Thɔl 1 - RUAC KUƆTH IN RƐL RƆ

¹ Dit Thɔ-lo-mon min gɔaa ni jɛn kä diit diaal.

Muɔŋ mäthni wutdä kɛ ciek Ciek

² Kɛ cimnidu cim ni ɣä, kɛ ɣöö nhökdu gɔaa ni jɛn kä kɔaŋ.

³ Kä wäl yi̱i̱rädu tëë kɛ ŋuäny mi gɔaa. Kä ciötdu gɔaaɛ ce̱tdɛ kɛ ŋuäny yi̱i̱rä, kɛ kui̱c ɛmɔ nhɔk nyier ji̱.

⁴ Naŋä kɛɛl kɛ ji̱, malnɛ wä kɛ pɛ̈th, bi ji̱n a kuäärä naŋni ɣä dueelu. Bi lɔcda wä tɛɛth kɛ ji̱ kɛɛl, bakɔ nhökdu liak ɛlɔ̱ŋ kɛ liak mi leny ni kɔaŋ. Kä nhɔk män ji̱ kɛ thuɔ̱k.

Mäthni Ciek

⁵ Ɣän cuɔlä kä gɔaa ɣä lö män Jɛ-ru-tha-lɛm, cuɔlä ce̱tnikɛ kɛmɛ Ke-dhar, cuɔlä ce̱tnikɛ geel duëël Thɔ-lo-mon.

⁶ /Cu ɣä dhɔt kɛ ɣöö cuɔlä. Ɛ cäŋ ci ɣä waŋ ɔ. Kä gak gaatmaar kɛ ɣä, ci kɛn ɣä jak kä läät ka̱a̱kni wal kɛ kui̱ kɔaŋ, a cä thil gua̱a̱th mi yuɔpä ni kakdä!

⁷ Luumdä, läri ɣä gua̱a̱th ɔ, la yieni detku thi̱n ɔ, gua̱a̱th ɔ la kɛn a lɔ̱ŋ thi̱n ɔ kɛ cäŋdäär. Kä ɛŋu bä ji̱ go̱r ɔ rɛy deet yiëëni ti kɔ̱ŋ ɔ?

Wut

⁸ Kä mi kui̱ci män tin gɔw ni kɛn ɛlɔ̱ŋ, guuri bun deet, kä lääkni dɛy deetku, gekä gɛ̈wni yiëëni deet.

⁹ Ɣän luumdä, ca̱a̱tdä ji̱ kɛ ŋuɔ̱ɔ̱t jiöŋköör, mi te rɛy jiöŋkööri Pɛro.

¹⁰ Kä ci nhiamdu gɔaa kɛ ciik ji̱ethdu, kä gɔaa ŋuäkdu kɛ tiɛk da̱a̱pni tin riaw riaaw.

¹¹ Bakɔ ji̱ lät kä ciik jieth dääpä, mi ca biɛl kɛ ciɛk in bo̱r.

Ciek

¹² Kɛ gua̱a̱th in te kuäär lɔ̱ŋä dhaŋädɛ, cu wälä min kɔp ŋuänydɛ jiɔam thiäŋ.

¹³ Luumdä ce̱tdɛ kɛ yio̱m wa̱l in ŋuäny mi te kam thiinkä.

¹⁴ Ɛn luumdä ce̱tdɛ kɛ ɣena mi ci ɣa̱r rɛy ka̱a̱kni wal kɛ kui̱ kɔaŋ kä Een-gɛ-di.

Wut

¹⁵ Gɔaani ɛlɔ̱ŋ luumdä, gɔaay ɛlɔ̱ŋ, kä wäŋku ce̱tkɛ nikɛ kunööri.

Ciek

¹⁶ Kä gɔaay ɛlɔ̱ŋ luumdä, la lɔcdä a jak kä tɛth, kä ko̱l tɔ̱ɔ̱cädan kɛ juaac.

Wut

¹⁷ Kä bi thi̱eer dueelan a luɔ̱ɔ̱r, kä bi kɔykɛ a buɔ̱w.