Thɔl 3 - RUAC KUƆTH IN RƐL RƆ

La̱k kɛ kui̱ nho̱kä Ciek

¹ Ni̱n kɛ wäär rɛy kölikä, cua̱ ram min nhɔakä kɛ lɔcdä läkikä. Cua̱ jɛ guic duundɛ ɣöö /ka̱n jɛ jek.

² Ɣän bä rɔ jiɛc täämɛ, bä wä go̱r rɛy wec, kɛnɛ rɛy duɔ̱pni kɛ rɛy kuëri. Ɣän bä wä go̱r ɛn ram in nhɔk lɔcdä jɛ. Cua̱ jɛ go̱r duundɛ ɣöö /ka̱n jɛ jek.

³ Kä cu nɛy tin la yiënkɛ wec ɣä nɛn, min jääl kɛn rɛy wec, cuakɛ thiec i̱, “Cia ram in nhɔk lɔcdä jɛ nɛn?”

⁴ Kä niɛ min cä kɛ bäl, cua ram in nhɔk lɔcdä jɛ jek. Kä cua jɛ käp, kä /cä jɛ bi pa̱l wä, amäni mi cä jɛ naŋ dhɔr maar, duëël ciëk ëë ruët kɛ ɣä.

⁵ Kä yɛn män Jɛ-ru-tha-lɛm, yacɛ rɔ̱ ɣä kɛ kɛ̈w kɛnɛ tuut thi̱eel, /cuarɛ nhök kap nhial a /ken gua̱a̱thdɛ ni ben!

⁶ Kä ɛŋa ɛnɔ bëë rɛy dɔaarɔ, ce̱tkɛ tol mi ci rɔ rith, mɔ ci rɔ yi̱rkɛ wäl in kɔp ɔ kɛnɛ wäl in kur kur, min la kɔakɛ ɛ köök?

⁷ Ɛ Thɔ-lo-mon bëë kɛ thurbilɛ mɔ! Te gëkdɛ kɛ wutni köör ji̱ I-thɛ-rɛl ti jiɛn bäkɛl.

⁸ Kä te kɛn diaal kɛ thɛpni, kä ŋa̱ckɛ ko̱r, kä ci ramɔ thɛpdɛ rialikä gekädɛ, kɛ tin la tuɔɔk kɛ wäär.

⁹ Ɛn Kuäär ni Thɔ-lo-mon, cɛ rɔ lät kä kɔm galä mi kapkɛ jɛ, lätdɛ jɛ kɛ jiɛn rööl Lɛ-ba-nɔn.

¹⁰ Kä cuɛ cuuŋnikɛ la̱t kɛ ciɛk in bo̱r, kä cuɛ jɔkdɛ rɔth kɛ da̱a̱p, kä cuɛ kɔm rith kɛ bi̱i̱ mi di̱t kökdɛ. Kä ca jicdɛ kɔc agɔaa kɛ nhök, ɛ nyier Jɛ-ru-tha-lɛm.

¹¹ Bia raar, lö nyier Dha-yɔn, guɛcɛ kuäär ni Thɔ-lo-mon cɛ kum kuäärä la̱th, kum ëë ca ka̱m jɛ ɛ man, kɛ cäŋ ëë muutdɛ ni ciekdɛ, cäŋ ëë tɛth kɛ lɔcdɛ.