Yɛdh 21 - RUAC KUƆTH IN RƐL RƆ

Thɛp Kuɔth Nhial

¹ Kä cu ruac Kuɔth Nhial ben kä ɣä wëë i̱,

² “Gat ran, locni nhiamdu kä Jɛ-ru-tha-lɛm kä lat ruac kɛ kui̱ gua̱thni tin la pal naath thi̱n. Kä lat ruac go̱o̱kä mi jiääk kɛ kui̱ muɔ̱ɔ̱n I-thɛ-rɛl,

³ läri jɛ mun I-thɛ-rɛl ɛn ɣöö ɛ ɣän Kuoth Nhial bëë kä yɛ mɔ, kä bä thɛpdä ka̱m raar go̱kädɛ, kä bä nɛy tin tekɛ cuŋ kɛnɛ nɛy tin tekɛ dueer ŋuɔ̱k raar rɛydun.

⁴ Kɛ ɣöö bä ji̱ cuŋni kɛnɛ ji̱ dueeri ŋuɔ̱k raar rɛydun, kɛ kui̱ ɛmɔ, bä thɛpdä ka̱m raar rɛy go̱kädɛ, kä bä nɛy diaal tin te kui̱c cuëëc a wä mäni kui̱c caam mak.

⁵ Kä bi nɛy diaal ɛ ŋa̱c ɛn ɣöö ɛ ɣän Kuoth Nhial ci thɛpdɛ ka̱m raar go̱kädɛ mɔ. Kä /ca jɛ bi nyɔk kɛ loc go̱kädɛ.

⁶ Kɛ kui̱c ɛmɔ ku pa̱r lö gat ran kɛ jiɛ̈th lɔaac mi di̱i̱t kɛnɛ jiääk lɔaac mi di̱i̱t nhiam nath.

⁷ Kä mi wä kɛn ji̱ wä thi̱ec i̱, ‘Ɛŋu mɔ päri mɔ?’ Bikɛ jiök i̱, ‘Ɛ ɣöö tëë kɛ ruac mi ci ben. Mi laar jɛ ɛn ɣöö bi lo̱c diaal ŋɛ̈ɛ̈r, kä bɛ tet diaal nuäŋ. Bi naath lo̱ckiɛn baath, kä bi mua̱a̱l kɔ̱c ce̱tnikɛ pi̱. Nɛ̈nɛ jɛ ja bëëni, kä bɛ dhil tuɔɔk ɛ puc, ruac ni ɣän Kuäär ni Kuoth Nhial.’ ”

⁸ Kä cu ruac Kuɔth Nhial ben kä ɣä wëë i̱,

⁹ “Gat ran, lat ruac go̱o̱kä, latdɛ ɛn ɣöö Kuäär ni Kuoth laarɛ jɛ, thɛp, thɛp mi ca thɛr, kä ca jɛ toth bä,

¹⁰ ca jɛ thɛr kɛ kui̱ na̱k nath, Ca jɛ toth kä riawɛ, ce̱tkɛ yiel nhial! Dee lo̱ckun kulɛ tɛɛth i̱di kä ji̱n lo̱ki ruac kɛnɛ lui̱k?

¹¹ Kä jɛn thɛp ba jɛ toth, kɛ ɣöö ba jɛ rɔm kɛ tet. Ca jɛ thɛr kä ca jɛ toth, kɛ ɣöö ba jɛ la̱th tetkä raam in näk naath.

¹² Wieeni kä rɔalni, lö gat ran, kɛ ɣöö thɛp gɛmɛ kɛ nɛɛkä. Jɛn gakɛ kɛ ruëëc ji̱ I-thɛ-rɛl diaal. bakɛ wä näk kɛɛl kɛ nɛɛkä ni ji̱ I-thɛ-rɛl. Kɛ kui̱ ɛmɔ dot wi̱cdu.

¹³ “Car mɛmɛ, mi ci luik Kuɔth lo̱k, bi ti̱ti̱ tuɔɔk kä ji̱ ɛ puc. Ruac ni ɣän Kuäär ni Kuoth Nhial.

¹⁴ Kä ji̱n lö gat ran lat ruaacni go̱o̱kä, kä pat tetku kä a ko̱r ro̱m, kä rɛɛw kiɛ kä diɔ̱ɔ̱k, a ko̱r na̱k nath. A ko̱r ŋutdä nath mi di̱i̱t, Ɛ ko̱r mi ci naath go̱l pekni diaal.

¹⁵ Kɛ kui̱ ɛmɔ ci lo̱c jiath, kä kɔ̱th nɛy ti ŋuan kɔ̱a̱a̱thikä. Thuk thieknikiɛn diaal, cä thɛp na̱k nath la̱th thi̱n. Aɣ! Jɛn thɛp ca la̱t kɛ ɣöö bɛ riaaw, ca jɛ ka̱n kɛ ɣöö ba jɛ näk ni naath.

¹⁶ Thɛp! Ji̱n ciecni kui̱c cuëëc! Kä ciecni kui̱c caam! Ciecni kui̱c ɔ ca muɔthdu riet thi̱n ɔ.

¹⁷ Ɣän bä tetkä pat bä, kä bi ŋɛ̈ɛ̈nydä cu thuɔ̱k, ruac ni ɣän Kuoth Nhial.”

Thɛp kua̱r Bɛ̈-bi-lɔn

¹⁸ Kä cu ruac Kuɔth Nhial ben kä ɣä wëë i̱,

¹⁹ “Gat ran, lätni duɔ̱p da̱ŋ rɛw ti bi ben kɛ thɛp kua̱r Bɛ̈-bi-lɔn, kä kɛn duɔ̱p da̱ŋ rɛw a kɛ tuɔkɛ rɔ̱ wi̱c kɛl. Kä lätni nyuuthni guäth in dääk duɔ̱p rɔ̱ thi̱n, min wä duɔ̱ɔ̱p kɛl wi̱c.

²⁰ Kä moc duɔ̱ɔ̱p kɛl kɛ nyuuth mi bi thɛp wä kɛ jɛ kä Rɛ̈-baa ro̱o̱l ji̱ Am-on, kiɛ mi wä Juda kɛnɛ Jɛ-ru-tha-lɛm wi̱i̱ tin buɔ̱m buɔ̱ɔ̱m.

²¹ Kä bi kuäär Bɛ̈-bi-lɔn ben cuɔ̱ŋ guäth in dääk duɔ̱p rɔ̱ thi̱n, röm duɔ̱pni da̱ŋ rɛw tui̱th ɛ. Kä jɛn yorɛ bääri ala gaakni, kä thiecɛ kuthkɛ. Kä guicɛ cueny lɛ̱̈ɛ̱̈ in cɛ thöp ala muc.

²² Kä gaak in te tetdä cuëëcdɛ nyuthɛ jɛ ɣöö bɛ wä kɛ duɔ̱ɔ̱p Jɛ-ru-tha-lɛm, kä bɛ ŋuɔ̱ɔ̱ny jiɛn ka̱n, bɛ thi̱i̱k Jɛ-ru-tha-lɛm dhiäm kɛ kɛ, kä bɛ wä kɛ jɔw köör, kä latdɛ ruac mi tho̱pɛ näk nath. Kä bɛ ko̱o̱tni la̱t ti wä wi̱i̱ pa̱a̱ny kä bɛ wec cu mak.

²³ Kä /ci ji̱ Jɛ-ru-tha-lɛm mɛmɛ bi ŋäth, kɛ ɣöö cikɛ ruac mat kɛ döör ti kɔ̱ŋ kɛ ɣöö bakɛ ben luäk. Duundɛ ɣöö bi kuäär Bɛ̈-bi-lɔn kɛ jakä tiɛmkɛ dueerkiɛn, kä bɛ kɛ naŋ ala pɛ̈ɛ̈c.”

²⁴ Kɛ kui̱ ɛmɔ mɛmɛ ɛ min lar Kuäär ni Kuoth Nhial ɛ wëë i̱, “Bi yɛn dueerkun tim kɛ ɣöö dueerkun jɔckɛ rɛy lätnikun diaal, kä kɛ ɣöö cia nyuɔɔnkun ŋa̱c, ba yɛ naŋ ala pɛ̈ɛ̈c.

²⁵ “Kä kɛ kui̱dun yɛn ruëëc I-thɛ-rɛl ti ji̱ nyuɔɔni ti ca rɔ̱ ya̱r, yɛn nɛy tin ci cäŋdun cop, min la gua̱a̱th tɔ̱ŋädun in jɔak,

²⁶ mɛmɛ ɛ min lär Kuäär ni Kuoth Nhial ɛ yɛ wëë i̱, ‘Wuɔcɛ kuɔ̱mni wuɔ̱thnikun, wuɔcɛ kuɔ̱mni kuäärä, /ci ŋɔak bi ŋot kɛ ta̱a̱diɛn. Nɛy tin gɔw täämɛ, bakɛ jakä jiäk, kä nɛy tin jiäk bakɛ jakä gɔw.

²⁷ Ɛ da̱k, ɛ da̱k, ɛ da̱k ɣän bä jɛ la̱t! (Jɛn ɛ mi /ken met tuɔɔk.) Amäni mi ci ram mi lot rɔ kɛ kuäär ben, ɣän bä cu ka̱m jɛ.’ ”

Thɛp Kuɔth kɛ kui̱ ji̱ Am-on

²⁸ Kä ji̱n lö gat ran lat ruac go̱o̱kä, kä lätni naath min ci Kuäär ni Kuoth Nhial ɛ lat kɛ kui̱ ji̱ Am-on tin kuëthkɛ ji̱ I-thɛ-rɛl kɛ rieet wäkɛ i̱, “Ɛ thɛp, ɛ thɛp, ca jɛ ka̱m raar go̱kädɛ kɛ kui̱ na̱k nath, ca jɛ toth kɛ ɣöö ba jɛ näk naath, kä yielɛ ce̱tkɛ nhiaal.

²⁹ Kä la̱a̱k tin nɛ̈nɛ kɛ kui̱du kɛn diaal kɛ ka̱a̱cni, latkɛ ruaacni go̱o̱kä kacä kɛ kui̱du. Kä ba yɛ ŋuɔ̱t ɛ ji̱ nyuɔɔni ti ji̱ dueeri, tin ci duäcdiɛn in jɔak cop, ci gua̱a̱th duäcädiɛn ben.

³⁰ Luɔcɛ jɛ go̱kädɛ! Ɣän bä yɛ luk, ni muun ëë cakä yɛ thi̱n, muun ëë tuɔɔk yɛn thi̱n.

³¹ Ɣän bä ŋɛ̈ɛ̈nydä wuɔ̱c yɛ, kä bä yɛ rɔl kɛ lew waŋä lɔaacdä. Ɣän bä yɛ la̱th tetdä raam mi thil pälikä, nɛy tin ŋa̱ckɛ däk nath.

³² Bi yɛn a tɔŋ maac, bia li̱w ɛn muun ɛmɔ, kä /ca yɛ bi nyɔk kɛ ti̱em, kɛ ɣöö ruac ni ɣän Kuoth Nhial.”