Yɛdh 12 - RUAC KUƆTH IN RƐL RƆ

Nyuɔ̱th Yɛdh-ki-el kɛ wä pɛɛcä

¹ Kä cu ruac Kuɔth Nhial ben kä ɣä wëë i̱,

² “Gat ran, ji̱n cieŋi rɛy döör mi ci kac raar, ti tekɛ nyin ti gui̱c duundɛ ɣöö /cikɛ nen, kä tekɛ ji̱th ti li̱ŋ, duundɛ ɣöö /cikɛ thëŋ.

³ Kɛ ɣöö ɛ thok duëël mi ci kac raar. Kɛ kui̱ ɛmɔ lö gat ran ku kuak pɛɛcädu rialikä, kä wër pɛɛcä nikɛ cäŋdäär a guɛckɛ ji̱. Kä bi wä ce̱tnikɛ pɛ̈c a nɛɛn kɛn ji̱ jiɛyi guäthdu wi̱i̱ guäth mi dɔ̱ŋ. Kä dɔ̱ŋ bikɛ jɛ ŋa̱c a cäŋni mɔ kɛ ji̱ thuɔk duëël mi ci kac raar ɔ.

⁴ Kä ji̱n bi kuaku nööŋ raar kɛ cäŋdäär a nɛɛn kɛn ɛ, ala kuak kɛ kui̱ pëc. Kä ji̱n puɔ̱nydu pa̱ny bi wä raar kɛ thiaŋ a nɛɛn kɛn ji̱. Ce̱tnikɛ nɛy tin la wä pɛɛcä.

⁵ Kä tɛt päny a guɛckɛ ji̱, kä naŋni kuaku raar kɛ jɛ.

⁶ Kä läthni kuaku jiɛru a nɛɛn kɛn ji̱, naŋ kɛ mi̱rä, kä kum nhiamdu kɛ ɣöö /ci mun bi guic kɛ ɣöö cä ji̱ jakä nyuuth kɛ kui̱ thuɔk duëël I-thɛ-rɛl.”

⁷ Kä cua̱ jɛ la̱t ce̱tnikɛ min ci Kuoth Nhial ɛ la̱r ɣä. Cua̱ kuakä ka̱m raar kɛ cäŋdäär, ala kuak kɛ kui̱ pëc, kä kɛ thiaŋdɛ cua̱ päny tɛt nikɛ tetkä pa̱ny. Kä cua̱ kuakä nööŋ raar mi̱rä, kä cua̱ kɛ la̱th jiɛrä kapäkɛ a nɛɛn kɛn ɣä.

⁸ Kɛ runwaŋ cu ruac Kuɔth Nhial ben kä ɣä wëë i̱,

⁹ “Gat ran, ɛn thok duëël I-thɛ-rɛl in ci kac raar /kenkɛ ruac kɛ ji̱ inu mëë ɛ kɛn i̱, ‘Ɛŋu mi lätdi?’

¹⁰ Kä läri kɛ ruacdä ɣän Kuäär ni Kuoth Nhial ɛn ɣöö ruac ɛmɛ ɛ ruac kɛ kui̱ rueecä min te kä Jɛ-ru-tha-lɛm kɛnɛ ji̱ thuɔk duëël I-thɛ-rɛl diaal tin cieŋ thi̱n.

¹¹ Läri jɛ kɛ i̱, ‘Yɛdh-ki-el ɛ nyuuth kɛ kui̱dun. Ce̱tnikɛ min cä la̱t, ba jɛ lät kä yɛ inɔ bä. Ba yɛ naŋ pɛɛcä a bi yɛn la ni pɛ̈ɛ̈c.’

¹² Kä bi rueec in te rɛydun kuakɛ kap nikɛ jiarɛ mi̱rä kä bɛ wä, kä ba ɣo̱t tɛt puɔ̱ɔ̱ny pa̱a̱ny mi bi wä kɛ jɛ raar. Kä bɛ nhiamdɛ kum, kɛ ɣöö /cɛ mun bi guic kɛ nyinkɛ.

¹³ Kä bä cambakdä ɣa̱r wi̱i̱dɛ, kä ba jɛ käp ɛ depdä. Kä ɣän bä jɛ naŋ kä Bɛ̈-bi-lɔn mun ji̱ Kɛ̈l-da-ya, kä /cɛ jɛ bi nɛn bä, bɛ li̱w ɛn wi̱ni.

¹⁴ Kä bä nɛy diaal tin te gekädɛ kiɛth rɛy jiɔam, nɛy tin ba jɛ luäk kɛnɛ rɛmdɛ, bäkɛ joc kɛ ko̱r.

¹⁵ Mi wa̱a̱ kɛ wä kiɛth rɛy dööri kä bä kɛ riaw rɛy wi̱i̱ni, bi kɛn ɛ cu ŋa̱c ɛn ɣöö ɛ ɣän Kuoth Nhial.

¹⁶ Duundɛ ɣöö ɣän bä tha̱a̱ŋkiɛn ti tɔt jakä kän ko̱o̱r, kɛnɛ buɔth kɛ liaw, kɛ ɣöö bikɛ jiäkiɛn diaal ti̱ti̱ wä lat rɛy dööri tɔ̱ bikɛ wä thi̱n tɔ̱. Kä bi kɛn ɛ cu ŋa̱c ɛn ɣöö ɛ ɣän Kuoth Nhial.”

Nyuɔ̱th kɛ kui̱ dualä I-thɛ-rɛl

¹⁷ Kä cu ruac Kuɔth Nhial ben kä ɣä wëë i̱,

¹⁸ “Gat ran, ji̱n cam mi̱ethdu kɛ dual kä math pi̱i̱ku kɛ lath kɛnɛ dual mi di̱i̱t,

¹⁹ kä läri jɛ nɛy tin cieŋ muun ɛn ɣöö nɛmɛ ɛ ruac Kua̱r ni Kuoth Nhial kɛ kui̱ nɛɛni tin cieŋ kä Jɛ-ru-tha-lɛm muun I-thɛ-rɛl. Akɛ camkɛ mi̱ethdiɛn kɛ dual mi di̱i̱t kä bikɛ pi̱i̱kiɛn math kɛ pöc mi di̱i̱t ɛlɔ̱ŋ, kɛ ɣöö ba ŋɔak diaal tin te muundiɛn woc, kɛ kui̱ gaak nɛɛni tin cieŋ ɛn muun.

²⁰ Kä ba wi̱i̱kɛ tin ciaŋkɛ päl ni baaŋ, kä bi mun la mi ca päl. Kä bi yɛn ɛ cu ŋa̱c ɛn ɣöö ɛ ɣän Kuoth Nhial.”

Cäätni ti ŋa̱ckɛ kɛnɛ ruaacni ti ca ŋäc

²¹ Kä cu ruac Kuɔth Nhial ben kä ɣä wëë i̱,

²² “Gat ran, ɛŋu mi lot cäätdu jɛ kɛ kui̱ muɔ̱ɔ̱n ji̱ I-thɛ-rɛl ɛ min wee i̱, ‘Ni̱n ruaacni go̱o̱kä cikɛ jääny, kä ci nyuuthni diaal thil luɔt’?

²³ Kɛ kui̱c ɛmɔ, ji̱n lätni jɛ kɛ, ɛn ɣöö ɛ Kuäär ni Kuoth Nhial i̱, ‘Ɣän bä ruac cäätdä nɛmɛ moc kɛ guk, kä /cikɛn cäät ɛmɛ bi nyɔk kɛ lat kä I-thɛ-rɛl.’ Duundɛ ɣöö lätni jɛ kɛ ɛn ɣöö, ci nin thia̱k tin ba nyuuthni ti̱ti̱ jakä thuɔ̱ɔ̱k.

²⁴ Kä bɛ cu thil nyuuth mi bi la kac, kä bɛ thil yiëë mɛɛtdä mi bi lɛ ŋot thi̱n thok duëël I-thɛ-rɛl.

²⁵ Duundɛ ɣöö, ɣän Kuoth Nhial bä ruac lat kä bɛ ben ala thuɔ̱k. Kä /cɛ bi lɛ jääny, bɛ ben nikɛ ni̱nku, lö thok duëël in ci kac raar, ɣän bä ruac lat kä bä jɛ cuɔ̱p, ruac ni ɣän Kuäär ni Kuoth Nhial.”

²⁶ Kä cu ruac Kuɔth Nhial ben kä ɣä wëë i̱, “Gat ran, thok duëël I-thɛ-rɛl ruacɛ wëë i̱,

²⁷ ‘Jɛn nyuuth in cɛ nɛn ɛ nyuuth mi bi ben kɛ run ti ŋuan tia̱ nhiam. Latdɛ ruaacni go̱o̱kä kɛ gua̱a̱th mi nɔ̱a̱n nɔ̱a̱n.’

²⁸ Kɛ kui̱ ɛmɔ läri jɛ kɛ ɛn ɣöö ɛ Kuäär ni Kuoth Nhial i̱, ‘Thilɛ riet kɛl kä rieetkä mi bi lɛ jääny, duundɛ ɣöö kɛn rieet tin bä lat bäkɛ cuɔ̱p guäthdiɛn.’ Ruac ni ɣän Kuäär ni Kuoth Nhial.”