Ruth 1 - RUAC KUƆTH IN RƐL RƆ

Wä Ɛ-li-mɛ-lɛk kä Mo-ab kɛnɛ ji̱ dhɔaarɛ

¹ Täämɛ ni̱ni tëë la rui̱c Rueec, cuɛ tekɛ buɔth muun, kä cuɛ tekɛ wut wec mi cɔali Beth-lɛ-ɣɛm ro̱o̱l Juda mi cu wä cieŋ muun Mo-ab kɛnɛ ciekdɛ kɛ gaatkɛ kɛɛl.

² Tëë kɛ wut mi cɔal i̱ Ɛ-li-mɛ-lɛk kɛnɛ ciekdɛ ni Na-omi kɛ gaatkiɛn da̱ŋ rɛw Maa-lɔn kɛnɛ Kil-yon, kɛn kɛ ji̱ Ɛp-ra-tha rɛy rɛ̈ɛ̈k mi cɔal i̱ Beth-lɛ-ɣɛm rööl Juda. Cukɛ put rööl dɔ̱diɛn mi cɔal i̱ Mo-ab kɛ ɣöö bikɛ wä te thi̱n kɛ gua̱a̱th mi tɔt.

³ Kä mëë täkɛ thi̱n cu Ɛ-li-mɛ-lɛk li̱w kä cu ciekdɛ ni Na-omi duɔth kɛnɛ gaatkɛ da̱ŋ rɛw.

⁴ Kɛn cukɛ kuɛɛn kɛ män ti tɔ nyi̱er rööl Mo-ab, cɔal kɛl i̱ Ɔrpa, kä cɔal min dɔ̱diɛn i̱ Ruth. Kä cukɛ te̱e̱ wi̱ni kɛ run wäl,

⁵ kä mëë ŋotkɛ thi̱n cu Maa-lɔn kɛnɛ Kil-yon lɛni li̱w. Ɛn wa̱nɔ cu Na-omi duɔth a thil cɔw kɛnɛ gaat ti te nhiamdɛ.

Luny Na-omi kä Beth-lɛ-ɣɛm kɛɛl kɛ Ruth

⁶ Kä mëë ci Na-omi jɛ guic, cuɛ rɔ jiɛc a lunyɛ jɔk rööl Mo-ab kɛɛl kɛnɛ män gankɛ tëë ci gaatkɛ kɛ kuɛn ɛn thɔ̱ŋi̱ kɛ ɣöö cɛ jɛ liŋ ɛn thɔ̱ŋi ɛn ɣöö ci Kuoth Nhial nɛɛkɛ ben gui̱l kä cɛ kɛ moc kɛ bɛl ti ro̱ŋ.

⁷ Kä cuɛ tɛth raar guäth ëë tëë thi̱n, jɛn kɛnɛ män gankɛ, jälkɛ dup a wäkɛ muun Juda.

⁸ Kä min tekɛ jäl ci Na-omi män gankɛ jiök, “Wiaa jɔk, wiaakɛ, a ramɔ loc dhɔɔriɛn. Kä a Kuoth Nhial lät yɛ kä ciaŋ gɔɔyä ce̱t min cia ciaŋ gɔɔyä lät kä gaatkä ti̱n cia jɔɔk amäni ɣän bä.

⁹ Kä a Kuoth Nhial nyɔk yɛ kɛ muɔ̱c cɔw a dee ram ɔ kä yɛ lɔcdɛ wä tɛɛth dhɔɔr cɔaadɛ.” Kä cuɛ kɛ ciɛm. Min cɛ kɛ ciɛm cukɛ wiee ɛlɔ̱ŋ.

¹⁰ Kä cukɛ jɛ jiök, “Eey, ɛpuc ji̱n bi loc kä nɛɛku a naaŋi kɔ kɛ ji̱ kɛɛl.”

¹¹ Kä cuɛ kɛ loc i̱, “Rietdɛ rɔ̱ jɔk, nyieekä, ɛŋu mi go̱o̱rɛ wä kɛɛl kɛ ɣä? Ɛ kuaa ŋa̱c ni ɣöö ta̱a̱ kɛ gaat ti bä nyɔk kɛ da̱p lö inu ti̱n dëë yɛ kulɛ kuɛn ɛ kɛn?

¹² Luɔcɛ ni jɔk, nyieekä, wiaa dho̱rkun kɛ ɣöö cä dɔŋ ɛpuc a /ca ɣä dee nyɔk kɛ kuen. Kä cäŋ ŋa̱cä jɛ i̱ dëë ɣä kuɛn niɛ wääri a dëë dhɔɔl cu dap,

¹³ ɛn guäth ɛmɔ dërɛ kɛ lip bitdä amäni mi wäkɛ piith? Kä dërɛ rɔ̱ pen cɔw kɛ kui̱diɛn? Aal, nyieekä, jiɛthɛ lɔcdä ɛlɔ̱ŋ kɛ kui̱dun kɛ ɣöö ci Kuoth Nhial rɔ luɔ̱c ɣä.”

¹⁴ Kä cukɛ rɔ̱ nyɔk kɛ wiee ɛlɔ̱ŋ. Kä cu Ɔrpa manthudɛ nam, kä cuɛ rɔ riet jɔk, kä Ruth cuɛ loc jɔk lo̱k.

¹⁵ Kä min ci Ɔrpa jiɛɛn, cu Na-omi Ruth jiök i̱, “Nɛn ɛ, nyäkdu cɛ loc kä nɛɛkɛ kɛnɛ kuthkiɛn, wër guuri jɛ.”

¹⁶ Kä cu Ruth ɛ lar, “/Cu ɣä jakä ba̱nyä ji̱ piny. A wa̱a̱ kɛ ji̱ kɛɛl, kɛ ɣöö gua̱a̱th in bi wä thi̱n, bä wä thi̱n, kä gua̱a̱th in bi cieŋ thi̱n, bä cieŋ thi̱n. Bi nɛɛku a nɛɛkä, kä Kuothdu bɛ la Kuothdä.

¹⁷ Bi gua̱a̱th liɛɛthdu a gua̱a̱th liɛɛthdä, kä ba ɣä kony thi̱n. Kä nɛn ɛ, mi tëë kɛ mi bi kamdan da̱a̱k ɛ ni mi dääkɛ lia̱a̱, mi /ciɛ jɛn inɔ, a Kuoth Nhial re̱e̱p waaŋ lɔaacdɛ kɛ ɣä.”

¹⁸ Kä mëë ci Na-omi jɛ nɛn ɛn ɣöö ci Ruth lɔcdɛ di̱t kɛ wädiɛn kɛɛl, /kenɛ ruac ɛmɔ lɛ nyɔk kɛ lät jɛ.

¹⁹ Kä cukɛ wä kɛɛl amäni mëë cikɛ coth Beth-lɛ-ɣɛm. Mëë cikɛ cop thi̱n cu wec kɛɛliw ga̱a̱c ɛlɔ̱ŋ, kä cu män rɔ̱ thiec i̱, “Ɛ kuaa jɛn Na-omi ɛnɛ?”

²⁰ Kä cuɛ kɛ loc i̱, “/Cuɔrɛ ɣä cɔl i̱ Na-omi, cɔalɛ ɣä i̱ Mara, kɛ ɣöö ci kuoth in le̱ny buɔ̱mdɛ ti diaal lɔcdɛ kɛ̈c ɛlɔ̱ŋ kɛ ɣä.

²¹ Ɣän ria̱ŋä mëë kacä raar, kä ci Kuoth Nhial ɣä luɔ̱ɔ̱c kɛ te̱tkä. Kua ɣä lɛ ciöl ŋu i̱ Na-omi kä ci Kuoth Nhial ɣä liɛc kɛ waŋ mi jiääk, kä jɛn Kuoth in le̱ny buɔ̱mdɛ ti diaal cɛ ɣä moc kɛ riɛk?”

²² Nɛmɛ ɛ jɛn luny ëë luny kɛ Na-omi jɔk rööl Mo-ab kɛɛl kɛ nyaa Mo-ab mëë mɔ ciek gadɛ. Kä cukɛ cop Beth-lɛ-ɣɛm kɛ jio̱l ŋër lääpä.