Thɔl 5 - RUAC KUƆTH IN RƐL RƆ

Wut

¹ Ɣän cä ben rɛy kakä walkä, kaw lɔaacdä, ɣän ma̱a̱tdä walkä tin kɔap kɔaap kɛnɛ tin kur, camä com comdä kɛnɛ tuaarä, maathä kɔaŋdä kɛnɛ caakä. Mi̱ethɛ kä ma̱thɛ lö nhöök, ma̱thɛ amäni mi cia yɔ̱ŋ kɛ nhök.

Mäthni Läk mi dɔ̱ŋ Ciek

² Ɣän mëë ci waŋdä wä ni̱n kä ji̱n lɔcdä. Cua̱ luumdä läkikä dɔɔŋɛ thi̱i̱k i̱, “Lep ni ɣä duel luumdä, nho̱o̱k lɔaacdä min rɛ̈lä. Kɛ ɣöö cä lua̱a̱ny kɛ thäc, kä ci mi̱emkä wac kɛ thäc wa̱r.”

³ Kä ɣän cä bi̱i̱dä woc, bä kulɛ nyɔk kɛ läth i̱di? Kä ɣän cä ciökä lak, bäkɛ kulɛ nyɔk kɛ löth i̱di?

⁴ Kä cu luumdä tetdɛ ruɔ̱ɔ̱ny kɛ rɛy thi̱ek, kä cu lɔcdä wee li̱k kɛ jɛ.

⁵ Cua rɔ jiɛc kɛ ɣöö bä luumdä lëp duel, kä te tetkä kɛ wäl mi kɔp, te tetkä kɛ liɛɛth wa̱l in kɔp kɔp, min ka̱a̱pä do̱o̱p thi̱ek.

⁶ Cua̱ luumdä lëp duel, duundɛ ɣöö luumdä cɛ jiɛn. Kä cua̱ jɛ go̱r i̱ dëë jɔwdɛ liŋ. Kä cua̱ jɛ go̱r, duundɛ ɣöö /ka̱n jɛ jek, cua̱ jɛ cɔl, duundɛ ɣöö /kenɛ jɛ loc.

⁷ Kä cua̱ ɣä jek ɛ gueec wec, min ja̱lkɛ rɛy wec. Cukɛ ɣä duäc, cua ɣä moc buɔ̱ɔ̱t, kɛn gueec kal wec, ca bieynikä woc.

⁸ Kä yɛn män Jɛ-ru-tha-lɛm, a yɛ yaacä, mi wä yɛn luumdä wä jek, jiökɛ jɛ i̱ ta̱a̱ kɛ juey nhök.

Mäthni

⁹ Kä luumdu gɔaa ni jɛn kä nyier tin kɔ̱ŋ, lö ciek in gɔaa ni jɛn kä män diaal? Ɛ ku gɔaa ni luumdu kä luɔ̱ɔ̱m diaal, mɔ thieci nɛy ɔ kɛ jɛ?

Ciek

¹⁰ Luumdä gɔaaɛ kä tëë kɛ guɔ̱p mi yian, kä deri jɛ ŋic rɛy nɛɛni ti bathdɔɔri wäl.

¹¹ Tëë kɛ nhiam mi yian mi puɔth puɔth, kä col mi̱emkɛ ce̱tnikɛ jakɔ̱k in ca̱r.

¹² Kä tëë kɛ wäŋ ti kɔ̱a̱c kɔa̱a̱c ce̱tkɛ kunöör. Kä buɔykɛ ce̱tkɛ cak, kä bilkɛ.

¹³ Kä tëë kɛ gi̱eek ti gɔw ti ce̱tkɛ kak wal ti kɔp ŋuänydiɛn, ce̱t thokdɛ kɛ tual ti thiy kɛ wäl mi kɔp kɔp.

¹⁴ Tëë kɛ tet ti ya̱ni ti cɛ la̱t agɔaa, ti tekɛ yio̱w pua̱a̱ny ti gɔw, tëë kɛ puɔ̱ny mi puɔth ce̱tnikɛ tuŋ gua̱r, mi ca biɛl kɛ päm mi yiel.

¹⁵ Kä ciökɛ bumkɛ ce̱tkɛ nikɛ päm mi ca la̱t, mi ca la̱th wi̱i̱ dääpä, kä mi guic i̱ jɛ cuŋɛ ce̱tdɛ nikɛ jiath mɛ̈th rööl Lɛ-ba-nɔn.

¹⁶ Kä ruacdɛ gɔaaɛ ɛlɔ̱ŋ, ti diaal kä jɛ gɔwkɛ. Ɛ jɛn ta̱a̱ luumädä ɛn nɔmɔ ɛ jɛn ta̱a̱ määthädä, lö män Jɛ-ru-tha-lɛm.