Thɔl 6 - RUAC KUƆTH IN RƐL RƆ

Mäthni

¹ Ciek in gɔaa ni jɛn kä män, luumdu cɛ wä nikä? Ɛ duɔ̱ɔ̱p in mi̱th ci luumdu wä kɛ jɛ mɔ, kɛ ɣöö dënɛ jɛ wä go̱r kɛɛl?

Ciek

² Luumdä cɛ wä rɛy kakä walkɛ guäth in do̱ny jiɛn tin ŋuäny thi̱n, cɛ detkɛ wä la̱a̱k rɛy kakä, kä bɛ tual wä ma̱a̱t.

³ Ɛ ɣän duŋ luumädä, kä ɛ duŋdä, lääkɛ detkɛ rɛy tuaali.

Gɔɔy ciëk mi thil mi päär kɛ jɛ Wut

⁴ Gɔaa i̱ ɛlɔ̱ŋ luumdä ce̱tkɛ wec Ti̱r-dha, nhɔakä ji̱ ce̱tkɛ Jɛ-ru-tha-lɛm, ce̱tdɛ nikɛ rɛm mi lät maacin.

⁵ Ri̱t wäŋku kä ɣä, pen kɛn ɣä ciaŋ! La mi̱emku rɔ̱ a niaŋ ce̱tkɛ det ti ri̱i̱ŋ piny wi̱i̱ pa̱a̱m Gil-yad.

⁶ Kä lɛcku buɔykɛ ce̱tnikɛ det ti ca lak, lɛc ti tak ti thilɛ mi ci ben raar thi̱n.

⁷ Kä gi̱eeku läŋkɛ ce̱tnikɛ dɔw nöör, piny miirä nhiam kaandu.

⁸ A kuäär tekɛ män kua̱r ti jiɛn bäkɛl, kɛ luɔɔm ti jiɛn bädäk, kɛ nyier ti ŋuan ti ca luäŋ kɛ kuën.

⁹ Duundɛ ɣöö luumdä min gɔaa rɛlɛ rɔ, ɛ jɛn nyam ɔ kɛlɔ kä man, kä nhɔk man ni jɛ ɛlɔ̱ŋ. Mɔ ca jɛ nɛn ɛ nyier ɔ, la cɔalkɛ jɛ i̱ mi ca poth. Kä la män kua̱r kɛ luɔɔm jɛ a liak.

¹⁰ Kä ɛŋa mi gɔaa ce̱tkɛ bak ɣɔaa, mi gɔaa ce̱tkɛ pay, kä buɔyɛ ce̱tkɛ cäŋ, kä riawɛ ce̱tdɛ nikɛ rɛm mi lät maacin.

¹¹ Kä cua̱ wä rɛy kakä wal, kɛ ɣöö bä gaakni jiɛn wä guic rɛy lo̱o̱lä, kɛnɛ mi ci wal ruët, kɛnɛ mi ci börɛ̈ɛ̈li tekɛ gaakni.

¹² A kuecä, cua̱ rɔ jek göörä luumdä ce̱tkɛ geer thurbiɛɛl mi wä ko̱o̱r.

Mäthni

¹³ Lunyni jɔk lö Nya-cɔ-lam, lunyni jɔk bakɔ ji̱ ben guic. Ɛŋu bia ɣä guic ɔ, ce̱t guic yɛn ni nɛy ti duth?