Yɛdh 10 - RUAC KUƆTH IN RƐL RƆ

Bäny wutdä Kuɔth piny kɛ luak palä

¹ Kä mëë cä min ce̱tkɛ döŋ in te nhial leyni tin tëk guic, tëë kɛ mi jɔc ce̱tkɛ guɛɛy in yiel in di̱t kökdɛ, ce̱t ta̱a̱dɛ kɛ kɔm kuäärä.

² Kä cu Kuoth Nhial ruac kɛ wut in ciɛŋ bi̱i̱ in ca tak agɔaa wëë i̱ “Wër cothni kɛ kam wi̱el wi̱eeli tin te piny leyni tin tekɛ gɔ̱k. Kä wër thiäŋ tetku kɛ mac miim in pɛt kamni leyni tin tekɛ gɔ̱k, kä ku mim tin pɛt kiɛth rɛy wec kɛɛliw.” Kä cuɛ coth rɛc min ta̱a̱ gui̱c.

³ Täämɛ te ley tin tekɛ gɔ̱k cuŋä peek cuëëc luaak, mëë coth wut rɛc, kä cu pua̱r rɛy kal rɛci thiäŋ.

⁴ Kä cu wuɔ̱t Kuɔth Nhial rɔ jiɛc wi̱i̱ lɛ̱̈ɛ̱̈ in tekɛ gɔ̱k cuɛ wä thok luaak, kä cu luak thia̱a̱ŋ kɛ pua̱r ni kɛɛliw, kä cu kal thia̱ŋ kɛ buay wutdä Kuɔth Nhial.

⁵ Kä cua jɔw gɔ̱ɔ̱k leyni tin tekɛ gɔ̱k wä liŋ ni jɔk kal raar ce̱tdɛ nikɛ jɔw Kuɔth in Leny Buɔ̱mdɛ ti Diaal mi ruacɛ.

⁶ Kä cu Kuoth Nhial ruac kɛ wut in ciɛŋ bi̱i̱ in ca tak agɔaa wëë i̱, “Käni mac rɛy wi̱el wi̱eeli tin te kamni leyni tin tekɛ gɔ̱k,” cuɛ wä rɛc kä cuɛ wä cuɔ̱ŋ gekä wi̱l wi̱lä.

⁷ Kä cu ley gɔ̱ɔ̱k kɛl tëtdɛ ri̱c kɛ kam leyni gɔ̱ɔ̱k tin kɔ̱kiɛn lɔ̱ɔ̱mɛ mac in te kamdiɛn, kä cuɛ tha̱a̱ŋdɛ ka̱n cuɛ jɛ la̱th tetdä wutdä min ciɛŋ bi̱i̱ in ca tak agɔaa, kä cuɛ jɛ ka̱n cuɛ wä raar.

⁸ Kɛn ley tin tekɛ gɔ̱k tekɛ kɛ tet ti ce̱tkɛ tet ran piny gɔ̱ɔ̱kiɛn.

⁹ Kä min ta̱a̱ gui̱c, cua̱ wi̱el wi̱eeli da̱ŋ ŋuaan nɛn gekä leyni tin tekɛ gɔ̱k, te ley ɔ gëkdɛ kɛ wi̱l wi̱l kɛl. Kä ce̱t ta̱a̱ wi̱el wi̱eeli kɛ ta̱a̱ guiiyä min duäy mi jaŋ jaŋ.

¹⁰ Kä ta̱a̱ in tekɛ kɛ, kɛn da̱ŋ ŋuaan cäätkɛ, ce̱tdɛ kɛ mi te wi̱l wi̱l rɛy wi̱l wi̱lä mi dɔ̱ŋ.

¹¹ Kä mi ca rɔ̱ wany, la pekdɛ a duɔ̱ɔ̱p mi wä kɛ kɛ, pekni da̱ŋ ŋuaan, kä /cikɛ rɔ̱ ri̱t min jälkɛ. Kä pek ɔ ci wi̱lwi̱l in te nhiam wä kɛ jɛ mɔ, la tin kɔ̱ŋ cua̱ guur ni jɛ /ca rɔ̱ gɔ̱ŋ min jäl kɛ.

¹² Kä pua̱nykiɛn diaal, kɛ jio̱kiɛn kɛ tetkiɛn, kɛ gɔ̱kiɛn kɛnɛ wi̱el wi̱eelikiɛn, thiäŋkɛ kɛ nyin.

¹³ Kä cua̱ wi̱el wi̱eeli liŋ cɔalkɛ kɛ i̱, “Wi̱el wi̱eeli ti lät kɛɛl.”

¹⁴ Te ley ɔ kɛ nhiem da̱ŋ ŋuaan kä kɛ. Kä nhiam in jio̱liɛn ɛ nhiam lɛ̱̈ɛ̱̈ in tekɛ gɔ̱k, kä nhiam in rɛwdɛ ɛ nhiam ran, kä nhiam in diɔ̱ɔ̱kdiɛn ɛ nhiam luɔny, kä nhiam in ŋuaandiɛn ɛ nhiam cuɔr.

¹⁵ Kä cu ley tin tekɛ gɔ̱k rɔ̱ jiac nhial. Cua kɛn ley tin tëk tëë cä kɔŋ nɛn gekä kiɛɛr Kɛ-bar.

¹⁶ Kä mëë ci ley tin tekɛ gɔ̱k rɔ̱ wany, cu wi̱el wi̱eeli ja̱l kɛ gëëkiɛn. Kä mëë ci ley gɔ̱kiɛn ɣär kɛ ɣöö bikɛ rɔ jiɛc wi̱i̱ muɔ̱ɔ̱n, /ken wi̱el wi̱eeli gëëkiɛn päl.

¹⁷ Kä mi ci ley tin tekɛ gɔ̱k cuɔ̱ŋ, la wi̱el wi̱eeli a cuŋ bä. Kä mɔ ci ley rɔ̱ jiac nhialɔ, la wi̱el wi̱eeli rɔ̱ a jiɛc bä. Kɛ ɣöö yiëë leyni tin tëk tëë rɛy wi̱el wi̱eeli.

¹⁸ Kä cu wuɔ̱t Kuɔth Nhial jiɛɛn thok luaak kä cuɛ wä cuɔ̱ŋ wi̱i̱ leyni tin tëk.

¹⁹ Kä min ta̱a̱ guic cu ley tin tekɛ gɔ̱k gɔ̱kiɛn ɣär kä cukɛ rɔ̱ jiac nhial wi̱i̱ muɔ̱ɔ̱n kä min wäkɛ cu wi̱el wi̱eeli wäkɛ gëëkiɛn. Kä cukɛ wä cuɔ̱ŋ thok kal luaak Kuɔth in te kui̱c känyä ca̱ŋ, kä te buay Kuɔth I-thɛ-rɛl nhialiɛn.

²⁰ Kä cua kɛn ley tëë cä kɔŋ nɛn piny kɔam kuäärä Kuɔth I-thɛ-rɛl mëë ta̱a̱ gekä kiɛɛr Kɛ-bar. Kä cua̱ jɛ ŋa̱c ɛn ɣöö kɛ kɛn ley tin tekɛ gɔ̱k.

²¹ Te mɔ kä kɛ kɛ nhiem da̱ŋ ŋuaan, kɛnɛ gɔ̱k da̱ŋ ŋuaan, kä tëë kɛ ti jɔc ce̱tkɛ tet ran piny gɔ̱ɔ̱kiɛn.

²² Kä cäät nhiemkiɛn kɛ nhiem kä tëë cä kɔŋ nɛn, mëë ta̱a̱ jɔk kiɛɛr Kɛ-bar. Kä jäl ley ɔ a lotdɛ ni nhiamdɛ.