Ruth 3 - RUAC KUƆTH IN RƐL RƆ

Ruth kɛnɛ Bo-ɛ̈dh därdöör kɔ̱a̱m

¹ Kɛ cäŋ kɛl cu Na-omi Ruth jiök i̱, “Ɛn duɔ̱ɔ̱r lö nyaadä, ɣän /cä ji̱ dee go̱r cieŋ mi deri wä ciɛŋ thi̱n kɛ mal.

² Guic ɛ, ɛn Bo-ɛ̈dh ɛmɛ ci lät kɛɛl kɛ guaar mään cieeŋdɛ mi, /ci ɛ jɛn raan maaräda in? Liŋ ɛ, jɛn ɛn thiaaŋni ɛmɛ bɛ bɛl lɔk därdöör kɔ̱a̱m.

³ Ɛ jɛn, ku rɔ puɔk täämɛ kä yi̱r rɔɔdu, kä moc rɔ bieyni ti̱n gɔw pa̱ny, kä wër guäth kɔ̱a̱m. /Cu jak kä bɛ ta̱a̱du guäth kɔa̱m ŋa̱c amäni mi wee wä thuɔ̱k kɛ mieth kɛnɛ ma̱th.

⁴ Mi wëë wä tɔ̱ɔ̱c, tit gua̱a̱th tɔ̱ɔ̱cädɛ agɔaa, kä wër guɛny bi̱i̱ in cɛ kuɔ̱m, kä ku cu tɔ̱ɔ̱c ciöknikɛ, bɛ ji̱ nyuɔ̱th ca̱r kä min bi la̱t.”

⁵ Kä cu Ruth jɛ loc i̱, “Cä kɛ liŋ kɛn diaal.”

⁶ Mëë thiaŋ, cuɛ wä guäth kɔ̱a̱m a cuɛ ti̱n diaal tëë ca guɔ̱k jɛ ɛ manthudɛ la̱t.

⁷ Cu Bo-ɛ̈dh mi̱th kä cuɛ ria̱ŋ a cu lɔcdɛ gɔaa, kä cuɛ wä tɔ̱ɔ̱c ni jɔk bunä bɛɛl. Kɛ gua̱a̱th mi tɔt cu Ruth rɔ kueel ni määth, cuɛ rɔɔdɛ ben kuɔ̱m piny kɛ jɛ kɛɛl.

⁸ Kɛ wäärdäär cu Bo-ɛ̈dh päär ni̱n, cuɛ rɔ jiɛc kä cuɛ ciek je̱k tɔ̱ɔ̱cä ciöknikɛ.

⁹ Cuɛ jɛ thi̱ec i̱, “Kä ɛ ji̱n ŋa?” Kä cuɛ jɛ loc i̱, “Ɛ ɣän Ruth, kuäärä. /Ce̱t mal lɛ kuɛn bä? Kɛ ɣöö ɛ ji̱n raan maaräda min thia̱k ni jɛn kɛ kɔ. Kä ɛ ji̱n ram in tekɛ ca̱r kɛ kui̱da.”

¹⁰ Kä cuɛ jɛ jiök i̱, “A ji̱ puɔthkɛ ɛ Kuoth Nhial, nyaadä. Ciaŋ gɔɔyädu ɛ jɔak ɛmɛ gui̱th ni jɛn kä min jio̱l, kɛ ɣöö /ken lɔcdu bɛc ni ŋuɛ̈tni, cäŋ deekɛ a can kiɛ ria̱ŋ ria̱a̱ŋ.

¹¹ /Cu dual täämɛ pa̱ny, nyaadä, ba ji̱ lät kä ti̱n diaal ti̱n ci thi̱ec kɛ ɣöö ŋäc ji̱ wec diaal ɛ ɛn ɣöö ɛ ji̱n ciëk mi thuɔ̱k.

¹² Kä täämɛ, nikɛ ɛ waŋ, ɛ thuɔ̱k ɛn ɣöö ɛ jɛn ɣän ram kɛl mi thia̱k ni maarɛ kɛ yɛ. Kä min te thi̱n, jɛn akɛ wut mi thia̱k ni maarɛ kɛ ji̱.

¹³ Ni̱ni ɛn wääri, kä iruun waaŋ mi wëë pëk maarädɛ wä la̱t, bɛ cua jɛn. Kä mi /cɛ jɛ bi la̱t, ce̱tnikɛ Kuoth Nhial, bä gua̱a̱th maarä min thia̱k käth ikä. Tɔ̱ɔ̱cni amäni ruun.”

¹⁴ Ɛn wäär ëë, cuɛ tɔ̱ɔ̱c ciöknikɛ a amäni bak ɣɔaa, kä cuɛ keer ni mi̱rä kɛ ɣöö /ci Bo-ɛ̈dh ɛ go̱r ɛn ɣöö dee raan ɛ ŋa̱c i̱ ci ciëk ɛmɔ ben guäth kɔa̱m.

¹⁵ Kä cu Bo-ɛ̈dh ɛ ku jiök i̱, “Ŋun kuɛr bieydu ɛmɔ kä ɣär ɛ.” Kä cuɛ jɛ thëm themni lääpä da̱ŋ bäkɛl, kä cuɛ kɛ kap wi̱i̱ Ruth. Kä cu Ruth wä rɛɛk.

¹⁶ Kä mëë cɛ cop kä manthudɛ, cu manthudɛ jɛ thi̱ec i̱, “Cɛ te̱e̱ di kɛ ji̱, nyaadä?” Kä cuɛ jɛ la̱t ti̱n diaal ti̱n ca lät kä jɛ ɛ Bo-ɛ̈dh,

¹⁷ wee i̱, “Kɛn themni lääpä da̱ŋ bäkɛl ti̱ti̱ kämɛ kɛ ɣä ɛ jɛn. Ɛ jɛn i̱ /cä dee luny kä ji̱ a thil tetdä duɔ̱ɔ̱r.”

¹⁸ Cuɛ jɛ loc i̱, “Ɛ jɛn, ku lie̱p, nyaadä, amäni cäŋ in wi̱i̱ duɔ̱ɔ̱r thuɔ̱kdɛ je̱k. Ɛn wut /cɛ bi nyuur, kä bɛ nɔmɔ rial ikä ni ɛn walɛ.”