Tay-täth 3 - RUAC KUƆTH IN RƐL RƆ

Ciaaŋ raam mi Krith-cini

¹ Ti̱mni jɛ ji̱ ŋäthä ɛn ɣöö bikɛ ruëëc kɛnɛ ji̱ bumni liŋ, bikɛ tekɛ luth, kä bikɛ rɔ̱ rialikä kɛ kui̱ la̱t mi gɔaa.

² /Cikɛ bi ruac a jiäk kɛ raan, /cikɛ bi a ji̱ gaak, bikɛ a nɛy ti kɔ̱c, kä bikɛ ciaŋ mi gɔaa nyuɔ̱th nɛy diaal.

³ Kɛ ɣöö kɔn pua̱nykɔn canɛ kɔŋ a dɔ̱a̱r mëëdan, ti thil luth, ca kɔn buath jɔ̱ɔ̱r, cua kɔn yiɛn ɛ ciɛŋ diaal ti gööl kɛnɛ nyin tɛthä lɔaac. Cu kɔn ni̱n kɔn thuk kɛ gak kɛnɛ tiɛɛl, ca kɔn nyir ɛ naath, kä cuanɛ rɔ̱ nyir.

⁴ Kä mëë ci gɔɔy kɛnɛ kɔ̱a̱c lɔaac Kuɔth in la Käändan jɔɔc,

⁵ cuɛ kɔn kän, kä /ciɛ kui̱ lätni cuŋni tin canɛ la̱t, kä ɛ kui̱ kɔ̱cä lɔaacdɛ, kɛ la̱k in ci kɔn moc kɛ tëk mi pay tuɔɔk Yiëë in Gɔaa in Rɛl Rɔ.

⁶ Yiëë ɛmɛ cɛ jɛ wuɔc wi̱i̱dan ɛlɔ̱ŋ kɛ Yecu Kritho in la Käändan,

⁷ kɛ ɣöö ba kɔn moc cuɔ̱ɔ̱ŋ kɛ puɔ̱thdɛ, kä banɛ a dieel gɔaal kɛ kui̱ ŋäthä teekä mi do̱raar.

⁸ Ruac ɛmɛ ɛ thuɔ̱k. Ɣän göörä ɣöö bi la̱t ni kɛnɛ ti̱ti̱, kɛ ɣöö bi nɛy tin ca Kuoth ŋäth rɔ niɛk kɛ ɣöö bikɛ rɔ̱ ka̱m lät ti gɔw. Lät ti̱ti̱ gɔwkɛ ɛlɔ̱ŋ, kä lua̱kɛ naath.

⁹ Nɔ̱ɔ̱ni rɔ kɛ gak gaakni dɔ̱ɔ̱rä, kɛnɛ ciööt kuayni nath, kɛ lo̱k ŋɔaani, kɛ ŋaknɔmni kɛ kui̱ ŋutdä, kɛ ɣöö /cikɛ naath luäk, kä thilɛ kɛ luɔt.

¹⁰ Kä kɛ kui̱ lui̱kä min nhiam kɛnɛ min rɛwdɛ, cu tekɛ mi lätdi kɛ ram mi ci naath jakä da̱a̱kɛ rɔ̱.

¹¹ Kä min ŋäci jɛ ram mi ce̱tkɛ inɔ ɛ ram mi jiääk kä cɛ thia̱a̱ŋ kɛ dueer, kuethɛ ni rɔɔdɛ.

Ruaacni tin jɔak

¹² Mi wa̱a̱ ji̱ jäkä Ar-te-math kiɛ Ti-ki-käth ɣɔ̱nɛ ɛn ɣöö bi ben kä ɣä kä Ni-ko-po-lith, kɛ ɣöö cä jɛ car ɛn ɣöö bä jiɔam thi̱n.

¹³ Ɣɔ̱nɛ ɛn ɣöö bi Dhi-näth in la ŋuuk kɛnɛ A-pɔ-löth mal jakä dupdiɛn, kä ŋäcni ɣöö thilɛ mi dak kä kɛ.

¹⁴ Kä jakni naath kä ŋa̱ckɛ ɣöö bikɛ rɔ̱ ka̱m lät ti gɔw, kɛ ɣöö bikɛ rik mal luäk, kɛ ɣöö /ci tëkdiɛn bi a mi jiääk.

¹⁵ Nɛy diaal tin te kɛɛl kɛ ɣä nërkɛ ji̱. Ner nɛy tin nhɔakɛ kɔn rɛy ŋäthä. A puɔ̱th te kɛɛl kɛ yɛn diaal.