Ruëëc 21 - RUAC KUƆTH IN RƐL RƆ

Män kɛ kui̱ ji̱ Ben-ya-min

¹ Täämɛ ji̱ I-thɛ-rɛl ca rɔ yac kä Midh-pa, “Thilɛ raan kä kɔn mi bi nyaadɛ jak kä kuɛnkɛ ɛ ji̱ Ben-ya-min.”

² Ɛ jɛn cukɛ ben kä Beth-ɛl, cukɛ nyuur thi̱n nhiam Kuɔth amäni thiaŋ, kä cukɛ wiee ɛlɔ̱ŋ.

³ Kä cukɛ wee, “Aɣ Kuoth Nhial Kuoth ji̱ I-thɛ-rɛl, ɛŋu cu nɛmɛ tuɔɔkɔ kä I-thɛ-rɛl, a bi thok duëël kɛl thil rɛy ji̱ I-thɛ-rɛl ɔ?”

⁴ Mëë ruɔ̱ndɛ cukɛ rɔ jiɛc kɛ runwaŋ, kä cukɛ yi̱k täth ɛn wa̱nɔ, kä cukɛ muc in la waŋkɛ kɛnɛ muc malä thöp.

⁵ Kä cukɛ wee, “Ɛ thok duëël lith kä thuk duëli ji̱ I-thɛ-rɛl diaal /ken ben dolä Kuɔth Nhial ɔ?” Kɛ ɣöö cikɛ ya̱c ɛlɔ̱ŋ kɛ kui̱ raam in /ken ben nhiam Kuɔth Nhial kä Midh-pa i̱, “Ba jɛ näk.”

⁶ Kä cu ji̱ I-thɛ-rɛl dämandiɛn ni Ben-ya-min par, wäkɛ i̱, “Ɛn walɛ ci thok duëël kɛl bath kä thuk duëli I-thɛ-rɛl.

⁷ Banɛ nɛy tin ci duɔth ku lɛ jek män nikä, kä canɛ rɔ yac nhiam Kuɔth Nhial i̱, /canɛ kɛ bi ka̱m nyieekɔn ala män kä kɛ?”

⁸ Kä cukɛ wee, “Ɛ thok duëël in mi̱th kä I-thɛ-rɛl /ken ben ɔ nhiam Kuoth Nhial kä Midh-pa?” Cukɛ jɛ jek i̱ thilɛ ram kɛl mi ci ben dolä, kä Ya-bec-gil-yad.

⁹ Mëë kuanykɛ naath, cuɛ thil raan kä ji̱ Ya-bec-gil-yad mi te thi̱n.

¹⁰ Kä cu duɔl nɛy ti bathdɔɔri wäl rɛw ti ji̱ ko̱o̱r ja̱k, la̱rkɛ jɛ kɛ i̱, “Wiaa na̱kɛ ji̱ Ya-bec-gil-yad. Amäni män kɛnɛ gaat.

¹¹ Kä nɛmɛ ɛ jɛn min bia la̱t. Bia wutni diaal kɛ män diaal tin la män näk.”

¹² Kä cukɛ nyi̱er ti ŋuɛ̈tni ti kur ŋuaan jek rɛy ji̱ Ya-bec-gil-yad ti /ken me̱t tɔ̱ɔ̱c kɛ wut. Kä cukɛ kɛ nööŋ wi̱c in te kä Cilo min te muun Kɛ-naan.

¹³ Kä cu duɔl kɛɛliw ruac jäk kä ji̱ Ben-ya-min tin te pääm Ri-mon, lät kɛn kɛ kä mal.

¹⁴ Cu ji̱ Ben-ya-min luny jɔk ɛn guäth ɛmɔ, kä cu ji̱ I-thɛ-rɛl kɛ ka̱m nyi̱er tëë ci kɛn kɛ päl a tëk kä män ji̱ Ya-bec-gil-yad. Duundɛ ɣöö /ken kɛ ro̱ŋ.

¹⁵ Cu naath tekɛ pa̱r kɛ kui̱ ji̱ Ben-ya-min. Kɛ ɣöö ci Kuoth Nhial thuk duëli I-thɛ-rɛl moc kam.

¹⁶ Ɛ jɛn cu bööth dolä wee, “Banɛ män ku lɛ jek nikä kɛ kui̱ nɛɛni ti ci duɔth ti, kä ci män ji̱ Ben-ya-min duɔ̱p?”

¹⁷ Cukɛ wee, “Bi ji̱ Ben-ya-min tin tëk dhil tekɛ pek, kɛ ɣöö thilɛ thok duëël mi ba kɛ̈k raar kä thuk duëli I-thɛ-rɛl.

¹⁸ Kä ŋotdɛ /canɛ kɛ bi ka̱m nyieekɔn ala män.” Kɛ ɣöö ci ji̱ I-thɛ-rɛl rɔ yac i̱, “Kuëth akɛ ram in bi nyaadɛ ka̱m ji̱ Ben-ya-min.”

¹⁹ Kä cukɛ wee, “Nɛ̈nɛ jɛ, la tëë kɛ ŋar runä kɛ kui̱ Kuɔth Nhial kä Cilo, min te caam Beth-ɛl, kui̱ käny ca̱ŋ duɔ̱p in di̱i̱t min jiɛy kä Beth-ɛl min wëë kä Cɛ-kɛm, kɛnɛ cuec Lɛ-bo-naa.”

²⁰ Kä cukɛ ji̱ Ben-ya-min jiök i̱, “Wiaa tɛ̱̈ɛ̱̈ ɛ rɔ rɛy ka̱a̱kni,

²¹ kä guecɛ, mi wä nyi̱er Cilo wä ben duth ŋarä, kua käny raar rɛy ka̱a̱kni kä ɛ ramɔ käp rɔ ciek kä nyi̱er Cilo. Kä bia cu wä muun Ben-ya-min.

²² Mi wä gua̱ni kiɛ dämani wä göny kä nɛy, ba̱kɔ kɛ jiök i̱ ‘Pa̱lɛ kɛ nɛy, kɛ ɣöö /ken kɛn kɛ ka̱n kɛ ko̱r kä yɛ ala män. Kä /ken yɛn kɛ ka̱m nyieekun, thilɛ yɛ duer kɛ pälun kɛ kɛ.’ ”

²³ Kä cu ji̱ Ben-ya-min ɛ la̱t ninɔ, min duth nyi̱er, cu ramɔ rɔ ka̱p nyal kä cuɛ jɛ naŋ ala ciekdɛ. Kä cukɛ loc gua̱thnikiɛn, kä cua wi̱i̱ nyɔk kɛ ta̱th kä cukɛ cieŋ thi̱n.

²⁴ Ɛn guäth ɔ cu ji̱ I-thɛ-rɛl däk piny wä ramɔ thok duëëliɛn dhɔrɛ, cu ramɔ wä kä nyinkɛ.

²⁵ Ɛn ni̱ni tɔ̱tɔ̱ thilɛ kuäär kä I-thɛ-rɛl. Lät ramɔ ni min gɔaa waaŋdɛ.