Ruëëc 6 - RUAC KUƆTH IN RƐL RƆ

Gi-don

¹ Ɛ jɛn cu ji̱ I-thɛ-rɛl mi jiäk nyɔk kɛ lätni nhiam Kuɔth Nhial. Kä cu Kuoth Nhial kɛ la̱th tetni ji̱ Mid-yan kɛ run bärɔw.

² Kä cua ji̱ I-thɛ-rɛl tiam ɛ kɛn. Kä kɛ kui̱diɛn cu ji̱ I-thɛ-rɛl rɔ wä tɔ̱w ni rɛy päämni, kɛnɛ rɛy kɔ̱a̱kni pa̱a̱m kɛ wi̱i̱ tin buɔ̱m buɔ̱ɔ̱m.

³ Kä niɛ mɔ ci ji̱ I-thɛ-rɛl ka̱a̱kiɛn pithɔ, la ji̱ Mid-yan kɛnɛ ji̱ Ä-ma-lek kɛ nɛy tin ciaŋkɛ ni kui̱ käny ca̱ŋ kɛ cua̱ mäk.

⁴ Bikɛ cu pua̱t mundiɛn kä ba bɛlkiɛn cu ya̱r a räth ni gua̱a̱th ɛ wä kä Gadha. Thilɛ mi la ba̱nykɛ ji̱ I-thɛ-rɛl, cäŋɛ ni dɛl kiɛ yaŋ kiɛ muul.

⁵ Kɛ ɣöö la ɣo̱nhkɛ kɛ ɣɔ̱ɔ̱kiɛn kɛɛl, la cäänɛ kɛ ce̱tnikɛ kɔryɔm mi thil pek. Kɛn kɛ thɔ̱a̱rɔa̱a̱likiɛn kɛɛl, la kɛ mun cua̱ ya̱r nikɛ cuɔ̱pdiɛn thi̱n.

⁶ Cu ji̱ I-thɛ-rɛl can kɛ kui̱ ji̱ Mid-yan. Kä cu ji̱ I-thɛ-rɛl wiee nhiam Kuɔth Nhial görkɛ luäk.

⁷ Mëë ci ji̱ I-thɛ-rɛl wiee nhiam Kuɔth Nhial kɛ kui̱ ji̱ Mid-yan,

⁸ cu Kuoth Nhial gök Kuɔth jäk kä ji̱ I-thɛ-rɛl, jio̱k ɛ kɛ i̱, “Nɛmɛ ɛ min laar Kuoth Nhial ɛ, Kuoth I-thɛ-rɛl. Ɣän cä yɛ ka̱m raar kä I-jëp, cä yɛ ka̱m raar duëël yieenä.

⁹ Kä cä yɛ kän tetni ji̱ I-jëp, kɛ nɛy diaal tëë ca yɛ ciɛŋ a jiäk, kä cua̱ kɛ juɔc raar nhiamdun kä cua̱ yɛ ka̱m mundiɛn.

¹⁰ Kä cua̱ yɛ jiök i̱, ‘Ɛ ɣän Kuoth Nhial Kuothdun. Kä /cia kuth ji̱ Ɛ-mor tin bia mundiɛn wä ciɛŋ bi pal.’ Kä /ken yɛn ruacdä liŋ.”

¹¹ Ɛ jɛn cu jääk Kuɔth Nhial ben nyuur thaar jiaath kä Ɔp-ra, min mɔ jiath Yo-ac raan Ä-bi-ɛ-dhɛr, guäth in kɔ̱ɔ̱m gatdɛ ni Gi-don bɛl guäth in la dhiɛmkɛ kɔaŋ thi̱n kɛ ɣöö /ci ji̱ Mid-yan kɛ bi lɛ nɛn.

¹² Kä cu jääk Kuɔth Nhial ben kä jɛ, kä cuɛ jɛ jiök i̱, “Kuoth Nhial akɛ ji̱ kɛɛl, ji̱n wut ko̱o̱r mi bum.”

¹³ Kä cu Gi-don ɛ jiök i̱, “Kuäär, mi te Kuoth Nhial kɛ nɛy kɛɛl, ɛŋu cuɛ ti̱ti̱ diaal jak kä bä kä nɛy ɔ? Kɛn ku la ni kɛn nyinkɛ diaal tin ga̱ykɛ naath tëë ca la̱tkɔ ɛ gua̱a̱ri i̱, /‘Ciɛ Kuoth Nhial ɛn nëë käm nɛy raar kä I-jëp?’ Kä täämɛ, /ciɛ Kuoth Nhial ci nɛy lo̱k ɛ, a cɛ nɛy cu ka̱m ni ji̱ Mid-yan.”

¹⁴ Kä cu Kuoth Nhial ɛ liɛc, kä cuɛ jiök i̱, “Wër kɛ jɛn buɔ̱mdu ɛmɔ bi ji̱ I-thɛ-rɛl wä luäk tetni ji̱ Mid-yan /ciɛ ɣän jäk ji̱ mɔ?”

¹⁵ Kä cuɛ wee, “Aɣ Kuäär, dëë ji̱ I-thɛ-rɛl luäk i̱ di? Nɛn ɛ dhɔra thilɛ jɛ lua̱ŋ thok duëël Ma-na-thɛ, kä kuiy ni ɣän dhɔr gua̱a̱r.”

¹⁶ Kä cu Kuoth Nhial ɛ jiök i̱, “Ɣän bä te kɛɛl kɛ ji̱, bi ji̱ Mid-yan duäc ce̱tnikɛ wut kɛl.”

¹⁷ Kä cu Gi-don ɛ loc i̱, “Ɛn täämɛ mi ci ɣä nɛn i̱ ro̱ŋä waaŋdu, kä ku ɣä nyuɔ̱th nyuuth mi bä ŋäc ni jɛ ɛn ɣöö ɛ ji̱n ruac kɛ ɣä mɔ.

¹⁸ Cu jiɛy ɛn wa̱nɛ, kua̱ läŋ ni ji̱, amäni mi wa̱a̱ mucdä nööŋ, mi bä ben ka̱m ji̱.” Kä cu Kuoth Nhial ɛ jiök i̱, “Bä tëë wa̱nɛ amäni mi ci luny jɔk.”

¹⁹ Ɛ jɛn cu Gi-don wä dhɔrɛ kä cuɛ dɔdɛ̈ɛ̈l wä rialikä, kɛnɛ jurayni ti ŋuan ti thil thuɔp. Cuɛ ri̱ŋ la̱th rɛy diëny kɛnɛ cuɛy ti te rɛy cukä, kä cuɛ kɛ nöŋ jɛ thaar jiaath, kä cuɛ kɛ ka̱m jɛ.

²⁰ Kä cu jääk Kuɔth ɛ jiök i̱, “Käni ri̱ŋ kɛnɛ jurayni tin thil thuɔp, kä läthnikɛ wi̱i̱ pa̱a̱m ɛ mi, kä wocni cuɛy wi̱i̱diɛn.” Kä cuɛ jɛ la̱t inɔ.

²¹ Ɛ jɛn cu jääk Kuɔth Nhial ri̱ŋ kɛnɛ jurayni tin thil thuɔp nyɔt kɛ kɛɛt in te tetädɛ. Cu mac dɔap kä päm, kä cuɛ ri̱ŋ kɛnɛ jurayni pɛt. Kä cu jääk Kuɔth Nhial rɔ pär kɛ bath nhiamdɛ.

²² Kä min ci Gi-don ɛ ŋa̱c ɛn ɣöö ɛ jääk Kuɔth Nhial. Cuɛ wee, “Aɣ Kuäär ni Kuoth! Ɛn täämɛ ɣän cä jääk Kuɔth Nhial nɛn ni waŋdä.”

²³ Duundɛ ɣöö cu Kuoth Nhial ɛ jiök i̱, “Ɛ mal tekɛ ji̱. Cu dual, kɛ ɣöö /ci bi li̱w.”

²⁴ Kä cu Gi-don Kuoth Nhial ta̱th yi̱k ɛn wa̱nɛ mɔ, kä cuɛ jɛ cɔl i̱, Kuoth Nhial ɛ mal. Amäni täämɛ jɛn a thi̱n kä Ɔp-ra, wec ji̱ Ä-bi-ɛ-dhɛr.

²⁵ Kɛ wäär ɛ mɔ, cu Kuoth Nhial ɛ jiök i̱, “Käni thäk guur, thäk in gɔaa ni jɛn, min te run bärɔw, kä däk yi̱k kuɔth Baal min tekɛ guur, kä jɔpni puɔ̱ny kuɔth Ä-ce-ra in te gekädɛ piny bä.

²⁶ Kä lätni Kuoth Nhial Kuothdu kä yi̱k ɛn wi̱i̱ päämni ti̱ti̱, nikɛ pääm ti ca rɔ car ti. Kä käni thäk näkɛ ala muc mi waŋkɛ kä waŋɛ kɛ jiɛn pua̱a̱ny kuɔth Ä-ce-ra in bi jɔap piny.”

²⁷ Ɛ jɛn cu Gi-don wutni da̱ŋ wäl ka̱n kä kuaanykɛ, kä cuɛ jɛ la̱t ce̱tnikɛ min ci Kuoth Nhial ɛ la̱r jɛ. Kä kɛ ɣöö dualɛ ɛlɔ̱ŋ kɛ ji̱ dhɔaariɛn kɛnɛ ji̱ wec mi cɛ jɛ la̱t kɛ cäŋdäär, cuɛ jɛ la̱t kɛ wäär.

²⁸ Kä nɛnɛ, mëë ci ji̱ wec keer kɛ runwaŋ cua yi̱k kuɔth Baal kɛnɛ puɔ̱ny kuɔth Ä-ce-ra in te gekädɛ, jek ca kɛ da̱k piny, kä ca thäk in gɔaa ni jɛn näk ala muc wi̱i̱ yi̱kä min ca täth.

²⁹ Kä cukɛ rɔ thiëc kamnikiɛn kä rɔ̱ wä kɛ i̱, “Ɛŋa mi lät nɛmɛ?” Kä mëë cikɛ jɛ go̱r thiëckɛ jɛ, cukɛ wee, “Ɛ Gi-don gat Yo-ac lät ɛn nɛmɛ ɔ.”

³⁰ Ɛ jɛn cu wutni wec Yo-ac jiök i̱, “No̱o̱ŋi gatdu raar kɛ ɣöö ba näk, jɛn cɛ yi̱k kuɔth Baal da̱k piny, kä cɛ puɔ̱ny kuoth Ä-ce-ra jɔap piny bä min te gekä kuɔth Baal.”

³¹ Kä cu Yo-ac nɛy diaal tin ci kɛ̈c kɛ jɛ loc i̱, “A ku yɛn ɣɔr ni kuoth Baal? Kiɛ gaŋɛ ni jɛ? Kä ramɔ gaŋ ni jɛ mɔ ba jɛ näk kɛ runwaŋ. Mi ɛ kuoth a rɔ gaŋɛ, kɛ ɣöö ca yi̱kdɛ da̱k piny.”

³² Kä cua Gi-don cɔl niɛ cäŋ ɛmɔ i̱ Yɛ-rub-baal, min lot ni ɣöö “Ɛ Baal gaŋ rɔɔdɛ?” Kɛ ɣöö ca yi̱kdɛ da̱k piny.

³³ Ɛ jɛn cu ji̱ Mid-yan kɛ ji̱ Ä-ma-lek kɛ nɛy tin cieŋ kui̱ känyä ca̱ŋ rɔ mat kɛɛl, cukɛ jiɛth kui̱ yiëër Jɔr-dɛn kä cukɛ pua̱t lo̱o̱lä Yidh-rɛɛl.

³⁴ Ɛni ɣöö cu yiëë Kuɔth Nhial te rɛy Gi-don. Kä cuɛ kaaŋ koth, kä cuɛ thok duëël Ä-bi-ɛ-dhɛr cɔl i̱ ba guɔ̱ɔ̱r.

³⁵ Cuɛ naath jäk kä rɛy cieŋ Ma-na-thɛ kɛɛliw cɔɔlɛ kɛ i̱ guɔ̱ɔ̱rɛ ɣä, kä cuɛ naath jäk kä A-cɛr, kɛ Dhɛ-bu-lun, kɛ Nap-ta-li. Cukɛ wä röm kɛ kɛ.

³⁶ Kä cu Gi-don Kuoth jiök i̱, “Mi bi ji̱ I-thɛ-rɛl kän kɛ tetdä, ce̱tkɛ min ci lar,

³⁷ nɛnɛ, ɣän bä miem deet la̱th piny guäth in la bɛl a kɔ̱a̱mkɛ thi̱n. Mi wä thec te kä miem kä rɔ, a kööt piny kɛɛliw, bä ŋa̱c ɛn ɣöö bi ji̱ I-thɛ-rɛl kän kɛ tetdä, ce̱tkɛ min ci lar.”

³⁸ Kä cuɛ cua̱ jɛn. Kä mëë cɛ keer mëë ruɔ̱n kɛ runwaŋ, cuɛ miem jek cikɛ nok kɛ thec, mëë cɛ kɛ nhiac, cu tuɔ̱k thia̱ŋ kɛ pikiɛn.

³⁹ Kä cu Gi-don Kuoth lɛni jiök i̱, “Cu gak kɛ ɣä. Ɛ ji̱ kua̱ thiec kɛ thiec kɛl kä rɔa. La̱ŋä ni ji̱, ku ɣä nhök ɣɔ̱n miemni ɛ mi, deri miem ti̱ti̱ jak kä kööt, kä dëë piny kɛɛliw tekɛ thec.”

⁴⁰ Kä cu Kuoth ɛ la̱t inɔ kɛn wäär ɛmɔ. Cu miem kööt kä rɔa, kä cu thec te wi̱i̱ muɔ̱ɔ̱n kɛɛliw.