Yɛdh 17 - RUAC KUƆTH IN RƐL RƆ

Cäät kɛ kui̱ cori da̱ŋ rɛw kɛnɛ jiath

¹ Kä cu ruac Kuɔth Nhial ben kä ɣä wëë i̱,

² “Gat ran, lätni ji̱ I-thɛ-rɛl ma̱r ma̱a̱ri kä lätnikɛ ruac cäätdä.

³ Läri jɛ kɛ ɛ Kuäär ni Kuoth Nhial i̱, ‘Cu cuɔɔr mi di̱i̱t mi tekɛ gɔ̱k ti di̱t, kä tëë kɛ juät ti ba̱r ba̱a̱r, kɛ biɛɛl ti ŋuan ti gɔw ɛlɔ̱ŋ, ben kä Lɛ-ba-nɔn. Kä cuɛ wi̱c jiaath lurä ben to̱l,

⁴ cuɛ kaar jiaath lurä ben to̱l. Kä cuɛ jɛ naŋ ro̱o̱l nɛɛni ti köök, cuɛ jɛ ben la̱th däär wec köökni.

⁵ Kä cuɛ dɔw jiaath ka̱n ɛn muun ɛmɔ, kä cuɛ jɛ la̱th rɛy muɔ̱ɔ̱n ciɛkä bɛɛl mi gɔaa. Kä cuɛ jɛ pith gekä pi̱i̱ni ti ŋuan, ce̱tnikɛ jiath kɛcä.

⁶ Kä cuɛ do̱ny a bɛ la jiath buɔ̱cä, cuɛ ta̱ny duundɛ ɣöö ciɛkɛ. Kä cu karkɛ piith luɔ̱ckɛ rɔ̱ cuɔɔr, kä cu ciökɛ peek niɛ guäth in cuŋɛ thi̱n. Kä cuɛ la jiath buɔ̱cä, cuɛ tekɛ kar, kä cuɛ tekɛ ji̱th.

⁷ “ ‘Kä cuɛ tekɛ cuɔɔr mi di̱i̱t mi dɔ̱ŋ, tëë kɛ gɔ̱k ti di̱t kɛnɛ juät ti ŋuan. Kä nɛn ɛ! Ɛn jiath buɔ̱cä cu ciökɛ piith luɔ̱ckɛ rɔ̱ cuɔɔr. Kä cu karkɛ piith luɔ̱ckɛ rɔ̱ cuɔɔr, kɛ ɣöö bi cuɔɔr ɛ wac kɛ pi̱, muun in ca jɛ piɛth thi̱n.

⁸ Jɛn ca jɛ piɛth muun mi gɔaa, mi tekɛ pi̱ ti ŋuan, kɛ ɣöö bɛ tekɛ kar ti ŋuan kä bɛ dɛy kuir, cua jiath mi di̱i̱t.’ ”

⁹ Kä läri jɛ kɛ bä ɛn ɣöö mɛmɛ lar ɛ Kuäär ni Kuoth Nhial wëë i̱, “Jɛn buɔ̱c /cɛ bi piith agɔaa. Bi cuɔɔr in jio̱l, ciökɛ ben lööl raar, kä bɛ dɛykɛ jakä bol a bikɛ rɔɔl. Kä bi ji̱thkɛ tin pay tunh rɔɔl, /cɛ rɛm mi bum bum kiɛ nɛy ti ŋuan go̱r, kɛ ɣöö ba jɛ ben guɔ̱th raar amäni ciökɛ.

¹⁰ Cäŋ ba jɛ nyɔk kɛ pi̱eth, bɛ piith agɔaa? Mi wä jiɔam kuec känyä ca̱ŋ wä puɔ̱t, /cɛ bi rɔɔl ɛn wi̱ni, guäth in ca jɛ pith thi̱n?”

Lat lotdä ruac cäätdä

¹¹ Cu ruac Kuɔth Nhial ben kä ɣä ɛn ɣöö bä jɛ

¹² la̱r ji̱ thuɔk duëël ɛ ci kac raarɛ i̱, “Ji̱n ŋäci min lot ŋɔak ti̱ti̱ jɛ? Läri jɛ kɛ i̱, ‘Ci kuäär Bɛ̈-bi-lɔn ben kä Jɛ-ru-tha-lɛm, cuɛ kuäärɛ kɛnɛ ji̱ kɔaarɛ ben naŋ, kä cuɛ kɛ naŋ kä Bɛ̈-bi-lɔn kɛɛl kɛ jɛ.

¹³ Kä cuɛ ram kɛl kä kuay kua̱r naŋ kä cuɛ mat ruac la̱t kɛ jɛ, kä cuɛ jɛ jakä yaacɛ rɔ. Kä cuɛ di̱eel wec naŋ bä.

¹⁴ Kä cu kuäär mɛmɛ la̱t kɛ ɣöö bi kuäär mua̱l /cɛ rɔ bi lɛ kap nhial. Kä bikɛ mat ruac ɛmɛ tit, kɛ ɣöö bikɛ kulɛ cieŋ ala naath.

¹⁵ Duundɛ ɣöö, cu ram in ci rɔ yac ruacdɛ lo̱k kɛ jäknidɛ kɛ naath kä I-jëp, kɛ ɣöö ba jɛ wä nöŋ jiöŋkööri kɛnɛ rɛm köör mi di̱i̱t. Bi duŋdɛ rɔ lot ɛn ram in lät ti ce̱tkɛ tɔ̱tɔ̱? Dee ram mi lät ti ce̱tkɛ kɛn ti̱ti̱ kään? Derɛ kään kä cɛ mat ruac ba̱ny piny?

¹⁶ Ɛ puc ɛ puc, ce̱tnikɛ min tëkä ɣän Kuäär ni Kuoth Nhial, bɛ li̱w kä Bɛ̈-bi-lɔn muun kua̱r ëë jak jɛ kä kuäär Juda, kɛ ɣöö cɛ mat ruacdɛ dhɔ̱l kä cɛ ya̱c ëë ca yaacni jɛ lo̱k.

¹⁷ /Ci Pɛro kɛnɛ rɛm köör in bum kɛ nɛɛkɛ tin ŋuan jɛ bi luäk kɛ ko̱r, mi ca ko̱o̱tni kɛnɛ päny in gölkɛ wec la̱t kɛ ɣöö ba nɛy ti ŋuan ben näk.

¹⁸ Kä kɛ ɣöö cɛ ya̱c päl kä cɛ mat ruac dhɔ̱l, kɛ ɣöö cɛ lar ɛn ɣöö bɛ Bɛ̈-bi-lɔn luäk, kä cɛ lɛ la̱t ni jiäk ti̱ti̱ jɛn /cɛ bi kään.

¹⁹ Kɛ kui̱ ɛmɔ, ce̱tnikɛ min tëkä, ɣän Kuäär ni Kuoth Nhial, ɣän bä ya̱cdä mëë cɛ lo̱k kɛnɛ mat ruacdä mëë cɛ to̱l la̱th ni wi̱i̱dɛ.

²⁰ Bä cambakdä ɣa̱r wi̱i̱dɛ, kä ba jɛ käp ɛ dhuurä. Kä bä jɛ naŋ kä Bɛ̈-bi-lɔn, kä bakɔ wä luk kɔnɛ jɛ ɛn wani kɛ kui̱ jiäkni tëë cɛ lät kä ɣä.

²¹ Kä ba nɛɛkɛ diaal tin ca rɔ̱ bar näk ko̱o̱r, kä ba nɛɛkɛ tin ci kään kiɛth rɛy jiɔam. Kä bi yɛn ɛ cu ŋa̱c ɛn ɣöö ɛ ɣän Kuäär ni Kuoth Nhial ruac ɔ.’ ”

Lär Kuɔth kɛ mi bi ben

²² Kä cu Kuäär ni Kuoth Nhial mɛmɛ lar wëë i̱, “Ɣän puɔ̱nydä bä piɛth jiaath ŋuerä ka̱n, ni bikädɛ kä bä jɛ pith. Kä bä dɛy jiaath ɛmɔ naŋ, ɣän puɔ̱nydä bäkɛ wä pith ni wi̱i̱ pa̱a̱m ni nhial.

²³ Wi̱i̱ pa̱a̱m I-thɛ-rɛl in bäär ɣän bä jɛ wä pith thi̱n, kɛ ɣöö bɛ kuay kulɛ nööŋ, kä bɛ la jiath ŋuerä mi gɔaa ɛlɔ̱ŋ. Kä bi diit ti gööl cieŋ thaarɛ, rɛy ti̱pädɛ bi diit diaal ti gööl duëlkiɛn la̱t karikɛ.

²⁴ Kä bi jiɛn ruɔ̱ɔ̱p diaal ɛ cu ŋa̱c ɛn ɣöö ɛ ɣän Kuoth Nhial. Ɣän luɔ̱ɔ̱cä jiath mi bäär piny, kä jakä jiath mi ciɛk kä bär. Ɣän jakä jiath mi ɣɔa̱a̱c kä kööt, kä jakä jiath mi kööt kä ɣɔa̱a̱c. Ruac ni ɣän Kuoth Nhial. Kä bä jɛ la̱t.”