Yɛdh 16 - RUAC KUƆTH IN RƐL RƆ

Jɛ-ru-tha-lɛm mi thil ŋa̱th

¹ Kä cu ruac Kuɔth Nhial ben kä ɣä wëë i̱,

² “Gat ran, läri Jɛ-ru-tha-lɛm dueerkɛ,

³ kä läri jɛ kɛ ɛn ɣöö mɛmɛ ɛ ruac Kua̱r ni Kuoth Nhial kɛ kui̱ Jɛ-ru-tha-lɛm wëë i̱, ‘Gua̱a̱th ëë tuɔɔki thi̱n, kɛnɛ gua̱a̱th ëë diëthkɛ ji̱ thi̱n, ɛ mun ji̱ Kɛ-naan. Guur ɛ raan ji̱ Ɛ-mor, kä muɔɔr ɛ raan ji̱ Ɣɛ̈th.

⁴ Kä kɛ kui̱ diëëthniku, kɛ cäŋ ëë daapkɛ ji̱ /ka̱n lo̱kdu tɛm, kä /ka̱n ji̱ lak kɛ pi̱ kɛ ɣöö bi puɔ̱nydu kulɛ puath, kä /ka̱n ji̱ buk kɛ milɛ kä /ka̱n ji̱ rith kɛ bieyni.

⁵ Cuɛ thil ram kɛl mi cu ji̱ nhɔk, mi cu ji̱ lät kä duɔ̱ɔ̱r kɛl kä ti̱ti̱. Cua yuɔr ni ji̱ dɔɔr rɛy ka̱a̱kni, kɛ ɣöö cua ji̱ lo̱k nikɛ cäŋ ëë daapkɛ ni ji̱.

⁶ “ ‘Kä mëë cä rët kɛ gëkdu cua̱ ji̱ jek daŋi ni rɔ rɛy riɛmdu. Kä min ti tɔ̱ɔ̱cä rɛy riɛmdu, cua̱ ji̱ jiök i̱, “Tëkni!

⁷ Kä cua̱ ji̱ jakä pith ce̱tnikɛ jiath rɛy kakä.” Kä curi piith a bi bär, a curi gua̱a̱th määnä cop. Cu thinku ben, kä cu miemku piith ɛ bär, duundɛ ɣöö curi ŋot ti̱i̱ juutdä kä jäli kɛ pa̱a̱tku.

⁸ “ ‘Kä cua̱ rɔ nyɔk kɛ rët kɛ gëkdu, cua ji̱ jek ci gua̱a̱th in dëë go̱r ni nyal cop. Kä cua̱ thok bieydä ɣär, kä cua̱ ji̱ kum kɛ ɣöö ti juutdä. Kä cua̱ rɔ ya̱c ji̱ kä cua̱ mat ruac la̱t kɛ ji̱, kä curi cua̱ duŋdä, ruac ni ɣän Kuäär ni Kuoth Nhial.

⁹ Kä cua̱ ji̱ puɔk kɛ pi̱ cua̱ riɛm lak jɔ̱ɔ̱r kä ji̱, kä cua̱ ji̱ yi̱r kɛ liɛɛth.

¹⁰ Kä cua̱ ji̱ kum kɛ bi̱i̱ biɛɛli mi gɔaa, kä cua̱ ji̱ moc wa̱a̱ri gupä ti gɔw ɛlɔ̱ŋ, kä cua̱ ji̱ kum kɛ bi̱i̱ thilikä kɛnɛ bi̱i̱ mi ca tak agɔaa.

¹¹ Kä cä ji̱ thiäŋ kɛ yio̱w pua̱a̱ny ti gɔw, kä cua̱ ji̱ moc kɛ ciik tetni kɛnɛ kuat ŋua̱a̱k,

¹² kä cua̱ ji̱ moc kɛ tiɛl wuɔ̱m, kɛnɛ tiil ji̱thni kɛ kum wec mi gɔaa ɛlɔ̱ŋ.

¹³ Kä wuɔ̱tdu kɛɛliw ɛ da̱a̱p kɛnɛ läŋ, kä la läthi ni bieyni thilikä kɛnɛ bi̱i̱ in di̱t kökdɛ kä ca tak agɔaa kɛ bi̱i̱ biɛɛli. Kä la cami ni jurayni tin ca la̱t kɛ nup in gɔaa ni jɛn kɛ tuaar kɛnɛ liɛɛth mi gɔaa. Kä ci piith kɛ gɔɔy mi di̱i̱t ɛlɔ̱ŋ a curi ro̱ŋ nikɛ ɣöö deri la ciek kua̱r.

¹⁴ Kä cu kɛ̈kdu räth rɛy dööri, kɛ kui̱ gɔɔyädu, kä curi gɔaa a lenyi ti diaal kɛ wuɔ̱t in cä ka̱m ji̱, ruac ni Kuäär ni Kuoth Nhial.

¹⁵ “ ‘Duundɛ ɣöö ji̱n curi ŋäth ni gɔɔydu, kɛnɛ kɛ̈kdu kä curi cua̱ ler la tɔ̱ɔ̱c ni ji̱n kɛ nɛy diaal tin ret kɛ jɛn gua̱a̱th ɛmɛ.

¹⁶ Curi tha̱a̱ŋ bieyniku ka̱n curi gua̱a̱th ciɛŋädu moc kɛ maan, kä la cua̱ tɔ̱ɔ̱ci thi̱n kɛ wutni, thilɛ mi ce̱tkɛ jɛ mi ci kɔŋ tuɔɔk kä thilɛ mi ce̱tkɛ jɛ mi met tuɔɔk.

¹⁷ Kä ji̱n käni yio̱w pua̱a̱nydu tin gɔw ala da̱a̱pnikä kɛnɛ la̱ŋkä tëë ka̱mä ji̱, ku kɛ lät ni rɔ̱ kä pua̱ny ti ce̱tkɛ wutni, ku nyin leerä la̱t kɛ kɛ.

¹⁸ Kä käni bieyni biɛɛliku, kä wër kumkɛ, kä läthni liɛɛthdä kɛnɛ wälä min kur kur nhiamdiɛn.

¹⁹ Kä amäni nupdä min gɔaa ni jɛn ɛlɔ̱ŋ kɛnɛ liɛɛthdä kɛ tuaarä tëë cä ka̱m ji̱ kɛ ɣöö bikɛ cam, tho̱pnikɛ nhiamdiɛn ala ŋuäny mi gɔaa. Kä cua jɛn min ci tuɔɔk, ruac ni ɣän Kuäär ni Kuoth Nhial.

²⁰ Ji̱n curi dhɔɔlku kɛnɛ nyieeku tëë däpi ɣä naŋ, curi kɛ wä thöp kuth tɔ̱tɔ̱ ala muc ti waŋkɛ. Ce̱tkɛ mi kɛn lät leerädu /ka̱n ji̱ ni ro̱ŋ!

²¹ Ɛ curi gaatkä ŋuɔ̱t kä curi kɛ wä thöp kuth, ala muc ti waŋkɛ.

²² Kä kɛ kui̱ dueeriku kɛnɛ lät leerädu, /keni nin ŋuɛɛtdädu lɛ tim, mëë ti juutdä kä thilɛ ciöku wa̱a̱ri, mëë daŋi ni rɔ rɛy riɛmdu.’ ”

Ce̱t Jɛ-ru-tha-lɛm kɛ ler

²³ Kä cu Kuäär ni Kuoth Nhial wee i̱, “ ‘Riɛk, riɛk akɛ ji̱, kɛ kɔr jiäkniku diaal,

²⁴ ci rɔ lät kä gua̱a̱th palä kuthni, kä ci rɔ lät kä duel rɛy dɛ̈ɛ̈ni wec diaal.

²⁵ Ci rɔɔdu lät kä duel mi gɔaa wuɔ̱thni duɔ̱pni diaal a ci gɔɔydu cu ya̱r kɛ leeru, kä la tho̱pi ni rɔɔdu nɛy diaal tin ret kɛ gua̱th ɛmɔ, kä rep leeru ni rɔ.

²⁶ Ji̱n tɔ̱ɔ̱ci kɛ ji̱ I-jëp, ji̱ thiäkädu tin lër, reep ciaŋ leerädu ni rɔ, a jaki ni ɣä kä gak.

²⁷ Kɛ kui̱c ɛmɔ, ɣän bä gaak kɛ yɛ, bä tha̱a̱ŋ muɔ̱ɔ̱ndun woc kä bä yɛ la̱th tetni ji̱ tɛ̈run, ni nyier ji̱ Pi-li-thɛt, tëë po̱c kɛ ciaaŋ nyuɔɔni.

²⁸ Kä curi tɔ̱ɔ̱c kɛ ji̱ A-thi-ri-ya, kɛ ɣöö /ken leeru ni thuuk, kä cäŋ ɛ mëë cia tɔ̱ɔ̱c kɛɛl bä ŋotdɛ /kenɛ leeru thuk.

²⁹ Kä cu leeru wä räth ni kä ji̱ Kɛ̈l-da-ya min la mun ji̱ köökni, a cäŋni mëë ci tɔ̱ɔ̱c kɛ kɛ /ken leeru thuɔ̱k.’ ”

³⁰ Cu Kuäär ni Kuoth Nhial mɛmɛ lar wëë i̱, “ ‘Kɛ thuɔ̱k puɔ̱ɔ̱t lɔc ji̱, kɛ ɣöö ci ŋɔak diaal ti jiäk ti̱ti̱ la̱t ce̱tnikɛ ler mi thil pöc.

³¹ Ji̱n curi gua̱th ti pali kuth guäyni thi̱n la̱t thär duɔ̱pni diaal, kä ci rɔ lät kä gua̱a̱th mi gɔaa dɛ̈ɛ̈ni wec diaal! Kä duundɛ ɣöö /keni yio̱w go̱r ce̱tkɛ ler.

³² Ler ciëk in la wä päth ni ja̱a̱l duɔ̱pni kɛ gua̱a̱th cɔaadɛ!

³³ Kä la muɔckɛ ni lëër diaal kɛ muc, duundɛ ɣöö la tho̱pi ni mucku diaal nhööku, la kɔki nikɛ kɛ ɣöö bikɛ kulɛ ben kä ji̱ pekni diaal kɛ kui̱ leerädu.

³⁴ Inɔ, ji̱n ti kɛ dääk kɛ män tin kɔ̱ŋ kɛ ciaŋ leerädu. Thilɛ ram mi wur kɔɔru mi go̱o̱r tɔ̱ɔ̱c kɛ ji̱. Kä ji̱n tho̱pi naath yio̱w, kä thilɛ ram mi mooc ji̱ kɛ yio̱w, ɛ jɛn dääkdu ɛ nɔ.’ ”

Luk Kuɔth kɛ Jɛ-ru-tha-lɛm

³⁵ “Kɛ kui̱ ɛmɔ lö ler liŋ ruac Kuɔth Nhial min latdɛ.

³⁶ Mɛmɛ ɛ min lar Kuäär ni Kuoth Nhial ɛ wëë i̱, ‘Kɛ ɣöö ci ta̱a̱ juutädu nyoth kɛ lät leerädu tin lätdi kɛ nhööku, kɛnɛ kuth guäyniku tin lökä, kä curi riɛm ganku thöp kɛn kuth guääyniku ala muc,

³⁷ kɛ kui̱c ɛmɔ ɣän bä kɛn nhööku diaal ku rol, kɛn nɛy tin la nhɔki, nɛy diaal tin nhɔki kɛnɛ nɛy diaal tin lo̱ki. Ɣän bäkɛ rol pekni diaal kɛ ɣöö bikɛ ben gaak kɛ ji̱, bä ji̱ lony ni juutdä nhiamdiɛn, a ba ta̱a̱ juutädu nɛn.

³⁸ Ɣän bä ji̱ luk ce̱tkɛ ciek mi ca dhɔm kiɛ bä ji̱ luk ce̱tkɛ nɛy ti ca naath näk, ɣän bä ji̱ kum kɛ lia̱a̱ kɛ ŋɛ̈ɛ̈nydä kɛnɛ tiɛɛl waŋä lɔaacdä.

³⁹ Ɣän bä ji̱ la̱th tetnikiɛn, a bikɛ gua̱thku da̱k piny kä bikɛ gua̱th paliku da̱k piny. Bikɛ bieyniku rɛ̈t kä bikɛ da̱a̱pniku mac, kä bikɛ ji̱ ba̱ny piny ni juutdä a thil wa̱a̱ri.

⁴⁰ Kä bikɛ buɔ̱n nath mi di̱i̱t nöŋ ji̱, bikɛ ji̱ bök kɛ pääm kä bikɛ ji̱ ŋuɔ̱k ni dhoon kɛ thɛpnikiɛn.

⁴¹ Bikɛ ciëëŋku waŋ, kä bikɛ ji̱ luk ni nhiam mään ti ŋuan. Ɣän bä ji̱ ka̱p cuɔ̱ŋ kä lätni nyinä leerä, /ci naath bilɛ nyɔk kɛ yur yio̱w ti kɔki kɛ.

⁴² Inɔ, bä gakdä cu thuk kä bi tiɛla cu jiɛɛn kä ji̱. Bi lɔcdä cu kɔ̱a̱c, /cä rɔɔdä bilɛ nyɔk kɛ gak kɛ ji̱.

⁴³ Kä kɛ ɣöö /keni ni̱n ŋuɛɛtädu tëë kɔn tim, a curi jakni ɣä kä ŋɛ̈ɛ̈ny kɛ lät jiäkniku diaal, kɛ kui̱ ɛmɔ, ɣän cä lätku tin jiäk luɔc wi̱i̱du, ruac ni ɣän Kuäär ni Kuoth Nhial. “ ‘Kä /keni mat ni nyin po̱cä ti ŋuan ti lënykɛ ni jiäk tëë kɔn thi̱n?’ ”

Cäät Nyaal mi ce̱tkɛ man

⁴⁴ Kä cu Kuoth Nhial wëë i̱, “Nɛnɛ ɛ bi nɛy diaal tin la latkɛ cäätni, cäät ɛmɛ la lat kɛ kui̱du wäkɛ i̱, ‘Ce̱t nyal nikɛ man, kä ce̱t man nikɛ nyaadɛ.’

⁴⁵ Ɛ ji̱n nyal mi ce̱tkɛ muɔɔr mëë lo̱k cɔwdɛ kɛnɛ gaatkɛ, kä ɛ ji̱n nyal mi ce̱tkɛ nyiemani tëë lökɛ cɔwkiɛn kɛnɛ gaatkiɛn. Kä muɔɔr ɛ nya ji̱ Ɣɛ̈th, kä guur ɛ raan ji̱ Ɛ-mor.

⁴⁶ Kä nyimuɔɔr in di̱i̱t ɛ jɛn Tha-mɛ-ria, min cieŋ kui̱c caamdu kɛnɛ nyieekɛ. Kä nyimuɔɔr in tɔtdiɛn ɛ Thɔ-dɔm min cieŋ kui̱c cuëëcdu kɛnɛ nyieekɛ.

⁴⁷ Kä ji̱n /keni nyiath nikɛ kɛ guuriɛn kä rɔa, kɛ gua̱a̱th mi tɔt cu lɛ ben jiääk ni ji̱n kä kɛ kɛ dupku diaal.

⁴⁸ Ce̱tnikɛ min tëkä ɣän Kuäär ni Kuoth Nhial, nyimuɔɔr ni Thɔ-dɔm kɛnɛ nyieekɛ, /kenkɛ min cia la̱t yɛnɛ nyieeku la̱t.

⁴⁹ Kä nɛmɛ ɛ duer nyimuɔɔr ni Thɔ-dɔm, jɛn kɛnɛ nyieekɛ cikɛ rɔ̱ liak kɛ mi̱th tin ŋuan tin tekɛ kɛ, kɛnɛ ciaŋ in gɔaa in tekɛ kɛ, kɛ ɣöö /kenɛ can kɛnɛ nɛy tin thil lua̱ŋ luäk.

⁵⁰ Kɛn liakɛ ni rɔ̱ kä lät kɛn ni jiäk nhiamdä. Kɛ kui̱c ɛmɔ ɣän cua̱ kɛ woc mëë cä lätkiɛn tin jiäk nɛn.

⁵¹ Tha-mɛ-ria /kenɛ nuth dueeriku tëë ci la̱t la̱t. Ji̱n ci dueer ti ŋuan nikɛn kä dueerkiɛn la̱t, ci nyimuɔɔri jakä jɔc ala ti tekɛ cuŋ kɛ kui̱ kä tëë jiäk diaal tëë ci la̱t.

⁵² Ku bɛ̈c po̱cä jek, kɛ ɣöö ci tha̱a̱ŋ dueeri nyimuɔɔri kur. Kɛ ɣöö ŋuan ni dueerku kä jiäk nyimuɔɔri, ci te ni kɛn kɛ cuŋ kä ji̱. Kɛ kui̱c ɛmɔ bi tekɛ pöc kä rut buaru, kɛ ɣöö ci nyimuɔɔri jakä tekɛ cuŋ.”

Loc Thɔ-dɔm kɛnɛ Tha-mɛ-ria gɔɔyä

⁵³ Kä cu Kuoth Nhial mɛmɛ la̱r Jɛ-ru-tha-lɛm wëë i̱, “Ɣän bä Thɔ-dɔm kɛnɛ nyieekɛ luɔ̱c gɔykiɛn, kä bä Tha-mɛ-ria kɛnɛ nyieekɛ luɔ̱c gɔykiɛn, kä bä ji̱ luɔ̱c gɔyku kɛɛl kɛ gɔykiɛn,

⁵⁴ kɛ ɣöö bi buaru rut kä bi pöc kɛ tëë diaal tëë ci la̱t mëë ci rɔ jakä cuumdiɛn.

⁵⁵ Kä kɛ kui̱ nyimuɔɔr ni Thɔ-dɔm kɛnɛ nyieekɛ bikɛ loc ni wi̱i̱diɛn ëëdan, kä bi Tha-mɛ-ria kɛnɛ nyieekɛ loc ni wi̱i̱diɛn ëëdan, kä ji̱n yɛnɛ nyieeku bia loc ni wi̱i̱dun ëëdan.

⁵⁶ A cäŋɛ ni nyimuɔɔr ni Thɔ-dɔm /ci jɛ a kɛki mëë la liaki rɔɔdu,

⁵⁷ mëë /ka̱n dueerku ni ŋa̱c. Kä täämɛ, /ci cäät kɛ ji̱ Ɛ-dɔm, kɛnɛ ji̱ thieekädɛ diaal kɛ ji̱ Pi-li-thɛt, kɛ nɛy diaal tin thia̱k tin lökɛ ji̱.

⁵⁸ Ji̱n bi dhil cuuc kɛ kui̱ dueeri kɛnɛ nyuɔɔn diaal tëë ci la̱t, ruac ni ɣän Kuoth Nhial.”

Mat ruac mi ci bi met thuuk

⁵⁹ Cu Kuäär ni Kuoth Nhial mɛmɛ lar wëë i̱, “Ɣän bä ji̱ lätkä min lot rɔ nikɛ ji̱, kɛ ɣöö ci ya̱cdä lo̱k kɛ to̱lu kɛ mat ruac.

⁶⁰ Duundɛ ɣöö, ɣän bä mat ruac ëë cä lat kɛ ji̱ mëë ɛ ji̱n ŋuɛ̈t tim. Kä bä mat ruac mi /ci bi met thuuk la̱t kɛ ji̱.

⁶¹ Ji̱n bi lätku tëë kɔn cu tim, kä bi pöc mi wä nyiemuɔɔri wä luny kä ji̱, nyimuɔɔr in tɔt kɛnɛ nyimuɔɔr in di̱i̱t, mi wa̱a̱kɛ wä ka̱m ji̱ ce̱tkɛ nyieeku, duundɛ ɣöö /ciɛ tha̱a̱ŋ matdä ruacdä kɛ ji̱.

⁶² Ɣän bä mat ruacdä la̱t kɛ ji̱, kä bi jɛ cu ŋa̱c ɛn ɣöö ɛ ɣän Kuoth Nhial.

⁶³ Bi min ci la̱t tim kä bi pöc, kä /ci thokdu bi nyɔk kɛ lëp kɛ kui̱ po̱cädu, mi wa̱a̱ ji̱ wä pa̱l tëë diaal tëë ci la̱t, ruac ni Kuäär ni Kuoth Nhial.”