Thɔl 8 - RUAC KUƆTH IN RƐL RƆ

¹ Mi ɛ ji̱n dämaar, mi ci thi̱n maar luɛth! Mi can röm dup, dëë ji̱ cim, kä thilɛ ram mi dee gaak.

² Kä dëë ji̱ nööŋ duëël maar, duëël ciëk ëë ruët kɛ ɣä. Kä dëë ji̱ moc kɛ kɔaŋ mi maathi, kɔaŋ dɛɛni walkä.

³ Kä te tet caamdɛ piny wecdä, kä cɛ ɣä kuak kɛ tet cuëëcdɛ.

⁴ Kä ɣän lö män Jɛ-ru-tha-lɛm luëëkä yɛ, /cuarɛ nhök kap nhial a /ken gua̱a̱thdɛ ni ben.

Ben cieŋ Mäthni

⁵ Kä ɛŋa ɛn ni bëë rɛy dɔaari, mi ci rɔ thi̱ŋ kɛ luumdɛ mi? Cua̱ ji̱ ker thaar jiaath mi gɔaa. Guäth ëë ruët muɔɔrkɛ ji̱ thi̱n.

Ciek

⁶ Car ɣä kɛ rɛy lɔaacdu, rɔm ni ɣä kɛ tetdu. Kɛ ɣöö nhök te lua̱ŋ ce̱tdɛ nikɛ lia̱a̱, kä tëë kɛ buɔ̱m ce̱tnikɛ kɔ̱a̱k. Kä jɛn la pɛtdɛ ce̱tnikɛ mac, ce̱tdɛ nikɛ mac mi ci kac nhial.

⁷ Kä /ci pi̱w ti ŋuan nhök dee yieny, kä ci nyɔc ɛ dee can. Kä mi ci raan wee tho̱pɛ nyin dhɔaarɛ diaal kɛ ɣöö bɛ nhök kɔk, ɛ ba dɔl ni jɛ.

Mäthni

⁸ Ta̱kɔ kɛ nyimaara mi tɔt, mi /ken thinkɛ ni ben. Bakɔ jɛ jiök i̱di, mi wëë wä wee ba kuɛn?

⁹ Mi bɛ ce̱tkɛ päny, bakɔ jɛ ta̱th biɛɛ cikɛ min bo̱r. Kä mi bɛ ce̱tkɛ thi̱i̱k, bakɔ jɛ kal kɛ jiɛn ŋuer.

Ciek

¹⁰ Mëëdan ɛ ɣän päny, kä thinkä cuŋkɛ ce̱tkɛ kɛ biɛɛni. Kä jɛ, cua̱ ce̱tkɛ ram mi no̱o̱ŋ ni mal.

¹¹ Mëëdan te Thɔ-lo-mon kɛ kak wal kɛ kui̱ kɔaŋ wi̱c kä Baal-ɣa-mon, kä cuɛ jɛ ka̱m pi̱eeth ti piɛth kɛ jɛ, kä dee ramɔ jɛ a yur yio̱w ti bathdɔɔr kɛ kui̱ dɛɛnikɛ.

¹² Duundɛ ɣöö kak walä kɛ kui̱ kɔaŋ ɛ duŋdä, kä yio̱w ti bathdɔɔr kɛ nyinku, lö Thɔ-lo-mon. Kä nɛy tin piɛthkɛ jɛ bikɛ tekɛ yio̱w ti kur rɛw.

Wut

¹³ Ji̱n ram in cieŋ rɛy kakä jiɛn, a liɛŋä jɔwdu luumdä kɔnɛ mäthnikä.

Ciek

¹⁴ Bër kä ɣä kɛ pɛ̈th luumdä, ce̱tkɛ kɛ̈w kɛnɛ ruath puɔ̱ɔ̱rä, mi pɛ̈th kɛ ben piny wi̱i̱ pa̱a̱m in la wal ti ŋuäny ɛ do̱ny thi̱n.