Ruëëc 20 - RUAC KUƆTH IN RƐL RƆ

Riali ji̱ I-thɛ-rɛl kɛ rɔ ikä kɛ ko̱r

¹ Cu ji̱ I-thɛ-rɛl diaal ben raar, kä Daan kä Ber-cɛ-ba, amäni mun Gil-yad. Kä cu nɛy diaal rɔ dol kɛɛl nhiam Kuɔth Nhial kä Midh-pa.

² Cu bööth diaal thuk duëli ji̱ I-thɛ-rɛl diaal gua̱thkiɛn ka̱n rɛy dolä nɛɛni Kuɔth. Kä cu nɛy ti bathdɔɔri ti kur ŋuaan cua yio̱w kööriɛn ka̱n.

³ (Kä cu ji̱ Ben-ya-min ɛ liŋ i̱ ci ji̱ I-thɛ-rɛl wä kä Midh-pa.) Kä cu ji̱ I-thɛ-rɛl wee, “Läri jɛ kɔ, ɛn nɛ jiääk ɛmɛ bëë i̱di?”

⁴ Kä cu raan ji̱ Lii-bay min la cɔw ciek in ca luc ɛ loc wëë i̱, “Ɣän cä ben kä Giba wec ji̱ Ben-ya-min, kɔnɛ luɔmdä, kɛ ɣöö ba̱kɔ niɛɛn thi̱n.

⁵ Kä cu ji̱ Giba ben kɔɔrä cua duel ben go̱l kɛ wäär. Go̱o̱r kɛn näkdä, kä cukɛ tɔ̱ɔ̱c kɛ luɔmdä, amäni mëë cɛ li̱w.

⁶ Kä cua̱ puɔ̱ny lomädä ka̱n kä cua̱ jɛ ŋuɔ̱k dhoon, Kä cua̱ thok duëëlɔ cu jäk ikä kä ji̱ I-thɛ-rɛl diaal. Kɛ ɣöö ca mi jiääk mi ci rɔ lot la̱t rɛy ji̱ I-thɛ-rɛl.

⁷ Kä nɛ̈nɛ jɛ yɛn diaal yɛn ji̱ I-thɛ-rɛl. Latdɛ ruacdun, kɛnɛ ŋukdun.”

⁸ Kä cu nɛy diaal rɔ jiɛc kɛɛl wäkɛ i̱, “Thilɛ ram mi bi loc cieŋ kä kɔ, thilɛ ram mi bi loc dhɔɔrɛ.

⁹ Kä nɛmɛ ɛ Jɛn min ba̱kɔ lät kä ji̱ Giba. Ba̱kɔ jɛ ka̱p ko̱r kɛ yor gaakni.

¹⁰ Ba wutni wäl ka̱n kä nɛy ti kuɔ̱r thuk duëli ji̱ I-thɛ-rɛl diaal. Kä ba nɛy ti kuɔ̱r ka̱n kä nɛy ti bathdɔɔr, kä ba nɛy ti bathdɔɔr ka̱n kä nɛy ti bathdɔɔri wäl, bikɛ naath moc mi̱eth. Kä duɔth nath bikɛ Giba wec ji̱ Ben-ya-min wä ma̱k, kɛ kui̱ jiäkni diaal tin ci kɛn kɛ la̱t kä I-thɛ-rɛl.”

¹¹ Inɔ cu ji̱ I-thɛ-rɛl rɔ dol kɛɛl kɛn diaal kɛ mäk wec.

¹² Kä cu thuk duëli ji̱ I-thɛ-rɛl diaal nath jäk kä thok duëël ji̱ Ben-ya-min wäkɛ i̱, “Ɛ mi jiääk mi tëë di ɛ nɛ ci tuɔɔk rɛydun ɛ?

¹³ Kɛ kui̱c ɛmɔ ŋuɔ̱nɛ nɛy tɔ̱ jiäk tɔ̱ la̱tkɛ nɔmɔ tɔ̱ kä Giba, kɛ ɣöö dëë kɔ kɛ ben näk. Kä dëë mi jiääk ɛmɛ cu woc rɛy I-thɛ-rɛl.” Kä duundɛ ɣöö /ken ji̱ Ben-ya-min ruac ganmani, ni ji̱ I-thɛ-rɛl liŋ.

¹⁴ Kä cu ji̱ wec Ben-ya-min ben raar wi̱i̱nikiɛn duɔlkɛ rɔ kä Giba, kɛ ɣöö bikɛ wä nyiëëny kɛ ji̱ I-thɛ-rɛl.

¹⁵ Ɛn cäŋ ëë cu ji̱ Ben-ya-min nɛy ti bathdɔɔri ti jiɛn rɛw wi̱cdɛ bäkɛl cɔl rɛy wi̱i̱nikiɛn kɛɛl kɛ yio̱w kööriɛn, a ci ji̱ Giba ti kur bärɔw ti ca kuany te thi̱n.

¹⁶ Kɛn nɛy tɔ̱tɔ̱ diaal te rɛydiɛn kɛ nɛy ti kur bärɔw ti cäm ti ca kuany. Kɛ ra̱ŋ ti ca miem duer kɛ döl.

¹⁷ Kä ji̱ I-thɛ-rɛl a /ci ji̱ Ben-ya-min te thi̱n, cua nɛy ti ji̱ ko̱o̱r ti bathdɔɔri ti kur ŋuaan kuany.

Ko̱r kɛ ji̱ Ben-ya-min

¹⁸ Kä cu ji̱ I-thɛ-rɛl rɔ jiɛc wäkɛ kä Beth-ɛl, cukɛ Kuoth wä thiec i̱, “Ɛŋa kä nɛy bi wä nyiëëny kɛ ji̱ Ben-ya-min kɛ nhiam ɔ?” Kä cu Kuoth Nhial kɛ loc i̱, “Ɛ thok duëël Juda bi wä mɔ kɛ nhiam.”

¹⁹ Kä cu ji̱ I-thɛ-rɛl rɔ jiɛc nikɛ runwaŋ, kä cukɛ ben pua̱t lotdä Giba.

²⁰ Kä cukɛ wä kɛ ɣöö bikɛ wä nyiëëny kɛ ji̱ Ben-ya-min. Kä cukɛ tuɔ̱ŋ ko̱o̱r kuany thiekä Giba.

²¹ Kä cu ji̱ Ben-ya-min pua̱t raar Giba, kä cua ji̱ I-thɛ-rɛl ti bathdɔɔri ti jiɛn rɛw wi̱cdɛ rɛw näk ɛn cäŋ ɛ mɔ.

²² Kä cu ji̱ I-thɛ-rɛl rɔ bum, cukɛ tuɔ̱ŋ ko̱o̱r nyɔk kɛ cuɔ̱ŋ niɛ guäth ëë ci kɛn kɛ kɔn cuŋ thi̱n kɛ cäŋ ëë nhiam.

²³ Kä cu ji̱ I-thɛ-rɛl wä wiee nhiam Kuɔth Nhial amäni thiaŋ. Kä cukɛ Kuoth Nhial thiec i̱, “Ba̱kɔ rɔ nyɔk kɛ wä ko̱o̱r kä gaatmanikɔ ni ji̱ Ben-ya-min?” Kä cu Kuoth Nhial kɛ loc i̱, “Wiaa nyiëënyɛ kɛ kɛ.”

²⁴ Kä cukɛ ko̱r wä tɛ̈r kɛ ji̱ Ben-ya-min kɛ cäŋ in rɛwdɛ.

²⁵ Kä cu ji̱ Ben-ya-min ben kä kɛ raar Giba kɛ cäŋ in rɛwdɛ, kä cukɛ nɛy ti bathdɔɔri wäl bädäk ti ji̱ ko̱o̱r kä ji̱ I-thɛ-rɛl näk.

²⁶ Cu ji̱ I-thɛ-rɛl diaal wä pua̱t kä Beth-ɛl kä cukɛ wiee. Cukɛ nyuur ɛn wi̱ni nhiam Kuɔth Nhial, Kä /ken kɛ mi̱th ɛn cäŋ ɛmɔ amäni thiaŋ. Kä cukɛ muc tin waŋkɛ kɛ muc malä thöp nhiam Kuoth Nhial.

²⁷ Kä cu ji̱ I-thɛ-rɛl Kuoth Nhial thiec (kɛ ɣöö te thanduk matdä ruac Kuɔth ɛn wi̱ni kɛn ni̱ni tɔ̱tɔ̱,

²⁸ kä lätni Pi-nɛ-ɣath gat Ɛl-a-dhar gat Ä-ron nhiamdɛ ɛn ni̱ni tɔ̱tɔ̱) wäkɛ i̱, “Kɔn bakɔ rɔ̱ nyɔk kɛ ko̱r kɛ gaatmanikɔ ni ji̱ Ben-ya-min, kiɛ /cakɔ bi wä?” Kä cu Kuoth Nhial kɛ loc i̱, “Wiaakɛ, kɛ ɣöö iruun bäkɛ la̱th tetädun.”

²⁹ Kä cu tha̱a̱ŋ ji̱ I-thɛ-rɛl naath wä nyurikä gekä Giba.

³⁰ Kä cu ji̱ I-thɛ-rɛl ji̱ Ben-ya-min ma̱k kɛ cäŋ in diɔ̱ɔ̱kdiɛn, kä cukɛ tuɔ̱ŋkiɛn cuŋ lotdä Giba ce̱tkɛ ni̱n tëë wen.

³¹ Kä cu ji̱ Ben-ya-min ben raar kä ji̱ I-thɛ-rɛl, cikɛ ben raar rɛy wec ce̱tkɛ ta̱a̱ in wen. Cukɛ jɛ tok kɛ mi näk kɛn tha̱a̱ŋ ji̱ I-thɛ-rɛl dɛɛkä wec, duɔ̱pni tin di̱t. Tin wä kɛl kä Beth-ɛl, kä wä min dɔ̱ŋ kä Giba. Cukɛ ji̱ I-thɛ-rɛl ti jiɛn diɔ̱k näk.

³² Kä cu ji̱ Ben-ya-min wee, “Banɛ kɛ joc kɛ juc in wen.” Kä cu ji̱ I-thɛ-rɛl wee, “Bar nɛ rɔ, na̱a̱nɛ kɛ kɛ wec wanɛ duɔ̱pni tin di̱t.”

³³ Kä cu ji̱ I-thɛ-rɛl diaal rɔ guath jɔk gua̱thnikiɛn, kä cukɛ rɔ wä car kä Baal-ta-mar. Kä cu ji̱ I-thɛ-rɛl tin ci naath nyurikä ben raar gua̱thnikiɛn tin ca rɔ̱ tɛ̱̈ɛ̱̈ thi̱n gekä Giba.

³⁴ Cu nɛy ti bathdɔɔri wäl ti ca liny kä ji̱ I-thɛ-rɛl diaal Giba ma̱k. Mëë ci ko̱r leeth. Kä kui̱c ji̱ Ben-ya-min ɛ ɛn ɣöö ci riɛk ben kä kɛ.

³⁵ Kä cu Kuoth Nhial ji̱ Ben-ya-min jak kä juɔckɛ ɛ ji̱ I-thɛ-rɛl. Kä cu ji̱ I-thɛ-rɛl nɛy ti bathdɔɔri ti jiɛn rɛw wi̱cdɛ dhieec wi̱i̱diɛn kuɔ̱r kɛl kä ji̱ Ben-ya-min näk ɛn cäŋ ëë. Ti kɛn diaal wutni ko̱o̱r.

³⁶ Kä cu ji̱ Ben-ya-min jɛ car ɛn ɣöö ca ji̱ I-thɛ-rɛl joc. Kä cu ji̱ I-thɛ-rɛl ji̱ Ben-ya-min gueny gua̱a̱th, kɛ ɣöö ŋääth kɛn nɛy tin ca kɛ nyurikä, tin ca la̱th gekä Giba.

Duɔ̱p in joc ji̱ I-thɛ-rɛl ɛ ji̱ Ben-ya-min

³⁷ Kä cu nɛy tin ca naath nyurikä riŋ rɛy Giba kɛ pɛ̈th. Kä cukɛ däk rɛy wec kä cukɛ ji̱ wec diaal näk.

³⁸ Kä täämɛ cu nyuuth kam nɛɛni tin ca nath nyurikä kɛnɛ buɔ̱n ji̱ I-thɛ-rɛl in te ko̱o̱r. Cua ɣöö mi wa tol nɛn wëë nhial rɛy wec.

³⁹ Ɛn wa̱nɔ bi ji̱ I-thɛ-rɛl cu loc ko̱o̱r. Kä täämɛ ci ji̱ Ben-ya-min kɛ ku thuŋ näk nɛy ti jiɛn diɔ̱k, kɛn ji̱ I-thɛ-rɛl. Kä cukɛ wee, “Jooc kɔn kɛ ce̱tkɛ ta̱a̱ in wen.”

⁴⁰ Kä mëë ci nyuuth rɔ tok kɛ mi jɔcɛ, cu tol päl wi̱c. Cu ji̱ Ben-ya-min liɛc jɔɔkdiɛn. Kä nɛnɛ ci wec kɛɛliw tolɛ pith ni pua̱a̱r.

⁴¹ Kä cu ji̱ I-thɛ-rɛl rɔ riet kɛ, kä cu ji̱ Ben-ya-min dual ɛlɔ̱ŋ, kɛ ɣöö cikɛ jɛ ŋa̱c ɛn ɣöö ci riɛk ben kä kɛ.

⁴² Kɛ kui̱ ɛmɔ cukɛ rɔ bar nhiam ji̱ I-thɛ-rɛl barkɛ rɔ̱ dɔɔr. Ɛ ni ɣöö ka̱n rɔ luäŋ kɛ leny, cu ji̱ I-thɛ-rɛl tin bä wi̱i̱ni kɛ näk.

⁴³ Cukɛ ji̱ Ben-ya-min go̱l, kä cukɛ kɛ joc kä na̱kɛ kɛ a räth ni lotdä Giba kui̱ käny ca̱ŋ.

⁴⁴ Cua nɛy ti bathdɔɔri wäl bädäk näk kä ji̱ Ben-ya-min. Kɛn diaal kɛ ji̱ ko̱o̱r.

⁴⁵ Kä cukɛ rɔ bar rɛy dɔaar pa̱a̱m Ri-mon. Cua nɛy ti bathdɔɔri dhieec kä kɛ thum duɔ̱pni tin di̱t, cuakɛ joc ɛlɔ̱ŋ amäni Gi-dom, kä cua nɛy ti bathdɔɔri rɛw näk kä kɛ.

⁴⁶ Inɔ cu nɛy diaal tëë ci li̱w ɛn cäŋ ëë kä ji̱ Ben-ya-min a nɛy ti bathdɔɔri ti jiɛn rɛw wi̱cdɛ dhieec, ti kɛn diaal ji̱ ko̱o̱r.

⁴⁷ Kä cu nɛy ti kur bäkɛl rɔ bar rɛy dɔaar pääm Ri-mon, kä cukɛ rɔ wä tɛ̱̈ɛ̱̈ rɛy pa̱a̱m Ri-mon kɛ päth ŋuaan.

⁴⁸ Kä cu ji̱ I-thɛ-rɛl rɔ ri̱t jucä ji̱ Ben-ya-min, kä cukɛ kɛ näk, naath kɛ lëy kɛ tin diaal tin ci kɛn kɛ jek. Kä wi̱i̱ diaal cua kɛ cua̱th kɛ mac.