Thɔl 7 - RUAC KUƆTH IN RƐL RƆ

Rieet liakä Wut

¹ Ɛŋu gɔw ciöku i̱ nɛmɛ rɛy wa̱a̱ri lö nya kua̱r! Kä ɣa̱a̱mku ce̱tkɛ nikɛ mɔ tääthkɛ bël ɔ.

² Kä lo̱kdu ce̱tdɛ nikɛ tuɔ̱k mi thiäŋ kɛ kɔaŋ. Kä lɛ̈tdu ce̱tdɛ nikɛ buɔ̱n bɛɛl ti ca go̱l ɛ tuaal.

³ Kä thinku ce̱tkɛ nikɛ cuɛ̈ɛ̈k kɛwä.

⁴ Kä ce̱t ŋuäkdu nikɛ biɛɛ mi ca la̱t kɛ tuŋ gua̱r, kä wäŋku ce̱tkɛ nikɛ pul pi̱i̱ni kä Ɛc-bon, min te Thok Bath-ra-bim. Kä wumdu ce̱tdɛ nikɛ biɛɛ Lɛ-ba-nɔn, min guic ni wec Da-math-kɛth piny.

⁵ Kä te wi̱cdu ni nhial ce̱tkɛ päm wec Kar-mɛl, kä ce̱t mi̱em wecdu nikɛ bi̱i̱ pua̱a̱ny duëël kua̱r, mëë cu gɔɔydɛ kuäär pɛc.

⁶ Ji̱n gɔaa i̱ ɛlɔ̱ŋ, kä comi, luumdä ji̱n dholi ni gɔɔy.

⁷ Kä cɛ ji̱ cuŋ ce̱tnikɛ jiath nöör, kä te thinku cuŋä ce̱tkɛ dɛy nöör.

⁸ Kä cua̱ wee i̱, “Bä no̱r kɔt kä bä rɔ wä ka̱p karikɛ. Kä ce̱t thinku kɛ dɛy lua̱l, kä ɛ yiëëdu ŋuäny ce̱tkɛ dɛy ŋɔa̱a̱p,

⁹ Kä ci̱emdu gɔaaɛ ce̱tkɛ kɔaŋ mi gɔaa.” Kä a kɔaŋ wä nikä luumdä, a jɛ lo̱ny ni thokdɛ.

Ciek

¹⁰ Ɛ ɣän duŋ luumädä, kä min go̱o̱rɛ ɛ ɣän.

¹¹ Bër lö luumdä, ber wan rɛy ciëŋ, ban wäär wä thuk thi̱n.

¹² Kä luɔ̱thnɛ rɛy ka̱a̱kni wal kɛ kui̱ kɔaŋ, banɛ wä guic mi cikɛ ruët, kɛnɛ mi cikɛ ɣa̱r, kɛnɛ mi ci börɛ̈ɛ̈li gaaknikiɛn jɔɔc. Ɛn wi̱ni bä ji̱ wä nhɔk thi̱n.

¹³ Bi gaakni jiaath mandrak gɔw ŋuänydɛ jakä raar, thok dhɔaara te dɛy wal diaal tin gɔw thi̱n, ti pay ciɛk kɛnɛ tëë wal, tëë cä tɔ̱a̱w ji̱ luumdä.