Ruëëc 8 - RUAC KUƆTH IN RƐL RƆ

Thuɔ̱k jucä ji̱ Mid-yan

¹ Kä cu wutni Ɛ-pa-rim Gi-don jiök i̱, “Ɛŋu ɛ nɛ ci lät kä nɛy ɔ, mɔ /keni nɛy cɔl ɔ mëë wi̱i̱ nyiëëny kɛ ji̱ Mid-yan?” Kä cukɛ gaak kɛ jɛ ɛlɔ̱ŋ.

² Kä cuɛ kɛ loc i̱, “Ɛŋu mi cä la̱t mi cäät kɔn ni rɔ? A /ci ku di̱t ni min cia la̱t yɛn ji̱ Ɛ-pa-rim, kä min ca la̱t ɛ ji̱ Ä-bi-ɛ-dhɛr?

³ Ci Kuoth yɛ ka̱m bööth ji̱ Mid-yan, Ɔ-rɛb kɛnɛ Dheeb. Ɛŋu mi cä la̱t mi päär kɔn ni rɔ?” Ɛn wa̱nɔ cu kɛ̈cdiɛn wä piny kɛ jɛ, mëë cɛ nɔmɔ lat.

⁴ Kä mëë ci Gi-don ben wi̱c yiëër Jɔr-dɛn kɛnɛ nɛɛkɛ ti kur diɔ̱k, kä cukɛ jiɛth kui̱c ala nɛy ti ci cuuc, kä ŋotkɛ guur kɛn kɛ.

⁵ Kä cuɛ ji̱ Cu-koth jiök i̱, “Moc nɛy ti jäl kɛ ɣä ti mi̱eth. Cikɛ cuuc, kä ɣän guɔ̱ɔ̱rä Dhɛ-bɛ̈ kɛnɛ Dhal-mu-na, kua̱r ji̱ Mid-yan.”

⁶ Kä cu bööth Cu-koth wee, “Ɛn Dhɛ-bɛ̈ kɛnɛ Dhal-mu-na cikɛ käp kɛ ɣöö dëë kɔ nɛɛku kulɛ moc kɛ mi̱eth?”

⁷ Kä cu Gi-don wee, “Ɛ jɛn mi wä Kuoth Nhial kɛ ka̱mä, bä yɛ duäc nikɛ kuiy dɔaar.”

⁸ Kä cuɛ jiɛɛn ɛn wa̱nɔ cuɛ wä kä Pɛ-nu-el, kä cuɛ ruac kɛ kɛ bä. Kä cu ji̱ Pɛ-nu-el jɛ loc ce̱tnikɛ luc ji̱ Cu-koth ëë ca loc ni jɛ.

⁹ Kä cuɛ ji̱ Pɛ-nu-el jiök i̱, “Mi wa̱a̱ luny jɔk kɛ mal, bä biɛɛ ɛ mi ben da̱k piny.”

¹⁰ Täämɛ te Dhɛ-bɛ̈ kɛnɛ Dhal-mu-na kä Kar-kor kɛɛl kɛ rɛmdiɛn, nɛy ti bathdɔɔri wäl dhieec, kɛnɛ tëë diaal tëë doth kä nɛy diaal tëë cieŋ kui̱ känyä ca̱ŋ. Kä ca nɛy ti bathdɔɔri ti kuɔ̱r kɛl wi̱cdɛ jiɛn da̱ŋ rɛw näk thi̱n.

¹¹ Cu Gi-don wä kɛ duɔ̱ɔ̱p nɛɛni tin ciaŋkɛ ni kɛmɛni kui̱ käny ca̱ŋ kä No-bɛ̈k kɛnɛ Yɔg-baa, cukɛ rɛm ma̱k kɛ duɔ̱ɔ̱p ɛmɔ. Kɛ ɣöö /ci kɛn ɛ ŋäc i̱ bakɛ ma̱k.

¹² Kä cu Dhɛ-bɛ̈ kɛnɛ Dhal-mu-na rɔ bar. Kä cuɛ kɛ guɔ̱ɔ̱r kä cuɛ kɛn kua̱r ji̱ Mid-yan da̱ŋ rɛw käp Dhɛ-bɛ̈ kɛnɛ Dhal-mu-na, kä cuɛ rɛm jak kä dual.

¹³ Ɛ jɛn cu Gi-don gat Yo-ac rɔ ku ri̱t ko̱o̱r bëë kɛ duɔ̱ɔ̱p Ɣɛ-rɛth.

¹⁴ Kä cuɛ ŋuɛ̈t ji̱ Cu-koth käp, kä cuɛ jɛ thiec. Cuɛ Gi-don gɔ̱a̱r ciööt bööthni kɛnɛ di̱t ji̱ Cu-koth, nɛy ti jiɛn bärɔw wi̱cdɛ nɛɛ bärɔw.

¹⁵ Kä cu Gi-don ben kä ji̱ Cu-koth, kä cuɛ kɛ jiök i̱, “Nɛ̈nɛ jɛ Dhɛ-bɛ̈ kɛnɛ Dhal-mu-na ti̱n, tëë jio̱k yɛn ɣä kɛ kɛ i̱, ‘Dhɛ-bɛ̈ kɛnɛ Dhal-mu-na akɛ ji̱, kɛ ɣöö dëë kɔ nɛɛku tin ci cuuc ku lɛ moc kɛ mi̱eth?’ ”

¹⁶ Cuɛ di̱t wec ka̱n, kä cuɛ kuiy dɔaar ka̱n kä cuɛ ji̱ Cu-koth nyuɔ̱th thok kɛ duäcdɛ kɛ kɛ kɛ kuiy dɔaar.

¹⁷ Kä cuɛ biɛɛ ji̱ Pɛ-nu-el däk, kä cuɛ ji̱ wec näk.

¹⁸ Ɛ jɛn cu Gi-don Dhɛ-bɛ̈ kɛnɛ Dhal-mu-na jiök i̱, “Te nɛy tëë cia näk kä Ta-bor i̱di?” Kä cukɛ jɛ loc i̱, “Kɛ nɛy ti cäät kɛ ji̱, kä kɛn diaal ce̱tkɛ kɛ gaat kua̱r.”

¹⁹ Kä cu Gi-don wee, “Kɛn gaat maar, gaat maar pa̱ny. Ce̱tnikɛ ciöt Kuɔth Nhial, mi cia kɛ päl a tëk, /cä yɛ dëë näk.”

²⁰ Kä cuɛ gatdɛ min di̱i̱t ni Yɛ-thɛr jiök i̱, “Wër, näk kɛ.” Duundɛ ɣöö /ken Yɛ-thɛr thɛpdɛ ka̱n a näkɛ kɛ. Cuɛ dual, kɛ ɣöö ŋotdɛ ɛ dhɔl mi tɔt.

²¹ Ɛ jɛn cu Dhɛ-bɛ̈ kɛnɛ Dhal-mu-na ku wee, “Jiɛc rɔ puɔ̱nydu, näk nɛy. Kɛ ɣöö la wut a näk wut mi ce̱tkɛ jɛ.” Cu Gi-don rɔ jiɛc kä cuɛ kɛ näk. Kä cuɛ la̱a̱kni tin te ŋua̱kni thɔ̱a̱rɔa̱a̱likiɛn ka̱n.

²² Kä cu ji̱ I-thɛ-rɛl Gi-don jiök i̱, “Ruac nɛy, yɛnɛ gaatku amäni gaat döödu. Kɛ ɣöö ci nɛy kän tetni ji̱ Mid-yan.”

²³ Kä cu Gi-don kɛ loc i̱, /“Cä yɛ bi ruac kɔnɛ gaatkä. Ɛ Kuoth Nhial bi yɛ ruac ɔ.”

²⁴ Kä cuɛ kɛ nyɔk kɛ jio̱k i̱, “A yɛ thiëcä. Ɛ ram ɔ kä yɛ kämä pɛ̈ɛ̈c warkëtnikɛ.” (Kɛ ɣöö kɛn ji̱ Mid-yan tekɛ kɛ warkëtni da̱a̱pni, kɛ ɣöö kɛ ji̱ I-ca-mel.)

²⁵ Kä cu ji̱ I-thɛ-rɛl jɛ loc i̱, “Ba̱kɔ kɛ ka̱m ji̱.” Kä cukɛ bi̱i̱ pap piny, kä cu ram ɔ pɛ̈ɛ̈c warkëtnikɛ la̱th thi̱n.

²⁶ Kä cu pek dääpä mëë cɛ thiec kɛɛliw a bathdɔɔr kɛl wi̱cdɛ kur bärɔw kä da̱a̱p, a /ci tak ŋua̱kni kɛnɛ bieyni kua̱r Mid-yan te thi̱n, kɛnɛ läk ŋua̱kni thɔ̱a̱rɔa̱a̱likiɛn.

²⁷ Cu Gi-don puɔ̱ny täth kɛ da̱a̱p kä cuɛ jɛ la̱th rɛy wecdɛ, kä Ɔp-ra. Kä cu ji̱ I-thɛ-rɛl diaal ɛ pal ɛn wi̱ni, cuɛ cua̱ min buɔth Gi-don kɛnɛ dhɔɔrɛ dui̱rä.

²⁸ Inɔ cua ji̱ Mid-yan cu puɔ̱t ɛ ji̱ I-thɛ-rɛl, ka̱n wuɔ̱thkiɛn lɛ nyɔk kɛ kap nhial. Cu piny tekɛ mal kɛ run ti jiɛn ŋuaan tetdä Gi-don.

Lia̱a̱ Gi-don

²⁹ Cu Gi-don gat Yo-ac wä ciɛŋ ni dhɔrɛ.

³⁰ Täämɛ te Gi-don kɛ gaat ti jiɛn bärɔw, gaatkɛ pa̱ny, kɛ ɣöö tëë kɛ män ti ŋuan.

³¹ Kä cu luɔmdɛ min cieŋ kä Cɛ-kɛm jɛ da̱p gat mi dho̱o̱l, kä cuɛ ciötdɛ cɔli Ä-bi-mɛ-lɛk.

³² Cu Gi-don gat Yo-ac li̱w kɛ run ti ci lɔcdɛ ro̱ŋ, kä cua jɛ kony kɔ̱k gua̱n ni Yo-ac, kä Ɔp-ra muun ji̱ Ä-bi-ɛ-dhɛr.

³³ Kä mëë ci Gi-don li̱w, cu ji̱ I-thɛ-rɛl rɔ ri̱t, palkɛ ni kuoth Baal, cukɛ kuoth Baal-bɛ-rith pal ala kuothdiɛn.

³⁴ Kä /ken ji̱ I-thɛ-rɛl Kuoth Nhial Kuothdiɛn tim, mëë kään kɛ tetni ji̱ tɛ̈riɛn kui̱ni diaal.

³⁵ Kä /ka̱n mi gɔaa nyuɔ̱th ji̱ dhɔaar Gi-don kɛ mëë gɔaa ëë cɛ lät kä ji̱ I-thɛ-rɛl.