Yɛdh 13 - RUAC KUƆTH IN RƐL RƆ

La̱m Kuɔth kɛ göök ka̱a̱cni

¹ Kä cu ruac Kuɔth Nhial ben kä ɣä wëë i̱,

² “Gat ran, lat ruaacni go̱o̱kä kɛ kui̱ göökni I-thɛ-rɛl tin latkɛ ruaacni go̱o̱kä. Läri jɛ kɛn nɛy tin latkɛ ruaacni go̱o̱kä kɛ cär wuɔ̱thnikiɛn kärɔ̱ wäkɛ i̱, ‘Liɛŋɛ ruac Kuɔth Nhial.’

³ Kä inɔ, lar Kuäär ni Kuoth Nhialɛ ɛn ɣöö, riɛk akɛ göök tin dɔa̱a̱r tin guɔ̱ɔ̱rkɛ ni cärkiɛn kä thil nyuuth mi ci kɛn ɛ nɛn.

⁴ Göökun ce̱tkɛ nikɛ guɔɔr ti cieŋ rɛy rua̱k rua̱kä lö I-thɛ-rɛl.

⁵ Ji̱n /keni wä gua̱thni pa̱a̱ny tin ci bak kɛ ɣöö bikɛ wä buɔt, kɛ kui̱ thuɔk duëël I-thɛ-rɛl, kɛ ɣöö dɔ̱ŋ dërɛ kään kɛ cäŋ luɔ̱k Kuɔth Nhial.

⁶ Kä nɛɛn kɛn ni nyuuthni ka̱a̱cni kä lat kɛn ruaacni go̱o̱kä ti thil luɔt wäkɛ i̱, ‘Ruac ni Kuoth Nhial,’ kä /ken Kuoth Nhial kɛ ja̱k, kä ŋot kɛ liɛpkɛ cuup ruaacni ka̱a̱cnikiɛn!

⁷ A /ken yɛn nyuuth kacä ku nɛn kä cia ruac go̱o̱kä kacä lat min wä yɛn i̱, ‘Ruac ni Kuoth Nhial,’ cäŋ ni min /ka̱n ruac?”

⁸ Kɛ kui̱c ɛmɔ, lar Kuäär ni Kuoth Nhial ɛ wëë i̱, “Kɛ ɣöö cia lat ni rieet ka̱a̱cni kä cia nɛn ni nyuuth ka̱a̱cni, ɣän gakä kɛ yɛ.

⁹ Ɣän bä göök tin latkɛ rieet lɔrä kä nɛ̈nkɛ nyuuthni ka̱a̱cni duäc. /Cikɛ bi te rɛy dolä nɛɛnikä, kä /cakɛ bi gɔ̱r kɛɛl kɛ thok duëël I-thɛ-rɛl, kä /cikɛ bi wä muun I-thɛ-rɛl. Kä bi yɛn ɛ cu ŋa̱c ɛn ɣöö ɛ ɣän Kuäär ni Kuoth Nhial.

¹⁰ Kɛ ɣöö ɛ puc, ci yɛn nɛɛkä buath jɔ̱ɔ̱r kɛ ɣöö laar yɛn ɛ i̱, ‘Ɛ mal,’ kä thilɛ mal. Mi ci nɛɛkä rɔ̱ lät kä päny mi rɛp, la go̱o̱k cua̱ bä, ba päny ben rɔth kɛ töc.

¹¹ Kua jɛ la̱r kɛn go̱o̱k tin rɔathkɛ päny kɛ töc ɛn ɣöö bi päny ɛmɛ tɛɛth. Ɣän Kuoth bä nhiaal mi di̱i̱t jakä dɛm kä bä nhiaal guiiyni jakä pɛn puɔ̱ɔ̱ny pa̱a̱ny, kä bä jiɔam mi di̱i̱t jakä put kɛ kui̱dɛ.

¹² Kä mi wä päny wä ria̱p a bɛ tɛɛth, ci naath bi thiec kɛ gua̱a̱th ɔ ci töc ëë rɔathkɛ ni päny wä thi̱n ɔ?”

¹³ Kɛ kui̱ ɛmɔ, mɛmɛ larɛ ɣän Kuäär ni Kuoth Nhial i̱, “Ɣän bä jiɔam mi di̱i̱t nööŋ kɛ ŋɛ̈ɛ̈nydä, kɛ nhiaal mi di̱i̱t kɛnɛ nhiaal guiiyni kɛ ɣöö bikɛ päny ɛmɛ ben däk.

¹⁴ Ɣän bä päny ɛ cia rɔth kɛ töc ɛ töl piny, kä bi keŋkɛ te ni baaŋ. Kä mi wëë wä tɛɛth bia nuɔɔr kɛɛl kɛ jɛ. Kä bi yɛn ɛ cu ŋa̱c ɛn ɣöö ɛ ɣän Kuäär ni Kuoth Nhial.

¹⁵ Inɔ, ɣän bä ŋɛ̈ɛ̈nydä cu thuɔ̱k kä päny kɛnɛ nɛy tëë rɔathkɛ päny kɛ töc. Kä bä jɛ la̱r yɛ ɛn ɣöö /ci päny kɛnɛ nɛy tëë rɔathkɛ jɛ kɛ töc lɛ ŋot thi̱n,

¹⁶ kɛn göök I-thɛ-rɛl tëë latkɛ ruaacni go̱o̱kä kɛ kui̱ Jɛ-ru-tha-lɛm kä nɛ̈nkɛ nyuuth kɛ kui̱ malä, kä thilɛ mal mi te thi̱n, ruac ni Kuäär ni Kuoth Nhial.

¹⁷ “Kä kɛ kui̱du, lö gat ran, lucni nhiamdu nyier nɛɛnikun tëë latkɛ ruaacni go̱o̱kä kɛ cär wuɔ̱thkiɛn. Lat ruaacni go̱o̱kä kɛ kui̱diɛn.

¹⁸ Larɛ ɛn ɣöö, ci Kuäär ni Kuoth Nhial ruac ɛn ɣöö, riɛk akɛ män tin kɔackɛ wal kɛ ɣöö bakɛ la̱th wuɔ̱ɔ̱kni, kä ruɔpkɛ gaakni ɛ bär kɛ ɣöö bakɛ la̱th wuɔ̱thnikiɛn, kɛ ɣöö bikɛ tëk nath kak. A bi yɛn tëk nɛɛnikä ku go̱r kä päl yɛn tëkdun?

¹⁹ Ci yɛn ɣä ya̱r ɛlɔ̱ŋ rɛy nɛɛnikä, kɛ ɣöö bia wäŋ bɛɛl ti tɔt kɛnɛ jurayni ti tɔt jek. A näk yɛn nɛy tin /ca dëë näk, kä päl yɛn nɛy tin dëë kulɛ näk a tëk, kɛ ka̱a̱cnikun tin la̱tdɛ nɛɛkä, tin nhɔakɛ lieŋ ka̱a̱cni.”

²⁰ Kɛ kui̱ ɛmɔ mɛmɛ larɛ ɣän Kuäär ni Kuoth Nhial i̱, “Ɣän gakä kɛ kui̱ wal tin go̱r yɛn kɛ ni tëk nath. Ɣän bäkɛ puɔ̱t piny wuɔ̱ɔ̱knikun, kä bä tëk nath cu jakä lɔr, tëk in la yɛn a kak ce̱tkɛ tëk din.

²¹ Ɣän bä gaaknikun puɔ̱t piny, bä nɛɛkä kän tetnikun. Kä /ci yɛn kɛ bilɛ nyɔk kɛ ka̱k ce̱tkɛ ley. Kä bi yɛn ɛ cu ŋa̱c ɛn ɣöö ɛ ɣän Kuoth Nhial.

²² Kä kɛ ɣöö ci yɛn nɛy tin gɔw jakä gak kɛ ka̱a̱cnikun, kä /ka̱n kɛ moc kɛ jiääk lɔaac kä /ken yɛn ji̱ nyuɔɔni com kä ɣöö ba jiäkiɛn päl, a bikɛ kään,

²³ kɛ kui̱ ɛmɔ /ci yɛn nyuuth mi kac bi nyɔk kɛ nën kä /ci yɛn lät yieekä mi kac bi nyɔk kɛ lätni. Ɣän bä nɛɛkä kän tetnikun. Kä bi yɛn ɛ cu ŋa̱c ɛn ɣöö ɛ ɣän Kuoth Nhial.”