Thɔl 4 - RUAC KUƆTH IN RƐL RƆ

Lat gɔɔyä ciëk Wut

¹ Ji̱n gɔaay ɛlɔ̱ŋ luumdä! Kä wäŋku ce̱tkɛ nikɛ kunööri piny miirä nhiam kaandu. Kä thia̱y mi̱emku ce̱tnikɛ buɔ̱n deet böwni, ti ri̱i̱ŋ piny wi̱i̱ Pa̱a̱m Gil-yad.

² Kä ce̱t lɛcku kɛ rɔɔm ti ca lak, lɛc ti tak ti thilɛ mi ci ben raar thi̱n.

³ Kä ti̱i̱ kɛ thok mi yian, la gɔaaɛ ɛlɔ̱ŋ mɔ ruaci mɔ. Kä gi̱eeku puɔthkɛ ce̱tkɛ nikɛ dɔw nöör piny miirä nhiam kaandu.

⁴ Ce̱t ŋuäkdu nikɛ biɛɛ Dee-bid, jɛn puɔthɛ kä bärɛ, kä tëë kɛ tiɛk ce̱tdɛ nikɛ köötni ti bathdɔɔr, ti ca ŋap thi̱n.

⁵ Kä ce̱t thinku kɛ cuɛ̈ɛ̈k kɛwä, ti läk rɛy tuaali.

⁶ Ɣän bä te wi̱i̱ pa̱a̱m wa̱l in kɔp, amäni mi ci ɣɔw baak, a ci wäär thuɔ̱k.

⁷ Gɔaa i̱ ɛlɔ̱ŋ luumdä, thilɛ mi jiäk kä ji̱.

⁸ Bër jiaynɛ kɛɛl kä Lɛ-ba-nɔn luumdä, bër jiaynɛ kä Lɛ-ba-nɔn. Bër piny wi̱i̱ pa̱a̱m Ä-ma-na, bër piny wi̱i̱ pa̱a̱m Thi-nir kɛnɛ Ɛr-mon, guäth in cieŋ lony thi̱n kɛnɛ kuac.

⁹ Kä ji̱n ci lɔcdä naŋ, lö nyimaar kä kaw lɔaacdä, ci lɔcdä naŋ kɛ wäŋku tɔ̱ gɔw tɔ̱tɔ̱, kɛnɛ tik ŋua̱a̱kdu nɔmɔ.

¹⁰ Kä nhökdu kaw lɔaacdä gɔaaɛ ɛlɔ̱ŋ! Nhökdu jakɛ lɔc kä gɔaa ɛlɔ̱ŋ kä kɔaŋ. Kä liɛɛth yi̱i̱rädu ŋuäny ni jɛn ɛlɔ̱ŋ kä wal diaal!

¹¹ Kä lim lɛpdu ce̱tnikɛ tuaar lö kawdä, ce̱t lɛpdu nikɛ cak kɛnɛ tuaar kä ɣä. Kä bi̱i̱du ŋuänyɛ agɔaa ce̱tdɛ nikɛ ŋuäny wa̱l Lɛ-ba-nɔn.

¹² Kä kawdä ɛ kak wal mi ca tɛ̱̈ɛ̱̈, ɛ wa̱t pi̱i̱ni mi ca kum.

¹³ Kä cuŋ pua̱a̱nydɛ ce̱tkɛ nikɛ jiath nöör, mi kuiir dɛy ti gɔw. Kɛ ɣena kɛnɛ wäl mi di̱t kökdɛ,

¹⁴ kɛ neet kɛnɛ gɔar kɛ ɣena, kɛ jiɛn diaal tin tekɛ ŋuäny mi gɔaa kɛ böl, nikɛ wal diaal tin ŋuäny, do̱ny kɛn ɛn wani.

¹⁵ Ɛ ji̱n pi̱w kakä dɛɛni wal, pi̱ jiɛw, ɛ ji̱n lo̱o̱l pi̱i̱ni ti bëë kä Lɛ-ba-nɔn.

Ciek

¹⁶ Bërkɛ jiɔam kuec caam, kä bërkɛ jiɔam kuec cuëëc! Puɔ̱tdɛ rɛy kakä walkä, naŋɛ ŋuänydɛ rɛy jiɔam. A luumdä bëë rɛy kakä walkɛ, bɛ dɛykɛ tin gɔw ben cam.