Thɔl 2 - RUAC KUƆTH IN RƐL RƆ

Ciek

¹ Ɣän ca̱tdä nikɛ gaakni rɛy tɔ̱ɔ̱rä Ca-ron, kɛnɛ tual rɛy löli.

Wut

² Luumdä rɛy nyieet, ce̱tdɛ nikɛ tual rɛy kuiyni.

Ciek

³ Kä luumdä rɛy ŋuɛ̈tni, ce̱tdɛ nikɛ jiath buɔ̱wä rɛy ruɔ̱ɔ̱p. Ɣän nhɔakä nyuur ti̱pkädɛ, kä com dɔwdɛ thokdä.

⁴ Kä cuɛ ɣä naŋ duëël mi̱ethdɛ, kä cuɛ ɣä kum kɛ nhök.

⁵ Kä cuɛ ɣä jak kä bum kɛ pat patni, kä cu puɔ̱nydä pɛl kɛ dɛy buɔ̱wä, kɛ ɣöö ci nhök puɔ̱nydä jak kä kɔ̱c.

⁶ Kä tet caamdɛ cä cak wi̱cdä, kä cɛ ɣä kuak kɛ tet cuëëcdɛ.

⁷ Kä yɛn män Jɛ-ru-tha-lɛm, yacɛ rɔ̱ ɣä kɛ kɛ̈w kɛnɛ tuut thi̱eel. /Cuarɛ nhök kap nhial a /ken gua̱a̱thdɛ ni ben!

Wɛ̈ɛ̈ ruëël mi gɔaa Ciek

⁸ Ɛ jɔw luumädä, cä liŋ! Cɛ ben yuurɛ pääm, wurɛ wuɔ̱thni päämni, bëë kä ɣä.

⁹ Luumdä ce̱tdɛ nikɛ kɛ̈w kɛnɛ ruath thia̱ŋ. Jɛn ci cuɔ̱ŋ jɔk kala mɔ, guicɛ rɛc ɔ kɛ kam jiɛn wernyinä.

¹⁰ Kä cu luumdä ruac jio̱kɛ ɣä i̱, “Jiɛc rɔ luumdä min gɔaa, bër wanɛ.

¹¹ Ci tɔ̱t thuɔ̱k, ci nhiaal rɔ ka̱p cuɔ̱ŋ.

¹² Kä gaakni juaacni cikɛ jɔɔc. Ci ben ni gua̱a̱th tuarä, wiee kunööri rɛy dɔaar.

¹³ Ci jiath ŋɔa̱a̱p kuer, ci juaac ka̱a̱kni ɣa̱r a nööŋkɛ ŋuäny mi gɔaa. Jiɛc rɔ luumdä min gɔaa, bër wanɛ.”

Wut

¹⁴ Ji̱n ce̱tdi nikɛ kunöör mi ci rɔ tɛ̱̈ɛ̱̈ kɔ̱kä pa̱a̱m, a nɛ̈ɛ̈nä nhiamdu min gɔaa, kä a liɛŋä jɔwdu, kɛ ɣöö ti̱i̱ kɛ jɔw mi gɔaa, kɛnɛ nhiam mi gɔaa ɛlɔ̱ŋ.

¹⁵ Käp rëli, rëli tin tiɛtni, tin la ya̱rkɛ ka̱a̱k wal kɛ kui̱ kɔaŋ. Kɛ ɣöö ka̱a̱k walkɔn kɛ kui̱ kɔaŋ kui̱r kɛn.

Ciek

¹⁶ Luumdä ɛ duŋdä, 3 kä ɛ ɣän duŋdɛ, la lääkɛ detkɛ rɛy tuaali.

¹⁷ Amäni mi ci ɣɔw baak, kä ci muth rɔ bar, bi luumdä ku loc jɔk kɛ pɛ̈th ce̱tkɛ kɛ̈w kɛnɛ ruath thi̱eel rɛy päämni.