Yɛdh 22 - RUAC KUƆTH IN RƐL RƆ

Dueer Jɛ-ru-tha-lɛm

¹ Kä cu ruac Kuɔth Nhial ben kä ɣä wëë i̱,

² “Gat ran bi wec ɛ nääk nath ɛmɛ luk? Kä ɛ jɛn ku jɛ la̱t nyuɔɔnkɛ diaal tëë cɛ la̱t.

³ Kä bi jɛ la̱r kɛ ɛn ɣöö mɛmɛ larɛ Kuäär ni Kuoth Nhial ɛn ɣöö, jɛn wec in näk ji̱kɛ rɔ̱ kärɔ̱ ɛ, ci gua̱a̱thdɛ cop, kɛ ɣöö cɛ rɔɔdɛ ya̱r kɛ palɛ kɛ kuth guäyni.

⁴ Ji̱n ci tekɛ duer kɛ kui̱ riɛm in ci wuɔ̱th piny, kä ca ji̱ ya̱r ɛ lätni kuthni guäyni. Ci ni̱nku jakä thia̱k, ci runku tin ca rialikä cop. Kɛ kui̱ ɛmɔ, ɣän cä yɛ moc kɛ buar nhiam dööri diaal, kä ba ji̱ dɔl ɛ wi̱i̱ diaal.

⁵ Bi nɛy tin thia̱k kɛnɛ nɛy tin nɔ̱a̱n ji̱ dɔl, ji̱n ram mi kuiy ŋäcdɛ mi thil luɔt.

⁶ “Ɛ ci ruëëc I-thɛ-rɛl tin te rɛydu, ci ram ɔ la̱t ni buɔ̱mdɛ cikɛ rɔ̱ mat ni näk nath.

⁷ Kä /ca gua̱ni nath kɛnɛ mani nath luth rɛydu. Kä ciaŋkɛ jur tin cieŋ rɛydu a jiäk. Kä rɛ̈tni kɛnɛ män jɔɔkni thilkɛ luɔt rɛydu.

⁸ Ci nyinkä tin rɛl gɔɔydiɛn rɔ̱ lo̱k, kä ci ca̱ŋ lɔ̱ŋnikä ya̱r.

⁹ Kä nɛy tin te rɛydu latkɛ ni guɛɛr na̱k nath. Kä nɛy tin te rɛydu camkɛ mi̱th tin ca thöp kuth guäyni gua̱thni tin palkɛ kuth guäyni thi̱n, kä la̱tkɛ ni nyin leerä.

¹⁰ Kä wutni tin te rɛydu tɔ̱ɔ̱ckɛ kɛ män gua̱nikiɛn, kä tɔ̱ɔ̱ckɛ kɛ män tin tekɛ buɔth, a /ken buɔthdiɛn ni kööt.

¹¹ Kä dhɔm ram ɔ ciek raam min thieek kɛ jɛ kä wutni tin te rɛydu, kä käm tha̱a̱ŋkiɛn nyimanthuunikiɛn, kɛnɛ nyiee gua̱nikiɛn tin manikiɛn gööl.

¹² Kä kän naath ni kök rɛydu kɛ ɣöö bikɛ riɛm wuɔ̱th piny. Kä la käni rëp ŋua̱l min tho̱pi jɛ, kä käni rëp mi dɔ̱ŋ mi luɔ̱ckɛ ji̱ ŋua̱lu. Kä la käni duɔ̱ɔ̱r kä gua̱n thieekädu kɛ duɔ̱ɔ̱p mi jiääk. Kä ci ɣä pa̱l ruëëc, ruac ni ɣän Kuäär ni Kuoth Nhial.

¹³ “Nɛn ɛ, ɣän cä tetkä pat kɛɛl, kɛ kui̱ kä tin ci jek kɛ duɔ̱ɔ̱p mi /ci rɔ lot, kɛnɛ kui̱ riɛm in ca wuɔ̱th piny rɛydu.

¹⁴ Bi buɔ̱m lɔaacdu ŋot thi̱n kɛ cäŋ in wa̱a̱ ji̱ wä duäc? Ɛ ɣän Kuoth Nhial ruac ɔ kä bä jɛ la̱t.

¹⁵ Ɣän bä yɛ kiɛth rɛy dööri diaal kä bä yɛ riaw rɛy wi̱i̱ni diaal. Kä bä thil gɔɔyädun cu moc kɛ pek.

¹⁶ Kä inɔ, bi döör yɛ cany, kä bi yɛn ɛ ŋa̱c ɛn ɣöö ɛ ɣän Kuoth Nhial.”

¹⁷ Kä cu ruac Kuɔth Nhial ben kä ɣä wëë i̱,

¹⁸ “Gat ran, kɛn ji̱ I-thɛ-rɛl cikɛ thil luɔt kä ɣä. Kɛn cikɛ ce̱tnikɛ gɔak ladiɛt, kɛnɛ baw, kɛ thapiy, kɛnɛ nuɔ̱ɔ̱r mi ci duɔth piny kä min thalkɛ kɛ.

¹⁹ Kɛ kui̱ ɛmɔ, ci Kuäär ni Kuoth Nhial wee i̱, ‘Mi ci yɛn diaal ce̱tkɛ gɔak, ɣän bä yɛ ruɔl kä Jɛ-ru-tha-lɛm.

²⁰ Ce̱tkɛ min la naath ciɛk in bo̱r kɛnɛ baw kɛ laadiit kɛnɛ thapiy a läth rɛy kä min ba thalnikɛ, inɔ, ɣän bä yɛ rol kɛ ŋɛ̈ɛ̈nydä kɛnɛ waŋ lɔaacdä bä yɛ ruɔl rɛy wec kä bä yɛ thal thi̱n.

²¹ Ɣän bä yɛ duɔl guäth kɛl, kä bä yɛ ŋök mac ŋɛɛnyädä, bia tuak rɛy Jɛ-ru-tha-lɛm.

²² Ce̱tnikɛ min la ciɛk in bo̱r a thalkɛ, ba yɛ thal rɛydɛ. Kä bia jɛ cu ŋa̱c ɛn ɣöö ɛ ɣän Kuoth Nhial ci ŋɛ̈ɛ̈nydɛ ŋök yɛ mɔ.’ ”

²³ Kä cu ruac Kuɔth Nhial ben kä ɣä wëë i̱,

²⁴ “Gat ran, lätni jɛ Jɛ-ru-tha-lɛm ɛn ɣöö ɛ wec mi ca lɔth, kä thilɛ nhiaal kɛ pek ni̱n i̱ gaak.

²⁵ Kä ce̱t göökɛ rɛydɛ kɛ lony ti bur guäth lɛ̱̈ɛ̱̈ in cikɛn ɛ cam kɛ ca̱a̱p ti jiäk. Cam kɛn naath, kä cikɛn ŋɔak tin gɔw kä di̱t kökdiɛn naŋ. Kä cikɛ män ti ŋuan jakä män jɔɔkni rɛy wec.

²⁶ Kä ci bööth palädɛ ŋuɔ̱tkä töl kä cikɛ ŋɔakä tin rɛ̈lkɛ rɔ̱ ya̱r. Kä thilɛ kɛ dääk kamä kä tin rɛl gɔɔydiɛn rɔ̱ kɛnɛ tin kɔ̱ŋ. Kä /kenkɛ dääk kä mi jiääk kɛnɛ mi gɔaa nyoth. Kä /kenkɛ ca̱ŋ lɔ̱ŋnikä tit, inɔ, ci kɛn ɣä jakä mi thil luɔt rɛydiɛn.

²⁷ Ce̱t bööthkɛ rɛydɛ nikɛ jio̱k nyapëc mi cam ley, kɛn bööth näk kɛn naath kɛ ɣöö bikɛ ŋɔak kulɛ jek.

²⁸ Kä kum göök lätkiɛn ti̱ti̱ kɛ la̱t nenä go̱o̱kä ti tɔ̱ kac, wäkɛ i̱, ‘Mɛmɛ laarɛ Kuäär ni Kuoth Nhial,’ kä /ken Kuoth Nhial ɛ lar.

²⁹ Kɛn ji̱ wec diaal ca ŋi̱eec ni rɔ̱ kɛ pɛl kɛnɛ mac nath. Kɛn yɔaŋkɛ can kɛnɛ ga̱y kä pɛɛl kɛn nyin juri kɛ ciɛŋ ti jiäk.

³⁰ Kä ɣän cua̱ raan go̱r rɛydiɛn mi dee päny bot, kä dëë cuɔ̱ŋ nhiamdä, kɛ ɣöö /cä wec dee lɛ däk. Duundɛ ɣöö cuɛ thil ram kɛl mi cua̱ jek.

³¹ Kɛ kui̱ ɛmɔ ɣän cua̱ ŋɛ̈ɛ̈nydä cu wuɔ̱ckɛ. Cua̱kɛ cu näk kɛ waŋ lɔaacdä, cua lätkiɛn la̱th ni wi̱i̱diɛn ruac ni ɣän Kuäär ni Kuoth Nhial.”