Yɛdh 20 - RUAC KUƆTH IN RƐL RƆ

Lo̱k ruac I-thɛ-rɛl wëë kɛ wä nhiam

¹ Kɛ cäŋ kä wäl kä pay dhieec kɛ bärɔw runi, cu tha̱a̱ŋ bööthni ji̱ I-thɛ-rɛl ben kɛ ɣöö bikɛ Kuoth Nhial ben thiec, kä cukɛ nyuur nhiamdä.

² Kä cu ruac Kuɔth Nhial ben kä ɣä wëë i̱,

³ “Gat ran, ruacni kɛ bööth ji̱ I-thɛ-rɛl, läri jɛ kɛ ɛn ɣöö ɛ Kuäär ni Kuoth Nhial i̱, ‘Ɛŋu bä yɛn ɔ? Kä ɛŋu thieec yɛn ɣä mɔ? Ce̱tnikɛ min tëkä ɣän Kuäär ni Kuoth Nhial, /cia ɣä bi met thiec.’

⁴ Bikɛ luk inu? Bikɛ luk inu, lö gat ran? A kɛ ŋa̱ckɛ jiäk gua̱ndɔɔŋnikiɛn,

⁵ läri jɛ kɛ ɛn ɣöö mɛmɛ laarɛ ɣän Kuäär ni Kuoth Nhial i̱, ‘Kɛ jɛn cäŋ ëë mɛ̈ɛ̈kä ni ji̱ I-thɛ-rɛl, cua̱ rɔɔdä ya̱c kuay thuɔk duëël Je-kɔb, cua̱ rɔɔdä nyuɔ̱thkɛ muun I-jëp, Cua̱ rɔɔdä ya̱ckɛ ɛn ɣöö ɛ ɣän Kuoth Nhial ni Kuothdun.

⁶ Ɛn cäŋ ɛmɔ cua̱ rɔɔdä yac ɛn ɣöö ɣän bäkɛ nööŋ raar muun I-jëp, naŋä kɛ muun in cä go̱r kɛ kui̱diɛn, mun caak kɛnɛ liɛɛth tuar, mun mi gɔaa ni jɛn kä muɔn diaal.

⁷ Kä ɣän cua̱kɛ jiök ɛn ɣöö ya̱kɛ kuth diaal tin cia lo̱ckun la̱th thi̱n, yɛn diaal, kä /cuarɛ rɔ̱ yär kɛ kuth guäyni I-jëp. Kɛ ɣöö ɛ ɣän Kuoth Nhial ni Kuothdun.

⁸ Duundɛ ɣöö, cua luɔ̱c ni rɔ̱ ɣä kä /kenkɛ ruacdä liŋ. Cuɛ thil ram kɛl mi cu kuth tin cikɛ lo̱ckiɛn la̱th thi̱n yäk, kä /kenkɛ kuth guäyni I-jëp päl. “ ‘Kä cua̱ car ni ɣöö dëë ŋɛ̈ɛ̈nydä wuɔ̱ckɛ kä dëë gakdä thuɔ̱kɛ rɛy rööl I-jëp.

⁹ Duundɛ ɣöö /ka̱nɛ la̱t kɛ kui̱ cio̱tädä, derɛ ciötdä moc kɛ pöc nhiam dööri tëë cieŋkɛ rɛydiɛn, kä kɛ kɛn nɛy tëë cä rɔɔdä nyuɔ̱thkɛ kɛ no̱o̱ŋ ji̱ I-thɛ-rɛl raar muun I-jëp.

¹⁰ Kä cua̱kɛ böth raar muun I-jëp, kä cua̱kɛ naŋ däärdɔaar.

¹¹ Cua̱kɛ ka̱m ŋuɔ̱tkä, kä cua̱kɛ nyuɔ̱th luëëkä, kɛ ɣöö mi wä kɛn kɛ luɔ̱th bikɛn diaal tëk.

¹² Wi̱i̱kä ti̱ti̱ diaal, ɣän cua̱kɛ ka̱m ca̱ŋ lɔ̱ŋni ala nyuuth kamädä kɛ kɛ, kɛ ɣöö bi kɛnɛ ŋa̱c ɛn ɣöö ɛ ɣän Kuoth Nhial cäkɛ jakä nɛy ti gɔw.

¹³ Duundɛ ɣöö cu ji̱ thuɔk duëël I-thɛ-rɛl rɔ̱ luɔ̱c ɣä däärdɔaar. /Kenkɛ ŋuɔ̱tkä luɔ̱th, kä cukɛ lo̱k ni luëëkä, kɛ ɣöö mi ci kɛn kɛ luɔ̱th dëë kɛn diaal tëk, kä cukɛ ca̱ŋ lɔ̱ŋnikä ya̱r ɛlɔ̱ŋ. “ ‘Kä cua̱ car ni ɣöö dëë ŋɛ̈ɛ̈nydä wuɔ̱ckɛ däärdɔaar ɛ bɛ cua̱ guutdiɛn.

¹⁴ Duundɛ ɣöö, /ka̱nɛ la̱t, kɛ kui̱ cio̱tädä, kɛ ɣöö /cɛ ciötdä bi moc kɛ pöc, nhiam dööri tëë böthä ji̱ I-thɛ-rɛl raar nhiamdiɛn.

¹⁵ Wi̱i̱kä ti̱ti̱ diaal, ɣän cua̱ rɔɔdä ya̱ckɛ däärdɔaar ɛn ɣöö ɣän /cäkɛ bi naŋ muun ëë cä ka̱mkɛ, min la mun caak kɛnɛ liɛɛth tuar, mun mi gɔaa ni jɛn kä muɔ̱n diaal,

¹⁶ kɛ ɣöö cikɛ luëëkä lo̱k, kä /kenkɛ ŋuɔ̱tkä luɔ̱th, kä cikɛ ca̱ŋ lɔ̱ŋnikä ya̱r kɛ ɣöö cikɛ lo̱ckiɛn ka̱m ni kuth guäyni.

¹⁷ A cäŋɛ jɛn inɔ, ɣän cua̱kɛ päl /ka̱nkɛ däk kiɛ dëëkɛ moc pek däärdɔaar.

¹⁸ “ ‘Kä cua̱ ruac kɛ gaatkiɛn däärdɔaar la̱räkɛ ɣöö /cuarɛ guur ni ŋuɔ̱t guurikun kä /cuarɛ luth ni luëëkiɛn, kä /cuarɛ rɔ̱ yär kɛ kuth guäynikiɛn.

¹⁹ Ɛ ɣän Kuoth Nhial la Kuothdun ɔ. Guɔ̱ɔ̱rɛ ni ŋuɔ̱tkä kä luɔ̱thɛ ni luëëkä agɔaa,

²⁰ kä tiɛtdɛ ca̱ŋ lɔ̱ŋnikä kɛ ɣöö bikɛ la nyuuth kamädä kɛ yɛ, kä bi yɛnɛ cu ŋa̱c ɛn ɣöö ɣän Kuoth Nhial ɛ ɣän Kuothdun.

²¹ Duundɛ ɣöö cu gaat luɔ̱c ni rɔ̱ ɣä. /Kenkɛ ŋuɔ̱tkä guɔ̱ɔ̱r, kä /kenkɛ luëëkä tit agɔaa tin dee luthdiɛn kɛn diaal jakä tëk, kä cukɛ ca̱ŋ lɔ̱ŋnikä ya̱r. “ ‘Kä cua̱ car ni ɣöö dëë ŋɛ̈ɛ̈nydä wuɔ̱ckɛ kä dëë waŋ lɔaacdä thuɔ̱kɛ däärdɔaar.

²² Duundɛ ɣöö /ka̱nɛ la̱t kɛ kui̱ cio̱tädä kɛ ɣöö dëë ciötdä moc kɛ pöc nhiam dööri tëë nööŋä ji̱ I-thɛ-rɛl raar nhiamdiɛn.

²³ Wi̱i̱kä ti̱ti̱ diaal, cua̱ rɔɔdä ya̱ckɛ däärdɔaar ɛn ɣöö ɣän bäkɛ kiɛth rɛy dööri, kä bikɛ däk rɛy wi̱i̱ni diaal,

²⁴ kɛ ɣöö /kenkɛ luëëkä wä la̱t kä cikɛ ŋuɔ̱tkä lo̱k, kä cikɛ ca̱ŋ lɔ̱ŋnikä ya̱r, kä cikɛ lo̱ckiɛn ka̱m kuth guäyni gua̱nikiɛn.

²⁵ Wi̱i̱kä ti̱ti̱ diaal, ɣän cua̱kɛ ka̱m ŋuɔ̱t ti /ci gɔw kɛ kɛ, kä cua̱kɛ ka̱m luëëk ti /cakɛ dëë jakä tëk.

²⁶ Ɣän cua̱kɛ jakä ya̱rkɛ rɔ̱ kɛ muckiɛn, cua̱kɛ jakä thöpkɛ gaatkiɛn tin key ala muc tin waŋkɛ, kɛ ɣöö bäkɛ kulɛ jakä dual, kɛ ɣöö bikɛ jɛ kulɛ ŋa̱c ɛn ɣöö ɛ ɣän Kuoth Nhial.’

²⁷ “Kɛ kui̱ ɛmɔ, gat ran ji̱n ruacni kɛ thok duëël I-thɛ-rɛl kä lärikɛ min ci Kuäär ni Kuoth Nhial ɛ lar ɛn ɣöö, ci guurikun ɣä kɔŋ, kueth kɛ bänydiɛn kɛ ɣä piny.

²⁸ Kɛ ɣöö mëë cäkɛ nööŋ muun ëë cä ya̱ckɛ, mɔ cikɛ päm nɛnɔ kɛnɛ jiɛn tin tɔ̱ɔ̱c, la kɛn muckiɛn cua tho̱p ɛn wi̱ni, la kɛn muckiɛn tin jakɛ ɣä kä ŋɛ̈ɛ̈ny cua̱ tho̱p. Ɛn wi̱ni waŋ kɛn wal tin kuɔ̱r kuɔ̱ɔ̱r kuthkiɛn, kä lät kɛn kɛ kä kɔaaŋ ti muɔckɛ kɛ.

²⁹ Kä cua̱kɛ thiec i̱, ‘Jɛn gua̱a̱th palä mɔ la wä yɛn thi̱n ɔ, ɛŋu?’ (Ni wal cɔalkɛ jɛ Bamaa.)

³⁰ Kɛ kui̱c ɛmɔ, ji̱n ruacni kɛ thok duëël I-thɛ-rɛl i̱ laar Kuäär ni Kuoth Nhial ɛ ɛn ɣöö, yɛn bia cuarɛ rɔ̱ɔ̱dun yär ce̱tkɛ guurikun tëë cua guɔ̱ɔ̱r ni jiäk tëë kɔn?

³¹ Mi wä yɛn muckun thöp, a tho̱p yɛn gaatkun ala muc ti waŋkɛ, cia ya̱r ni rɔ̱ kɛ kuth guäynikun amäni walɛ. A bä yɛ ku nhök ɣöö bia ɣä ben thiec inu lö thok duëël I-thɛ-rɛl? Ce̱tnikɛ tëkdä, ɣän Kuäär ni Kuoth Nhial, /cia bi ben ruac kɛ ɣä.”

³² “Kä min te rɛy cärädun /cɛ bi met tuɔɔk, min caar yɛn ɛ ɛn ɣöö bia rɔ̱ pa̱a̱r kɛ döör. Ce̱tkɛ ji̱ wi̱i̱ni tin palkɛ jiɛn kɛnɛ pääm.”

Bi Kuoth I-thɛ-rɛl luɔc thi̱n

³³ “Ce̱tnikɛ min tëkä, ɣän Kuäär ni Kuoth Nhial, ɛ puc kɛ buɔ̱mdä min di̱i̱t kɛnɛ ŋɛ̈ɛ̈nydä, ɣän bä yɛ dhil ruac ala kuäärun.

³⁴ Ɣän bä yɛ nööŋ raar rɛy dööri kɛnɛ rɛy wi̱i̱ni diaal tëë cä yɛ riaw kä thi̱n, kɛ buɔ̱mdä min di̱i̱t kɛnɛ ŋɛ̈ɛ̈nydä,

³⁵ ɣän bä yɛ naŋ däärdɔaar dööri, ɛn wani ɣän bä ben luk kɛ yɛ a guic kɔn rɔ̱.

³⁶ Ce̱tnikɛ mëë cä kɔŋ luk kɔnɛ guurikun däärdɔaar muun I-jëp, ɣän bä luk kɛ yɛ, ruac ni ɣän Kuäär ni Kuoth Nhial.

³⁷ Ɣän bä yɛ käp, kä bä yɛ jakä te rɛy matdä ruacdä.

³⁸ Ɣän bä nɛy tin /ca ɣä luth woc rɛydun, kɛnɛ nɛy tin ca ɣä duer duer. Bäkɛ lieny raar muun in cieŋkɛ thi̱n ala jur, duundɛ ɣöö /cikɛ bi wä muun ji̱ I-thɛ-rɛl. Kä bi yɛn ɛ cu ŋa̱c ɛn ɣöö ɛ ɣän Kuoth Nhial.

³⁹ “Kä kɛ kui̱dun lö ji̱ thuɔk duëël I-thɛ-rɛl, mɛmɛ larɛ Kuäär ni Kuoth Nhial ɛn ɣöö yɛn wiaa la̱tdɛ kuth guäynikun ikä ramɔ kä yɛ, duundɛ ɣöö kɛ kɔrɛ bi yɛn ɣä liŋ, kä /ci yɛn ciötdä bi lɛ nyɔk kɛ yäri, kɛ muckun kɛnɛ kuth guäynikun.

⁴⁰ “Kɛ ɣöö wi̱i̱ pa̱a̱mdä min rɛl rɔ, wi̱i̱ pa̱a̱m I-thɛ-rɛl in bäär, bi ji̱ thuɔ̱k duëël I-thɛ-rɛl diaal ɣä lätikä ɛn muun ruac ni ɣän Kuäär ni Kuoth Nhial. Ɛn wani ɣän bäkɛ nhɔk, ɛn wani bä muckun tin gɔw nikɛn tin cia liny agɔaa cu go̱r, kɛɛl kɛ muckun tin rɛ̈lkɛ rɔ̱.

⁴¹ Ɣän bä yɛ nhɔk ce̱tnikɛ ŋuäny mucni ti waŋkɛ, mi wa̱a̱ yɛ wä nööŋ raar rɛy dööri tëë cä yɛ riaw kä thi̱n, bä yɛ ruɔ̱ɔ̱l wi̱i̱ni diaal tin ca yɛ kiɛth thi̱n. Kä ɣän bä gɔɔydä cu nyoth rɛydun nhiam dööri.

⁴² Kä bia jɛ cu ŋa̱c ɛn ɣöö ɛ ɣän Kuoth Nhial, mi wa̱a̱ yɛ wä nööŋ muun I-thɛ-rɛl, wec ëë cä yac ɛn ɣöö bä ka̱m guurikun.

⁴³ Ɛn wani bia lätkun diaal tëë ca yɛ ya̱r cu tim. Kä bia rɔ̱ɔ̱dun cu lo̱k kɛ kui̱ dueeri diaal tëë ci yɛn kɛ la̱t.

⁴⁴ Kä bi yɛn ɛ cu ŋa̱c ɛn ɣöö ɛ ɣän Kuoth Nhial, mi wa̱a̱ wä lät kɛ kui̱ cio̱tädä, ɛ /ci mɔ a duɔ̱ɔ̱p nyuɔɔnikun. Kiɛ jiäkun lö thok duëël I-thɛ-rɛl, ruac ni ɣän Kuäär ni Kuoth Nhial.”

Lääri ŋɛnyä kɛ kui̱c cuëëc

⁴⁵ Kä cu ruac Kuɔth Nhial ben kä ɣä wëë i̱,

⁴⁶ “Gat ran, ji̱n ri̱tni nhiamdu peek cuëëc, lat ruac gaak kɛ pek kuec cuëëc, kä lat ruac go̱o̱kä kɛ kui̱ ruɔ̱ɔ̱p Nɛ-gɛb,

⁴⁷ läri jɛ rup Nɛ-gɛb ɛn ruac Kuɔth Nhial, laarɛ Kuäär ni Kuoth Nhialɛ ɛn ɣöö ɣän bä mac dɔp rɛydu. Kä bɛ jiɛn diaal tin tɔ̱ɔ̱c tin te rɛydu waŋ, amäni jiɛn diaal tin ko̱o̱t bikɛ waaŋ. Kä /ca bo̱l maac bi luäŋ kɛ yieny. Kä bɛ nhiem diaal ni kui̱c cuëëc bi wä ni kui̱c caam bo̱r kɛ lëthdɛ.

⁴⁸ Kä bi naath diaal ɛ cu nɛn ɛn ɣöö ɛ ɣän Kuoth Nhial ɛ nëë dɔp mac, kä /ca jɛ bilɛ luäŋ kɛ yieny.”

⁴⁹ Kä ɛ jɛn cua̱ wee i̱, “Aɣ, Kuäär ni Kuoth Nhial kɛn nɛy ti̱ti̱ lat kɛn ɣä, ɛn ɣöö ɛ ɣän läät ma̱r ma̱a̱ri.”