Yɛdh 19 - RUAC KUƆTH IN RƐL RƆ

Pa̱r kɛ kui̱ I-thɛ-rɛl

¹ Kä cu Kuoth ɣä jakä kiɛtdä dit jiɛthä lɔaac kɛ kui̱ ruëëcni I-thɛ-rɛl wëë i̱,

² “Muɔɔrun ɛ lony in mith rɛy lonyni! Jɛn tɔ̱ɔ̱cɛ rɛy dɛɛni, yienɛ dɛykɛ kɛ tut lonyni.

³ Kä cuɛ dɔw kɛl nyuɔ̱th ka̱k kä dɛykɛ, kä cuɛ la lony mi bum bum. Kä cuɛ ka̱k leyni ŋa̱c, cuɛ naath la camɛ.

⁴ Kä cu döör kɛ̈kdɛ liŋ, kä cukɛ jɛ käp kɛ ɣɔ̱m. Cukɛ jɛ buɔth kɛ yieeth, naŋkɛ jɛ muun I-jëp.

⁵ Kä mëë ci man ɛ nɛn ɛn ɣöö ci dɔwdɛ thil mi lɛnɛ lɛ ŋäth, cuɛ dɔwdɛ mi dɔ̱ŋ ka̱n kä dɛykɛ, cuɛ jɛ jakä lony mi bum bum.

⁶ Mëë cɛ ku thuɔ̱k kɛ pi̱eth, cuɛ ja̱l kɛɛl kɛ lony. Cuɛ rɔ ŋi̱eec kɛ ka̱k amäni mëë cɛ la mi cam naath.

⁷ Kä cuɛ ti̱eckiɛn tin buɔ̱m buɔ̱ɔ̱m tiath, kä cuɛ wi̱i̱kiɛn däk. Kä cu wi̱c muɔ̱ɔ̱n kɛnɛ ji̱kɛ diaal dual ɛlɔ̱ŋ, mi ca burɛ liŋ.

⁸ Kä cu döör ben nyiëëny kɛ jɛ cukɛ ben wi̱i̱ni diaal tin thia̱k, kä cukɛ cambaknikiɛn ɣa̱r wi̱i̱dɛ, kä cukɛ jɛ käp kɛ ɣɔ̱mdiɛn.

⁹ Kä cukɛ jɛ buath dueel yieenä kɛ yieeth, kä cukɛ jɛ nöŋ kuäär Bɛ̈-bi-lɔn. kä cua jɛ la̱th dueel yieenä. Kɛ ɣöö /ca jɔwdɛ bi nyɔk kɛ lieŋ wuɔ̱thni päämni I-thɛ-rɛl.

¹⁰ Mëëdan ce̱t ta̱a̱ muɔɔr kɛ jiath buɔ̱cä rɛy kakä wal kɛ kui̱ kɔaŋ, mi ca piɛth gekä yiëër, cuɛ tekɛ ji̱th kɛnɛ dɛy ti ŋuan, kɛ ɣöö te gua̱th kɛ pi̱w ti ŋuan.

¹¹ Cu karkɛ bum ɛ tet, cuakɛ lätni kɛtni kuäärä. Kä jɛn ɛn jiath cu bär ni jɛn, rɛy jiɛn ti ca rɔ̱ thi̱ŋ, kä cua jɛ nɛn kɛ bärɛ kɛnɛ ŋuan karikɛ.

¹² Duundɛ ɣöö cua jɛ yut kɛ ŋɛ̈ɛ̈ny, kä cua jɛ yuɔr piny. Kä cu jiɔam känyä ca̱ŋ jɛ koth, kä cua dɛykɛ tɛ̈ŋ jɔ̱ɔ̱r, kä cu taŋdɛ ɛn jiath kööt, kä cu mac ɛ waŋ.

¹³ Kä täämɛ cua jɛn jiath pith däärdɔaar, dɔr rɛ̈w mi kööt mi thil pi̱.

¹⁴ Kä cua puɔ̱ny jiaath waŋ kɛ mac, kä cu mac karkɛ diaal kɛnɛ dɛykɛ waŋ. Kä cuɛ thil kaar mi bum bum mi cu duɔth puɔ̱ɔ̱ny jiaath, mi dëë lɛ jak kä kɛɛt kua̱r.” Mɛmɛ ɛ dit jiɛthä lɔaac, la kiɛtkɛ jɛ kɛ cäŋ pärä ji̱ I-thɛ-rɛl.