Yɛdh 11 - RUAC KUƆTH IN RƐL RƆ

Luk bööthni I-thɛ-rɛl

¹ Kä cu yiëë ɣä kap nhial, kä cuɛ ɣä naŋ thok kal luaak Kuɔth in te kui̱c känyä ca̱ŋ. Kä ɛn wi̱ni thok kal, cua̱ wutni ti jiɛn da̱ŋ rɛw wi̱cdɛ dhieec nɛn, kä te Yɛ̈-ä-dhɛ̈n-yaa gat Ɛ̈-dhur kɛnɛ Pɛ-lɛ̈t-yaa in la gat Bɛ-na-yaa tin la bööth nath rɛydiɛn.

² Kä cu ruac Kuɔth Nhial ben kä ɣä wëë i̱, “Gat ran, kɛn wutni ti̱ti̱ kɛ kɛn nɛy tin ca̱a̱pkɛ ti jiäk kä ca wec ɛmɛ thiäŋ kɛ nyuɔɔn.

³ Ruac kɛn i̱, ‘/Ken gua̱a̱th in ba lät ni ciëëŋ ni cop, kɛ ɣöö wec ɛmɛ ɛ cuk kä kɛ kɔn ri̱ŋ.’

⁴ Kɛ kui̱ ɛmɔ, lat ruac go̱o̱kä kɛ kui̱diɛn, lö gat ran.”

⁵ Kä cu yiëë Kuɔth ben puɔ̱ɔ̱nydä, kä cuɛ ruac kɛ ɣä wëë i̱, “Latdɛ, ci Kuoth Nhial ruac ɛn ɣöö, mɛmɛ ɛ min car yɛn ɛ lö thok duëël I-thɛ-rɛl. Ɣän ŋa̱cä tin ci ben wuɔ̱thnikun.

⁶ Yɛn, cia nɛy ti ŋuan näk ɛn rɛy wec ɛmɛ, kä cia duɔ̱pkɛ thiäŋ kɛ nɛy tin ci li̱w.

⁷ Kɛ kui̱ ɛmɔ, laarä jɛ ɣän Kuäär ni Kuoth Nhial ɛn ɣöö, kɛn pua̱ny nath tin cia yuɔr duɔ̱pni kɛ ri̱ŋ kä ku wec puɔ̱nydɛ la cuk. Duundɛ ɣöö bä yɛ juɔc raar rɛydɛ.

⁸ Kɛ ɣöö cia dual kɛ ko̱r, ɣän bä yɛ nöŋ ko̱r, ruac ni ɣän Kuäär ni Kuoth Nhial.

⁹ Ɣän bä yɛ ka̱m raar rɛydɛ kä bä yɛ la̱th tetni juri, kä ba yɛ ciɛŋ ɛ jiäk.

¹⁰ Kä ba yɛ näk kɛ mut. Kä bä yɛ luk këth I-thɛ-rɛl. Kä bi yɛn ɛ ŋa̱c ɛn ɣöö ɛ ɣän Kuoth Nhial.

¹¹ Jɛn wec ɛmɛ /cɛ bi la cukdun, kä /ci yɛn bi la ri̱ŋ rɛydɛ. Kä bä yɛ luk këth I-thɛ-rɛl.

¹² Kä bi yɛn ɛ cu ŋa̱c ɛn ɣöö ɛ ɣän Kuoth Nhial in /ken yɛn luëëkɛ guɔ̱ɔ̱r, kä /ken yɛn ŋuɔ̱tkɛ tit, kä cu yɛn wä guɔ̱ɔ̱r ni ŋuɔ̱t dööri tin cieŋ yɛn kɛɛl kɛ kɛ.”

¹³ Täämɛ, ɣän min latdä ruaacni go̱o̱kä, cu Pɛ-lɛ̈t-yaa gat Bɛ-na-yaa li̱w. Kä cua̱ rɔɔdä yuɔr piny buupä kä cua̱ wiee kɛ jɔw mi di̱i̱t wa̱a̱ i̱, “Aɣ Kuäär ni Kuoth Nhial! Ɛ bi nɛy tin ci kään kä I-thɛ-rɛl ku thuk, ni kɛn diaal?”

Bi Kuoth I-thɛ-rɛl luɔc thi̱n

¹⁴ Kä cu ruac Kuɔth Nhial ben kä ɣä wëë i̱,

¹⁵ “Gat ran, kɛn ji̱ maarädu, kɛn nɛy tin maarkɛ ji̱ diëëth, kɛn gaat muɔɔr tin la pɛ̈ɛ̈c, kɛ ji̱ thuɔk duëël I-thɛ-rɛl diaal, kɛ kɛn tin ruac ji̱ Jɛ-ru-tha-lɛm kɛ kui̱diɛn wäkɛ i̱, ‘Kɛn cikɛ na̱n ɛlɔ̱ŋ kɛ Kuɔth Nhial, kä mun ɛmɛ ca ka̱m kɔn ala duŋdan.’

¹⁶ Kɛ kui̱ ɛmɔ larɛ ruacdä ɣän Kuäär ni Kuoth Nhial ɛn ɣöö, cäŋɛ ni min cäkɛ woc a tekɛ ni nɔ̱nä, kä cäkɛ kiɛth rɛy dööri diaal, cua̱ ŋot bä ta̱a̱ kɛ gua̱a̱th mi tɔt cu ɣän a luak rɛy wi̱i̱ni tëë cikɛ wä thi̱n.

¹⁷ Kɛ kui̱ ɛmɔ larɛ ruacdä ɣän Kuäär ni Kuoth Nhial ɛn ɣöö ɣän bä kɛ ruɔ̱ɔ̱l rɛy dööri kä bä kɛ ma̱a̱t rɛy wi̱i̱ni diaal tëë ca kɛ kiɛth thi̱n kä bä kɛ ka̱m mun I-thɛ-rɛl.

¹⁸ Kä mi wä kɛ wä cop ɛn wi̱ni, bikɛ jiäkɛ diaal ka̱m raar, kä bikɛ dueerkɛ diaal woc.

¹⁹ Kä ɣän bäkɛ moc kɛ lɔc mi pay tuɔɔk, kɛnɛ ca̱r kɛl. Kä bä lɔc in thil luth woc kä bä kɛ moc kɛ lɔc min gɔaa min tekɛ luth,

²⁰ kɛ ɣöö bikɛ luëëkä ku lɛ guɔ̱ɔ̱r kä bikɛ ŋuɔ̱tkä tit kä bakɛ cu luɔ̱th. Kä bikɛ cua̱ nɛɛkä, kä bi ɣän a Kuothdiɛn.

²¹ Duundɛ ɣöö, kɛ kui̱ nɛɛni tin ca lo̱ckiɛn la̱th jiäknikiɛn kɛnɛ nyuɔɔnkiɛn, ɣän bä lätkiɛn la̱thni wuɔ̱thnikiɛn, ruac ni ɣän Kuäär ni Kuoth Nhial.”

Bäny buɔyä Kuɔth kɛ Jɛ-ru-tha-lɛm piny

²² Kä cu ley tin tëk gɔ̱kiɛn ɣär kä te wi̱el wi̱eeli gëëknikiɛn. Kä te buay Kuɔth I-thɛ-rɛl nhialiɛn.

²³ Inɔ, cu buay Kuɔth jiɛɛn rɛy wec, kä cuɛ wä cuɔ̱ŋ wi̱i̱ pa̱a̱m in te kui̱ känyä ca̱ŋ wec.

²⁴ Ɛn wan ɔ cu yiëë Kuɔth ɣä kap nhial cuɛ ɣä nöŋ pɛ̈ɛ̈c kä Bɛ̈-bi-lɔn. Kä cu nyuuth in cä nɛn cu jiɛɛn kä ɣä.

²⁵ Kä cua̱ pɛ̈ɛ̈c la̱t ŋɔak diaal tëë ci Kuoth Nhial kɛ nyuɔ̱th ɣä.