäät rɛy mään, kɛ duäc ëë ca duääc ni jɛ.

¹¹ “Kä cu nyiman ni Ɔ-li-baa mɛmɛ nɛn, cu lɛ ba̱l ni leerɛ kɛnɛ kadiimdɛ, kä cu jiääkni jɛn ɛlɔ̱ŋ kä nyiman.

¹² Kä cuɛ ji̱ A-thi-ri-ya lɛni nhɔk bä nɛy tin la ruëëc, kɛnɛ bööth rɛ̈m, tin ca rɔ̱ moc kɛ bieyni lathkeerä, kɛn diaal ŋuɛ̈tni ti tekɛ maan, kä jälkɛ, kɛ jio̱o̱k tuɔ̱ruɔ̱k.

¹³ Kä cua̱ jɛ nɛn ɛn ɣöö cɛ rɔ ya̱r, cukɛn da̱ŋ rɛw wä ni kɛ jɛn duɔ̱ɔ̱p ɔ kɛl ɔ.

¹⁴ Duundɛ ɣöö jɛn cuɛ kadiimdɛ jakä wä kɛ wä nhiam. Kä mëë cɛ thurɛni wutni nɛn puɔ̱ɔ̱ny kal ji̱ Kɛ̈l-da-ya ti tekɛ biɛɛl ti luaal,

¹⁵ kä ca lɛtkiɛn yiɛn kɛ läk, kä ca wuɔ̱thkiɛn rieth bieyni, kä kɛn diaal jɔckɛ ce̱tkɛ bööth thurbiɛɛli ji̱ Bɛ̈-bi-lɔn ti bëë kä Kɛ̈l-da-ya.

¹⁶ Kä mëë cɛ kɛ nɛn, cuɛ kɛ bɛc ɛlɔ̱ŋ. Kä cuɛ kɛ jäkä naath nikä Kɛ̈l-da-ya waa kɛ cɔl.

¹⁷ Kä cu ji̱ Bɛ̈-bi-lɔn ben bäkɛ ben tɔ̱ɔ̱c kɛ jɛ dhaŋädɛ, kä cukɛ jɛ cu ya̱r. Kä kɛ kɔr kä mëë cɛ rɔɔdɛ ya̱r kɛ kɛ, cuɛ rɔ ri̱t kä kɛ, kɛ bɛ̈c pua̱a̱ny.

¹⁸ Kä cuɛ lät leerädɛ ku la̱t ɛ jɔc, kä cu nɛy diaal ɛ ku ŋa̱c, cua̱ rɔ ri̱t kä jɛ kɛ jiääk lɔaac ce̱tkɛ mëë rieetdä rɔ kä nyiman in diit.

¹⁹ Kä cu leerɛ rep ni rɔ mɔ cɛ ni̱n ŋuɛɛtädɛ tim ɔ, mëë lätdɛ nyin leerä kä I-jëp.

²⁰ Kä jɛn min ci leerɛ di̱t, la go̱o̱rɛ ni wutni ti̱i̱ ler ce̱tkɛ muɔ̱li kɛnɛ tut jiöŋkööri.

²¹ Kä ji̱n go̱o̱ri lätni kä ti jiäk ti ce̱tkɛ tëë ci la̱t mëë ɛ ji̱n nyal kä I-jëp, mëë ci nyieetdu ŋar ŋar kä thieep wutni thinku thi̱n.”

Luk Kuɔth kɛ nyam min tɔt

²² Kɛ kui̱ ɛmɔ, ji̱n lö Ɔ-li-baa, mɛmɛ ɛ min ci Kuäär ni Kuoth Nhial ɛ lar kɛ kui̱du wëë i̱, “Ɣän bä nhööku riet ji̱ ala ji̱ gaakdu, kɛn nɛy tëë ci gaak kɛ kɛ, ɣän bäkɛ jakä mak kɛ ji̱ kɛ pek diaal.

²³ Kɛn ji̱ Bɛ̈-bi-lɔn kɛ ji̱ Kɛ̈l-da-ya diaal, kɛ ji̱ Pɛ-kod kɛnɛ Cowa kɛ Kowa kɛɛl kɛ ji̱ A-thi-ri-ya diaal, kɛn ŋuɛ̈tni diaal tin tekɛ maan kɛnɛ ruëëc kɛ bööth rɛ̈m amäni ji̱ guɔ̱ri tin di̱t, kɛn diaal tin la ko̱t kɛ jiöŋkööri.

²⁴ Kɛn bikɛ ji̱ ben mak kɛ kui̱c caam kɛ thurbiɛɛli kɛnɛ rɛm mi di̱i̱t. Kä bikɛ ji̱ ben mak kɛ pek diaal, a ca rɔ̱ moc kɛ köötni ti di̱t kɛnɛ ti tɔatni kɛ kuɔ̱mni köör. Kä ɣän bä ji̱ ka̱mkɛ ɛ ba ji̱ wä luk nikɛ ŋuɔ̱tkiɛn.

²⁵ Kä bä ŋɛ̈ɛ̈ny tiilädä nöŋ ji̱, kɛ ɣöö bikɛ cu thil kɔ̱a̱c lɔaac kɛ ji̱. Kä bikɛ wumdu kɛnɛ ji̱thku ŋuɔk jɔ̱ɔ̱r, kä nɛy tɔ̱ bi kään tɔ̱ kä yɛ bakɛ näk kɛ ko̱r. Bikɛ dhɔɔlku kɛnɛ nyieeku naŋ, kä nɛy tɔ̱ ci kään tɔ̱ kä yɛ bakɛ waŋ kɛ mac.

²⁶ Kɛn bikɛ bieyniku ka̱n, kä bikɛ da̱a̱pniku tin gɔw naŋ.

²⁷ Inɔ, ɣän bä leeru kɛnɛ lät kadiimädu tëë ci tok kä I-jëp cu moc kɛ guk. Kä /cikɛ bi nyɔk kɛ gör kä /ci I-jëp bi nyɔk kɛ ti̱em.”

²⁸ Mɛmɛ ɛ min ci Kuäär ni Kuoth Nhial ɛ lar wëë i̱, “Ɣän bä ji̱ la̱th tetni nɛɛni tin lo̱ki, tetdä nɛɛni tëë ci gaak kɛ kɛ.

²⁹ Kä bikɛ lät kɛ ji̱ tiilä, kä bikɛ ŋɔaku diaal tin ci la̱t ka̱n. Kä bikɛ ji̱ ba̱ny piny juutdä kä thilɛ war, kä bikɛ lät kadiimädu nyuɔ̱th naath. Leeru kɛnɛ kadiimdu

³⁰ kɛ kɛn nöŋkɛ ji̱ ti̱ti̱ ɔ, kɛ ɣöö ci nyin leerä la̱t kɛ döör, kä ci rɔ ya̱r kɛ palu kɛ kuth guääynikiɛn.

³¹ Ji̱n ci guɔ̱ɔ̱r ni duɔ̱ɔ̱p nyimuɔɔr in di̱i̱t, kɛ kui̱ ɛmɔ, ɣän bä ji̱ ku ka̱m duäc mi cät kɛ duäc nyimuɔɔr.”

³² Mɛmɛ ɛ min lar Kuäär ni Kuoth Nhial ɛ wëë i̱, “Ji̱n bi liɛɛr nyimuɔɔr math, liɛɛr in lueŋ kä di̱t. Kä bi nɛy diaal ji̱ lɛŋ, kɛ ɣöö jɛn liɛɛr thiäŋɛ.

³³ Bɛ ji̱ jakä cuc kä bɛ ji̱ yɔ̱ŋ. Ɛ liɛɛr mi no̱o̱ŋ dual kɛnɛ da̱k, ɛ liɛɛr nyimuɔɔr ni Tha-mɛ-ria.

³⁴ Bi min te rɛydɛ math ni kɛɛliw. Kä bi liɛɛr cu nyuɛy, bi thinku cu ŋuk kä raar. Mɛmɛ latdɛ ɣän Kuäär ni Kuoth Nhial.

³⁵ Kɛ kui̱ ɛmɔ ɣän Kuäär ni Kuoth Nhial laarä jɛ ɛn ɣöö, ci yɛn ɣä pa̱l ruëëc a ci jɔkdu riet ɣä, ji̱n bi ti bɛ̈c rut kɛ kui̱ kadiimädu.”

Luk Kuɔth kɛ nyiee ciëk

³⁶ Kä cu Kuoth Nhial ruac kɛ ɣä wëë i̱, “Gat ran, ji̱n bi Ɔ-laa kɛnɛ Ɔ-li-baa luk inu? Lätnikɛ lätkiɛn tin jiäk.

³⁷ Kɛ ɣöö kɛn cikɛ dhɔm kä te tetkiɛn kɛ riɛm. Cikɛ dhɔm kɛ kuth guäynikiɛn. Kä cukɛ gaatkiɛn tin ca da̱p ɣä wa̱ŋ kuthnikiɛn ala mi̱ethdiɛn.

³⁸ Kä cukɛ ɣä lät kä mɛmɛ bä, kɛ jɛn gua̱a̱th ɔ kɛl ɔ, cukɛ luaakdä ya̱r kä cukɛ ca̱ŋ lɔ̱ŋnikä ŋar ŋar.

³⁹ Ɛn cäŋ ɛmɔ mëë cikɛn gaatkiɛn thöp kuthkiɛn, cukɛ ben cukɛ luaakdä ben ya̱r. Mɔmɔ ɛ jɛn mëë cikɛn ɛ la̱t luaakdä.

⁴⁰ “Kä cukɛ nɛy ti nɔ̱a̱n jäkä naath, kä mëë cikɛ cop. Kä kɛ kui̱diɛn, yɛn cuarɛ rɔ̱ puɔk a puɔth, kä cuarɛ nyinkun biɛl, kä cuarɛ pua̱nykun thiäŋ kɛ wuɔ̱t.

⁴¹ Yɛn cuarɛ dhaŋ mi gɔaa nööŋ mi ca nhiamdɛ moc kɛ tharbët, min ci yɛn wälä in kur kur kɛnɛ liɛɛthdä kuëŋ thi̱n.

⁴² Kä ɛn wani te buɔ̱n nath mi di̱i̱t mi rɔal mi ci jɛ go̱l thi̱n, kä cu naath rɔ̱ dol, kä cua buɔ̱n wutni ti yɔaŋ wä nööŋ därdɔaar. Kä cukɛ kuatni ben la̱th wuɔ̱ɔ̱kni ciëk kɛnɛ nyiman, kɛnɛ kuɔ̱mni, ti gɔw ɛlɔ̱ŋ cuakɛ la̱th wuɔ̱thnikiɛn.

⁴³ “Kä cua̱ ruac ɛn ɣöö kä mi cɛ cuuc kɛ leer inɛ mɛ, kä ŋot wutni kɛ mi tɔ̱ɔ̱ckɛ kɛ jɛ mɔ.

⁴⁴ Kä cukɛ tɔ̱ɔ̱ckɛ jɛ ce̱tkɛ min la tɔ̱ɔ̱c naath kɛ kadim. Inɔ, cukɛ ŋot kɛ mi wäkɛ tɔ̱ɔ̱ckɛ kɛ Ɔ-laa kɛnɛ Ɔ-li-baa män tɔ̱ lër tɔ̱tɔ̱.

⁴⁵ Duundɛ ɣöö bi wutni tin ji̱ cuŋni kɛ kuɛth kɛ luk kɛ kui̱ dhöm kɛnɛ näk nath. Kɛ ɣöö kɛn kɛ dhööm kä thiäŋ tetkiɛn kɛ riɛm.”

⁴⁶ Mɛmɛ ɛ min lar Kuäär ni Kuoth Nhialɛ wëë i̱, “Nööŋɛ, buɔ̱n nath mi di̱i̱t mi bikɛ ben jakä dual kä bikɛ ben mac.

⁴⁷ Kä bi buɔ̱n ɛmɔ kɛ ben bök kɛ pääm, kä bikɛn kɛ ciëc kɛ thɛpnikiɛn. Kä bikɛ dhɔɔlkiɛn kɛnɛ nyieekiɛn näk, kä bikɛ dho̱rkiɛn waŋ.

⁴⁸ Inɔ, ɣä bä lät kaadiimä diaal moc kɛ pek rɛy wec. Kä bi män diaal rɔ̱ cu luek, kɛ ɣöö /cikɛ yɛ bilɛ nyiath.

⁴⁹ Kä bikɛ yɛ culikä kɛ kui̱ leerädun kä bi yɛn riɛkdun rut kɛ kui̱ dui̱rä palä kɛ kuth guäyni. Kä bi yɛn ɛ cu ŋa̱c ɛn ɣöö ɛ ɣän Kuäär ni Kuoth Nhial.”