Yɛdh 14 - RUAC KUƆTH IN RƐL RƆ

La̱m Kuɔth kɛ kuth guääyni

¹ Kä cu ram kɛl kä bööth I-thɛ-rɛl ben kä ɣä, kä cuɛ ben nyuur nhiamdä.

² Kä cu ruac Kuɔth Nhial ben kä ɣä wëë i̱,

³ “Gat ran, kɛn wutni ti̱ti̱ cikɛ la̱th ni walkiɛn lo̱cnikiɛn. Kä cikɛ duɔ̱pkiɛn gäk kɛ dueerkiɛn, a dëë kɛ ku jakä görkɛ ɣä?

⁴ Kɛ kui̱c ɛmɔ, ruacni kɛ kɛ, lär ni jɛ kɛ ɛn ɣöö, ɛ Kuäär ni Kuoth Nhial i̱, ‘Kɛn ji̱ thuɔk duëël I-thɛ-rɛl diaal tin ca la̱th ni walkiɛn lo̱cnikiɛn kä ca duɔ̱pkiɛn gäk kɛ dueerkiɛn, kä ŋotkɛ bäkɛ kä gök, ɣän Kuoth Nhial bä kɛn ji̱ wal tin ŋuan loc,

⁵ kɛ ɣöö bä lo̱c ji̱ thuɔk duëël I-thɛ-rɛl ku lɛ ka̱n ɔ kɛn nɛy diaal tëë ba̱nykɛ ɣä piny kɛ kui̱ walkiɛn.’ ”

⁶ Kɛ kui̱c ɛmɔ, läri jɛ ji̱ thuɔk duëël I-thɛ-rɛl ɛn ɣöö mɛmɛ latdɛ Kuäär ni Kuoth Nhial wëë i̱, “Rietdɛ rɔ̱ kä kuthkun, kä rietdɛ rɔ̱ kä nyuɔɔnkun diaal tëë ci yɛn kɛ la̱t.

⁷ Kä kɛ kui̱ ji̱ thuɔk duëël ji̱ I-thɛ-rɛl diaal tɔ̱tɔ̱ kɛnɛ jur tin cieŋ rɛy ji̱ I-thɛ-rɛl tin ca rɔ̱ koc kä ɣä, läth kɛn ni kuthkiɛn lo̱cnikiɛn, kä ca duɔ̱pkiɛn gäk kɛ nyuɔɔnkiɛn nhiamdiɛn, kä ŋotkɛ bäkɛ kä gök kɛ ɣöö bikɛ luäk ben thiec kä ɣä, bäkɛ loc ɛ ɣän Kuoth Nhial puɔ̱nydä.

⁸ Ɣän bä gaak kɛ kɛ. Ɣän bäkɛ jakä nyuuth kä cäät, kä bäkɛ woc rɛy dolä nɛɛnikä ni ji̱ I-thɛ-rɛl. Kä bi yɛnɛ cu ŋa̱c ɛn ɣöö ɛ ɣän Kuoth Nhial.

⁹ “Mi ca gök mɛ̈t kä bɛ ruac lat, ɛ ɣän Kuoth Nhial mɛɛt gök ɛmɔ, kä bä ŋɛ̈ɛ̈nydä nyuɔ̱th jɛ kä bä jɛ däk rɛy nɛɛnikä ni ji̱ I-thɛ-rɛl.

¹⁰ Kä bikɛ duäcdiɛn rut kɛn göök, duäc dui̱rä kɛnɛ duäc go̱o̱kä bikɛ pa̱a̱r,

¹¹ kɛ ɣöö dɔ̱ŋ /ci thok duëël I-thɛ-rɛl rɔ̱ bilɛ nyɔk kɛ ba̱r kä ɣä, kä /cikɛ rɔ̱ bilɛ nyɔk kɛ yäri kɛ dueerkiɛn diaal. Kä bikɛ cua̱ nɛɛkä, kä bi ɣän cua̱ Kuothdiɛn, ruac ni ɣän Kuäär ni Kuoth Nhial.”

Luk Kuɔth mi /ca bi luäŋ kɛ leny piny

¹² Kä cu ruac Kuɔth Nhial ben kä ɣä wëë i̱,

¹³ “Gat ran, mi ci ji̱ wec ɣä lät kä dueer kɛ thil ŋäthä, kä bä kɛ nyuɔ̱th ŋɛ̈ɛ̈nydä, a bä mi̱ethdiɛn ka̱p cuɔ̱ŋ, kä bä buɔth jäkä thi̱n, kä bä ley kɛnɛ naath ŋuɔk raar thi̱n,

¹⁴ a cäŋ te ni Nowa, kɛnɛ Da-ni-yel kɛ I-yob thi̱n, kɛn da̱ŋ diɔ̱k deekɛ kän ni pua̱nykiɛn kɛ cuŋkiɛn, ruac ni ɣän Kuäär ni Kuoth Nhial.

¹⁵ Kä mi cä ley dɔaar jäkä wi̱c ɛmɔ kɛ ɣöö bɛ ji̱kɛ cam, a ci wec duɔth ni baaŋ, kä bɛ thil ram mi ret kɛ jɛ, kɛ kui̱ leyni tin camkɛ naath thi̱n,

¹⁶ ɛ cäŋ te kɛn wutni da̱ŋ diɔ̱k ti̱ti̱ rɛy wec ɛmɔ, ce̱tnikɛ ruacdä ɣän Kuäär ni Kuoth Nhial in tëk, /ci raan gat dhöl kiɛ gat nyaal dee kän. Dee kään ni pua̱nykiɛn kärɔ̱, duundɛ ɣöö dee wec duɔth ni baaŋ.

¹⁷ Kiɛ mi cä wec ɛmɛ nöŋ ko̱r a cä wee i̱, ‘A wec ɛmɛ tekɛ ko̱r.’ Kä cä naath kɛnɛ ley ŋuɔk raar thi̱n,

¹⁸ a cäŋ te wutni da̱ŋ diɔ̱k ti̱ti̱ rɛy wec ɛmɔ, ce̱tnikɛ min tëkä ɣän Kuäär ni Kuoth Nhial, /cikɛ gat dhöl kiɛ gat nyaal dee kän, deekɛ kän ni pua̱nykiɛn ni kärɔ̱.

¹⁹ Kiɛ mi cä buɔth jäkä wi̱c ɛmɛ, kä cä waŋ lɔaacdä jäkä thi̱n kɛ löny riɛm, kä cä naath kɛnɛ ley ŋuɔk raar thi̱n,

²⁰ a cäŋ te Nowa kɛnɛ Da-ni-yel kɛ I-yob thi̱n ɛn wec ɛmɔ, ce̱tnikɛ min tëkä, ɣän Kuäär ni Kuoth Nhial, ɛ puc /ci wutni ti̱ti̱ nyier kiɛ dhɔɔl dee kän, deekɛ kän ni pua̱nykiɛn kärɔ̱ kɛ cuŋkiɛn.”

²¹ Kä mɛmɛ ɛ min lat Kuäär ni Kuoth Nhial ɛ wëë i̱, “Bɛ kulɛ jiääk i̱di mi wa̱a̱ rikä da̱ŋ ŋuaan tin bɛ̈c bɛ̈ɛ̈c wä jäkä Jɛ-ru-tha-lɛm, mi wa̱a̱ jɛ wä jäkä ko̱r kɛnɛ buɔth kɛ ley dɔaar kɛnɛ liaw kɛ ɣöö ba naath kɛnɛ ley ŋuɔk raar thi̱n!

²² Kä ŋotdɛ bɛ tekɛ nɛy ti bi kään thi̱n, bɛ tekɛ nyier kɛnɛ dhɔɔl ti ba nööŋ raar rɛy wec. Bikɛ ben kä ji̱, kä mi wi̱i̱ ciaaŋdiɛn kɛnɛ lätkiɛn wä nɛn, ba ji̱ bum kɛ da̱k in cä nööŋ kä Jɛ-ru-tha-lɛm kɛ kɔr kä tin diaal tin cä nööŋ thi̱n.

²³ Ba ji̱ bum ɛ kɛn, mi wi̱i̱ lätkiɛn kɛnɛ ciaaŋdiɛn wä nɛn. Kä biɛ cu ŋa̱c ɛn ɣöö /ka̱n jiäk ti̱ti̱ nöŋ ɛ baaŋ, ruac ni ɣän Kuäär ni Kuoth Nhial.”