Ruth 4 - RUAC KUƆTH IN RƐL RƆ

Kuɛn Bo-ɛ̈dh kɛ Ruth

¹ Ɛn ruun waaŋ ëë, cu Bo-ɛ̈dh wä nyuur guäth dolä ji̱ Juudh thok rɛ̈ɛ̈k. Kä cu ran maarä Ɛ-li-mɛ-lɛk ëë lat Bo-ɛ̈dh ɛ ben ɛ cath cath, cu Bo-ɛ̈dh jɛ jiök i̱, “Ŋuuŋu, bër inɛ kä nyuurä wanɛ mi,” kä cuɛ ben nyuur.

² Kä cu Bo-ɛ̈dh wutni da̱ŋ wäl ti di̱t cɔl, kä cuɛ kɛ jiök i̱, “Nyuɔ̱ɔ̱rɛ wanɛ mi,” kä cukɛ nyuur.

³ Kä cu Bo-ɛ̈dh wut maarädiɛn ku jiök i̱, “Kak dämandan ni Ɛ-li-mɛ-lɛk, kɔakɛ jɛ ɛ ciekdɛ ni Na-omi, mëë luny jɔk rööl Mo-ab.

⁴ Kä ɣän, kɛ ca̱rä kärɔa, cä jɛ car i̱ bä ji̱ la̱r lär, ku jɛ kɔk nhiam nɛɛni ti te nyuurä ti, kä nhiam di̱tni wecdan. Ɛ jɛn, mi bi kui̱ maarädu la̱t, ɛ jɛn gɔaa. Kä mi /ci̱ jɛ bi luäŋ kɛ lätni, läri jɛ ɣä, kä bä cu ŋa̱c, kɛ ɣöö thilɛ radɔ̱diɛn mi dee jɛ la̱t ɛ ni ji̱n kɛ nhiam, kä kɛ jɔak rɛwdu ɣän.” Kä cuɛ jɛ loc i̱, “Bä jɛ kɔk.”

⁵ Kä cu Bo-ɛ̈dh jɛ lɛni jiök i̱, “Ɛn cäŋ ɔ bi kɔk ni kak ɔ tetdä Na-omi mɔ, bi nyaa Mo-ab ni Ruth mat thi̱n bä, min mɔ ciëk jɔkä, kɛ ɣöö bi ciöt jɔkä jiɛc rɛy ganmani.”

⁶ Kä cu wut maarä ɛ loc i̱, “Kɛ kui̱ ɛmɔ, ɣän /cä jɛ bi luäŋ kɛ lätni.”

⁷ Täämɛ, kɛ ciaŋ I-thɛ-rɛl ëë wal kɛ kui̱ kökä kɛnɛ guäcni kä ŋɔaani, kɛ ɣöö bi mɔmɔ ca la̱t ɔ a thuɔ̱k, la käm ram kɛl war cio̱kdɛ raar kä bɛ jɛ ka̱m ram in dɔ̱ŋ. Ɛ jɛn ciaŋ I-thɛ-rɛl ɛnɔ.

⁸ Ɛnɔ, mëë ci wut maarä Bo-ɛ̈dh jiök i̱, “Kɔk ɛ,” cuɛ warɛ woc kä cuɛ jɛ ka̱m Bo-ɛ̈dh.

⁹ Ɛn wa̱nɔ cu Bo-ɛ̈dh di̱t kɛnɛ nɛy diaal ku jiök i̱, “Kɛ yɛn neen ɛn walɛ kä cia jɛ nɛn täämɛ ɛn ɣöö cä ti̱n diaal ti̱n tɔ nyin Ɛ-li-mɛ-lɛk kɔk, a amäni nyin Kil-yon diaal kɛnɛ Maa-lɔn bä, cä kɛ kɔk tetdä Na-omi.

¹⁰ Kä min te ni jɛn thi̱n, cä Ruth nyaa Mo-ab ciëk Maa-lɔn mat thi̱n ala ciëkdä kɛ ɣöö bä ciöt jɔkä jiɛc rɛy ganmani kɛnɛ ji̱ matdä wecdɛ. Kɛ yɛn neen ɛn walɛ.”

¹¹ Kä cu nɛy diaal ti̱n te nyuurä thok rɛ̈ɛ̈k kɛnɛ di̱t jɛ lar i̱, “Ɣɔ̱ɔ̱n, ɛ jɛn, lakɔ neen. Kä a Kuoth Nhial jak ciëk ɛmɔ ci kuɛn ɔ ce̱tnikɛ Re-cɛl kɛnɛ Leya tëë ca Je-kɔb di̱eth kuay ti ŋuan. A ria̱ŋdu di̱t thok duëël Ɛp-ra-tha, kä a kɛ̈kdu jɔc kä Beth-lɛ-ɣɛm.

¹² A gaat ti̱n bi Kuoth Nhial kɛ ka̱m ji̱ kɛ nyaa mɔ, jakɛ thok dueelu kä di̱t ce̱tkɛ thok duëël Pɛ-rɛdh mëë di̱ethkɛ Juda ɛ Ta-mar.”

Gua̱ndɔɔŋni Dee-bid

¹³ Kä ɛ jɛn, cu Bo-ɛ̈dh Ruth jakä ciekdɛ, kä cuɛ wä kä jɛ duëël, kä cu Kuoth Nhial jɛ moc gat kä cuɛ dap kɛ gat dhöl.

¹⁴ Kä cu män rɛ̈ɛ̈k Na-omi jiök i̱, “A puɔ̱th tekɛ Kuoth Nhial in ci ji̱ jakä ti̱i̱ kɛ ram mi tekɛ lua̱ŋ kɛ kui̱du ɛn walɛ. A ciöt gatä kɛ̈kɛ kä I-thɛ-rɛl,

¹⁵ kä bɛ yi̱eyku luɔ̱ɔ̱c kä bɛ ji̱ bum rɛy dɔŋädu, kɛ ɣöö ca jɛ dap ɛ ciëk gatdu, min mɔ nho̱o̱kdu, kä le̱ny gua̱a̱thdɛ gaat ti ŋuan.”

¹⁶ Kä cu Na-omi gat ka̱n kä cuɛ jɛ bom, kä cuɛ jɛ la rɔɔmɛ.

¹⁷ Kɛ cäŋ ëë cakɛ ni ciötdɛ cu ji̱ thie̱e̱kädiɛn ŋar kɛ tɛ̈th lɔaay kä larkɛ jɛ i̱, “Ca Na-omi di̱eth gat.” Kä cukɛ ciöt gatä cɔl i̱ O-bɛd. Cuɛ la gua̱n Jɛthi, gua̱n Dee-bid.

¹⁸ Ti̱ti̱ kɛ kɛn kuay Pɛ-rɛdh, Pɛ-rɛdh ɛ gua̱n Ɣɛdh-ron,

¹⁹ kä cu Ɣɛdh-ron a gua̱n Raam, kä cu Raam a gua̱n A-mi-na-dab,

²⁰ kä cu A-mi-na-dab a gua̱n Na-con, kä cu Na-con a gua̱n Thal-mɔn,

²¹ kä cu Thal-mɔn a gua̱n Bo-ɛ̈dh, kä cu Bo-ɛ̈dh a gua̱n O-bɛd,

²² kä cu O-bɛd a gua̱n Jɛthi min mɔ gua̱n Dee-bid.