Yɛdh 1 - RUAC KUƆTH IN RƐL RƆ

Nën kɔaam Kuäärä Kuɔth

¹ Kɛ cäŋ kä dhieec kä ŋuaan päthni, kɛ jiɛn diɔ̱k runi mëë ta̱a̱ rɛy pɛ̈ɛ̈cni gekä Kiɛɛr Kɛ-bar, cu pua̱a̱r rɔ lɛp, kä cua̱ nyuuthni nɛn kä Kuoth.

² Kɛ cäŋ kä dhieec kä pay (kä ɛ dhieec runi tëë tekɛ kuäär ni Yɛ-ɣo-ya-kin pɛɛcä,)

³ cu riet Kuɔth Nhial ben kä ɣän bo̱o̱th palä ni Yɛdh-ki-el gat Budhi, jɔk kiɛɛr Kɛ-bar muun ji̱ Kɛ̈l-da-ya. Kä cu buɔ̱m Kuɔth Nhial te kɛɛl kɛ ɣä ɛn wani.

⁴ Kä min guecä cu jiɔam puɔ̱t kui̱c caam. Kä cuɛ tekɛ pua̱r mi di̱i̱t mi ca go̱l ɛ buay kä yiel mac rɛydɛ gua̱thni diaal. Kä därɛ ɛn mac, tëëkɛ mi jaŋ ce̱tkɛ läŋ in yian.

⁵ Kä rɛy puɔ̱rä tëë kɛ ti ce̱tkɛ ley da̱ŋ ŋuaan ti tëk. Kä ce̱t ta̱a̱diɛn kɛ ta̱a̱ nath.

⁶ Duundɛ ɣöö te mɔ kɛ nhiem da̱ŋ ŋuaan kɛnɛ gɔ̱k da̱ŋ ŋuaan.

⁷ Cuŋ ciökiɛn ɛ pi̱c, ce̱t pa̱a̱tkiɛn kɛ barkaakni tha̱a̱k, kä jaŋkɛ ce̱tnikɛ läŋ in yian mi ca toth.

⁸ Piny gɔ̱ɔ̱kiɛn peknikiɛn da̱ŋ ŋuaan, tekɛ kɛ tet ti ce̱tkɛ tet nath. Kä kɛn da̱ŋ ŋuaan tekɛ kɛ gɔ̱kiɛn kɛnɛ nhiemkiɛn ti ce̱tkɛ ti̱ti̱.

⁹ Kä ro̱m gɔ̱kiɛn, a cuuŋ mɔ ni duɔ̱ɔ̱pdɛ ɛ thiw kä kɛ, /cikɛ rɔ̱ ri̱t min jälkɛ.

¹⁰ Kɛn ley da̱ŋ ŋuaan tin tëk, te mɔ kɛ nhiem da̱ŋ ŋuaan. Nhiamdiɛn tekɛ kɛ nhiam mi ce̱tkɛ nhiam ran. Kui̱c cuëëcdiɛn te nhiam mi ce̱tkɛ nhiam luɔny thi̱n. Kä te nhiam mi ce̱tkɛ nhiam tha̱a̱k kui̱c caam. Kɛ nhiam mi ce̱tkɛ nhiam cuɔr jɔkɔ.

¹¹ Ɛ jɛn ta̱a̱ nhiemnikiɛn ɛnɔ. Kä cikɛ gɔ̱kiɛn ɣär nhial, te ley ɔ kɛ gɔ̱k da̱ŋ rɛw ti ro̱m kɛ gɔ̱k leyni tin kɔ̱ŋ, kɛnɛ gɔ̱k da̱ŋ rɛw ti kɔŋ ti kuɔ̱mkɛ puɔ̱nydɛ.

¹² Kä mɔ jälkɛ mɔ lot mɔ ni nhiamdɛ, gua̱a̱th ɔ wä yiëëdiɛn thi̱n ɔ, wäkɛ thi̱n a /cikɛ rɔ ri̱t min wäkɛ.

¹³ Kä där leyni tin tëk tëë kɛ mi jɔc mi pɛt ce̱tkɛ mac miim, mi pɛt ce̱tkɛ rith wäkɛ nhiam kä wäkɛ jɔk rɛy leyni tin tëk ɛn mac buɔyɛ ɛlɔ̱ŋ, kä bä yiel raar rɛy maac.

¹⁴ Kä kɛn ley tin tëk la riŋkɛ nhiam kä ri̱i̱ŋkɛ jɔk kɛ pɛ̈th mi ce̱tkɛ pɛ̈th yi̱lä.

¹⁵ Kä min guɛcä kɛn ley tin tëk, cua̱ wi̱l wi̱l nɛn gekä leyni tin tëk, te mɔ kɛ kɛl kä kɛn ley da̱ŋ ŋuaan.

¹⁶ Kä ta̱a̱ wi̱el wi̱eeli kɛnɛ la̱tdiɛn in ca lätnikɛ ɛ kɛl, kɛn jaŋkɛ ce̱tkɛ kɛ pääm ti di̱t kökdiɛn, kä cäätkɛ kɛn da̱ŋ ŋuaan, kä ce̱tdɛ kɛ mi te wi̱l wi̱l rɛy wi̱l wi̱lä min dɔ̱ŋ.

¹⁷ Kä mi jälkɛ, dee pekdɛ a duɔ̱ɔ̱p mi wä kɛ kɛ pekni da̱ŋ ŋuaan diaal, kä /cikɛ rɔ̱ ri̱t min jälkɛ.

¹⁸ Thɛɛriɛn bärɛ kä dual naath kɛ jɛ, kɛ ɣöö thɛɛrikiɛn da̱ŋ ŋuaan diaal thiäŋkɛ kɛ nyin ti wiɛlkɛ kɛ.

¹⁹ Mi ci ley tin tëk rɔ̱ wany, la jäl wi̱el wi̱eeli kɛ gëëkiɛn, kä mi ci ley tin tëk rɔ̱ kap nhial, la kap wi̱el wi̱eeli rɔ̱ nhial.

²⁰ Gua̱a̱th ɔ dee yiëëdiɛn wä thi̱n ɔ, dee ley tin tëk wä thi̱n bä, kä la wä wi̱el wi̱eeli kɛɛl kɛ kɛ, kɛ ɣöö te yiey leyni tin tëk rɛy wi̱el wi̱eeli.

²¹ Mi ci ley rɔ̱ wany, la wanykɛ rɔ̱ bä, kä mi ci ley cuɔ̱ŋ, la cuŋ wi̱el wi̱eeli, kä mi cikɛ jiɛɛn piny, la jiɛy wi̱el wi̱eeli kɛ kɛ kɛɛl, kɛ ɣöö te yiey leyni tin tëk rɛy wi̱el wi̱eeli.

²² Wuɔ̱thni leyni tin tëk tëë kɛ mi ce̱tkɛ dääk wi̱i̱diɛn, kä jaŋɛ ce̱tkɛ gi̱dha̱t, cɛ rɔ ɣa̱r wuɔ̱thnikiɛn.

²³ Piny dääkä cikɛ gɔ̱kiɛn riny a cikɛ cuɔ̱ŋ ɛ pi̱c, wä gɔ̱a̱kɔ kä min dɔ̱ŋ, kä te ley ɔ kɛ gɔ̱k da̱ŋ rɛw ti kɔ̱ŋ ti kuɔ̱mkɛ puɔ̱nydɛ.

²⁴ Mëë wä kɛ rɔ̱ wany, cua̱ jɔw gɔ̱ɔ̱kiɛn liŋ ce̱tdɛ nikɛ jɔw pi̱i̱ni ti ŋuan, cuɛ ce̱tnikɛ ma̱a̱r Kuɔth in leny buɔ̱mdɛ ti diaal kɛnɛ jɔw rɛ̈m mi di̱i̱t. Kä mɔ cikɛ cuɔ̱ŋɔ la luɔ̱ɔ̱ckɛ gɔ̱kiɛn piny.

²⁵ Kä cu jɔw päl nhial dääkä min te wi̱i̱diɛn, mëë cikɛ cuɔ̱ŋ, cukɛ gɔ̱kiɛn luɔ̱ɔ̱c piny.

²⁶ Kä rɛy dääkä in te wi̱i̱diɛn nhial tëë kɛ mi jɔc ce̱tkɛ kɔm kuäärä, mi ca la̱t kɛ guɛɛy mi yiel mi di̱t kökdɛ. Kä nyuur mi ce̱tkɛ raan wi̱i̱ kɔam.

²⁷ A känɛ jɛ ni guäth in jɔc ce̱tkɛ lɛ̈tdɛ a wä nhial, cua̱ mi ce̱tkɛ läŋ in yian mi riaw nɛn, mi ci thia̱a̱ŋ kɛ mac kui̱nikɛ diaal. Kä a känɛ jɛ ni lɛtädɛ a wä piny, cua̱ mi ce̱tkɛ mac nɛn, kä te buay gëëknikɛ diaal.

²⁸ Ce̱tkɛ min la jɔc tik Kuɔth rɛy puɔ̱rä kɛ cäŋ nhial, ɛ jɛn jɔac in jɔc kɛ buay gëëknikɛ. Nɔmɔ ɛ jɛn jɔac ciɛɛŋä wutdä Kuɔth Nhial. Mëë cä jɛ nɛn cua̱ rɔ yuɔr piny buupä, kä cua̱ jɔw raam mi ruac liŋ.