Ruëëc 5 - RUAC KUƆTH IN RƐL RƆ

Dit Dɛ-bo-ra kɛnɛ Ba-rak

¹ Nɛmɛ ɛ dit ëë cua kɛt ɛ Dɛ-bo-ra kɛnɛ Ba-rak gat Ä-bi-no-am ɛn cäŋ ëë.

² “Liakɛ Kuoth Nhial kɛ ɣöö ci bööth I-thɛ-rɛl rɔ rialikä kɛ ko̱r, kä ci naath kɛ guɔ̱ɔ̱r!

³ “Liɛŋɛ jɛ lö kua̱r. Tiɛtdɛ jɛ lö ruëëc. Ɣän bä puany ni Kuoth Nhial, ɣän bä Kuoth I-thɛ-rɛl, pua̱t ni thom.

⁴ “Kä kɛ bendu Kuoth Nhial rööl päämni Ɛ-dɔm, nikɛ jiɛɛndu ni ro̱o̱l Ɛ-dɔm. Cuɛ piny lath, cu nhiaal dɛ̈m nhial. Ɛ puc cu pua̱a̱r dɛ̈m kɛ nhiaal.

⁵ Kä cuɛ pääm lath nhiam Kuɔth Nhial, ɛn wi̱ni kä Thi-nay nhiam Kuɔth Nhial, Kuoth I-thɛ-rɛl.

⁶ “Kɛ ni̱n Cam-gar gat Ä-naath, kɛnɛ ni̱n Ya-el, cu naath dual kɛ ja̱l duɔ̱pni cu ja̱a̱l ja̱l nikɛ gëëk duɔ̱pni.

⁷ Cu tëk jiääk rɛy cieeŋni a bɛ jiääk, amäni mëë ci rɔ jiɛc, ji̱n Dɛ-bo-ra. Curi rɔ jiɛc ala man ji̱ I-thɛ-rɛl.

⁸ Mɔ cikɛ rɔ moc kuth ti pay jëk ɔ, la wec ɛ tekɛ ko̱r. Cia mut kiɛ ko̱t me̱t nɛn rɛy ji̱ I-thɛ-rɛl, ti bathdɔɔri ti jiɛn ŋuaan?

⁹ Liakɛ Kuoth Nhial, kɛ ɣöö tɛth lɔcdä kɛ ruëëc I-thɛ-rɛl kɛnɛ nɛy tin cikɛ guɔ̱ɔ̱r.

¹⁰ “Puanyɛ jɛ, yɛn tin kɔat kɛ muɔ̱li ti bo̱o̱r, yɛn, tin nyuur kɛ ti gɔw, kɛ yɛn tin jäl duɔ̱pni.

¹¹ Liɛŋɛ jɔw nɛɛni tin ca rɔ̱ ma̱a̱t wuɔ̱thni puɔ̱li, lat kɛn ni cuŋ Kuɔth Nhial, cuŋ bööthnikɛ kä I-thɛ-rɛl. “Kä cu nɛɛ Kuɔth Nhial ben guäth luɔ̱k.

¹² “Jiɛc rɔ, jiɛc rɔ Dɛ-bo-ra! Jiɛc rɔ jiɛc rɔ, kä bër kit dit! Kä jiɛc rɔ Ba-rak, bër naŋ pɛ̈ɛ̈cku, lö gat Ä-bi-no-am.

¹³ Kä cu böth nath wä ko̱o̱r. Cu Kuoth Nhial wä ko̱o̱r kɛɛl kɛ rɛm I-thɛ-rɛl.

¹⁴ Bäkɛ kä Ɛ-pa-rim kɛn nɛy tëë ciaŋkɛ mun ji̱ Ä-ma-lek, kä cu Ben-ya-min jɛ guɔ̱ɔ̱r kɛ rɛmdɛ, kä cu ruëëc ben kä Ma-kir kä Dhɛ-bu-lun cu bööth ben thi̱n.

¹⁵ Kä cu kua̱r Yi-tha-kar te kɛɛl kɛ Dɛ-bo-ra, kä cu Yi-tha-kar te kɛɛl kɛ Ba-rak. Kä cukɛ wä kɔɔr rɛy lo̱o̱lä. Kä duundɛ ɣöö cu kar Rɛ-u-ben ga̱a̱r kɛ wä ko̱o̱r.

¹⁶ Ɛŋu cia duɔth gɛ̈wni mɔ a liɛŋɛ ni ruaacni yiëëni deet ɔ? Ɛ thuɔ̱k ci kar Rɛ-u-ben ga̱a̱r kɛ wä ko̱o̱r.

¹⁷ Ciɛŋ Gil-yad ni kui̱ yiëër Jɔr-dɛn. Kä Daan, ɛŋu cuɛ ciɛŋ ni gua̱th känä mɔ? Kä A-cɛr cɛ ŋot ciɛŋɛ ni thok baar, cɛ cu ciɛŋ ni bap yiëër.

¹⁸ Kä ji̱ Dhɛ-bu-lun /kenkɛ dual kɛ lia̱a̱. Kä ji̱ Nap-ta-li cikɛ wä ko̱o̱r, a thil dual.

¹⁹ “Ci kua̱r ben, kä cikɛ nyiëëny. Kɛn kua̱r Kɛ-naan cikɛ nyiëëny, gaŋkɛ wi̱i̱ Ta-nak kɛnɛ waŋ Mɛ-gi-do, ɛni ɣöö cuɛ kulɛ thil pɛ̈ɛ̈c ti cua naŋ ɛ kɛn.

²⁰ Kä cu Kuoth nhiaal jak kä dɛm, nyieenyɛ kɛ Ci-cɛ-ra.

²¹ Kä cua kɛ cu lɔk ɛ löny tɔ̱ɔ̱rä Ki-con, kuanɛ wä thi̱n kɛ buɔ̱m!

²² “Kä cu thurbiɛɛli kööriɛn cuit, kä cu jio̱o̱k tuɔ̱ruɔ̱k rɔ̱ bar dɔɔr.

²³ “Kuëth akɛ Me-rodh, laarɛ jääk Kuɔth Nhial, kuëth akɛ ji̱ kɛ, kɛ ɣöö /ka̱n Kuoth Nhial ben luäk, dëë Kuoth Nhial ben luäk kɛ buɔ̱m.

²⁴ “Thilɛ män ti tekɛ puɔ̱th ce̱tkɛ Ya-el, ciek Ɣɛ-bɛr raan Kɛɛn, min ca poth ni jɛ kä män kɛmɛni.

²⁵ Min ca thiec ni pi̱ kä cuɛ thöp ni cak, kɛ tuɔ̱k nɛɛni tin gɔw cuɛ moc cak ti ruɔ̱t.

²⁶ Jɛn min cu tetdɛ la̱th lo̱o̱c kɛmɛkä, kä te puɔ̱ɔ̱t tetdä cuëëcdɛ. Kä cuɛ wi̱c Ci-cɛ-ra riac, cuɛ jɛ näk kɛ puɔ̱t löc raŋädɛ.

²⁷ Cɛ tɛɛth, a cɛ rɔ can, kam ciöknikɛ tëë tɔ̱ɔ̱cä. Ni kam ciöknikɛ cɛ tɛɛth, a cɛ rɔ riny. Ɛ winith cɛ tɛɛth thi̱n ɔ, cɛ li̱w winɛ mi.

²⁸ “Kä kɛ wernyin cu man Ci-cɛ-ra lët ruacɛ i̱, ‘Ɛŋu mi ci thurbilɛ jääny jɔ̱ɔ̱r i̱ nɛ mi? Ɛŋu ci thurbiɛɛlikɛ ja̱l a määth ɔ?’

²⁹ Kä cua jɛ loc ɛ män ti ŋa̱ckɛ ŋɔak ti mäthnikɛ, kä cuɛ ŋot kɛ mi latdɛ jɛ,

³⁰ ‘Ɛn duɔ̱ɔ̱r /ken kɛn kuak ti pɛ̈ckɛ kä dëë da̱a̱k ku jëk? Nyal kiɛ nyi̱er da̱ŋ rɛw kä ramɔ, kiɛ bi̱i̱ biɛɛli mi gɔaa kɛ kui̱ Ci-cɛ-ra, kiɛ bi̱i̱ mi ca dir, bi̱i̱ biɛɛli mi ca dir kä rɛɛw ti pɛ̈ɛ̈c kɛ kui̱ ŋua̱kni nyieet?’

³¹ “Inɔ bi ji̱ tɛ̈ru diaal li̱w, lö Kuoth Nhial! Kä a mäthniku bum ce̱tnikɛ cäŋ min lɛpɛ.” Kä cu mun tekɛ mal kɛ run ti jiɛn ŋuaan.