Ruth 2 - RUAC KUƆTH IN RƐL RƆ

Ruth kakä Bo-ɛ̈dh

¹ Kä tëë kɛ wut mi gɔaa kɛ̈kdɛ mi cɔal i̱ Bo-ɛ̈dh, jɛn wut ɛmɔ ɛ ram mi riäŋ riäŋ kä ɛ raan maarä Na-omi kɛ kui̱ cɔaadɛ ni Ɛ-li-mɛ-lɛk.

² Kä kɛ cäŋ kɛl, cu nya Mo-ab ni Ruth Na-omi jiök i̱, “A wa̱a̱ guäth ŋër, dɔ̱ɔ̱ bɛ tekɛ ram mi gɔaa lɔcdɛ kɛ ɣä mi bi ɣä jak kä kuenyä kakädɛ.” Kä cu Na-omi jɛ loc i̱, “Wër, nyaadä.”

³ Kä cuɛ jiɛɛn kä cuɛ ben kuany kakä gurɛ ni ji̱ ŋër, kä kɛ baŋkɛ cuɛ ben jac ni pëk kakä min mɔ kak Bo-ɛ̈dh, raan thuɔk duëël Ɛ-li-mɛ-lɛk.

⁴ Kɛ gua̱a̱th mi tɔt cu Bo-ɛ̈dh cop, bëë kä Beth-lɛ-ɣɛm, kä cuɛ ŋeer nër i̱, “Mal Kuɔth Nhial a yɛ.” Kä cukɛ jɛ loc i̱. “A Kuoth Nhial poth ji̱.”

⁵ Kä cu Bo-ɛ̈dh kuäär la̱a̱tni kɛ thi̱ec i̱, “Ɛŋa ɛn nyaa mɔ?”

⁶ Kä cuɛ jɛ loc i̱, “Ɛ nyaa Mo-ab ëë bä kɛɛl kɛnɛ Na-omi lunyädɛ jɔk rööl Mo-ab.

⁷ Jɛn cɛ ɣä lim i̱, ‘/Cä wuɔ̱th bɛɛl ti̱n ca bäny kä piny ɛ ŋeer rɛy kakädu mal lɛ kuany kä duɔ̱lä kɛ rɔɔdä?’ Inɔ, tëë cuŋä ni wäärun a payɛ wä ti̱pä ni ɛn täämɛ.”

⁸ Täämɛ min ci Bo-ɛ̈dh ruac ɛmɔ liŋ, cuɛ Ruth ku jiök i̱, “I̱di la, nyaadä, /cu kac raar ɛn wanɛ ɛ bi lɛ wä kuany kakä dɔ̱diɛn. Täni kɛɛl kɛ nyieekä,

⁹ tit ni ɛn kak ɔ ŋe̱rkɛ thi̱n ɔ, kä guuri kɛ. Kä nɛn ɛ, ɣän cä ŋuɛ̈tni läätdä lue̱k ɛn ɣöö /ca ji̱ bi juut kä thi̱n. Mi waa ji̱ wä näk ɛ rɛw, wër mäthni pi̱i̱ni dha̱a̱ri ti̱n ca jio̱m ikä ɛ la̱a̱t.”

¹⁰ Ɛn guäth ɛmɔ cu Ruth nhiamdɛ yiath piny kä cuɛ jɛ jiök i̱, “Ɛŋu mi jekä ni gɔɔy waaŋdu a ci ɣä ciɛŋ ni gɔaa, kä lapä raan rööl mi dɔ̱ŋ?”

¹¹ Kä cu Bo-ɛ̈dh ɛ loc i̱, “Ŋɔak diaal tëë ci lät kä muɔɔthu ni mëë ci cɔwdu li̱w, cä kɛ liŋ, kɛnɛ ɣöö ci guur kɛnɛ muɔɔr ba̱ny piny amäni mun diëëthniku bä, kä ci ben a raan nɛɛni ti /keni kɔn mëë ŋäc.

¹² A cuɔ̱lkɛ ji̱ lätku ɛ Kuoth Nhial, kä ba pëk läätädu pi̱ek ji̱ ɛ Kuoth Nhial in la Kuoth I-thɛ-rɛl, jɛn Kuoth ɛ ci rɔ ben lua̱k jɛ mi!”

¹³ Kä cu Ruth jɛ jiök i̱, “A puɔ̱nydu kɔ̱c, kuäärä, kɛ ɣöö ci lɔcdä bum kä ci ruac ni kɔ̱c kɛ ɣä cäŋɛ min /ciɛ ɣän nya läätädu pa̱ny.”

¹⁴ Kä kɛ gua̱a̱th miɛth cu Bo-ɛ̈dh ɛ jiök i̱, “Ti̱i̱cni rɔ cɔ̱ɔ̱r, moc rɔ juray kä bër cuäthni jɛ muläkä.” Kä cuɛ ben nyuur ge̱kä ji̱ ŋër, kä cu Bo-ɛ̈dh Ruth lɔ̱a̱m ŋaam lääpä. Kä cuɛ mi̱th a cuɛ ria̱ŋ, kä cuɛ tha̱a̱ŋkiɛn doth.

¹⁵ Kä mëë cɛ rɔ jiɛc a wëë kuany, cu Bo-ɛ̈dh ŋuɛ̈tnikɛ jiök i̱, “A jɛ kue̱ny rɔ ikä amäni rɛy bua̱a̱ni ti̱n cia dol, kä /cuɔrɛ jɛ puɔl.

¹⁶ Kä yuɔrɛ tha̱a̱ŋ wuɔ̱thni piny kä ti̱n cia duɔl te̱tnikun kä ba̱nyɛ kɛ jɛ, kä /cuɔrɛ jɛ ɣök.”

¹⁷ Kä mëë ci Ruth loc kuany cuɛ buut kue̱ny, kä cuɛ ti̱n cɛ kuany kɔ̱m a cukɛ di̱eny kɛl thiäŋ.

¹⁸ Kä cuɛ kɛ kap kal a cuɛ manthudɛ ben nyuɔ̱th pëk kä ti̱n cɛ kuany. Kä cuɛ duɔth mi̱ethdɛ mëë cɛ doth ka̱m raar kä cuɛ jɛ ka̱m manthudɛ.

¹⁹ Cu manthudɛ jɛ thi̱ec i̱, “A ci ku kuany winith ɛn walɛ? Kä ɛ kak ŋa? A puɔ̱th te kɛɛl kɛ jɛn ram ɔ ci ji̱ liɛc ɔ.” Kä cuɛ manthudɛ loc i̱, “Ram in cä lät kakädɛ ɛ wut mi cɔal i̱ Bo-ɛ̈dh.”

²⁰ Kɛ tɛ̈th lɔaay cu manthudɛ jɛ jiök i̱, “A jɛ, a jɛ puɔthkɛ ɛ Kuoth Nhial min /ken nhökdɛ mi thil pëk tɛ̈ɛ̈ kɛ nɛy ti̱n tëk kɛnɛ jɔɔk!” Kä cu Na-omi jɛ lɛni jiök i̱, “Jɛn Bo-ɛ̈dh ɛmɔ ɛ raan maaräda mi lia̱a̱, ɛ jɛn ram in tekɛ lua̱ŋ kɛ kui̱dan.”

²¹ Kä cu Ruth ɛ jiök i̱, “Cɛ ɣä lɛni jiök bä i̱ bä te kɛɛl kɛ la̱a̱tkɛ a amäni mi wäkɛ thuɔ̱k kɛ ŋer.”

²² Kä cu Na-omi ciek gadɛ ni Ruth jiök, “Ɛ jɛn, nyaadä, gɔaa ni ɣöö bi la wi̱i̱ kɛɛl kɛ guaar mään ti̱n tɔ la̱a̱tkɛ kɛ ɣöö /ca ji̱ bi lɛ jut ka̱a̱kni ti̱n kɔ̱ŋ.”

²³ Kä cuɛ ja̱l kɛɛl kɛnɛ guaar Bo-ɛ̈dh kue̱nyɛ rɔ ikä a amäni mëë ci ŋer lääpä kɛnɛ gɛmɛ thuuk. Kä cukɛ ciɛŋ cieŋdiɛn kɛnɛ manthudɛ.