Ruëëc 9 - RUAC KUƆTH IN RƐL RƆ

Pek kuäärä Ä-bi-mɛ-lɛk

¹ Täämɛ cu Ä-bi-mɛ-lɛk gat Gi-don wä kä Cɛ-kɛm kä ji̱ maarä man kɛ ji̱ thuɔk duëël cieŋ näridɛ jiök i̱,

² “Latdɛ jɛ ji̱th ji̱ Cɛ-kɛm diaal i̱, ‘Ɛ mi̱th gɔaa ɔ kä yɛ, ɛ ba yɛ ruac ɛ gaat Gi-don ti jiɛn bärɔw, kiɛ ɛ ɣöö ba yɛ ruac ɛ ram kɛl?’ Kä ŋa̱cɛ jɛ bä ɛn ɣöö ɛ ɣän kuɛ̈ɛ̈dun.”

³ Kä cu ji̱ maarä man laat ti ti diaal la̱t ji̱ Cɛ-kɛm diaal kɛ kui̱dɛ. Kä cukɛ jɛ nhɔk ɛn ɣöö ba Ä-bi-mɛ-lɛk guɔ̱ɔ̱r, kɛ ɣöö laar kɛn ɛ i̱, “Ɛ dämaara.”

⁴ Kä cukɛ jɛ moc kɛ yio̱w ti jiɛn bärɔw duëël kuɔth Baal-bɛ-rith tin cu Ä-bi-mɛ-lɛk kɛ ben kɔk ni nɛy tin thil luɔt kä /ci riɛk ala ji̱ kɔaarɛ.

⁵ Kä cuɛ wä dhɔr gua̱n kä Ɔp-ra, kä cuɛ gaat man wä näk gaat Gi-don ti jiɛn bärɔw wi̱i̱ pa̱a̱m kɛl. Duundɛ ɣöö cu Yo-tham gat in tɔtdiɛn kä Gi-don kään kɛ ɣöö cɛ rɔ tɛ̱̈ɛ̱̈.

⁶ Kä cu ji̱ wec diaal kä Cɛ-kɛm rɔ dol, nikɛ ji̱ Beth-mil-lo diaal, cukɛ Ä-bi-mɛ-lɛk wä jak kä kuäär thaar jiaath ëë ci Jɔ-cua päm la̱th thi̱n kä Cɛ-kɛm.

⁷ Kä mëë ca jɛ la̱r Yo-tham, cuɛ wä cuɔ̱ŋ wi̱i̱ pa̱a̱m Gɛ-ri-dhim, cuɛ wiee kɛ jɔw mi di̱i̱t kä cuɛ kɛ jiök i̱, “Yɛn ji̱ Cɛ-kɛm, liɛŋɛ ɣä, dɔŋ bi Kuoth yɛ liŋ.

⁸ Cäŋ kɛl cu jiɛn rɔ dol kɛ ɣöö bikɛ rɔ kuëny kuäär. Kä cukɛ jiath Ɔ-lip jiök i̱, ‘Ruac nɛy.’

⁹ Kä cu jiath Ɔ-lip kɛ jiök i̱, ‘A bä liɛɛthdä ku päl, min la ka̱m kɛ kuth kɛnɛ naath, kɛ ɣöö bä yɛ wä ruac?’

¹⁰ Kä cu jiɛn jiath ŋɔa̱a̱p jiök i̱, ‘Ji̱n bër, ruac nɛy.’

¹¹ Kä cu jiath ŋɔa̱a̱p ɛ loc i̱, ‘A bä ku päl ni gɔɔydä, kɛnɛ liɛm dɛɛnikä, kɛ ɣöö bä ruac ni yɛ?’

¹² Kä cu jiɛn beel jiök i̱, ‘Bër, bër ruac nɛy?’

¹³ Kä cuɛ kɛ loc i̱, ‘A bä ku päl ni kɔaŋdä min la kuth kɛnɛ naath lo̱ckiɛn a jak kä tɛth, kɛ ɣöö bä yɛ wä ruac?’

¹⁴ Kä cu jiɛn diaal rup kuiyni jiök, ‘Bër, bër ruac nɛy?’

¹⁵ Kä cuɛ kɛ loc i̱, ‘Mi lot yɛn ni jɛ kɛ lɔc mi gɔaa a ba̱a̱ kuäär kä yɛ, kä bia lua̱kɛ rɔ ti̱pädä. Kä mi /ciɛ jɛn inɔ, kä ɛ mac bä raar kuiinikä mi bi bua̱w Lɛ-ba-nɔn ben waŋ?’

¹⁶ “Inɔ täämɛ mi cia lät agɔaa kɛ lɔc ŋäthä mi thuɔ̱k kɛ kuënydun kɛ Ä-bi-mɛ-lɛk ala kuäär, kä cia lät agɔaa kɛ ji̱ dhɔaar Gi-don, ce̱tkɛ min dëë lät kä jɛ.

¹⁷ (Kɛ ɣöö ci gua̱a̱r ko̱r tɛr kɛ kui̱dun kä cɛ tëkdɛ thöp, kä cɛ yɛ kän tetni ji̱ Mid-yan.

¹⁸ Kä ɛn walɛ cia rɔ riet dhɔr gua̱a̱r, a cia gaatkɛ näk, gaatkɛ ti jiɛn bärɔw cia kɛ näk pääm kɛl, kä jak yɛn Ä-bi-mɛ-lɛk gat läkä ciek kä kuäär Ji̱ Cɛ-kɛm, kɛ ɣöö marɛ kɛ yɛ.)

¹⁹ Kä ɛn walɛ mi la̱tdɛ agɔaa kɛ lɔc ŋäthä mi thuɔ̱k kɛ Gi-don kɛnɛ dhɔrɛ, a lɔcdun tɛth kɛ Ä-bi-mɛ-lɛk, kä bi lɔcdɛ tɛɛth kɛ yɛ bä.

²⁰ Kä mi /ciɛ jɛn inɔ, a mac bä raar kä Ä-bi-mɛ-lɛk mi bi ji̱ Cɛ-kɛm kɛnɛ ji̱ Beth-mil-lo pɛt, kä a mac bä raar kä ji̱ Cɛ-kɛm kɛnɛ ji̱ Beth-mil-lo, mi bi Ä-bi-mɛ-lɛk pɛt.”

²¹ Cu Yo-tham rɔ bar, kä cuɛ wä cieŋ kä Bɛɛr, kɛ ɣöö dualɛ kɛ däman ni Ä-bi-mɛ-lɛk.

²² Cu Ä-bi-mɛ-lɛk I-thɛ-rɛl ruac kɛ run diɔ̱k.

²³ Kä cu Kuoth mi jiääk la̱th kam Ä-bi-mɛ-lɛk kɛnɛ ji̱ Cɛ-kɛm. Cu ji̱ Cɛ-kɛm lät a jiäk kɛ Ä-bi-mɛ-lɛk.

²⁴ Tuɔɔk nɔmɔ kɛ kui̱ gan Gi-don ti jiɛn bärɔw tëë ca näk, ɛ riɛmdiɛn bä kä Ä-bi-mɛ-lɛk dämandiɛn ëë näk kɛ kɛnɛ ji̱ Cɛ-kɛm tëë cuɔm kɛ jɛ i̱ bɛ gaat man näk.

²⁵ Kä cu ji̱ Cɛ-kɛm Ä-bi-mɛ-lɛk moc kɛ naath ti nyuɔ̱rkɛ jɛ ikä dup wi̱i̱ pa̱a̱m, kä cukɛ nɛy tëë wä kɛ duɔ̱ɔ̱p ɛ mɔ mac. Kä cua la̱r Ä-bi-mɛ-lɛk.

²⁶ Kä cu Gaal gat Ɛ-bɛd ɣo̱th kä Cɛ-kɛm kɛnɛ ji̱ maarädɛ. Kä cua jɛ ŋäth ɛ ji̱ Cɛ-kɛm.

²⁷ Kä cukɛ wä rɛy ka̱a̱kni, wäkɛ ŋɛɛr kɛ bua̱c ti ba ben lät ni kɔaŋ rɛy ka̱a̱kni walkiɛn kɛ kui̱ kɔaŋ, kä cukɛ wä rɛy luaak kuɔthdiɛn, wa cäŋ bälä tim. Cukɛ mi̱th kä cukɛ maath, kä cukɛ Ä-bi-mɛ-lɛk kuëth.

²⁸ Kä cu Gaal Gat Ɛ-bɛd wee, “Ɛŋa ɛn Ä-bi-mɛ-lɛk, kä kɛ kɔn ŋaani kɔn ji̱ Cɛ-kɛm, mɔ dënɛ jɛ lät ikä mɔ? Ciɛ gat Gi-don kɛnɛ Dhɛ-bul bo̱o̱th nɛɛnikɛ, lätdɛ ni ji̱ Ɣä-mor gua̱n Cɛ-kɛm ikä? Ɛŋu mi dënɛ jɛ lätikä kɛ jɛ?

²⁹ Kɛn nɛy ti̱ti̱ mi tekɛ tetädä! Dëë Ä-bi-mɛ-lɛk jak kä ci te thi̱n. Dëë jiök i̱, ‘Cio̱o̱li nɛɛku raar kɛn diaal.’ ”

³⁰ Kä mëë ci Dhɛ-bul kuäär wec ruac Gaal gat Ɛ-bɛd liŋ, cuɛ gaak ɛlɔ̱ŋ.

³¹ Kä cuɛ naath jäk kä Ä-bi-mɛ-lɛk kɛ tɛ̱̈ɛ̱̈ jio̱kɛ jɛ i̱, “Nɛnɛ, Gaal gat Ɛ-bɛd cɛ ben kä Cɛ-kɛm kɛnɛ watkɛ, kä ca wec ben jëc cuɔ̱ŋ kɛ kui̱du.

³² Täämɛ ku wä ɛn wääri, yɛnɛ nɛy tɔ̱ te kɛɛl kɛ ji̱ tɔ̱, wiaa tɔ̱a̱wɛ rɔ rɛy ka̱a̱kni.

³³ Nikɛ runwaŋ ni po̱o̱tdä, kua wec ma̱k. Mi wä Gaal wä ben raar kä yɛ kɛnɛ nɛɛkɛ, la̱tdɛ kɛ kä mɔ dërɛ luäŋ kɛ lätni mɔ.”

³⁴ Cu Ä-bi-mɛ-lɛk kɛnɛ nɛy diaal tin te kɛɛl kɛ jɛ rɔ̱ jiɛc kɛ wäär, cukɛ rɔ̱ wä tɔ̱w gekä Cɛ-kɛm kɛ buɔ̱n da̱ŋ ŋuaan.

³⁵ Kä cu Gaal gat Ɛ-bɛd wä cuɔ̱ŋ raar thok wec. Cu Ä-bi-mɛ-lɛk rɔ jiɛc kɛnɛ nɛɛkɛ guäth in bi̱m kɛ thi̱n.

³⁶ Kä min ci Gaal naath nɛn, cuɛ Dhɛ-bul jiök i̱, “Guicɛ naath a bëë piny ni nhial wi̱i̱ pa̱a̱m!” Kä cu Dhɛ-bul ɛ loc i̱, “Ji̱n guici ni ti̱eep päämni ɛ ji̱n dɔ̱ŋ kɛ naath.”

³⁷ Cu Gaal rɔ nyɔk kɛ ruac wee i̱, “Guicɛ naath bäkɛ piny kueer, kä buɔ̱n in dɔ̱ŋ bëë kɛ duɔ̱ɔ̱p jiaath in la tueth ti̱t thi̱n.”

³⁸ Ɛ jɛn cu Dhɛ-bul ɛ jiök i̱, “Min latdi a nikä täämɛ, ji̱n ram mëë wee, ‘Ɛŋa ɛn Ä-bi-mɛ-lɛk, min dënɛ lätikä?’ /Cikɛ kɛn nɛy tin ci dhɔt i̱? Wër ɛn täämɛ nyieenyni kɛ kɛ.”

³⁹ Cu Gaal wä nyiëëny kɛ Ä-bi-mɛ-lɛk kɛnɛ ji̱ Cɛ-kɛm.

⁴⁰ Kä cu Ä-bi-mɛ-lɛk ɛ joc, cuɛ nɛy ti ŋuan moc kɛ buɔ̱ɔ̱t amäni mëë cikɛ cop thok wec.

⁴¹ Cu Ä-bi-mɛ-lɛk cieŋ kä Thɔr-ma. Kä cu Dhɛ-bul Gaal tuk kɛnɛ watkɛ kä Cɛ-kɛm.

⁴² Kɛ bakdɛ cu naath wä rɛy ka̱a̱kni. Kä cua Ä-bi-mɛ-lɛk la̱r lär.

⁴³ Kä cuɛ nɛɛkɛ ka̱n kä cuɛ kɛ dääk kä bun da̱ŋ diɔ̱k, kä cukɛ wä li̱ep rɛy ka̱a̱kni. Cuɛ guic, kä cuɛ naath nɛn bäkɛ wi̱c, cuɛ jiëc kɛ, kä cuɛ kɛ näk.

⁴⁴ Kä cukɛ kɛ näk i̱ nɛ, cu Ä-bi-mɛ-lɛk kɛnɛ buɔ̱n in tëë thi̱n wä thaar wec, guäth in nyiëëny bun da̱ŋ rɛw kɛ nɛy diaal tin ci rɛy wä ka̱a̱kni kä cukɛ kɛ näk.

⁴⁵ Cu Ä-bi-mɛ-lɛk nyiëëny kɛ wec ɛn cäŋ ëë. Cuɛ wec ka̱n, kä cuɛ ji̱ kɛ diaal tin te thi̱n näk. Cuɛ jɛ däk, kä cuɛ kith kɛ milɛ.

⁴⁶ Kä mëë ci ji̱ thar biikä diaal kä Cɛ-kɛm ɛ liŋ, cukɛ wä rɛy duëli kuɔth El-bɛ-rith tin buɔ̱m buɔ̱ɔ̱m.

⁴⁷ Kä cua Ä-bi-mɛ-lɛk la̱r lär i̱ ji̱ thar biikä Cɛ-kɛm diaal ca rɔ dol guäth kɛl.

⁴⁸ Cu Ä-bi-mɛ-lɛk wä Pääm Dhal-mon, kɛnɛ nɛɛkɛ tin tekɛ jɛ kɛɛl. Ɛn wi̱ni cuɛ jio̱p ka̱n, kä cuɛ jɔp kɛ kar jiath. Kä cuɛ kɛ kap kɛ wuɔ̱ɔ̱kdɛ. Kä cuɛ nɛy tin te kɛɛl kɛ jɛ jiök i̱, “Mi guic yɛn ɛ mi ɛ la̱tdä, kɛ pɛ̈th la̱tdɛ jɛ ce̱tnikɛ min cä la̱t.”

⁴⁹ Inɔ cu ramɔ jiɛn kɛ jɔp, kä cukɛ jɛ guɔ̱ɔ̱r, cukɛ jiɛn la̱th wuɔ̱thni duëli tin buɔ̱m buɔ̱ɔ̱m, kä cukɛ kɛ cua̱th wi̱i̱diɛn, kä cu ji̱ biikä Cɛ-kɛm diaal li̱w, nɛy ti bathdɔɔr, wutni kɛnɛ män.

⁵⁰ Kä cu Ä-bi-mɛ-lɛk wä kä Te-bedh, kä cuɛ pua̱t lotdä Te-bedh, kä cuɛ ka̱n.

⁵¹ Duundɛ ɣöö tëë kɛ biɛɛ mi bum bum ɛn wec, cu ji̱ wec diaal rɔ bar thi̱n, wutni kɛ män, kä cua rɔ ga̱k thi̱n. Cukɛ wä kɛ wä ni wi̱i̱ biikä.

⁵² Kä cu Ä-bi-mɛ-lɛk nyiëëny kɛ ji̱ biikä, cuɛ ben thiekä thuɔk biikä kɛ ɣöö bɛ jɛ waŋ kɛ mac.

⁵³ Kä cuɛ tekɛ ciek mi cu pil yuɔr wi̱i̱ Ä-bi-mɛ-lɛk, kä cuɛ wi̱cdɛ tiath.

⁵⁴ Kä kɛ pɛ̈th cuɛ ŋuɛ̈t in rɔm mutdɛ cɔl, kä cuɛ jɛ jiök i̱, “Käni thɛpdu kä näk ɣä, mäni mi dëë naath wee, ‘Näkɛ ni ciek’ ” Kä cu ŋuɛ̈t ɛ yiɛth ni jicdɛ, kä cuɛ cu li̱w.

⁵⁵ Kä mëë ci ji̱ I-thɛ-rɛl ɛ nɛn i̱ ci Ä-bi-mɛ-lɛk li̱w, cukɛ däk piny cu ramɔ wä dhɔriɛn.

⁵⁶ Inɔ cu Kuoth Ä-bi-mɛ-lɛk cu cuɔ̱l duerɛ mëë näkɛ gaat man ti jiɛn bärɔw.

⁵⁷ Kä cu Kuoth dueer ji̱ Cɛ-kɛm la̱th wi̱i̱diɛn, kä cu lam Yo-tham gat Gi-don ben kä kɛ.