Tay-täth 1 - RUAC KUƆTH IN RƐL RƆ

¹ Ɛ ɣän Puɔl, läät Kuɔth kä jak Yecu Kritho, kɛ ɣöö bä ŋa̱th nɛɛni tin ci Kuoth kɛ kuany jakä bum, kä bäkɛ jakä ŋa̱c thuɔ̱k min lot rɔ kɛ ciaŋ Kuɔth.

² Jɛn ŋa̱th ɛmɔ bëë kä ŋa̱th teekä mi do̱raar, min ci Kuoth in kui̱c kac ɛ lar ɛ /ka̱n gua̱a̱th ni tok.

³ Kɛ gua̱a̱th in gɔaa cuɛ ruacdɛ nyoth kɛ lat ruac Kuɔth min ca ka̱m ɣä kɛ ɣöö bä jɛ lat ɛ Kuoth in la Käändan.

⁴ Gɔ̱a̱rä warɛgak ɛmɛ Tay-täth, gatdä min nhɔakä rɛy ŋäthä min nyuakɔ. A puɔ̱th kɛnɛ mal kä Kuoth in la Gua̱a̱ra kɛnɛ Kritho Yecu in la Käändan tekɛ ji̱ kɛɛl.

Tay-täth kä Ku-riit

⁵ Kɛ kui̱ ɛmɔ cä ji̱ ba̱ny kä Ku-riit, kɛ ɣöö deri min tekɛ diw rialikä, kä bi ɛldɛri kuany rɛy wi̱i̱ni diaal ce̱tkɛ min cä nyuɔ̱th ji̱.

⁶ Ɛn ɛldɛr bɛ la ram mi thil bɛ̈l, kä cɛ kuɛɛn kä kɛɛl, kä gaatkɛ kɛ ji̱ ŋäthä, ti /ka̱n gɔany kɛ thil lɔaac kɛnɛ thil luthä.

⁷ Kɛ ɣöö bo̱o̱th duëël Kuɔth, ɛ yuup la̱t Kuɔth, bɛ a ram mi thil bɛl. Kä /cɛ rɔ bi dhil liakä, kiɛ mi la mal a kɛ̈c, kiɛ yɔ̱ŋ kɔaŋ, kiɛ gua̱n rɔlä, kiɛ di̱t lɔc kɛ jek ŋɔaani.

⁸ Kä jɛn bɛ la ram nyuur naath agɔaa, kä bɛ a nho̱o̱k kä mi gɔaa, kä bɛ ŋɔak ŋa̱c, mi lät cuŋ, mi rɛl rɔ, kä käpɛ lɔcdɛ piny.

⁹ Bɛ käp ni ruac mi thuɔ̱k mi ŋa̱thkɛ mi lot rɔ kɛ ŋi̱i̱c, kɛ ɣöö derɛ tekɛ lua̱ŋ kɛ ŋi̱i̱c ruaacni Kuɔth agɔaa, kɛnɛ ɣöö derɛ nɛy tin gakɛ ruac nyuɔ̱th dueriɛn.

¹⁰ Kä tëëkɛ nɛy ti ŋuan ti ci kac raar bä, ji̱ ruac lɔrä, kä mɛɛtdä nath, kä di̱tdiɛn kɛ ji̱ Juudh tin nhɔakɛ ciaŋ cuelä.

¹¹ Bakɛ jakä bit, kɛ ɣöö nyuɔnkɛ dho̱r diaal kɛ ŋi̱i̱cdiɛn kɛ ti /ca dee ŋi̱eec. Kä lät kɛn ɛ kɛ ɣöö ba duɔ̱ɔ̱r jek thi̱n.

¹² Ci ram kɛl kä kɛ mi la gökdiɛn pa̱ny ɛ lar i̱, “Ji̱ Ku-riit kɛ ji̱ ka̱a̱cni ni ciaŋ, kɛ ley ti jiäk, kɛ nɛy ti nyɔap.”

¹³ Nën ɛmɔ ɛ thuɔ̱k. Kɛ kui̱ ɛmɛ luekɛ a bum, kɛ ɣöö dɔ̱ŋ bikɛ tekɛ ŋa̱th mi gɔaa,

¹⁴ kä /cikɛ ruaacni ji̱ Juudh tëë wal kɛnɛ luëëk nɛɛni tin lökɛ thuɔ̱k bi liŋ.

¹⁵ Kɛ kui̱ nɛɛni tin buɔy lo̱ckiɛn, ŋɔaani diaal kɛ wiɛc wiɛɛc, kä kɛ kui̱ nɛɛni tin jiäk tin thil ŋa̱th thilɛ duɔ̱ɔ̱r kɛl mi wic wic. Ca̱riɛn kɛnɛ ŋäc lo̱cnikiɛn cɛ nyuɔɔn.

¹⁶ Laar kɛn ɛ ɛn ɣöö ŋa̱ckɛ Kuoth, kä jay kɛn ɛ kɛ lätkiɛn. Kɛ nɛy ti lökɛ ti thil luth, kä /cikɛ ro̱ŋ kɛ la̱t kä mi gɔaa.